ជនជាតិចិនបីនាក់ត្រូវបានបញ្ជូនទៅសាលាដំបូងខេត្តព្រះសីហនុសាកសួរពាក់ព័ន្ធនឹងការបង្ខាំងមនុស្សជំរិតទារប្រាក់

ជនសង្ស័យ​ជនជាតិ​ចិនចំនួន៣នាក់ត្រូវបានបញ្ជូនទៅសាកសួរ​នៅសាលាដំបូង​ខេត្ត​ព្រះសីហនុ ពាក់​ព័ន្ធ​បទល្មើសចាប់បង្ខាំងបុរសជនជាតិចិនម្នាក់ ដោយធ្វើ​ទារុណ​កម្ម​ដើម្បីជំរិតទារប្រាក់ដែលប្រព្រឹត្ត​​នៅក្នុងក្រុងព្រះសីហនុ។

ជនសង្ស័យទាំង៣នាក់ខាងលើនេះ ត្រូវកម្លាំងនគរបាលជំនាញឃាត់ខ្លួនកាលពីរសៀល​ថ្ងៃ​ទី១០ ខែមីនា ឆ្នាំ​២០២៣ ក្នុងអំឡុងពេលចុះប្រតិបត្តិការឆ្មក់ចូលត្រួតពិនិត្យនៅក្នុងអគារ​ខុនដូរ មួយកន្លែងឈ្មោះ LZ SEAVIEW RESIDDENCE មានទីតាំងស្ថិតនៅភូមិ៥ សង្កាត់៤ ក្រុង-ខេត្តព្រះសីហនុ​ ហើយបានបញ្ជូនពួកគេទៅកាន់សាលាដំបូងខេត្តព្រះសីហនុកាលពី​ថ្ងៃទី១៣ ខែមីនា ឆ្នាំ២០២៣។

លោក ធុច បញ្ចសន្តិភាព អ្នកនាំពាក្យអមអយ្យការនៃសាលាដំបូងខេត្តព្រះសីហនុ បានថ្លែង​ថា ជនសង្ស័យជនជាតិទាំងបីនាក់កំពុងស្ថិតក្នុងការសាកសួរនៅតុលាការ ហើយតុលាការមិន​សម្រេចចោទ​ រឺយ៉ាងណានៅឡើយទេ។ លោក​ បញ្ចសន្តិភាពមិនបានបកស្រាយ​លម្អិតទេ​ពាក់ព័ន្ធ​នឹងករណីខាងនេះ។

លោក យី ជូន ស្នងការរងខេត្តព្រះសីហនុ ​ទទួលផែនអន្តោប្រវេសន៍ មានប្រសាសន៍ថា នៅថ្ងៃចន្ទ ទី​១៣ ខែមីនា ឆ្នាំ​២០២៣ កម្លាំងជំនាញបានបញ្ជូនសំណុំរឿងជនសង្ស័យ​ជនជាតិចិនទាំង៣នាក់ ទៅកាន់សាលាដំបូងខេត្តព្រះសីហនុ ដើម្បីបន្តនីតិវិធី ដែលពាក់ព័ន្ធ​នឹងបទល្មើសចាប់បង្ខាំងមនុស្សខុសច្បាប់ កាន់កាប់រក្សាទុកអាវុធខុសច្បាប់ និងប្រើប្រាស់​គ្រឿងញៀន។

លោកស្នងការរងបន្តថា ចំពោះបុរសរងគ្រោះជនជាតិចិនម្នាក់ដែលត្រូវជនល្មើសចាប់បង្ខាំង ហើយត្រូវកម្លាំងសមត្ថកិច្ចជួយសង្គ្រោះដោយសុវត្ថិភាព។

ទាក់ទិនបញ្ហានេះ លោក ជួន ណារិន្ទ ស្នងការនគរបាលខេត្តព្រះសីហនុ បានឱ្យផ្តល់ព័ត៌មាន​ដល់ប្រព័ន្ធផ្សព្វផ្សាយកាលពីថ្ងៃទី១២ ខែមីនា ឆ្នាំ២០២៣​ថា កម្លាំង​នគរបាល​ជំនាញពិតជា​បាន​ឃាត់ខ្លួនជនសង្ស័យជាជនជាតិចិនចំនួន៣នាក់ ពាក់ពន្ធ័បទល្មើស​ចាប់​បង្ខាំង​ជនជាតិ​ចិនដូចគ្នា ដើម្បីជំរិតទារប្រាក់ពិតប្រាកដមែន។

លោក ណារិន្ទ បន្តថា ប្រតិបត្តិការនេះ សមត្ថកិច្ចបានដកហូត អាវុធខ្លី គ្រាប់កាំភ្លើង ​ថ្នាំញៀន ព្រមទាំងវត្ថុតាងមួយចំនួនទៀត។ ហើយក្នុងយុទ្ធនាការកខាងលើនេះ កម្លាំងនគរបាល ក៏បាន​រំដោះ​ជនរងគ្រោះ ជនជាតិចិនម្នាក់ដែលត្រូវបានជនល្មើសចាប់បង្ខាំងទុកក្នុងអគារខុនដូរ ដើម្បី​ចាប់ជំរិត​។

លោកស្នងការបានថ្លែង​ថា ចំពោះប្រតិបត្តិការបង្ក្រាបបទល្មើសចាប់ជំរិតនេះ គឺធ្វើ​ឡើង​នៅរសៀថ្ងៃទី១០ ខែមីនា ឆ្នាំ២០២៣ បន្ទាប់ពីមានបណ្តឹងតាមរយៈទំព័រហ្វេសប៊ុកផេក របស់ លោក ស ខេង រដ្ឋមន្ត្រីក្រសួងមហាផ្ទៃ ដាក់បញ្ជាឱ្យសមត្ថកិច្ចជួយស្វែងរកជនជាតិចិន ចំនួន១នាក់ឈ្មោះ HU RONG ភេទប្រុស អាយុ៣២ឆ្នាំ ដែលបាត់ខ្លួននៅក្នុងខេត្ត​ព្រះសីហនុ។

លោក ណារិន្ទ លើកឡើងទៀតថា តាមរយៈការស្រាវជ្រាវរបស់សមត្ថកិច្ចជំនាញ និង​ចូល​រួម​​ពី​ថ្នាក់​ដឹក​នាំ​រដ្ឋបាលខេត្ត និងតំណាងអយ្យការអមសាលាដំបូងខេត្តព្រះសីហនុ កម្លាំងចម្រុះ បានចុះ​ស្រាវ​ជ្រាវពីទីតាំងមួយទៅទីតាំងមួយផ្សេងៗ ក្នុងក្រុងព្រះសីហនុ និងចុងក្រោយ បាន​ចុះទៅ​ដល់ខុនដូរឈ្មោះ LZ SEAVIEW RESIDDENCE ស្ថិតនៅភូមិ៥ សង្កាត់៤ ក្រុង ព្រះសីហនុ ខេត្តព្រះសីហនុ ហើយបានរកឃើញជនសង្ស័យពាក់ព័ន្ធនឹងបទ​ល្មើសបង្ខាំង​មនុស្ស​ចំនួន​៣នាក់ មានឈ្មោះ HEI LONGJIANG ភេទប្រុស ជនជាតិចិន អាយុ៣៨ឆ្នាំ​ ZHOU LAI ភេទ​ប្រុស ជនជាតិចិន អាយុ២៨ឆ្នាំ WANG JIANPING ភេទប្រុស ជនជាតិចិន អាយុ២៣ឆ្នាំ​។

លោកស្នងការបានបន្ថែមថា សមត្ថកិច្ចក៏បានដកហូតសម្ភារៈមួយចំនួន រួមមាន៖ រថយន្តបី​គ្រឿង រថយន្ត AUDI ពណ៌ ខ្មៅ ស្លាកលេខ 2AD8796 (១គ្រឿង) ម្ចាស់ឈ្មោះ ZHOU LAI រថយន្ត RANDROVER ពណ៌ ខ្មៅ ស្លាកលេខ កម្ពុជា CAR.LIF7 (១គ្រឿង) ម្ចាស់ឈ្មោះ WANG JIAN PING រថយន្ត RANDROVER ពណ៌ ខ្មៅ ស្លាកលេខ ភ្នំពេញ 2AW-5665 (១គ្រឿង) ម្ចាស់​ឈ្មោះ HEILONG JIANG។ អាវុធ ខ្លី GLOCK 19 GEN 4 ១០គ្រាប់(មួយដើម) របស់ឈ្មោះ WANG JIAN PING និងអាវុធ GLOCK 17 ខ្លី ប្រើហ្គាស (មួយដើម) របស់ឈ្មោះ WANG JIAN PING និងសម្ភារៈមួយចំនួនទៀត ព្រមទាំងគ្រឿងញៀនមួយចំនួនផងដែរ។

ពាក់ព័ន្ធនឹងបញ្ហានេះដែរ លោកស្រី ជៀប សុធារី អ្នកសម្របសម្រួលសមាគមអាដហុក ប្រចាំ​ខេត្តព្រះសីហនុ ​បង្ហាញការព្រួយបារម្ភ ចំពោះបទល្មើសចាប់បង្ខាំងធ្វើទារុណកម្ម​មនុស្ស​ជំរិត​ទារប្រាក់ ដែលបង្កឡើងដោយជនជាតិចិន ​​នៅក្នុងមូលដ្ឋានក្រុងព្រះសីហនុ ជាបន្ត​បន្ទាប់។ ទោះបីបទល្មើសទាំងនេះ សមត្ថកិច្ចជំនាញ​បានចុះបង្ក្រាប និងចាប់ខ្លួនជនសង្ស័យ​ជនជាតិ​ចិន ជាច្រើននាក់បញ្ជូនទៅកាន់តុលាការ ​ជាច្រើនករណីបែបណាក្តី ក៏​បទល្មើសទាំងនេះ បាន​បន្តកើតមានដដែល។

លោកស្រីបន្តថា ចំពោះបទល្មើសចាប់បង្ខាំងមនុស្សធ្វើទារុណកម្មជំរិតទារប្រាក់នេះ បើ​កាល​ណា​កើតមានកាន់តែច្រើន គឺវានាំឱ្យប៉ះពាល់ដល់កិត្តិយសរបស់ប្រទេសកម្ពុជាធ្ងន់ធ្ងរ​ផង​ដែរ​។ លោកស្រីបានកត់សម្គាល់ថា ​កាលពីចុងឆ្នាំ​២០២២ គឺឃើញមានកម្លាំង​នគរបាល​ជំនាញ​ពី​ក្រសួងមហាផ្ទៃ បានចុះសហការជាមួយកម្លាំងចម្រុះនៃខេត្តព្រះសីហនុ បើកយុទ្ធនាការ​ចុះ​បង្ក្រាប​បទល្មើសបង្ខាំងមនុស្សខុសច្បាប់ ជួញដូរមនុស្ស គ្រឿងញៀន លាង​លុយកខ្វក់ និង​ជួញ​ដូរអាវុធជាដើម ដោយបានឃាត់ខ្លួនជនសង្ស័យ​ជាច្រើននាក់ បញ្ជូន​ទៅកាន់​តុលាការ​ផ្តន្ទាទោស។ ប៉ុន្តែជាក់ស្តែងបទល្មើសទាំងនេះ នៅតែបន្តកើតមានជា​ហូរហែរ នៅក្នុង​ទី​ប្រជុំ​ជន​ក្រុងព្រះសីហនុ។

លោកស្រី សុធារី បន្ថែមថា លោកស្រីសំណូមពរដល់ស្ថាប័នអនុវត្តច្បាប់ ស្នើឱ្យមាន​ការ​ពង្រឹង​​ការ​​ផ្តន្ទាទោសជនប្រព្រឹត្តបទល្មើសទាំងអស់​ឱ្យបានធ្ងន់ធ្ងរ ​ ដើម្បី​ឱ្យជនល្មើស​ទាំង​នោះរាង​ចាល។

ចំណែក លោក ស្រេង វ៉ាន់លី អ្នកសម្របសម្រួលអង្គការ លីកាដូ ប្រចាំខេត្តព្រះសីហនុ ក៏បានលើកឡើងពីការព្រួយបារម្ភ ចំពោះបទល្មើសចាប់បង្ខាំងមនុស្ស​ធ្វើទារុណកម្ម​ជំរិត​ទារប្រាក់នេះដែរ។ ព្រោះ វាធ្វើឱ្យប៉ះពាល់ដល់អារម្មណ៍នៃការរស់នៅរបស់​ប្រជាពលរដ្ឋ​នៅខេត្តព្រះសីហនុផង ក៏ដូចជាភ្ញៀវទេសចរជាតិ-អន្តរជាតិ ដែល​គ្រោងចូល​មកទស្សនា​ខេត្តព្រះសីហនុ ហើយពួកគាត់ទទួលបានព័ត៌មានពីករណីកើតមានបទល្មើស​ចាប់បង្ខាំង​មនុស្ស​ទាំងនេះ ដែលនាំឱ្យពួកគាត់ភិតភ័យ ឬព្រួយបារម្ភចំពោះសុវត្ថិភាពផ្ទាល់ខ្លួន។

ត្រង់ចំណុចនេះ អ្នកឃ្លាំមើលសង្គមរូបនេះ បានស្នើដល់សមត្ថកិច្ច សូមបន្តមានវិធានការ​ចុះ​បង្ក្រាបបទល្មើសទាំងនេះ ឱ្យបានច្រើនថែមទៀត ជាពិសេសគួរធ្វើការផ្សព្វផ្សាយ​ឱ្យ​បាន​ទូលំ​ទូលាយជាសាធារណៈជូនដល់ប្រជាពលរដ្ឋ ជាពិសេសជនបរទេស ដែលចូលមក​ទស្សនា ឬ​ធ្វើការនៅខេត្តព្រះសីហនុ រួមមានមានជនជាតិចិនជាដើម​ ដើម្បីកុំឱ្យពួកគាត់ ចាញ់​បោកការ​ឃោសនា ឬចាញ់បោកក្រុមជនល្មើសចាប់ជំរិតទាំងនោះ​ទៀតនាថ្ងៃខាងមុខ៕