ក្រុងព្រះសីហនុ៖ អ្នកស្រី ចាន់ វរលក្ខណ៍ បានជូតទឹកភ្នែក ខណៈអង្គុយក្នុងបន្ទប់តូចរបស់អ្នកស្រី នៅក្នុងអន្តេវាសិកដ្ឋានសម្រាប់កម្មករស្នាក់នៅប្រចាំថ្ងៃក្នុងក្រុងព្រះសីហនុ។ ចាប់តាំងពីខែមេសាមក អ្នកស្រី បានជួយធ្វើពុម្ពសម្រាប់ចាក់បេតុងនៅគម្រោង Peninsula Bay ដែលជារមណីយដ្ឋាន ប្រណីត តម្លៃ ៥៧៤ លានដុល្លារ ស្ថិតនៅតំបន់មាត់សមុទ្រនៃក្រុងនេះ។ ប៉ុន្តែប្រាក់ឈ្នួលរបស់ អ្នកស្រីតែងតែត្រូវបានបើកយឺត។
អ្នកស្រីបាននិយាយថា៖ «ខ្ញុំមិនដែលនឹកស្មានសោះថា ខ្ញុំនឹងត្រូវសុំឱ្យកូនៗឈប់រៀន ហើយមកធ្វើការនៅទីនេះទេ»។
អ្នកស្រី វរលក្ខណ៍ ប្តីរបស់អ្នកស្រី និងកូនប្រុសវ័យជំទង់ពីរនាក់ ដែលម្នាក់មានអាយុទើបតែ ១៥ ឆ្នាំ ធ្វើការឱ្យក្រុមហ៊ុនម៉ៅការបន្តមួយនៅរមណីយដ្ឋាននេះ។ អ្នកស្រីទទួលបានប្រាក់ឈ្នួល ១១ ដុល្លារក្នុងមួយថ្ងៃ។ ដោយសារជាប់បំណុល គ្រួសារអ្នកស្រីក៏ជាដូចគ្រួសារជាច្រើនទៀតដែលខេមបូចាបានជួបសម្ភាសន៍ បានចាកចេញពីខេត្តជាប់ព្រំដែនមកធ្វើការនៅទីនេះ។ ក្រុងកំពង់ផែនេះមានអគារខុនដូខ្ពស់ៗជាច្រើនត្រូវបានទុកចោល កាស៊ីណូ និងទីតាំងបោកប្រាស់តាមអនឡាញទ្រង់ទ្រាយធំដែលអាជ្ញាធរបានបង្ក្រាបក្នុងពេលថ្មីៗជាបន្តបន្ទាប់មកនេះ។ ការបង្ក្រាបឧស្សាហកម្មឆបោកអស់រយៈពេលមួយឆ្នាំកន្លងមក បានធ្វើឱ្យសេដ្ឋកិច្ចក្នុងក្រុងនេះធ្លាក់ចុះផងដែរ។
កម្មករនៅការដ្ឋានបាននិយាយថា ប្រាក់ឈ្នួលរបស់ពួកគេត្រូវបានបើកយឺតម្តងហើយម្តងទៀតក្នុងប៉ុន្មានខែថ្មីៗនេះ ខណៈការងារក៏កាន់តែខ្សត់ទៅៗ។ រមណីយដ្ឋាននេះធ្លាប់ត្រូវបានមន្ត្រីខេត្តម្នាក់សរសើរថា ជាសញ្ញាបង្ហាញពីទំនុកចិត្តរបស់វិនិយោគិនបរទេសលើតំបន់នេះ។ ប៉ុន្តែបច្ចុប្បន្ន គម្រោងនេះយឺតជាងកាលវិភាគដើមរយៈពេលពីរឆ្នាំ ហើយការបញ្ចប់ការសាងសង់ត្រូវបានពន្យារពេលដល់ឆ្នាំ២០៣០។
ជម្លោះពាក់ព័ន្ធនឹងការបើកប្រាក់ឈ្នួល ជារឿងដែលតែងកើតមាននៅការដ្ឋានសំណង់ក្នុងប្រទេសកម្ពុជា។ ប៉ុន្តែការបើកប្រាក់ឈ្នួលយឺតនៅ Peninsula Bay កើតឡើងស្របពេលដែលអតីតនាយកក្រុមហ៊ុនអភិវឌ្ឍន៍គម្រោងនេះ ត្រូវបានកាត់ផ្តាច់ពីប្រព័ន្ធហិរញ្ញវត្ថុរបស់សហរដ្ឋអាមេរិក។ នេះបើយោងតាមការពិនិត្យមើលឯកសារក្រុមហ៊ុន និងទណ្ឌកម្មរបស់ក្រសួងរតនាគារអាមេរិកដោយអ្នកសារព័ត៌មានខេមបូចា។
កាលពីខែមេសា ក្រសួងរតនាគារអាមេរិកបានដាក់ទណ្ឌកម្មលើលោក Aik Paung និងលោក Sai Aung Linn ដែលជាពលរដ្ឋកម្ពុជាកើតនៅប្រទេសមីយ៉ាន់ម៉ា ដោយចោទប្រកាន់ថា អ្នកទាំងពីរពាក់ព័ន្ធនឹងប្រតិបត្តិការឆបោក និងលាងលុយកខ្វក់។ ឯកសារក្រុមហ៊ុន ដែលក្រោយមកត្រូវបានដកចេញពីបញ្ជីចុះបញ្ជីអាជីវកម្មរបស់រដ្ឋ បង្ហាញថា អ្នកទាំងពីរធ្លាប់ជានាយកក្រុមហ៊ុននៅពីក្រោយគម្រោងរមណីយដ្ឋាននេះរហូតដល់ខែធ្នូ ឆ្នាំ ២០២៥។ កញ្ចប់ទណ្ឌកម្មនេះក៏រួមបញ្ចូលក្រុមហ៊ុនរបស់អ្នកទាំងពីរ ធនាគារមួយដែលក្រសួងរតនាគារអាមេរិកអះអាងថា Linn គ្រប់គ្រង ហើយក៏បានដាក់ទណ្ឌកម្មលើលោក កុក អាន សមាជិកព្រឹទ្ធសភាគណបក្សកាន់អំណាច ដែលបានបដិសេធថាមិនមានជាប់ពាក់ព័ន្ធនឹងអំពើឆបោកអនឡាញឡើយ។
ក្រុមហ៊ុនអភិវឌ្ឍន៍គម្រោង Peninsula Bay Investment មិនត្រូវបានដាក់បញ្ចូលក្នុងបញ្ជីទណ្ឌកម្មនោះទេ។ ប៉ុន្តែគម្រោងនេះបង្ហាញពីហានិភ័យដែលកម្ពុជាកំពុងប្រឈម ខណៈព្យាយាមកាត់ផ្តាច់ទំនាក់ទំនងសេដ្ឋកិច្ចរបស់ខ្លួនពីឧស្សាហកម្មឆបោក។ យោងតាមរបាយការណ៍ឆ្នាំ២០២៤ របស់វិទ្យាស្ថានសន្តិភាពសហរដ្ឋអាមេរិក ឧស្សាហកម្មនេះត្រូវបានប៉ាន់ប្រមាណថា រកចំណូលបាន ១២,៥ ពាន់លានដុល្លារក្នុងមួយឆ្នាំនៅកម្ពុជា។
«ពេលយើងតវ៉ា ទើបយើងបានប្រាក់»
នៅការដ្ឋានសំណង់ កម្មករស្គាល់ឈ្មោះតែ«Peninsula Bay» ប៉ុណ្ណោះថាជាអ្នកទទួលខុសត្រូវលើរឿងបើកប្រាក់ឈ្មួលយឺតឱ្យពួកគេ។
នេះជាឈ្មោះតែមួយគត់ដែលកម្មករភាគច្រើនស្គាល់សម្រាប់គម្រោងដ៏ធំនេះ។ ពួកគេនិយាយថា គម្រោងនេះមានក្រុមហ៊ុនម៉ៅការបន្តរបស់ចិនជាច្រើន។ ប៉ុន្តែកម្មករដែលខេមបូចា បានសម្ភាសន៍ មិនអាចប្រាប់ឈ្មោះក្រុមហ៊ុនដែលជួលពួកគេឱ្យធ្វើការបានទេ។
អ្នកស្រី វរលក្ខណ៍ បាននិយាយថា អ្នកស្រី និងកម្មកររាប់សិបនាក់ក្នុងក្រុមរបស់អ្នកស្រី តែងតែទទួលបានប្រាក់ឈ្នួលយឺតពី ៥ ទៅ ១០ ថ្ងៃ។ អ្នកគ្រប់គ្រងរបស់អ្នកស្រីបានប្រាប់ក្រុមការងារថា Peninsula Bay បានបើកប្រាក់ឱ្យក្រុមហ៊ុនម៉ៅការបន្តយឺត ដែលធ្វើឱ្យក្រុមហ៊ុននោះខ្វះប្រាក់សម្រាប់បើកឱ្យកម្មករ។ ខេមបូចាបានកំណត់អត្តសញ្ញាណក្រុមហ៊ុន Hui An Construction Co. Ltd. តាមរយៈស្លាកសញ្ញានៅលើមួកសុវត្ថិភាពរបស់អ្នកស្រី វរលក្ខណ៍ ប៉ុន្តែមិនអាចបញ្ជាក់បានថា ក្រុមហ៊ុននេះមានការងារនៅគម្រោងនេះឬយ៉ាងណាទេ។ ក្រុមហ៊ុនមិនបានឆ្លើយតបនឹងសំណើសុំការបំភ្លឺឡើយ។
ការបើកប្រាក់យឺតនេះបានធ្វើឱ្យអ្នកស្រីពិបាកក្នុងការបង់សងកម្ចីទៅគ្រឹះស្ថានហិរញ្ញវត្ថុដែលអ្នកស្រីបានជំពាក់។ អ្នកស្រីបាននិយាយថា៖ «ពេលប្រាក់ឈ្នួលបើកយឺតចឹង ខ្ញុំស្ទើរតែឆ្កួតទៅហើយ»។
ការងារក៏មានតិចជាងមុនដែរ។ អ្នកស្រី វរលក្ខណ៍ ពេលខ្លះត្រូវរង់ចាំច្រើនថ្ងៃ ទើបអ្នកគ្រប់គ្រងទូរសព្ទហៅទៅធ្វើការ។ អ្នកស្រីនិយាយថា អ្នកស្រីមិនអាចទៅធ្វើការនៅកន្លែងផ្សេងបានទេ ព្រោះអាចត្រូវបណ្តេញចេញពីកន្លែងស្នាក់នៅបណ្តោះអាសន្នដែលនិយោជកជួលឱ្យកម្មករ។ ក្នុងប៉ុន្មានខែថ្មីៗនេះ អ្នកស្រីធ្វើការបានត្រឹម ១០ ទៅ ១៥ ថ្ងៃប៉ុណ្ណោះក្នុងមួយខែ។
ដោយមិនដឹងថាក្រុមហ៊ុនណាជាអ្នកជួលខ្លួន កម្មករមានមធ្យោបាយតិចតួចក្នុងការទាមទារប្រាក់ឈ្នួលដែលត្រូវបានបើកយឺតនេះ។ កម្មករខ្លះបានសម្រេចចិត្តតវ៉ា។
អ្នកស្រី សន សារ៉ែន វ័យ ៣៨ ឆ្នាំ ជាកម្មករបូកជញ្ជាំងមកពីខេត្តកំពត បាននិយាយថា ក្រុមរបស់អ្នកស្រីបានតវ៉ាកាលពីខែសីហា បន្ទាប់ពីប្រាក់ឈ្នួលរបស់ពួកគេត្រូវបានបើកយឺតប្រហែលមួយសប្តាហ៍។ បញ្ហានេះទើបតែចាប់ផ្តើមកើតមានប្រហែលបួនខែមុន ប៉ុណ្ណោះ។ សារ៉ែនបានធ្វើការនៅការដ្ឋាននេះតាំងពីខែវិច្ឆិកា ឆ្នាំ២០២៥។ អ្នកស្រីបាននិយាយថា កម្មករមកពីក្រុមហ៊ុនស្ទើរតែទាំងអស់នៅការដ្ឋាននេះក៏បានធ្វើដូចគ្នា ដោយអង្គុយនៅច្រកចូល និងបដិសេធមិនធ្វើការ។ សូម្បីតែអ្នកគ្រប់គ្រងរបស់អ្នកស្រីក៏បានស្នើឱ្យកម្មករចូលរួមតវ៉ា ដើម្បីទាមទារប្រាក់ពី Peninsula Bay ដែរ។
អ្នកស្រីបាននិយាយថា៖ «ពេលយើងតវ៉ា ទើបយើងបានប្រាក់»។
ក្រុមកម្មករដែលចងដែកសម្រាប់ពង្រឹងបេតុង និងធ្វើការឱ្យក្រុមហ៊ុនម៉ៅការបន្តមួយផ្សេងទៀត បាននិយាយថា ប្រាក់ឈ្នួលរបស់ពួកគេត្រូវបានបើកយឺតក្នុងរយៈពេលពីរខែកន្លងមក។ ពួកគេបាននិយាយថា ថៅកែរបស់ពួកគេបានបន្ទោសក្រុមហ៊ុនដែលដឹកនាំគម្រោង។ អ្នកបកប្រែពីរនាក់ដែលធ្វើការឱ្យក្រុមហ៊ុនម៉ៅការបន្តរបស់ចិន ក៏បានរៀបរាប់អំពីការបើកប្រាក់យឺតស្រដៀងគ្នានេះដែរ។
អ្នកបកប្រែម្នាក់ក្នុងចំណោមនោះ គឺលោក លី ចាន់ឌី ត្រូវបានថៅកែបញ្ជូនឱ្យទៅជួបតំណាង «Peninsula Bay» ដើម្បីទាមទារប្រាក់ នៅពេលការបើកប្រាក់យឺត។
លោកបាននិយាយថា៖ «ខ្ញុំបានប្រាប់ពួកគេថា យើងមកធ្វើការនៅទីនេះដើម្បីចិញ្ចឹមជីវិត ប៉ុន្តែឥឡូវនេះអ្នកបើកប្រាក់ឱ្យយើងយឺត។ តើយើងអាចរស់នៅយ៉ាងដូចម្តេច?»។ បន្ទាប់ពីកិច្ចប្រជុំនោះ ប្រាក់ត្រូវបានបើកឱ្យកម្មករ។
លោក ចាន់ឌី បាននិយាយថា លោកជឿថា ការបើកប្រាក់យឺតអាចបណ្តាលមកពីបញ្ហាលំហូរសាច់ប្រាក់។ ទោះជាយ៉ាងណា លោកបានបន្ថែមថា ក្រុមហ៊ុនម៉ៅការបន្តខ្លះក៏ប្រើប្រាស់ខុសគោលដៅនូវប្រាក់ដែលត្រូវទុកសម្រាប់បើកឱ្យកម្មករផងដែរ។ អ្នកបកប្រែម្នាក់ទៀត គឺលោក ខាន់ វង្ស បាននិយាយថា តំណាង Peninsula Bay បានលើកឡើងពីការខ្វះខាតសាច់ប្រាក់។
ការរៀបរាប់របស់កម្មករទាំងនេះបង្ហាញថា ការបើកប្រាក់ឈ្នួលយឺតបានចាប់ផ្តើមប្រហែលខែមេសា ដែលជាខែដែលសហរដ្ឋអាមេរិកបានដាក់ទណ្ឌកម្មលើអតីតនាយកក្រុមហ៊ុនអភិវឌ្ឍន៍គម្រោងនេះ។ ខេមបូចា មិនអាចកំណត់បានថា បញ្ហាទាំងពីរនេះមានទំនាក់ទំនងគ្នាឬយ៉ាងណាទេ។
លោក Aik Yon ដែលយោងតាមបញ្ជីចុះបញ្ជីអាជីវកម្មរបស់ក្រសួងពាណិជ្ជកម្ម គឺជាប្រធានក្រុមហ៊ុន Peninsula Bay Investment បច្ចុប្បន្ន បានបិទទូរសព្ទនៅពេលខេមបូចា សួរអំពីការបើកប្រាក់ឈ្នួលយឺត។ ក្រោយមក បុរសម្នាក់ដែលណែនាំខ្លួនថាជាអ្នកគ្រប់គ្រងរដ្ឋបាលរបស់ក្រុមហ៊ុន បានស្នើឱ្យផ្ញើសំណួរជាលាយលក្ខណ៍អក្សរ ប៉ុន្តែមិនបានឆ្លើយតបនឹងសំណួរទាំងនោះឡើយ។
ពីគម្រោងដែលត្រូវបានលើកសរសើរ ទៅកាន់ទណ្ឌកម្ម
ក្រុមប្រឹក្សាអភិវឌ្ឍន៍កម្ពុជា (CDC) ដែលជាស្ថាប័នរបស់រដ្ឋាភិបាលទទួលបន្ទុកសម្របសម្រួលការវិនិយោគបរទេសតាមរយៈច្រកចេញចូលតែមួយ បានអនុម័តគម្រោងនេះនៅដើមឆ្នាំ២០២៤។ យោងតាមឯកសារក្រុមហ៊ុន ក្រុមហ៊ុនអភិវឌ្ឍន៍គម្រោងនេះត្រូវបានចុះបញ្ជីនៅខែមីនា ឆ្នាំ២០២៣ ក្រោមឈ្មោះ Ban Dao Investment ដែលជាពាក្យចិនមានន័យថា «ឧបទ្វីប» ហើយបានប្តូរឈ្មោះទៅជា Peninsula Bay Investment នៅឆ្នាំ២០២៤។ ក្រុមហ៊ុននេះដឹកនាំដោយលោក Paung និង លោក Linn។
ក្រុមប្រឹក្សាអភិវឌ្ឍន៍កម្ពុជា បាននិយាយថាគម្រោងនេះក្នុងតម្លៃ ៥៧៤ លានដុល្លារ។ គម្រោងនេះរួមមានសណ្ឋាគារប្រហែល ២ ៨៧០ បន្ទប់ អគារខុនដូខ្ពស់ៗ និងមជ្ឈមណ្ឌលពាណិជ្ជកម្ម។ អ្នកគ្រប់គ្រងគម្រោងរបស់ក្រុមហ៊ុនបានប្រាប់សារព័ត៌មាន Khmer Times កាលពីខែមករា ឆ្នាំ២០២៥ ថា ទុនវិនិយោគបានកើនឡើងដល់ ១ ពាន់លានដុល្លារ។ កាលពីខែកញ្ញា លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ បានលើកឡើងថា ក្រុមហ៊ុនមានដើមទុន ៥០០ លានដុល្លារ ហើយលោកមិនមានព័ត៌មានអំពីម្ចាស់ភាគហ៊ុនរបស់ក្រុមហ៊ុននេះទេ។ លោកបាននិយាយថា កាលបរិច្ឆេទបញ្ចប់គម្រោងត្រូវបានពន្យារពេលពីឆ្នាំ២០២៨ ទៅឆ្នាំ២០៣០។
តំណាងផ្នែកលក់នៅរមណីយដ្ឋានបានប្រាប់ថា អគារភាគច្រើននៃគម្រោងនេះត្រូវបានសាងសង់រួចហើយ រួមទាំងអគារខុនដូចំនួនបួនដែលសាងសង់បានប្រហែល ៩០ ភាគរយ។ បន្ទប់ខ្លះនៅក្នុងអគារទាំងនេះត្រូវបានជួលរួចហើយ។ តំណាងរូបនេះបាននិយាយថា ក្រុមហ៊ុនកំពុងផ្តោតលើការបញ្ចប់សាងសង់សណ្ឋាគារ និងការបំពេញដីចូលសមុទ្រនៅខាងមុខគម្រោង ដើម្បីសាងសង់ផ្លូវដើរលំហែកាយតាមមាត់សមុទ្រ។
លោក ឡុង ឌីម៉ង់ អភិបាលរងខេត្ត បានបដិសេធមិនធ្វើអត្ថាធិប្បាយរឿងទណ្ឌកម្ម ឬការបើកប្រាក់ឈ្នួលយឺតនោះឡើយ ដោយលើកឡើងថា បញ្ហាទាំងនេះស្ថិតក្រោមសមត្ថកិច្ចរបស់ ក្រុមប្រឹក្សាអភិវឌ្ឍន៍កម្ពុជា ។ សារព័ត៌មាន Khmer Times បានរាយការណ៍ថា លោក ឌីម៉ង់ បានដឹកនាំកិច្ចពិគ្រោះយោបល់ពីការវាយតម្លៃផលប៉ះពាល់បរិស្ថាននៃគម្រោងនេះកាលពីឆ្នាំ២០២៥។
អ្នកនាំពាក្យម្នាក់របស់ ក្រុមប្រឹក្សាអភិវឌ្ឍន៍កម្ពុជាបានបដិសេធមិនប្រាប់ថា តើស្ថាប័នលោកនឹងពិនិត្យឡើងវិញលើគម្រោងនេះដោយសារទណ្ឌកម្មឬយ៉ាងណាទេ ហើយក៏មិនធ្វើអត្ថាធិប្បាយអំពីការបើកប្រាក់ឈ្នួលយឺតដែរ។ លោកបានបង្វែរសំណួរទៅក្រុមការងារជំរុញការវិនិយោគរបស់ខេត្ត ប៉ុន្តែលោក អ៊ឹម សុខធី ដែលជាប្រធានលេខាធិការដ្ឋានរបស់ក្រុមការងារនេះ មិនបានឆ្លើយតបឡើយ។
សារព័ត៌មានខេមបូចា មិនអាចទាក់ទងលោក Paung បានទេ ហើយលោក Linn ក៏មិនបានឆ្លើយតបនឹងសំណួរដែលផ្ញើតាមជំនួយការរបស់លោកដែរ។ អ្នកម៉ៅការសំណង់ធំរបស់គម្រោង គឺក្រុមហ៊ុន China State Construction Engineering Corp ដែលជាក្រុមហ៊ុនរដ្ឋរបស់ចិន ក្រុមហ៊ុនសណ្ឋាគារអង់គ្លេស IHG ដែលគ្រោងបើកសណ្ឋាគារ InterContinental ដែលមាន ចំនួន ៣០០ បន្ទប់នៅទីតាំងនេះ និងក្រុមហ៊ុនផលិតជណ្តើរយន្តរបស់ហ្វាំងឡង់ KONE មិនបានឆ្លើយតបនឹងសំណួរថា តើពួកគេនៅបន្តភាពជាដៃគូជាមួយគម្រោងនេះឬយ៉ាងណានោះទេ។
ចម្ងល់អំពីលទ្ធភាពជោគជ័យរបស់គម្រោង
ជាងពីរឆ្នាំបន្ទាប់ពីទទួលបានការអនុម័ត អនាគតរបស់រមណីយដ្ឋាននេះនៅតែមិនច្បាស់លាស់។ យោងតាមក្រសួងទេសចរណ៍ ចំនួនភ្ញៀវទេសចរអន្តរជាតិមកកម្ពុជាបានធ្លាក់ចុះ ៤៤.៤ ភាគរយ ក្នុងរយៈពេលប្រាំបីខែដំបូងនៃឆ្នាំនេះ។ ក្រុងព្រះសីហនុ ក៏រងផលប៉ះពាល់សេដ្ឋកិច្ចពីការចាកចេញរបស់កម្មករនៅទីតាំងឆបោក ដែលបានរត់គេចពីការបង្ក្រាបរបស់សមត្ថកិច្ចផងដែរ។
លោក ជា គឹមសៀ ប្រធានផ្នែកស្រាវជ្រាវ និងប្រឹក្សាយោបល់នៅក្រុមហ៊ុន Advantage Property Services បាននិយាយថា ទីផ្សារអចលនទ្រព្យនៅក្រុងព្រះសីហនុពឹងផ្អែកលើតម្រូវការពីជនជាតិចិន ដែលបានធ្លាក់ចុះយ៉ាងខ្លាំងចាប់តាំងពីការហាមឃាត់ល្បែងស៊ីសងតាមអនឡាញ។
លោកបាននិយាយពីរមណីយដ្ឋាននេះថា ៖ «មជ្ឈមណ្ឌលផ្សារទំនើបនោះនឹងរងផលប៉ះពាល់យ៉ាងខ្លាំង ប្រសិនបើគ្មានជនជាតិចិនរស់នៅក្នុងក្រុងព្រះសីហនុ ឬប្រសិនបើវិស័យទេសចរណ៍នៅកម្ពុជា ជាពិសេសនៅក្រុងព្រះសីហនុ មានការធ្លាក់ចុះ»។ លោកមិនរំពឹងថាទីផ្សារអចលនទ្រព្យរបស់ក្រុងនេះនឹងងើបឡើងវិញក្នុងរយៈពេលប្រាំឆ្នាំខាងមុខទេ។
លោក Stephen Higgins ប្រធានគ្រប់គ្រងដៃគូនៃក្រុមហ៊ុន Mekong Strategic Capital ដែលមាន មូលដ្ឋាននៅភ្នំពេញ បាននិយាយថា ទណ្ឌកម្មតែមួយមុខក៏អាចធ្វើឱ្យគម្រោងនេះជាប់គាំងបានដែរ។
លោកបាននិយាយថា៖ «ប្រសិនបើអ្នកដែលនៅពីក្រោយគម្រោងនេះស្ថិតក្នុងបញ្ជីទណ្ឌកម្ម នោះការបញ្ចប់គម្រោងនឹងមានការលំបាកខ្លាំង។ ប៉ុន្តែមានបញ្ហាធំជាងនេះទៀត គឺខ្ញុំមើលមិនឃើញសោះថា ទីផ្សារអាចស្រូបយកការផ្គត់ផ្គង់អចលនទ្រព្យក្នុងបរិមាណច្រើនបែបនេះបានដោយរបៀបណានោះទេ»។
លោកបានបន្តថា ដើម្បីឱ្យគម្រោងដូចជា Peninsula Bay ទទួលបានជោគជ័យ ព្រះសីហនុត្រូវតែកែប្រែរូបភាពរបស់ខ្លួនឱ្យផុតពីការមើលឃើញថាជា «ទីក្រុងដែលពឹងផ្អែកលើទីផ្សារចិន» ពោលគឺទីក្រុងដែលទាក់ទាញតែភ្ញៀវទេសចរ និងវិនិយោគិនពីគ្រប់ប្រភព។ លោកក៏បានបន្ថែមថារដ្ឋាភិបាលគួរវាយកម្ទេចអគារ និងគម្រោងដែលត្រូវបានបោះបង់ចោល ហើយដាក់ដីទាំងនោះដេញថ្លៃ ឬកែច្នៃទៅជាសួនសាធារណៈវិញ។
លោកបានលើកឡើងថា៖ «ក្រុងព្រះសីហនុនឹងត្រូវការពេលជាច្រើនឆ្នាំដើម្បីស្ដារស្ថានភាពឡើងវិញពីផលប៉ះពាល់ដែលបានកើតឡើង ហើយគេក៏គួរសួរផងដែរថា ហេតុអ្វីបានជាបញ្ហាទាំងនេះត្រូវបានអនុញ្ញាតឱ្យកើតមានតាំងពីដំបូង»៕
ប្រែសម្រួលពីអត្ថបទភាសាអង់គ្លេស៖ Workers Report Delayed Payments After Peninsula Bay’s Ex-Directors Sanctioned
