សមាគមសម្ព័ន្ធអ្នកសារព័ត៌មានកម្ពុជា

ទូកដឹកជនជាតិចិនចូលក្នុងទឹកដីកម្ពុជាបានលិចកណ្ដាលសមុទ្រក្នុងខេត្តព្រះសីហនុ បណ្តាលឱ្យមានអ្នកស្លាប់និងបាត់ខ្លួន

ក្រុមអាជ្ញាធរកំពុងបញ្ជូនក្រុមជនជាតិចិន ដែលសង្រ្គាះបាន ទៅទីសុវត្ថិភាព ខេត្តព្រះសីហនុ។ រូបថតនៅថ្ងៃទី២៣ ខែកញ្ញា ឆ្នាំ២០២២។ រូបភាពពីរដ្ឋបាលខេត្តព្រះសីហនុ
ក្រុមអាជ្ញាធរកំពុងបញ្ជូនក្រុមជនជាតិចិន ដែលសង្រ្គាះបាន ទៅទីសុវត្ថិភាព ខេត្តព្រះសីហនុ។ រូបថតនៅថ្ងៃទី២៣ ខែកញ្ញា ឆ្នាំ២០២២។ រូបភាពពីរដ្ឋបាលខេត្តព្រះសីហនុ

ទូកឈើមួយគ្រឿងផ្ទុកជនជាតិចិនស្រីប្រុសចំនួន៤១នាក់ឆ្លងដែនចូលមកកម្ពុជា ត្រូវបាន​លិច​កណ្ដាលសមុទ្រ នៅចន្លោះពយសារឿង និងកោះតាង ក្នុងខេត្តព្រះសីហនុបណ្ដាលឱ្យមនុស្ស​មួយនាក់ស្លាប់និងបាត់ខ្លួន២១នាក់ ព្រម​ទាំងជួយសង្គ្រោះបាន១៩នាក់​ ដោយគិតត្រឹមម៉ោង៤​រសៀល ថ្ងៃទី២២ ខែកញ្ញា ២០២២។ យោងតាមមន្ត្រីអ្នកនាំខេត្តព្រះសីហនុ លោក ឃាង ភារម្យ។

អ្នកនាំពាក្យសាលាខេត្តព្រះសីហនុសរសេរលើហ្វេសប៊ុកផ្លូវការរបស់ថា «គិតត្រឹមម៉ោង​[ប្រហែលម៉ោង៤រសៀក]នេះ ជនរងគ្រោះដោយសារលិចទូកនៅ​​ចំណុច​និយាមកា១០.២៥N ១០៣.១៦Eនៅចន្លោះពយសារឿង និងកោះតាង ក្នុងភូមិសាស្រ្ត​ខេត្តព្រះសីហនុ ចំនួនសរុប​៤១នាក់ ជួយសង្គ្រោះបាន២០នាក់ (ស្លាប់០១នាក់) និងបាត់ខ្លួន២១នាក់ ដោយសមត្ថកិច្ច និងក្រុមជួយសង្រ្គោះកំពុងបន្តស្វែងរក»

លោក ភារម្យ បន្ថែមថា ចំពោះ​អ្នក​ដែល​នៅ​រស់​យក​មក​ប្រគល់​ឱ្យ​​អធិការ​ដ្ឋាន​នគរបាល​ក្រុង​កោះរ៉ុង​ ដោយ​ឡែក​សាកសព​អណ្ដែត​ទឹក​ យក​ទៅ​ទីបញ្ជាការ​អង្គភាព​បង្ក្រាប​បទ​ល្មើស​លើ​ផ្ទៃ​សមុទ្រ​ ដើម្បី​ប្រគល់​បន្តទៅ​មន្ទីរពេទ្យ​បង្អែក​ខេត្ត​ព្រះសីហនុ​ធ្វើ​កោសល្យវិច័យ​​។

បើតាមលោក ឡុង ឌីម៉ង់ អភិបាលរងខេត្តព្រះសីហនុ បានថ្លែងប្រាប់ខេមបូចា នាររសៀលថ្ងៃ នេះ ថា មានករណីលិចទូកចំនួន ០១គ្រឿង កាលថ្ងៃទី ២២ ខែកញ្ញា ឆ្នាំ២០២២ ស្ថិតនៅ​ចន្លោះ​​ពយសារឿង និងកោះតាង ក្នុងភូមិសាស្រ្តខេត្តព្រះសីហនុ។ 

លោក ឌីម៉ង់ បញ្ជាក់ថា អាជ្ញាធរមិនទាន់អាចបញ្ជាក់បានថា ជនជាតិចិនទាំងនោះ ឆ្លងដែន​មក​កម្ពុជាដោយស្របច្បាប់ ឬខុសច្បាប់ទេ ត្បិតថាកំពុងសាកសួរជនជាតិចិន​ទាំងនោះ​មក​កម្ពុជា​ក្នុងគោលបំណងអ្វី មកដោយស្របច្បាប់ ឬក៏ខុសច្បាប់។

លោកថ្លែងថា៖ «ទន្ទឹមនឹងការជួយសង្រ្គោះជីវិតមនុស្ស យើងក៏ស្វែងរកអំពីគោលបំណង​នៃការឆ្លងដែនមកកម្ពុជា ថាតើស្របច្បាប់ ឬមិនស្របច្បាប់។ ថាតើទូកមួយដែលមាន​គ្នា២នាក់ហ្នឹង មានការពាក់ព័ន្ធនឹងការនាំ[មនុស្ស] ឆ្លងដែនខុសច្បាប់ ឬមិនខុសច្បាប់»។

ជនជាតិចិនស្រីប្រុសប្រមាណ ២០នាក់កំពុងដើរចេញពីផែ ក្រោយសមត្ថកិច្ច​ជួយ​សង្រ្គោះហើយ ខេត្តព្រះសីហនុ។ រូបថតថ្ងៃទី២៣ ខែកញ្ញា ឆ្នាំ២០២២។ រូបភាពពីរដ្ឋបាលខេត្តព្រះសីហនុ

នៅពេលអ្នកសារព័ត៌មានសាកសួរ ក្នុងករណីជនជាតិចិនទាំងនោះឆ្លងដែនមកកម្ពុជា​ដោយ​ខុសច្បាប់ នឹងមានទោសទណ្ឌបែបណានោះ?  លោកឌីម៉ង់ មិនទាន់បង្ហើបពីនីតិវីធី​យ៉ាងណា​ទេ ដោយលោកបញ្ជាក់ថាទោះបីជាអ្នកទាំងនោះខុសច្បាប់ ឬស្របច្បាប់ អាជ្ញាធរផ្ដោត​លើការ​ជួយសង្រ្គោះមនុស្សជាមុនសិន ហើយបន្ទាប់ពីស្វែងរកអ្នកដែលបាត់ខ្លួនឃើញ អាជ្ញាធរ​នឹង​បញ្ជាក់ពីនីតិវិធីច្បាប់តាមក្រោយ។

លោកថ្លែងយ៉ាងដូច្នេះថា៖ «រឿងនីតិវិធីចាំគិតតាមក្រោយ បច្ចុប្បន្ននេះយើងត្រូវការ​ជួយ​សង្រ្គោះ​ជីវិតមនុស្សសិន ទោះជាយ៉ាងម៉េចក៏ដោយចាំយើងគិត[និតិវិធីច្បាប់]តាមក្រោយ»។

លោកឌីម៉ង់ ចាត់ទុកថា ជារឿងមិនសមទំនង នៅពេលដែលជនជាតិចិនទាំងនោះ​កំពុងមាន​គ្រោះថ្នាក់ ហើយអ្នកសារព័ត៌មានសាកសួរ ថាតើជនជាតិចិនទាំងនោះ នឹងមានទោសទណ្ឌ​បែបណា។

លោក ឌីម៉ង់ បន្ថែមថា៖ «ក្នុងន័យមនុស្សធម៌ យើងអត់អាចទៅចាត់វិធានការអីភ្លាមៗ វាហាក់​ដូចជាលឿនពេក គ្នា[ជនជាតិចិន]កំពុងតែមានទុក្ខយើងបែរជាចាប់ផ្ដន្ទាទោសភ្លាម ខ្ញុំគិតថា​យើងជួយសង្រ្គោះជីវិតមនុស្សសិន»។

ខេមបូចា មិនអាចសុំការបកស្រាយពី លោក ជួន ណារិន ស្នងការនគរបាលខេត្តព្រះសីហនុ និងលោក អ៊ុក សីហា មេបញ្ជាការរង​កងទ័ពជើង​ទឹក និង​ជា​មេបញ្ជាការ​មូលដ្ឋាន​សមុទ្រ​រាម បានទេនៅរសៀលថ្ងៃសុក្រនេះ។

តាមរយៈសារព័ត៌មានក្នុងស្រុក បានចុះផ្សាយថា ទូកដែលដឹកជនជាតិចិនទាំង៤១នាក់ បាន​ធ្វើដំណើរចេញពីប្រទេសចិន (កំពង់ផែក្វាងចូវ) តាមកប៉ាល់លឿនមួយគ្រឿងនៅថ្ងៃទី១១ ខែកញ្ញា ឆ្នាំ២០២២ រួចបានប្ដូរមកទូកឈើមួយគ្រឿង នៅអំឡុងថ្ងៃទី១៧ ខែកញ្ញា ឆ្នាំ២០២២ នៅសមុទ្រអន្តរជាតិជាមួយតៃកុងទូកជនជាតិខ្មែរ ០២នាក់ និងបានបន្តនៅលើទូកឈើ រហូត​ដល់ថ្ងៃទី២២ ខែកញ្ញាឆ្នាំ២០២២ ទើបទូកឈើនោះខូចក៏ចាប់ផ្តើមលិច។

ក្រុមជនជាតិចិនស្រីប្រុសកំពុងឈរតម្រង់ជួរនៅលើផែ ខេត្តព្រះសីហនុ។ រូបថតថ្ងៃទី២៣ ខែកញ្ញា ឆ្នាំ២០២២។ រូបភាពពីរដ្ឋបាលខេត្តព្រះសីហនុ

ជុំវិញករណីនេះ លោកឌីម៉ង់ បញ្ជាក់ថា អាជ្ញាធរបានឃាត់ខ្លួនបុរសជនជាតិខ្មែរ២នាក់ ដែលជា​អ្នកបើកបរទូកមួយផ្សេងទៀត ដើម្បីឱ្យដឹងថាពួកគេជាអ្នកនាំជនជាតិចិនឆ្លងដែន​មកកម្ពុជា ដោយខុសច្បាប់ឬក៏យ៉ាងណា។

លោក ឌីម៉ង់ បានបន្ថែមទៀតថា៖ «ជាមួយគ្នានេះកម្លាំងអង្គភាពបានធ្វើការឃាត់ទូកចំនួន ០១គ្រឿងផ្សេងទៀត មានមនុស្សចំនួន០២នាក់ជាជនជាតិខ្មែរ ដោយបានប្រគល់​ជូន​អធិការដ្ឋាននគរបាលក្រុងព្រះសីហនុ ខេត្តព្រះសីហនុ សួរនាំតាមនីតិវិធី ដោយឡែកទូក​រក្សាទុកនៅអង្គភាព»។

លោកអំ សំអាត នាយកចាត់ការទូទៅនៃអង្គការលីការដូ ចាត់ទុកថា ក្រុមជនជាតិចិន​ទាំង​នោះ លួចឆ្លងដែនមកកម្ពុជាដោយខុសច្បាប់ ហើយដោយសារតែ​មន្រ្តីអនុវត្តន៍ច្បាប់​មានភាព​ធូររលុង និងពុករលួយ ទើបជនជាតិចិនទាំងនោះអាចឆ្លងដែនមកកម្ពុជាបានទាំងផ្លូវទឹក និង​ផ្លូវគោក។

លោក សំអាត ថ្លែងថា៖ «កន្លងមក យើងឃើញវិធានការរបស់អាជ្ញាធរ មានភាពធូររលុង​ក្នុងការអនុវត្តន៍ផ្លូវច្បាប់  ព្រោះការចូលមកដោយខុសច្បាប់នេះ​មិនមែនចេះតែចូល​បាន​ដោយងាយៗទេ ពីព្រោះតាមព្រំដែនគោក ព្រំដែនទឹក យើងមានកងការពារគ្រប់ច្រក  ប៉ុន្តែហេតុអ្វីពួកហ្នឹងអាចចូលមកកម្ពុជាដោយខុសច្បាប់?»។

លោកសំអាត សម្ដែងការបារម្ភអំពីលំហូរចូលនៃជនជាតិចិន ដោយសារតែកន្លងមក ក្នុងខេត្ត​ព្រះសីហនុ​ និងបណ្ដាខេត្តមួយចំនួនទៀត បានក្លាយទៅជាទីតាំងបង្ខាំង​មនុស្សសម្រាប់​ការ​ជួញដូរ ទីតាំងល្បែងអនឡាញ ទីតាំងផលិតគ្រឿងញៀន ដែលបង្កអសន្តិសុខ សណ្ដាប់ធ្នាប់​ដល់កម្ពុជា។

 លោកថ្លែងយ៉ាងដូច្នេះថា៖ «វាជារឿងមួយគួរឱ្យព្រួយបារម្ភ មិនមែនតែអង្គការសង្គមស៊ីវិលទេ សូម្បីតែអង្គការអន្តរជាតិក៏មានការព្រួយបារម្ភដែរ អំពីបញ្ហាជួយដូរមនុស្សនៅកម្ពុជា»

លោកសំអាត រំពឹងថា អាជ្ញាធរដែលពាក់ព័ន្ធ នឹងអនុវត្តច្បាប់អន្តោប្រវេសន៍​ដែលមាន​ស្រាប់​ឱ្យបានតឹងរឹង និងបំបាត់អំពើពុករលួយទៅលើមន្រ្តីមួយចំនួន ដែលឃុបឃិត អនុញ្ញាត​ឱ្យ​ជនជាតិចិនឆ្លងដែនមកកម្ពុជាដោយខុសច្បាប់ ហើយគប្បីសហការជាមួយអាជ្ញាធរ​ប្រទេស​ជិតខាង ដើម្បីទប់ស្កាត់លំហូរជនអន្តោប្រវេសន៍ និងការជួយដូរមនុស្សដោយ​ខុសច្បាប់​នៅ​កម្ពុជា៕

702 views

ព័ត៌មានថ្មីៗ

អត្ថបទពេញនិយម