ថ្នាក់ដឹកនាំជាន់ខ្ពស់ក្រុមហ៊ុនព្រីនស៍ គ្រុប ដែលរងទណ្ឌកម្មបានប្រើក្រុមហ៊ុនអន្តរការីរបស់ខ្លួន ដើម្បីទិញលំនៅឋានប្រណីតតម្លៃរាប់លានដុល្លារមួយកន្លែងនៅតំបន់ជាយក្រុងមួយកន្លែង ក្នុងរដ្ឋកាលីហ្វ័រញ៉ា សហរដ្ឋអាមេរិក។ នេះបើតាមកំណត់ត្រាសាជីវកម្ម និងអចលនទ្រព្យ។
លោក Bo Lei ជាអតីតនាយកក្រុមហ៊ុនព្រីនស៍ គ្រុប ដែលជាប់ពាក់ព័ន្ធនឹងបណ្ដាញឆបោកតាមអនឡាញ។ លោកគឺជាអ្នកជំនួញជនជាតិចិន និងបានទទួលសញ្ជាតិខ្មែរនៅឆ្នាំ២០១៨។ បើតាមកំណត់ត្រាក្រុមហ៊ុន និងទ្រព្យសម្បត្តិពីអាជ្ញាធររដ្ឋកាលីហ្វ័រញ៉ា បានឲ្យដឹងថា លោក Bo Lei បានប្រើក្រុមហ៊ុនចុះបញ្ជីនៅអាមេរិកដើម្បីទិញផ្ទះតម្លៃ៣,៧លានដុល្លារនៅតំបន់ Orange County ក្នុងរដ្ឋកាលីហ្វ័រញ៉ា កាលពីឆ្នាំ២០២០។ លំនៅឋានជាប់ពាក់ព័ន្ធនឹងក្រុមហ៊ុនព្រីនស៍នេះ គឺជាទ្រព្យដំបូងដែលត្រូវបានគេរាយការណ៍ក្នុងបញ្ជីអចលនទ្រព្យអាមេរិកដែលតម្លៃផ្ទះមានរហូតដល់៥,៧លានដុល្លារនាពេលបច្ចុប្បន្ន។
ការទិញនេះបានឆ្លុះបញ្ជាំងពីគម្រោងវិនិយោគលើអចលនទ្រព្យដ៏ធំដោយក្រុមហ៊ុនពាក់ព័ន្ធនឹងព្រីនស៍ គ្រុប ដែលការវិនិយោគនោះមាននៅចក្រភពអង់គ្លេស ជប៉ុន តៃវ៉ាន់ និងសិង្ហបុរី។ ប្រធានក្រុមហ៊ុនព្រីនស៍ គ្រុប លោក ចេន ហ្ស៊ី ដែលត្រូវបានធ្វើបត្យាប័នទៅកាន់ប្រទេសចិនកាលដើមឆ្នាំនេះ កំពុងប្រឈមមុខនឹងបទចោទជាច្រើនសំណុំរឿងនៅតុលាការប្រទេសចិន។ លោក ចេន ហ្ស៊ី បានកាន់កាប់អចលនទ្រព្យយ៉ាងតិច១៩កន្លែងនៅក្នុងទីក្រុងឡុងដ៍ រួមជាមួយក្រុមហ៊ុនអន្តរការីរបស់គាត់ផ្សេងទៀត ដែលអចលនទ្រព្យទាំងនេះ រួមមាន អាគារពាណិជ្ជកម្ម និងអាគារលំនៅឋានប្រណីតផ្សេងទៀតនៅទីក្រុងតូក្យូ ប្រទេសជប៉ុន។
លោក Bo Lei ទំនងជាបានប្រើទំនាក់ទំនងរបស់ក្រុមហ៊ុនដើម្បីទិញអចលនទ្រព្យនៅរដ្ឋកាលីហ្វ័រញ៉ា។ លោកដាក់ឈ្មោះជាក្រុមហ៊ុនចុះបញ្ជី និងជានាយកប្រតិបត្តិនៃក្រុមហ៊ុន TZHY LLC ដែលជាក្រុមហ៊ុនចុះបញ្ជីមានកំណត់ ធ្វើប្រតិបត្តិការនៅក្នុងរដ្ឋកាលីហ្វ័រញ៉ា ក្នុងឆ្នាំ២០២០ ដោយប្រើឈ្មោះជាក្រុមហ៊ុនធ្វើអាជីវកម្ម «គ្រប់គ្រងអចលនទ្រព្យ»។ លោក ក៏បានប្រើក្រុមហ៊ុននេះទិញផ្ទះមានប្រាំបន្ទប់គេងនៅទីតាំងជាប់មាត់សមុទ្រមួយកន្លែងទៀតនៅឆ្នាំដដែលក្នុងតំបន់ Orange County។ នេះបើតាមឯកសារអាជីវកម្មដែលខេមបូចាទទួលបាន។
អ្នកសារព័ត៌មានខេមបូចាបានផ្ញើអ៊ីម៉ែលទៅកាន់ក្រុមហ៊ុនតាមរយៈអាសយដ្ឋានអ៊ីម៉ែលដែលបានដាក់សម្រាប់ចុះបញ្ជី តែមិនមានការឆ្លើយតប។ អ្នកសារព័ត៌មានក៏បានផ្ញើសារតាមអ៊ីម៉ែល និងលេខទូរសព្ទដែលចុះបញ្ជីថាជារបស់លោក Bo Lei និងអាសយដ្ឋានរបស់លោកនៅកម្ពុជា ប៉ុន្តែមិនមានការឆ្លើយតបដូចគ្នា។ លោក Cayenne Kuang ភ្នាក់ងារអចលនវត្ថុដែលបានឈ្មួញកណ្តាលទិញនោះមិនបានឆ្លើយតបនឹងសំណើសុំការអត្ថាធិប្បាយទេ។
ការស៊ើបអង្កេតនេះរកឃើញការជាប់ពាក់ព័ន្ធជាមួយក្រុមហ៊ុន Prince Huan Yu (អាមេរិក) ដែលជាក្រុមហ៊ុនចុះបញ្ជីនៅកាលីហ្វ័រញ៉ាក្នុងឆ្នាំ២០២០។ ដូចគ្នាដែរ លោក Bo Lei ជានាយកប្រតិបត្តិ និងជានាយកតែម្នាក់គត់របស់ក្រុមហ៊ុន តាមរយៈឯកសារបញ្ជាក់ចុងក្រោយនៅខែកញ្ញា ឆ្នាំ២០២៥។ ក្រុមហ៊ុននេះចុះបញ្ជីធ្វើអាជីវកម្មជាភ្នាក់ងារ «តុបតែងអាគារផ្នែកខាងក្នុង» និង «គ្រប់គ្រងគម្រោង»។ ដូចគ្នានេះដែរ ក្រុមហ៊ុនក៏ប្រើឈ្មោះដូចគ្នា គឺ Prince Huan Yu នៅកម្ពុជា ហើយក៏រងនូវទណ្ឌកម្មពីអាមេរិកដូចគ្នា។
ក្រុមហ៊ុន Prince Huan Yu (អាមេរិក) មានអាសយដ្ឋានដូចគ្នានឹងក្រុមហ៊ុនផ្សេងទៀតដូចជា Realty YKP Group Holdings Inc។ នេះបើតាមឯកសាររបស់ក្រុមហ៊ុនចុះបញ្ជីកាលពីឆ្នាំ២០២០។ ក្រុមហ៊ុនបានដាក់ឈ្មោះលោក Bo Lei ជានាយកប្រតិបត្តិ និងជានាយកផ្នែកហិរញ្ញវត្ថុរបស់ក្រុមហ៊ុន។ កំណត់ត្រារបស់ក្រុមហ៊ុនក៏បានបង្ហាញថា Realty YKP ជាក្រុមហ៊ុនចុះបញ្ចីមួយរបស់ TZHY ដែរ។
បើតាមកំណត់ត្រាដដែល លោក Bo Lei ក៏បានប្រើអាសយដ្ឋានក្រុមហ៊ុនអចលនទ្រព្យ Laguna Niguel ក្នុងការចុះបញ្ជីក្រុមហ៊ុន TZHY ទោះបីជាអាសយដ្ឋាននេះជារបស់ LLC មិនមែនជាកម្មសិទ្ធិរបស់លោកក្ដី។
កំណត់ត្រាអចលនទ្រព្យបានបង្ហាញថាការិយាល័យគ្រប់គ្រងទ្រព្យសម្បត្តិបរទេសនៃក្រសួងហិរញ្ញវត្ថុអាមេរិក បានបង្កកគណនីធនាគារដែលពាក់ព័ន្ធនឹង TZHY កាលពីខែវិច្ឆិកា ឆ្នាំ២០២៥។ គណនីនេះត្រូវបានប្រើប្រាស់សម្រាប់ទូទាត់ការចំណាយប្រចាំខែរបស់ម្ចាស់ផ្ទះ ប៉ុន្តែប្រតិបត្តិការចំណាយនេះត្រូវបានបញ្ឈប់នៅពាក់កណ្ដាលខែវិច្ឆិកា ពោលគឺមួយខែក្រោយលោក Bo Lei ត្រូវបានអាមេរិកដាក់ទណ្ឌកម្ម។
ឯកសារមានកាលបរិច្ឆេទចុះថ្ងៃទី១៧ ខែវិច្ឆិកា ឆ្នាំ២០២៥ បានសរសេរថា៖ «គណនីត្រូវបានបង្កក/បញ្ជូនត្រឡប់ ដោយ OFAC តាមរយៈ ACH…9019»។
ផ្អែកតាមកំណត់ត្រានេះ TZHY មិនមានការធ្វើប្រតិបត្តិការចំណាយណាមួយទៀតទេទៅកាន់សមាគមន៍ម្ចាស់ផ្ទះ ក្រៅតែពីមូលប្បទានបត្រមួយសន្លឹកតម្លៃ៣០០ដុល្លារ។ គិតមកដល់ខែឧសភា ឆ្នាំ២០២៦ ក្រុមហ៊ុនបានជំពាក់សមាគមម្ចាស់ផ្ទះចំនួន៧ ៧៦៥ដុល្លារដែលត្រូវបង់។
ស្ថានទូតសហរដ្ឋអាមេរិកប្រចាំក្រុងភ្នំពេញមិនបានឆ្លើយតបភ្លាមៗទៅនឹងសំណើសុំអត្ថាធិប្បាយរបស់អ្នកសារព័ត៌មានខេបូចានោះទេ។
OFAC បានដាក់ឈ្មោះលោក Bo Lei កាលពីខែតុលា ឆ្នាំ២០២៥ ទៅក្នុងផ្នែកមួយនៃក្រុមហ៊ុន ព្រីនស៍ គ្រុប ដែលត្រូវរងទណ្ឌកម្ម ក្រោមការចោទថាបានធ្វើប្រតិបត្តិការឆបោកតាមអនឡាញ ដោយប្រើប្រាស់កម្លាំងពលកម្មដោយបង្ខំ និងរកប្រាក់បានរាប់ពាន់លានដុល្លារពីប្រតិបត្តិការខុសច្បាប់មួយនេះ។ យ៉ាងណា ក្រុមហ៊ុនព្រីនស៍ គ្រុប បានច្រានចោលការចោទប្រកាន់ទាំងនេះ។
ផ្អែកតាមឯកសារដែលមាន លោក Bo Lei ពេលខ្លះក្រុមប្រទេសលោកខាងលិចហៅថា Lei Bo កន្លងមកក៏ធ្លាប់ធ្វើជាប្រធានក្រុមហ៊ុន Prince Huan Yu Real Estate (Cambodia) Group និងបានគ្រប់គ្រងចាត់ចែងលើការសាងសង់កន្លែងកម្សាន្ដ Golden Fortune Resorts World Co. Ltd. ដែលជាប់សង្ស័យថាជាមជ្ឈមណ្ឌលឆបោកអនឡាញមួយកន្លែងក្នុងក្រុងសំពៅពូន ខេត្តកណ្ដាល និងទីតាំងនោះរងការចោទថាជាប់ពាក់ព័ន្ធនឹងការប្រើប្រាស់កម្លាំងពលកម្មដោយបង្ខំ និងប្រព្រឹត្តអំពើឆបោក។
លោក Bo Lei មានវ័យ៤៨ឆ្នាំ មកពីក្រុង Chongqing ប្រទេសចិន និងធ្លាប់ជាសហនាយកជាមួយលោក ចេន ហ្ស៊ី ក្នុងក្រុមហ៊ុន Prince Huan Yu Real Estate។ លោក ចេន ហ្ស៊ី រងការចោទប្រកាន់ថាបានកាន់កាប់ Bitcoin តម្លៃ១៥ពាន់លានដុល្លារបានពីអំពើឆបោកតាមអនឡាញ ហើយទ្រព្យសម្បត្តិទាំងនេះត្រូវបានក្រសួងយុត្តិធម៌អាមេរិករឹបអូសក្នុងប្រតិបត្តិការប្រឆាំងនឹងអំពើឆបោកដ៏ធំមួយប្រឆាំងនឹងលោក ចេន ហ្ស៊ី។
OFAC និងបណ្ដាញបង្ក្រាមបទល្មើសហិរញ្ញវត្ថុអាមេរិក មិនបានឆ្លើយតបភ្លាមៗលើសំណើសុំអត្ថាធិប្បាយលើករណីនេះទេ៕
ប្រែសម្រួលពីអត្ថបទភាសាអង់គ្លេស៖ Sanctioned Prince Executive Owns Multi-Million Dollar Home in US
