សមាគមសម្ព័ន្ធអ្នកសារព័ត៌មានកម្ពុជា

ភាសាខ្មែរ
  • English
  • ភាសាខ្មែរ

តុលាការអនុញ្ញាតឲ្យ លោក កឹម សុខា ចូលរួមគោរពវិញ្ញាណក្ខន្ធកងទ័ពកម្ពុជា

លោក កឹម សុខា ចូលរួមគោរពវិញ្ញាណក្ខន្ធកងទ័ពកម្ពុជា នៅព្រឹកថ្ងៃទី៣១ ខែកក្កដា ឆ្នាំ២០២៥។ (រូបភាពពីហ្វេសប៊ុក ផែង ហេង)
លោក កឹម សុខា ចូលរួមគោរពវិញ្ញាណក្ខន្ធកងទ័ពកម្ពុជា នៅព្រឹកថ្ងៃទី៣១ ខែកក្កដា ឆ្នាំ២០២៥។ (រូបភាពពីហ្វេសប៊ុក ផែង ហេង)

លោក ផែង ហេង​ ជាមេធាវីការពារក្តីលោក កឹម សុខា​​ អតីតមេដឹកនាំគណបក្សប្រឆាំងបានឱ្យដឹងថា​ នៅព្រឹកថ្ងៃព្រហស្បតិ៍នេះ លោក កឹម សុខា ត្រូវបានតុលាការអនុញ្ញាតឲ្យលោកទៅគោរពវិញ្ញាណក្ខន្ធវីរៈកងទ័ពកម្ពុជា ដែលបានស្លាប់ក្នុងការបាញ់ប្រហាររបស់ទាហានថៃ។

លោក កឹម សុខា បានទៅចូលរួមបុណ្យសពនាយទាហាពីរនាក់ នៅខេត្តកំពង់ចាម និងខេត្តត្បូងឃ្មុំ។

លោក កឹម សុខា​ បានថ្លែងទៅកាន់គ្រួសារនៃសពថា៖ «ប្តីអ្នក ឪពុកអ្នកគឺជាឈាមខ្ញុំ ពេលនេះអ្នកឈឺចាប់ ខ្ញុំក៏ឈឺចាប់ជាមួយអ្នក ហើយខ្មែរជាច្រើនទៀតក៏ឈឺចាប់ និងចងចាំនូវវីរភាពនៃការលះបង់ដ៏ធំធេងនេះ។ ខ្មែរយើងឈឺចាប់ដោយសង្គ្រាមឈ្លានពានជាច្រើនដងកន្លងមកហើយ មិនគួរណាពេលនេះសៀមបន្តឈ្លានពានធ្វើឲ្យយើងឈឺចាប់ទៀតសោះ»។

ក្នុងឱកាសនោះលោកក៏បានថ្លែងទៅកាន់អ្នកសារព័ត៌មានថា៖ «ខ្មែរយើងធ្លាប់ឆ្លងកាត់សង្គ្រាមឈ្លានពានច្រើនមកហើយ មិនគួរដល់ពេលនេះហើយ ថៃមកឈ្លានពានយើងទៀត វាហួសហេតុ។ សូមអំពាវនាវខ្មែរសាមគ្គី គ្នាដើម្បីភាពរឹងមាំប្រទេសយើង ការពារទឹកដីសម្រាប់កូនចៅយើងបន្តទៀត»។

លោក កឹម សុខា អតីត​ប្រធាន​គណបក្ស​សង្គ្រោះ​ជាតិ ត្រូវ​បាន​តុលាការ​រក​ឃើញ​ពិរុទ្ធភាព​ពី​បទ​ក្បត់​ជាតិ ហើយ​ត្រូវ​បាន​កាត់​ទោស​ឲ្យ​ជាប់​ពន្ធនាគាររយៈ​ពេល​ ២៧ឆ្នាំ កាល​ពី​ខែ​មីនា ឆ្នាំ​២០២៣។ លោកត្រូវបានតុលាការសម្រេចឃុំខ្លួនក្នុងផ្ទះ។

លោក​ត្រូវបានចាប់ខ្លួននៅឆ្នាំ២០១៧ ដែល​​ចោទ​ពីប​ទ​សមគំនិតជាមួយសហរដ្ឋអាមេរិក ដើម្បីអនុវត្តអ្វីដែលគេហៅថា បដិវត្តន៍ពណ៌ ដើម្បីផ្តួលរំលំរដ្ឋាភិបាល ៕

ព័ត៌មានថ្មី

អត្ថបទពេញនិយម