កាលពីសប្តាហ៍មុន ឥទ្ធិពលនៃព្យុះទីហ្វុងប៊ូឡយ(Bualoi)បានបោកបក់មកលើប្រទេសកម្ពុជាបង្កឱ្យមានទឹកជំនន់ភ្លាមៗ និងការបាក់ដីនៅតាមតំបន់ឆ្នេរ និងតំបន់ខ្ពង់រាប ដែលបណ្ដាលឱ្យមនុស្សម្នាក់ស្លាប់ ខណៈក្រុមជួយសង្គ្រោះកំពុងមមាញឹកក្នុងការស្វែងរកមនុស្ស៤នាក់ដែលបាត់ខ្លួននៅក្នុងខេត្តរតនគិរី។
ជាមួយនឹងភ្លៀងមូសុងធ្លាក់មកច្រើនទៀតនាពេលខាងមុខ អាជ្ញាធរកំពុងវាយតម្លៃការខូចខាតផ្នែកហេដ្ឋារចនាសម្ព័ន្ធ និងកសិកម្មនៅតាមតំបន់ឆ្នេរសមុទ្រ និងតំបន់ដងទន្លេ ដោយពិពណ៌នាថា ទឹកជំនន់នេះធ្ងន់ធ្ងរជាងឆ្នាំមុនៗ។
ព្យុះនេះដំបូងបានវាយប្រហារប្រទេសហ្វីលីពីន និងវៀតណាម បណ្ដាលឱ្យមនុស្សរាប់សិបនាក់ស្លាប់។ ប្រទេសថៃបានរាយការណ៍ពីទឹកជំនន់នៅខេត្តចំនួន១៧ កាលពីថ្ងៃចន្ទ ដោយប៉ះពាល់ដល់ប្រជាជនរាប់សែននាក់ និងបណ្ដាលឱ្យមនុស្ស៧នាក់ស្លាប់។
គិតត្រឹមថ្ងៃអង្គារ ស្ថានីយជលសាស្ត្រដែលវាស់កម្រិតទឹកទន្លេមេគង្គ ទន្លេសាប និងទន្លេបាសាក់ នៅក្នុងទឹកដីកម្ពុជា បានបង្ហាញថាកម្រិតទឹកឡើងខ្ពស់ខុសពីធម្មតា។ ក្រសួងធនធានទឹកបានអំពាវនាវឱ្យប្រជាពលរដ្ឋដែលរស់នៅតាមដងទន្លេ និងអាជ្ញាធរមូលដ្ឋានបង្កើនការប្រុងប្រយ័ត្ន។
អាជ្ញាធរបានជូនដំណឹងឱ្យប្រជាពលរដ្ឋនៅតំបន់ទំនាប និងតំបន់ឆ្នេរ រួមទាំងខេត្តកោះកុង ឱ្យត្រៀមខ្លួនសម្រាប់ភ្លៀងធ្លាក់ខ្លាំង និងខ្យល់បក់ខ្លាំងរហូតដល់ចុងសប្តាហ៍ នៅពេលដែលប្រព័ន្ធមូសុងថ្មីៗបានបង្កើតឡើងនៅសមុទ្រអាន់ដាម៉ាន់។
ទឹកជំនន់កាលពីសប្តាហ៍មុនបានជន់លិចស្រុកនានាក្នុងខេត្តចំនួន១១ រួមមាន រតនគិរី ព្រះវិហារ មណ្ឌលគិរី និងពោធិ៍សាត់ បំផ្លាញផ្ទះជិត ២៥ ០០០ ខ្នង និងបំផ្លាញដំណាំជាង ៦៣០ ហិកតា។ នេះបើយោងតាមគណៈកម្មាធិការជាតិគ្រប់គ្រងគ្រោះមហន្តរាយ។
លោក ម៉ា វិចិត្រ អភិបាលរងខេត្ត និងជាប្រធានលេខាធិការដ្ឋាននៃគណកម្មាធិការគ្រប់គ្រងគ្រោះមហន្តរាយខេត្ត បានមានប្រសាសន៍ថា ស្រុកដែលរងផលប៉ះពាល់ខ្លាំងជាងគេដោយសារទឹកនៅតែជន់ គឺស្រុក អូរជុំ អណ្តូងមាស អូរយ៉ាដាវ វ៉ើនសៃ និងតាវែង ដែលស្ថិតនៅតាមបណ្តោយទន្លេសេសាន។
លោកបានលើកឡើងថា ពលរដ្ឋចំនួន៥០០គ្រួសារត្រូវបានជម្លៀសចេញពីស្រុកទាំងនេះ ខណៈអ្នកនៅស្រុកភាគខាងត្បូង រួមមានស្រុកលំផាត់ និងកូនមុំក្បែរទន្លេស្រែពក មិនទាន់ត្រូវបានជម្លៀសចេញទេ ដោយសារទឹកបានស្រកចុះហើយ។
លោក វិចិត្រ បានប្រាប់ថា សាកសពបុរសម្នាក់ត្រូវបានគេប្រទះឃើញកាលពីថ្ងៃចន្ទនៅស្រុកអូរជុំ ខណៈក្រុមស្វែងរកបន្តស្វែងរកប្រជាពលរដ្ឋចំនួន៤នាក់ដែលគេជឿថាត្រូវបានទឹកជំនន់បោកបក់នៅឃុំសាមគ្គី កាលពីថ្ងៃទី២៥ ខែកញ្ញា។ លោកបានហៅព្យុះនេះថា ជាព្យុះមួយក្នុងចំណោមព្យុះដែលអាក្រក់បំផុតដែលលោកបានឃើញនៅក្នុងខេត្ត ហើយបានបន្ថែមថា ការខូចខាតដោយសារការបាក់ដីនៅមិនទាន់ត្រូវបានគេវាយតម្លៃនៅឡើយទេ។
លោកនាយករដ្ឋមន្ត្រី ហ៊ុន ម៉ាណែត ក៏បានអំពាវនាវដល់គណៈកម្មាធិការជាតិគ្រប់គ្រងគ្រោះមហន្តរាយ ក្រសួងកសិកម្ម និងអាជ្ញាធរពាក់ព័ន្ធផ្សេងទៀត ឱ្យបន្តតាមដានទឹកជំនន់ និងឆ្លើយតបភ្លាមៗចំពោះការជួយសង្គ្រោះបន្ថែមទៀត។
អ្នកនាំពាក្យខេត្តមណ្ឌលគិរី លោក នាង វណ្ណៈ បានមានប្រសាសន៍ថា៖ «ទឹកជំនន់ឆ្នាំនេះមានសភាពធ្ងន់ធ្ងរជាងឆ្នាំមុនៗ» ដោយសំដៅលើទំនោរទឹកជំនន់ទន្លេមេគង្គដែលរំពឹងថា អាចកើតមានក្នុងរដូវវស្សានេះ។ លោកបានជំរុញប្រជាពលរដ្ឋឱ្យមានការប្រុងប្រយ័ត្ន និងតាមដានរបាយការណ៍អាកាសធាតុ។
កាកបាទក្រហមកម្ពុជាបានលើកឡើងថា ខ្លួនបានបញ្ជូនក្រុមការងារទៅកាន់ស្រុកកែវសីមា និងកោះញែក ក្នុងខេត្តមណ្ឌលគិរី កាលពីថ្ងៃទី២៧ ខែកញ្ញា ដោយបានចែកអំណោយដល់អ្នករងគ្រោះដោយទឹកជំនន់ចំនួន ៩៥០គ្រួសារ ដែលអំណោយទាំងនោះរួមមាន អង្ករ មីកញ្ចប់ អាហារផ្សេងៗទៀត និងសម្ភារៈចម្អិន ក៏ដូចជាមុង ភួយ កន្ទេល និងក្រមាផងដែរ។
វីដេអូមួយដែលបានបង្ហោះនៅលើបណ្តាញសង្គមដោយអ្នកភូមិ៣ ក្នុងខេត្តរតនគិរី បានបង្ហាញទិដ្ឋភាពស្រដៀងគ្នាទៅនឹងខេត្តផ្សេងទៀត ដែលផ្លូវ សាលារៀន វត្តអារាម ស្ពាន និងផ្ទះសសរខ្ពស់ៗនៅតែលិចលង់ដោយទឹកហូរត្រឡប់មកវិញកាលពីថ្ងៃចន្ទ។ អ្នកភូមិត្រូវបានគេឃើញកំពុងវេចខ្ចប់សម្ភារចាំបាច់ ដោយខ្លះដឹកជញ្ជូនរបស់របរតាមទឹកដោយម៉ូតូ និងត្រាក់ទ័រ។
ខេត្តពោធិ៍សាត់ក៏បានជួបប្រទះនឹងភ្លៀងធ្លាក់ខ្លាំងនៅសប្តាហ៍នេះ បណ្តាលឱ្យមានការបាក់ដី ខូចខាតផ្លូវ និងបិទចរាចរណ៍នៅលើផ្លូវជាតិលេខ៥៥ ក្នុងតំបន់អន្ទង់អាំង។
លោក ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ទទួលបន្ទុកការងារខេត្ដរតនគិរី បានមានប្រសាសន៍ថា លោកបានដឹកនាំក្រុមអ្នកជំនាញកាលពីដើមសប្តាហ៍នេះ ដើម្បីវាយតម្លៃការខូចខាតផ្នែកកសិកម្មនៅខេត្តរតនគិរី។
លោកបានមានប្រសាសន៍ថា៖ «ដំណាំនៅស្រុកកូនមុំ និងលំផាត់ រងផលប៉ះពាល់យ៉ាងខ្លាំងដោយសារទឹកជំនន់។ អាជ្ញាធរពាក់ព័ន្ធកំពុងសិក្សា និងវាយតម្លៃផលប៉ះពាល់នៃទឹកជំនន់លើដីកសិកម្មតាមបណ្តោយទន្លេស្រែពក»។
ដំណាំនៅខេត្តរតនគិរីរងការខូចខាតខ្លាំងជាងគេដោយសារព្យុះ ដោយមានដីស្រែជាង ៧៥០ ហិកតាត្រូវបានជន់លិច រួមទាំងដំណាំចម្រុះផ្សេងទៀតដូចជាដំឡូងមី និងសណ្តែកសៀង។ នេះបើតាមក្រសួងកសិកម្ម រុក្ខាប្រមាញ់ និងនេសាទ។ ទឹកជំនន់ជាកត្តាចម្បងដែលបណ្តាលឱ្យខាតបង់ផ្នែកកសិកម្មនៅកម្ពុជា។ ក្នុងឆ្នាំ២០២៤ ស្រូវជាង ៤០ ០០០ ហិកតា រងផលប៉ះពាល់ កើនឡើងពីជាង ២២ ០០០ ហិកតា ក្នុងឆ្នាំ២០២៣៕
ប្រែសម្រួលពីអត្ថបទភាសាអង់គ្លេស៖ Floods Sweep Provinces, Devastating Crops and Leaving One Dead, Four Missing
