អាជ្ញាធរកម្ពុជាបានសាកសួរជនជាតិចិនចំនួន២១នាក់ដែលត្រូវបានជួយសង្គ្រោះ រួចក៏បានបញ្ជូនពួកគេទៅឱ្យស្ថានទូតចិន ដែលពួកគេទាំងនេះស្ថិតក្នុងចំណោមជនជាតិចិនចំនួន ៤១ នាក់ដែលបានជិះលើទូកមួយគ្រឿងហើយលិចនៅឆ្នេរសមុទ្រខេត្តព្រះសីហនុកាលពីសប្តាហ៍មុន។
លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុបានឱ្យដឹងថា៖ «យើងនៅតែស្វែងរកមនុស្ស ៨ នាក់ដែលបាត់ខ្លួននោះ ខណៈមនុស្ស៩នាក់ត្រូវបានរកឃើញដោយអាជ្ញាធរវៀតណាមតាំងពីសប្តាហ៍មុនមកម្ល៉េះ»។
លោកបានបញ្ជាក់កាលពីថ្ងៃព្រហស្បតិ៍ថាសាកសពជនជាតិចិនបីនាក់ដែលក្នុងនោះមានស្រ្តីម្នាក់និងបុរសពីរនាក់ត្រូវបានរកឃើញ។ អ្នកដែលត្រូវបានសង្គ្រោះមួយចំនួនបានទទួលការព្យាបាលនៅមន្ទីរពេទ្យខេត្ត។
លោក ភារម្យ បានថ្លែងបន្តថា រដ្ឋាភិបាលចិននឹងជួយសម្រួលក្នុងការនាំយកជនជាតិចិនទាំង ៩នាក់ ដែលអាជ្ញាធរវៀតណាមជួយ សង្គ្រោះមករាជធានីភ្នំពេញ។
អ្នកនាំពាក្យរូបនេះបានបន្ថែមថា កាលពីថ្ងៃអង្គារ អង្គភាពប្រឆាំងបទល្មើសដែនសមុទ្រនៃកងទ័ពជើងទឹកកម្ពុជាបានបញ្ជូនជនជាតិចិនទាំង ២១នាក់ ដែលត្រូវបានអាជ្ញាធរកម្ពុជា ជួយសង្គ្រោះទៅឱ្យមន្ត្រីស្ថានទូតចិន នៅរាជធានីភ្នំពេញ។ លោកបានបង្វែរសំណួរបន្ថែមរបស់អ្នកសារព័ត៌មានជុំវិញជនជាតិចិនមួយក្រុមនោះទៅស្ថានទូតចិនវិញ ប៉ុន្តែស្ថានទូតមិនទាន់បានឆ្លើយតបអ៊ីម៉ែលដែលអ្នកសារព័ត៌មានបានសួរនៅឡើយទេ។
កាលពីសប្តាហ៍មុនអាជ្ញាធរបានឃាត់ខ្លួននិងសាកសួរពលរដ្ឋខ្មែរពីរនាក់ដែលនៅលើទូកមួយទៀតនៅក្បែរកោះតាង ដែលទូកដឹកជនជាតិចិនទាំង ៤១នាក់នោះបានលិច។
ស្នងការនគរបាលខេត្តព្រះសីហនុ លោក ជួន ណារិន បានឱ្យដឹងនៅសប្តាហ៍នេះថា ពលរដ្ឋខ្មែរទាំងពីររូបនោះបានប្រាប់អាជ្ញាធរថា ពួកគេមកជួយអ្នកនៅលើទូកដែលលិច ប៉ុន្តែលោកមិនបានបញ្ជាក់លម្អិតនោះទេ។
ប៉ុន្តែលោក ណារិន ធ្លាប់បានប្រាប់បណ្តាញសារព័ត៌មាន Fresh News ដែលស្និទ្ធនឹងរដ្ឋាភិបាលថា ជនជាតិចិនម្នាក់បាននិយាយថាពួកគេធ្វើដំណើរតាមទូកល្បឿនលឿនចេញពីកំពង់ផែមួយក្នុងខេត្តក្វាងទុងកាលពីថ្ងៃទី១១ ខែកញ្ញា ហើយក្រោយមកបានផ្ទេរទៅទូកមួយទៀតនៅដែនទឹកអន្តរជាតិដែលលើទូកនោះមានក្រុមនាវិកខ្មែរពីរនាក់។ ទូកនោះបានខូចហើយក្រោយមកបានលិចនៅឆ្នេរប្រទេសកម្ពុជា។ ទូកមួយគ្រឿងទៀតបានមកយកជនជាតិខ្មែរទាំងពីរនាក់នោះ ដោយទុកជនជាតិចិនចោលខណៈដែលទូករបស់ពួកគេលិច។
លោក CHENGUI SHENG ជនរងគ្រោះម្នាក់ដែលត្រូវបានជួយចេញពីសមុទ្រក្នុងហេតុការណ៍លិចទូកនោះ បានប្រាប់សមត្ថកិច្ចថាពួកគេមកពីខេត្តហ្វូចៀន ប្រទេសចិន។
ស្នងការនគរបាលខេត្តមិនឆ្លើយសំណួរពីមូលហេតុដែលជនជាតិចិនទាំង ៤១នាក់នេះធ្វើដំណើរមកកម្ពុជាទេ ដោយលោកបង្វែរឱ្យអ្នកយកព័ត៌មានទៅសួរលោក ទូច ពលៈ ប្រធាននាយកដ្ឋាននគរបាលការពារព្រំដែនទឹកនៃក្រសួងមហាផ្ទៃវិញ។
លោក ពលៈ បានបដិសេធធ្វើអត្ថាធិប្បាយបន្ថែម។ ដោយឡែកអ្នកនាំពាក្យអគ្គស្នងការនគរបាលជាតិ លោក ឆាយ គឹមឃឿន ក៏បានបដិសេធមិនធ្វើអត្ថាធិប្បាយដែរ ដោយលើកឡើងថាអាជ្ញាធរកំពុងស៊ើបអង្កេត។
លោកស្រី ជៀប សុធារី អ្នកសម្របសម្រួលសមាគមការពារសិទ្ធិមនុស្សអាដហុក ប្រចាំខេត្តព្រះសីហនុ បានថ្លែងថា ករណីលិចទូកនេះ ទំនងជាពាក់ព័ន្ធនឹងការប៉ុនប៉ងឆ្លងកាត់ព្រំដែនប្រទេសកម្ពុជាដោយខុសច្បាប់។
លោកស្រីបានលើកឡើងថា៖ «យើងទាំងអស់គ្នាគិតថា បើពួកគេមកស្របច្បាប់ ពួកគេមិនចាំបាច់ជិះទូកទេ។ បើមកស្របច្បាប់ត្រូវឆ្លងព្រំដែនកម្ពុជា ហេតុអ្វីត្រូវផ្ទេរពីកប៉ាល់ចិនមកទូកខ្មែរ? ម៉េចក៏មិនមានទំនាក់ទំនងគ្នា ព្រោះបើគ្មានការទាក់ទងទេ ខ្មែរទាំងពីរមិនអាចយកជនជាតិចិនទាំង៤១នាក់ដោយខ្លួនឯងបានទេ»។
អ្នកជំនាញនៅការិយាល័យប្រចាំតំបន់របស់អង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្មបាននិយាយកាលពីសប្តាហ៍មុនថា ការជួញដូរ និងការរត់ពន្ធជនចំណាកស្រុកកើតឡើងនៅក្នុងតំបន់អាស៊ីអាគ្នេយ៍ និងពីតំបន់ទៅកាន់ផ្នែកផ្សេងទៀតនៃពិភពលោក ហើយក្រុមឧក្រិដ្ឋកម្មដែលមានរចនាសម្ព័ន្ធ អ្នកជួញដូរ និងអ្នករត់ពន្ធ ជួយសម្រួលដល់ឧក្រិដ្ឋកម្មទាំងនេះ។
អ្នកជំនាញរូបនេះបាននិយាយថា ការរត់ពន្ធជនចំណាកស្រុក និងការជួញដូរមនុស្សចូលមកខេត្តព្រះសីហនុ «មិនមែនជារឿងថ្មីទេ»៕
ប្រែសម្រួលពីអត្ថបទភាសាអង់គ្លេស៖ One Week After Boat Sank Off Sihanoukville 8 Chinese Remain Missing
