ឪពុកម្ដាយសិស្សានុសិស្សលើកឡើងថា ពួកគេព្រួយបារម្ភពីសុវត្ថិភាពកូនៗ ក្រោយបាក់របងសាលាដែលបណ្តាលឱ្យមានស្នាមប្រេះទីធ្លាចាក់សាបអគារសិក្សានៅសាលាចតុមុខ ដោយសារតែមានការដ្ឋានសាងសង់ចំណតក្រោមដី និងការិយាល័យធ្វើការរបស់កម្លាំងនគរបាលជាតិនៃក្រសួងមហាផ្ទៃ នៅលើសួនច្បារក្បែររបងសាលាចតុមុខ កាលពីសប្ដាហ៍មុន។
អ្នកស្រី លឹម ចិន្តា ជាអាណាព្យាបាលម្នាក់ ដែលមានកូនរៀននៅថ្នាក់ទី៨ នៃអនុវិទ្យាល័យចតុមុខ លើកឡើងពីក្ដីបារម្ភចំពោះសុវត្ថិភាពកូនរបស់អ្នកស្រីក្រោយមានការបាក់របងសាលា និងមានស្នាមប្រេះអគារ ទោះបីមានការបញ្ជាក់ពីនាយកសាលាថាមិនមានអ្វីកើតឡើងលើអគារដែលមានស្នាមប្រេះនោះក៏ដោយ។
អ្នកស្រី ចិន្តា បញ្ជាក់ថា៖ «យើងបារម្ភគឺបារម្ភ តែខាងសាលាគាត់អត់សូវរវល់ និយាយទៅគាត់ដូចខ្លាចគេដែរ ចឹងយើងមិនដឹងធ្វើម៉េចទេ ព្រោះជាក់ស្ដែងវាបាក់ហើយ វាគ្មានការពារត្រឹមត្រូវទេ»។
អ្នកស្រីបន្តថា ខណៈអគារថ្នាក់រៀនមានស្នាមប្រេះ និងបាក់របងបែបនេះហើយ ខាងសាលានៅតែបន្តឱ្យសិស្សមករៀននៅក្នុងថ្នាក់ធម្មតា បើទោះជាក្រុមអាណាព្យាបាលដាក់សំណើសុំជួបជជែកពីបញ្ហានេះ តែខាងសាលាមិនឆ្លើយតប។
អ្នកស្រីបន្តថា៖ «អាពួកហ្នឹង[ការបាក់អគារ] វាអត់ប្រាប់យើងមុនទេណា៎ តែវាត្រូវបាក់វាបាក់ហើយ ខាងសាលាអត់មានឆ្លើយតបជាមួយខាងយើងទេ គឺស្ងាត់ស្ងៀមអត់ហ៊ានឱ្យយោបល់យើងអស់ការបារម្ភអីទេ»។
អ្នកស្រីអះអាងថា អ្នកស្រីគ្រាន់តែចង់បានដំណោះស្រាយ ដើម្បីបញ្ចៀសបញ្ហាដែលនឹងកើតឡើងដោយចៃដន្យ ហើយបើគណៈគ្រប់គ្រងនៅតែមិនបញ្ជាក់ឱ្យអស់កង្វល់ អ្នកស្រីនឹងបញ្ចូនកូនអ្នកស្រីទៅរៀនសាលាផ្សេង ដើម្បីបង្ការនូវហានិភ័យដែលអាចកើតឡើងនៅថ្ងៃណាមួយ។
អ្នកស្រី ចិន្តា បន្ថែមថា៖ «កូនខ្ញុំរៀនអគារជាប់ហ្នឹង[ការដ្ឋាន] កន្លែងបាក់ហ្នឹង បើវាបាក់ គឺប៉ះពាល់កូនសិស្សទាំងអស់ ហើយឆ្នាំក្រោយខ្ញុំនឹងដូរកូនខ្ញុំឱ្យទៅរៀនសាលាផ្សេង»។
បើតាមការសាកសួរពីក្រុមយុវសិស្សជាច្រើននាក់នៅអនុវិទ្យាល័យចតុមុខ បានប្រាប់ឱ្យដឹងថា មុនពេលបាក់របងសាលា គឺឮសូរសម្លេងផាំង និងបែកផ្កាភ្លើងចេញពីទីតាំងដែលបាក់របងសាលា។ នាពេលនោះ សិស្សស្រីប្រុស ក៏ដូចជាគ្រូបង្រៀនបានរត់ចុះពីលើអគារ ដោយភាពភ័យស្លន់ស្លោគ្រប់ៗគ្នា។
យុវតី សុគន្ធ និរតី[ឈ្មោះអ្នកសារព័ត៌មានដាក់ឱ្យ] និយាយថា៖ «ពេលហ្នឹងខ្ញុំកំពុងរៀបសរសេរតាមអាន ស្រាប់តែឮផាំង ហើយមានផ្កាភ្លើងមួយឆ្វាចហ្នឹងដូចរន្ទះបាញ់អ៊ីចឹង ហើយខ្ញុំនឹងលោកគ្រូអ្នកគ្រូនាំគ្នារត់ចេញក្រៅ ខ្ញុំរាងភ័យញ័រដៃញ័រជើង ឯគ្រូខ្លះគាត់មានបេះដូង[ជំងឺបេះដូង] គាត់ខ្យល់ចាប់ដែរ គាត់ភ័យ»។
និរតី ជាសិស្សស្រីម្នាក់រៀនថ្នាក់ទី៨ នៃអនុវិទ្យាល័យចតុមុខ បានបន្តថា រូបខ្លួនក៏ដូចជាសិស្សដទៃទៀតរងការរំខានដោយសារតែសំឡេងការដ្ឋានសំណង់នៅជាប់របងសាលា។ ហើយជាញឹកញយ យុវតីនេះថា ពិបាកស្ដាប់គ្រូពន្យល់មេរៀនទៀតផង។
និរតី បញ្ជាក់ថា៖ «វាប៉ះពាល់ដល់ការសិក្សាដល់សិស្សផ្សេងៗខ្លាំងមែនទែនទាំងខ្ញុំផ្ទាល់ដែរ ហើយលោកគ្រូអ្នកគ្រូខ្លះគាត់អត់បានពន្យល់មេរៀនទេ ដោយសារតែឮសំឡេងថ្លង់ជិតអគារហ្នឹងខ្លាំងមែនទែន»។
យុវតីរូបនេះ ឱ្យដឹងថា ដោយសារតែមានការរំខានដោយសំឡេងបែបនេះហើយ ទើបមានគ្រូបង្រៀនមួយចំនួនមិនមកបង្រៀន ហើយផ្ញើតែមេរៀនឱ្យសិស្សស្វ័យសិក្សាដោយខ្លួនឯង។
និរតី បានបន្ថែមថា៖ «ពេលខ្លះគ្រូខ្លះអត់មកបង្រៀន គាត់មកបង្រៀនដែរតែដូចជាពិបាករៀនគាត់ដាក់តែមេរៀនហើយគឺអត់ពន្យល់ទេ ព្រោះបើពន្យល់ក៏ស្ដាប់អត់ឮដែរ គ្រូខ្លះគាត់ខំស្រែកក៏អត់ឈ្នះជាមួយត្រាក់ទ័រហ្នឹងដែរ»។
បើទោះបីជាគណៈគ្រប់គ្រងសាលា ប្រាប់សិស្សានុសិស្សថា បញ្ហានេះ មិនមានអ្វីគួរឱ្យបារម្ភប៉ុន្តែយុវតីរូបនេះ អះអាងថា សិស្សមួយចំនួនដែលរៀននៅអគារជាប់ការដ្ឋានសំណង់របស់ក្រសួងមហាផ្ទៃ មិនហ៊ានឡើងទៅរៀននៅក្នុងបន្ទប់ឡើយ គឺរៀននៅក្រោមរោងអង្គុយលេងក្រោមដើមឈើ ព្រោះបារម្ភពីសុវត្ថិភាព។
និរតី ប្រាប់ទៀតថា៖ «ព្រោះអគារចាប់ផ្ដើមរាងហើបគ្រឹះខាងក្រោម ហើយវាអត់មានដំណោះស្រាយទេ ម៉ាក់ប៉ាខ្ញុំអត់ឱ្យខ្ញុំឡើងទៅលើអគារហ្នឹងទៀតទេ ព្រោះដោយសារតែនៅកៀនរបងអគារ ជញ្ជាំងថ្នាក់ខ្ញុំវារាងប្រេះ ហើយរញ្ជួយអគារ ដូចរញ្ជួយដី ចឹងខ្ញុំសម្រេចចិត្តថាទៅអង្គុយរៀនក្រោមសង្ក័សីវិញ[[រោងសង្ក័សី]»។
ចំណែកសិស្សមួយក្រុមទៀតរៀនថ្នាក់ទី៩ នៃអនុវិទ្យាល័យចតុមុខ លើកឡើងស្រដៀងគ្នាថា នៅពេលដែលមានការបាក់របងសាលាដូច្នេះ ធ្វើឱ្យពួកគេមានការបារម្ភពីសុវត្ថិភាព ខណៈការដ្ឋាននេះ ក៏មានសំឡេងរំខានដល់ការរៀនសូត្ររបស់ពួកគេផងដែរ។
យុវតី សូណា ជាសិស្សម្នាក់ក្នុងចំណោមសិស្សផ្សេងទៀតដែលបានជួបសម្ភាសជាមួយអ្នកសារព័ត៌មាន បាននិយាយថា៖ «ខ្ញុំភ័យតិចៗពេលឮដំណឹងដំបូង ភ័យបុកពោះដែរខ្លាចរៀនៗទៅវាស្រុត ហើយរំខានព្រោះពេលរៀនទៅមិនសូវឮសំឡេងគ្រូបង្រៀន»។
ដោយសារតែកម្ពុជាធ្លាប់មានករណីបាក់រលំអគារមួយនៅខេត្តកែប កាលពីឆ្នាំកន្លងទៅ ទើបបណ្ដាលឱ្យអាណាព្យាបាលសិស្សដែលមានកូនរៀននៅអនុវិទ្យាល័យចតុមុខ មានក្ដីបារម្ភចំពោះសុវត្ថិភាពកូនៗរបស់ពួកគេ។
អ្នកស្រី ផាន សុខេម ជាម្ដាយមួយរូបដែលមានកូនរៀននៅអនុវិទ្យាល័យចតុមុខ លើកឡើងថា ម្ដាយរូបណាក៏បារម្ភពីសុវត្ថិភាពកូនៗដែរ តែបញ្ហាត្រង់ថា សាលាឱ្យរក្សាភាពស្ងៀមស្ងាត់ និងអះអាងថាគ្មានការបាក់រលំអគារឡើយ។
អ្នកស្រី សុខេម បន្តថា៖ «ចុះឥឡូវខ្ញុំសួរយើង បើមានកូនរៀននៅហ្នឹងបារម្ភអត់? ចឹងខ្ញុំបារម្ភដូចគ្នា ហើយថ្នាក់លើឱ្យរក្សាភាពស្ងៀមស្ងាត់ សួរថាកូនគាត់មួយណារៀននៅសាលារដ្ឋ ចឹងគាត់ឱ្យរក្សាភាពស្ងៀមស្ងាត់វាត្រូវហើយ ព្រោះអត់មានកូនគាត់នៅក្នុងហ្នឹង»។
អ្នកស្រីបន្តថា ដោយសារតែនៅតែកើតកូនចិត្តខ្វល់ពីសុវត្ថិភាពកូន អ្នកស្រីនិងអាណាព្យាបាលផ្សេងទៀត បានស្នើតាមរយៈនាយិកា ទៅនាយកសាលា ដើម្បីសុំឱ្យសិស្សរៀនអនឡាញរហូតដល់ប្រឡងឌីម្លូប ឬវ៉ាកងមុនពេលកំណត់ តែមិនមានការឆ្លើយតបមកវិញឡើយ។
អ្នកស្រីបន្ថែមថា៖ «ឱ្យកូនរៀននៅខាងក្រៅម៉េចៗទេ វាពិបាកភ្នែកដែរ សាលារដ្ឋវាអ៊ីចឹង»។
នាយកអនុវិទ្យាល័យចតុមុខ លោក ឌឹម វិរឫទ្ធិ ទទួលស្គាល់ថា ពិតជាមានការបាក់របងសាលា និងមានស្នាមប្រេះទីធ្លាចាក់សាបរបស់អគាសាលា ប៉ុន្តែបដិសេធថាមិនមានការស្រុតអគារ ឬប៉ះពាល់គ្រឹះអគារ ដោយសារតែការដ្ឋានសំណង់នៅក្បែរសាលាឡើយ។
លោកថ្លែងថា៖ «មានការដ្ឋានរបស់ក្រសួងមហាផ្ទៃគេជីកកន្លែងក្រោមដីសម្រាប់ដាក់ម៉ូតូនាំក្បួនប្រតិភូរាជរដ្ឋាភិបាល ហើយមានការហូរច្រោះដី ហើយបណ្ដាលឱ្យបាក់របង មិនមែនបាក់គ្រឹះទេ វាគ្រាន់តែរលំតួរបងប្រហែល២០ម៉ែត្រ។ ហើយអគារវាប៉ះពាល់សាបខាងក្រោមដោយសារច្រោះដីខាងក្រោម វាស្រុតសាប មិនមែនអគារទាំងមូលឡើយ»។
យ៉ាងណាមិញ ដោយសារតែមានអាណាព្យាបាលនៅតែបារម្ភថា ខ្លាចមានការបាក់ស្រុតអគារ ហើយមិនហ៊ានឱ្យកូនៗរៀននៅក្នុងអគារនោះ និងខ្លាចមានសំឡេងរំខានដល់សិស្សរៀនផង លោកនាយកសាលា បានឱ្យសិស្សទៅរៀននៅអគារផ្សេង ថ្វីបើមានមន្រ្តីជំនាញចុះមកវាយតម្លៃថាមិនមានបញ្ហាក៏ដោយ។
លោកបានបញ្ជាក់ថា៖ «អាំងស៊ីញ៉រ[វិស្វករ]ខាងក្រសួងមកពិនិត្យ ហើយធានាថាមិនមានការបាក់ស្រុតអគារទាំងមូលឱ្យគ្រោះថ្នាក់បានទេ។ ប៉ុន្តែដោយសារតែការភ័យខ្លាច កុំឱ្យមានការភ័យបារម្ភរបស់អាណាព្យាបាល យើងខ្ញុំក៏ប្ដូរអគារហ្នឹងលែងឱ្យរៀនហើយ»។
អភិបាលខណ្ឌដូនពេញ លោក ជា ខេមា លើកឡើងថា តាំងតែពីកើតមានបញ្ហាបាក់របងសាលា ខាងមន្ត្រីជំនាញ និងខណ្ឌដូនពេញ បានចុះត្រួតពិនិត្យរួចហើយ មិនមានអ្វីបង្កជាហានិភ័យ និងមិនប៉ះពាល់ដល់គ្រឹះសាលាទេ។
លោក ខេមា បានបន្ថែមថា៖ «ខាងខណ្ឌមានសមាសភាពទាំងអស់ ចុះមកដោះស្រាយ ពិភាក្សាគ្នាអស់ហើយគេនឹងធ្វើសងវិញ អត់មានអីប៉ះពាល់ទេ គ្រាន់តែរបងសាលាវាចាស់រាងផុយ»។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជា លើកឡើងថា ការសាងសង់សំណង់អ្វីមួយ ជាពិសេសស្ថាប័នរដ្ឋ គួរតែសិក្សាពីផលប៉ះពាល់ ព្រោះមិនចាំបាច់ទាល់តែអាណាព្យាបាលសិស្សប្រតិកម្មនោះទេ ក្រសួងសាមីគួរតែធានាឱ្យបាននូវសុវត្ថិភាពជាចម្បង។
លោក សន ជ័យ ថ្លែងថា៖ «រាល់គម្រោងសាងសង់ផ្សេងៗតែងតែបានគិតអំពីផលប៉ះពាល់ ចឹងនៅពេលដែលផលប៉ះពាល់បែបនេះកើតឡើង ខ្ញុំគិតថាការដោះស្រាយភ្លាមឬក៏ការប៉ះពាល់ណាមួយ មិនចាំបាច់ឮការត្អូញត្អែរ ឬការបារម្ភអំពីអាណាព្យាបាលទេ គឺគេគួរតែដោះស្រាយភ្លាមៗតែម្ដង»។
សូមជម្រាបជូនថា ការដ្ឋានដែលកំពុងសាងសង់ក្បែររបងសាលាចតុមុខ គឺជាគម្រោងរបស់ក្រសួងមហាផ្ទៃ ដើម្បីសាងសង់ចំណតក្រោមដី និងការិយាល័យធ្វើការរបស់នគរបាលជាតិ នាយកដ្ឋានអង្គរក្សនៃអគ្គស្នងការដ្ឋាននគរបាលជាតិ ក្រសួងមហាផ្ទៃ ហើយគម្រោងនេះនឹងបញ្ចប់មុនការប្រជុំអាស៊ាននាពេលខាងមុខនេះ។ នេះបើតាមការបញ្ជាក់របស់លោកនាយកសាលាចតុមុខ៕