សាលាដំបូងរាជធានីភ្នំពេញកាលពីថ្ងៃអង្គារបានចោទប្រកាន់មនុស្ស១៣នាក់ដែលជាប់ពាក់ព័ន្ធនឹងការរត់គេចខ្លួនរបស់ជនជាប់ចោទជួញដូរគ្រឿងញៀនជនជាតិចិនពីពន្ធនាគារ អំឡុងពេលសមត្ថកិច្ចនាំមកព្យាបាលធ្មេញនៅគ្លីនិកធ្មេញមួយកន្លែងក្នុងខេត្តសៀមរាប។
តុលាការសម្រេចឃុំខ្លួនជនសង្ស័យទំាង១៣នាក់នៅពន្ធនាគារព្រៃស។ បទចោទទាំងនោះរួមមានលួចរត់ពីពន្ធនាគារ បង្ខាំងមនុស្សដោយខុសច្បាប់ បោះបង់អាវុធក្នុងទីកន្លែងសាធារណៈ រៀបចំចាត់តាំងក្រុមជនប្រដាប់អាវុធ សម្អាតប្រាក់ រក្សាទុកដោយខុសច្បាប់នូវសារធាតុញៀន និងកាន់កាប់ និងដឹកជញ្ជូនអាវុធដោយគ្មានខុសច្បាប់។
លោក ប្លង់ សុផល អ្នកនាំពាក្យសាលាដំបូងរាជធានីភ្នំពេញបានបញ្ជាក់ថា ជនសង្ស័យកំពុងស្ថិតនៅក្នុងពន្ធនាគារ រង់ចាំការសាកសួររបស់តុលាការ ដែលមិនទាន់បានកំណត់ពេលនៅឡើយ។
កាលពីសប្តាហ៍មុន អគ្គស្នងការនគរបាលជាតិបានបញ្ជាក់ថា មនុស្ស១១នាក់ត្រូវបានឃាត់ខ្លួនក្នុងនោះមានឈ្មោះ Chen Hsin Han ជាជនជាប់ចោទជួញដូរគ្រឿងញៀនផងដែរ។ កាលពីថ្ងៃអង្គារ អគ្គស្នងការនគរបាលជាតិបានរាយការណ៍បន្ថែមថា នគរបាលបានឃាត់ខ្លួនជនសង្ស័យពីរនាក់ទៀតនៅខេត្តសៀមរាប។
យោងតាមលោក ម៉ក់ ជីតូ អគ្គស្នងការរងនគរបាលជាតិបានឲ្យដឹងថា ជនសង្ស័យដែលត្រូវចោទប្រកាន់រួមមានជនជាតិចិនតៃវ៉ាន់២នាក់ ជនជាតិខ្មែរ៣នាក់ ជនជាតិខ្មែរអាមេរិកកាំង៦នាក់ ជនជាតិចិនអាមេរិកម្នាក់ និងអារ៉ាប៊ីសាអូឌីតម្នាក់។
លោកបានបន្ថែមថា សមត្ថកិច្ចនៅបន្តស៊ើបអង្កេតស្វែងរកសមាជិកក្រុមឧក្រិដ្ឋជនបន្ថែមទៀត ដែលពាក់ព័ន្ធនឹងការប្រើប្រាស់អាវុធរំដោះជនជាប់ចោទ។ លោកបានបន្តថា ជនជាតិតួកគីពីរនាក់ទៀតត្រូវបានកំណត់មុខសញ្ញា ប៉ុន្តែមិនទាន់ត្រូវបានចាប់ខ្លួននៅឡើយ។
លោក នុត សាវនា អ្នកនាំពាក្យនាយកដ្ឋានពន្ធនាគារក្រសួងមហាផ្ទៃបានបញ្ជាក់ថា បច្ចុប្បន្នជនសង្ស័យទាំង១៣នាក់កំពុងស្ថិតក្នុងពន្ធនាគារព្រៃស។ លោកមានប្រសាសន៍ថា ក្រោយជួបករណីរត់គេចខ្លួនរបស់ជនជាប់ចោទជួញដូរគ្រឿងញៀនមក មន្ត្រីពន្ធនាគារបានពង្រឹងវិធានការទប់ស្កាត់កុំឲ្យមានការរត់គេចខ្លួនបែបនេះម្ដងទៀត។
លោកមានប្រសាសន៍បន្ថែមថា៖ «យើងបានពង្រឹងការងារសន្តិសុខយ៉ាងយកចិត្តទុកដាក់។ ប្រធានមណ្ឌលបានរៀបចំក្រុមការងារ និងផែនការការពារ និងប្រព័ន្ធរាយការណ៍ច្បាស់លាស់»។
លោក អំ សំអាត នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូបានប្រាប់ ខេមបូចា ថា ទោះបីជាជនសង្ស័យស្ថិតនៅក្នុងឃុំក៏ដោយ ក៏នគរបាលគួរតែបន្តការស៊ើបអង្កេតឱ្យជ្រៅទៅលើថា តើជនជាប់ចោទទាំងនោះបានដឹងថា Chen Hsin Han ទៅដល់ពេទ្យធ្មេញនៅពេលណាដោយរៀបណា និងថា តើពួកគេទទួលបានកាំភ្លើងដោយរៀបណា។
លោកបានមានប្រសាសន៍ថា៖ «ទោះបីជាយើងឃើញថា ឧក្រិដ្ឋជនត្រូវបានចាប់ខ្លួនក៏ដោយ ក៏នៅមានការសង្ស័យជាច្រើន។ គាត់ត្រូវតែធ្វើការស៊ើបអង្កេតបន្ថែមទៀត ដើម្បីពង្រឹងសន្តិសុខ និងទប់ស្កាត់កុំឲ្យបញ្ហានេះកើតឡើងម្តងទៀត»៕
ប្រែសម្រួលពីអត្ថបទភាសាអង់គ្លេស៖ Phnom Penh Court Orders Detention of 13 Suspects Involved in Siem Reap Prison Escape
