សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋបឹងតាមោក៩នាក់ត្រូវបានដាក់ឱ្យស្ថិតក្រោមការត្រួតពិនិត្យតាមផ្លូវតុលាការ ខណៈប្រឈមនឹងការចោទប្រកាន់បន្ថែម

អ្នកស្រី ប្រាក់ សុភា បង្ហាញដីកាកោះដែលអ្នកស្រីទទួលបានពីតុលាការ និងសំណើរបស់អ្នកស្រីសុំពន្យារពេល ថ្ងៃទី២៥ ខែកុម្ភៈ ឆ្នាំ២០២៣។ (ខេមបូចា/ ផុន សុទ្ធីរ័ត្ន)
អ្នកស្រី ប្រាក់ សុភា បង្ហាញដីកាកោះដែលអ្នកស្រីទទួលបានពីតុលាការ និងសំណើរបស់អ្នកស្រីសុំពន្យារពេល ថ្ងៃទី២៥ ខែកុម្ភៈ ឆ្នាំ២០២៣។ (ខេមបូចា/ ផុន សុទ្ធីរ័ត្ន)

ប្រជាពលរដ្ឋបឹងតាមោកប្រាំបួននាក់ ប្រឈមនឹងការចោទប្រកាន់ពីបទ «ហិង្សាដោយចេតនា និងរារាំងមន្ត្រីសាធារណៈ»  ហើយត្រូវបានដាក់ឱ្យស្ថិតក្រោមការត្រួតពិនិត្យតាម​ផ្លូវ​តុលាការ បន្ទាប់ពី​សាលាដំបូង​រាជធានីភ្នំពេញ​ចេញ​ដីកាកាល​ពី​ថ្ងៃទី២១ ខែកុម្ភៈ។

ពលរដ្ឋទាំង​ប្រាំបួន​នាក់​បាន​ទទួល​ដីកា​នៅ​ពេល​ព្រឹក​ហើយ​ត្រូវ​បានបង្គាប់​ឲ្យ​បង្ហាញ​មុខ​នៅ​តុលាការ​​នៅ​រសៀល​ថ្ងៃ​ដដែល។ ពួកគាត់និយាយថា ពួក​គាត់​មិន​បាន​បង្ហាញខ្លួន​នៅតុលាការ​ទេ ដោយសារ​មេធាវី​របស់​ពួក​គាត់​​មក​ពី​អង្គការ​សិទ្ធិ​មនុស្ស​លីកាដូ កំពុងជាប់រវល់។

លោក អ៊ី រិន អ្នក​នាំ​ពាក្យ​សាលាដំបូង​រាជធានីភ្នំពេញ​​បាន​មាន​ប្រសាសន៍ថា ​លោក​​មិន​មាន​ព័ត៌មាន​បន្ថែម ​ដើម្បី​ផ្តល់​ជូន​នោះ​ទេ ហើយ​លោក លឹម សុគន្ធារ៉ា ចៅក្រម​ដែល​ចេញ​ដីកាកោះ​​ក៏​មិន​អាច​ទាក់​ទង​សុំ​ការ​បំភ្លឺ​បាន​ដែរ។

អស់ជាច្រើនឆ្នាំមកនេះ ប្រជាពលរដ្ឋដែល​ហ៊ាន​និយាយ​ឥតសំចៃមាត់​មកពី​ភូមិសំ​រោងត្បូងនៅ​ជាយក្រុងភ្នំពេញ បានតវ៉ាចំពោះការចាក់ដីលុបបឹងតាមោក ដែល​ជាបឹងធម្មជាតិនៅសល់​ចុងក្រោយបង្អស់របស់រាជធានី។ ពួកគាត់​ក៏កំពុងប្រឈមនឹងការបណ្តេញចេញពីផ្ទះរបស់ពួកគាត់​ និងបាត់បង់មុខរបរ​នេសាទ និង​ការបេះ​បន្លែពីបឹងនេះ​ ខណៈមាន​ការផ្តល់​ដីជាបន្តបន្ទាប់ទៅឲ្យឥស្សរជន និងក្រុម​ហ៊ុន​អភិវឌ្ឍន៍ដែលមានខ្នង​ក្រាសបាន​ផ្លាស់ប្តូរទិដ្ឋ​ភាពរបស់​បឹង​នេះ។

អ្នកស្រី​ ប្រាក់ សុភា សកម្មជន​ដ៏​លេចធ្លោ និង​ជា​អ្នក​រស់នៅ​ភូមិ​សំរោង​ត្បូង​ជាប់​បឹង​តាមោក​បាន​បដិសេធ​ការ​ចោទ​ប្រកាន់​។ អ្នក​​ស្រី​បាន​និយាយ​ថា ការ​ចោទ​ប្រ​កាន់​នេះ ទំនង​ជា​កើត​ឡើង ​បន្ទាប់​ពី​មាន​ជម្លោះ​រវាង​អាជ្ញាធរ និង​អ្នក​ភូមិ​កាល​ពី​​ខែ​តុលា​ឆ្នាំ​មុន។

អាជ្ញាធរ​មូលដ្ឋាន​បាន​រារាំង​ប្រជាពលរដ្ឋ​មិន​ឲ្យ​ធ្វើ​ការ​ជួស​ជុល​ផ្ទះ​ដោយ​លើកហេតុ​ផល​ថា ​ពួក​គាត់គឺ​​ជា​អ្នក​ស្នាក់​នៅ​ខុស​ច្បាប់ ហើយ​បាន​ផ្តល់មីកញ្ចប់​ជា​សំណង។

ក្រោយ​មក អ្នក​ភូមិ​មួយ​ក្រុម​ដែលមាន​ការខកចិត្ត​បាន​ដុត​អំណោយ​ដែល​បាន​ចែក​​ជូន​នៅ​ចំពោះ​មុខ​មន្ត្រី​សន្តិសុខ​ភូមិ ដែល​បាន​ទាត់​រងើកភ្លើង​​ដាក់​ពួក​គាត់។ ជា​ការ​ឆ្លើយ​តប អ្នក​ភូមិ​បាន​​ព្រាចអង្កដាក់វិញ។ អ្នក​ស្រី ប្រាក់ សុភា ​​បាន​និយាយ​​ថា អ្នកស្រី​បានរលាក​រងើក​ភ្លើង​ ហើយ​ធ្វើ​ឲ្យ​អ្នក​ស្រី​បង្ខំ​ចិត្ត​​ទៅ​មន្ទីរពេទ្យ ​ដើម្បី​ព្យាបាល។

អ្នកស្រី សុភា អាយុ៤៣ឆ្នាំ ជា​ម្ដាយ​កូន​បីបាន​និយាយថា៖ «តើ​យើង​គួរឈរ​ឲ្យ​អា​ជ្ញា​ធរ​វាយ​យើង​ឬយ៉ាងណា​​?តើ​ច្បាប់​អនុញ្ញាត​ឱ្យ​យើង​ការពារ​ខ្លួន​ឬ​អនុញ្ញាត​ឱ្យ​អាជ្ញាធរ​វាយ​ប្រជា​ពល​រដ្ឋ​?» ។

យោង​តាម​ក្រម​ព្រហ្មទណ្ឌ​កម្ពុជា ការ​ប្រព្រឹត្ត​ «អំពើ​ហិង្សា​ដោយ​ចេតនា​» ត្រូវ​ផ្តន្ទាទោស​ដាក់​ពន្ធនាគារ​រហូត​ដល់​៣ឆ្នាំនិង​ពិន័យ​ជា​ប្រាក់៦លាន​រៀល ចំណែក​បទ «រារាំង​មន្ត្រី​សាធារណៈ» អាចត្រូវ​បាន​​ផ្ដន្ទាទោស​ដាក់​​ពន្ធនាគារ១ឆ្នាំ និង​ពិន័យ​ជា​ប្រាក់២លាន​រៀល​ ។

អ្នក​ស្រី ប្រាក់ សុភា ចង្អុលទៅទីតាំងចាក់ដីលុបបឹងខាងក្រោយផ្ទះរបស់​អ្នក​ស្រី​ កាលពីថ្ងៃទី២៥ ខែកុម្ភៈ ឆ្នាំ២០២៣។  (ខេមបូចា/ ផុន​ សុទ្ធីរ័ត្ន)

អ្ន​កស្រី សុភា និង​អ្នក​ភូមិ​យ៉ាង​ហោច​ណាស់១០​នាក់ ត្រូវ​បាន​តុលាការ​បង្គាប់​ឲ្យ​ចូល​ខ្លួន​មក​តុលាការ​ចំនួន៣​លើក​រួច​មក​ហើយ ចាប់​តាំង​ពី​ឆ្នាំ​២០២២មក។

សាលា​ដំបូង​រាជធានី​ភ្នំពេញ​ធ្លាប់​បាន​ចេញ​ដីកា​កោះ​​កាលពី​ខែ​សីហា ឆ្នាំ​២០២២ ឲ្យ​តំណាង​អ្នក​ភូមិ​សំរោង​ត្បូង​៧​នាក់ រួម​ទាំង​អ្នក​ស្រី​ សុភា ផង​ដែរ។ ប្រធាន​ក្រុម​​សន្តិ​សុខ​ខណ្ឌ​ព្រែក​ព្នៅ​បាន​អះអាង​ថា ប្រជាពលរដ្ឋ​បាន​ធ្វើ​ការ​​រារាំង​មន្ត្រី​សាធារណៈ ញុះញង់ និងធ្វើ​ឲ្យ​ខូច​សណ្តាប់​ធ្លាប់សាធារណៈ។

សឿន ស្រីសុទ្ធ អាយុ៣២ឆ្នាំបាននិយាយថា អ្នក​ស្រី​ផ្ទាល់ ប្តីរបស់អ្នក​ស្រី​ និងប្អូន​ប្រុសរបស់អ្នក​ស្រី​មានឈ្មោះនៅក្នុងដីកាកោះរបស់តុលាការនាពេលថ្មីៗនេះ​។ អ្នកស្រី​បាន​បន្ថែម​ថា ​អ្នកស្រី​ខកចិត្ត ​ព្រោះ​អ្នក​ភូមិ​​គ្រាន់តែស្វះ​ស្វែង ដើម្បី​ទទួល​បាន​​កម្មសិទ្ធិ​ដីធ្លី​ស្របច្បាប់​នៃ​អចលនទ្រព្យ​ដែល​ពួកគាត់​បាន​កាន់កាប់​ជាច្រើន​ឆ្នាំ​មក​ហើយនោះ​។

អ្នកស្រី​បន្ត​ថា៖​ «វា​ជា​រឿង​អយុត្តិធម៌​សម្រាប់​ប្រជាពលរដ្ឋ ព្រោះ​យើង​គ្រាន់តែ​តស៊ូ​មតិ តស៊ូ​ទាមទារ​សិទ្ធិ​លំនៅឋាន​របស់​យើង ប៉ុន្តែ​អាជ្ញាធរ​បាន​ចេញ​ដីកា​គំរាម​ពួកយើង​»

យោងតាមអង្គការសមាគមធាងត្នោត (STT) បានឲ្យដឹងថា យ៉ាងហោចណាស់ផ្ទៃ​ដីចំនួន ២.២៤៤,៤៥ហិកតានៃផ្ទៃ​បឹងចំនួន ៣.២៣៩,៦៩ហិកតាត្រូវបានបូមខ្សាច់ចាក់​បំពេញ បន្ទាប់ពីមាន​អនុក្រឹត្យឆ្នាំ២០១៦​ ដែលអនុញ្ញាតឱ្យរដ្ឋាភិបាល​ជួលឬលក់ដីនៅ​ក្នុងនិងជុំវិញបឹងនេះ។

ក្នុងរយៈពេលប៉ុន្មានឆ្នាំចុងក្រោយនេះ តំបន់ដែល​គេ​ចាក់​ដី​លុប​ជុំវិញបឹងតាមោកត្រូវបានចែកចាយ​ទៅ​ឲ្យបុគ្គលនិងក្រុមហ៊ុនដែលមាន​ទ្រព្យ​និង​មានអំណាច។ អ្នក​ទទួល​បានដីនៅតំបន់​នោះ​​រួម​មានលោក កុក អាន សមាជិក​ព្រឹទ្ធសភា​គណបក្ស​កាន់​អំណាច លោកស្រី​ ជា សុផាឡែន ជាកូន​ស្រី​លោក ជា សុផារ៉ា ជា​រដ្ឋមន្ត្រី​ក្រសួង​ដែនដី លោក វង្ស ពិសេន និង លោក សៅ សុខា ជាមេបញ្ជាការ​កងយោ​ធ​​​ពលខេមរភូមិន្ទ​និង​តារា​ចម្រៀង​ល្បីឈ្មោះ​​ ព្រាប សុវត្ថិ។

ក្នុង​ចំណោម​ក្រុមហ៊ុន​ជា​ច្រើន លោក នុត តុន នាយក​ក្រុមហ៊ុន អ័រគីដេ វីឡា ក៏​បាន​ទទួល​ដី​នៅ​តំបន់​បឹង​តាមោក​ចំនួន៦៧ហិកតា​ដែរ កាល​ពី​ខែ​កញ្ញា ឆ្នាំ​មុន។ ក្រុមហ៊ុនអ័រគីដេ ដឹកនាំដោយលោកស្រី ហ៊ុន ម៉ាណា កូនស្រីរបស់លោកនាយករដ្ឋមន្ត្រី ហ៊ុន សែន ខណៈកូនស្រីរបស់លោក​ម្នាក់ទៀតគឺលោកស្រី ហ៊ុន ម៉ាលី និងកូនប្រសាស្រី ​គឺ​លោកស្រី​ ពេជ្រ ច័ន្ទមុនី ជានាយកសាខាក្រុមហ៊ុនអ័រគីដេផង​ដែរ។

ទិដ្ឋភាពមើល​ពីផ្ទះរបស់អ្នក​ស្រី សុភា បង្ហាញពី​រថយន្តដឹកដី​បន្តចាក់​ដី​លុប​បឹងតាមោក ថ្ងៃទី២៥ ខែកុម្ភៈ ឆ្នាំ២០២៣។  (ខេមបូចា/រ៉ាន់​ ស្រីដែត​)

អ្នក​ភូមិ​សំរោង​ត្បូង មិន​បាន​ទទួល​ប័ណ្ណ​កម្ម​សិទ្ធិ​ដី​ធ្លី ឬ​ត្រូវ​បាន​ចាត់​ទុក​ជា​ពលរដ្ឋ​រស់​​នៅ​ស្រប​ច្បាប់នោះ​​ទេ ប៉ុន្តែ​ពួក​គេ​តែង​តែ​អាច​ទៅ​បោះ​ឆ្នោត​បាន។

លោក សឿង សារ៉ន​ នាយកប្រតិបត្តិរបស់អង្គការសមាគមធាងត្នោត​មានប្រ​សាសន៍ថា លោក​អបអរ​ចំពោះការអភិវឌ្ឍន៍ជុំវិញរាជធានីភ្នំពេញ ប៉ុន្តែមិនមែនធ្វើ​ដោយ​មិន​គិតគូរពីផលប៉ះពាល់នោះទេ។

លោក​មាន​ប្រសាសន៍ថា៖​ «មុន​នឹង​អភិវឌ្ឍន៍ យើង​គួរ​គិត​ពី​ផល​ប៉ះពាល់​រយៈពេល​វែង​ចំពោះ​​សង្គម និង​បរិស្ថាន​។ ខ្ញុំ​ចង់​ឃើញ​ការ​វាយ​តម្លៃ​បន្ថែម​ទៀត​អំពី​ផល​ប៉ះពាល់​សង្គម សេដ្ឋកិច្ច និង​បរិស្ថាន មុន​នឹង​ធ្វើ​ការ​សម្រេច​ចិត្ត​ធ្វើ​អនុបយោគដី​»។

អ្នកស្រី អំ ភឿន ជា​ស្ត្រីកូនបួនដែលមានឈ្មោះក្នុងដីកាកោះ​របស់តុលាការខែសីហា ឆ្នាំ២០២២ បាននិយាយថា ខណៈអ្នកស្រីប្រកបរបរនេសាទចិញ្ចឹម​ជីវិត​ពីបឹងតាំងពីឆ្នាំ២០០៧មក ឥឡូវនេះអ្នកស្រីកំពុងត្រៀម​ធ្វើចំណាកស្រុកទៅប្រ​ទេស​ថៃ ដើម្បីស្វែងរកប្រភពចំណូលផ្សេងទៀត។

អ្នក​ស្រី​បាន​និយាយថា៖ «ដោយ​សារ​ការ​អភិវឌ្ឍ និង​ការ​ចាក់​ដីលុប​​បឹង​នេះ យើង​មិន​មាន​ប្រាក់​ចំណូល​ក្រៅ​ពី​សម្រេច​ចិត្ត​ធ្វើ​ចំណាក​ស្រុក​នោះ​ទេ។ យើង​ធ្លាប់​ពឹង​ផ្អែក​លើ​ការ​នេសាទ ប៉ុន្តែ​នៅ​ពេល​អាជ្ញាធរ​ចាក់​ដី​លុប​បឹង គ្រួសារ​ខ្ញុំនិង​ខ្ញុំ​រងផល​​ប៉ះពាល់​ខ្លាំង​​ពីការ​អភិវឌ្ឍ​នេះ​» ។

អ្នក​ស្រី សុភា បានសុំឱ្យរដ្ឋាភិបាលជួយរកយុត្តិធម៌ជូនពលរដ្ឋ និងឱ្យពួកគាត់​រស់នៅ​កន្លែងដើម​របស់​ពួកគាត់​ ព្រោះអ្នក​ស្រី​គិតថា អ្នក​ស្រី​នឹងទទួលបានប្រាក់ចំ​ណូលគ្រប់គ្រាន់តាម​រយៈ​ការរស់នៅទីនេះ ដូចជាលក់ទឹកសុទ្ធ​ជាដើម។

អ្នក​ស្រី​និយាយថា៖ «យើង​បាន​បាត់​បង់​ប្រាក់​ចំណូល​ដោយ​សារ​ការ​អភិវឌ្ឍ ដូច្នេះ​យើង​ចង់​រស់​នៅ​ក្នុង​តំបន់​អភិវឌ្ឍន៍។ យើង​អាច​រកស៊ី​នៅ​ទី [នោះ]» ។

អ្នក​ស្រី​បាន​បន្ត​ថា៖​ «យើង​មាន​ការ​ឈឺ​ចាប់​យ៉ាង​ខ្លាំង​និង​ខក​ចិត្ត​ចំពោះ​អាជ្ញាធរ។ វា​​ជា​រឿង​អយុត្តិធម៌​បំផុត​មួយ​ដែល​ប្រជាពលរដ្ឋ​​នៅ​តំបន់​បឹងនេះ ​គ្មាន​សិទ្ធិ​រស់​នៅ​​ទី​នេះ ខណៈ​មាន​តែ​មន្ត្រី​ជាន់​ខ្ពស់ ក្រុមហ៊ុន និង​ស្ថាប័ន​មាន​សិទ្ធិ​រស់​នៅ​ទី​នេះ»

អត្ថបទប្រែសម្រួលពីអង់គ្លេស៖ Nine Boeng Tamok Residents Placed Under Court Supervision, Face Additional Charges

622 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម