សមាគមសម្ព័ន្ធអ្នកសារព័ត៌មានកម្ពុជា

លោកនាយករដ្ឋមន្ត្រី ហ៊ុន ម៉ាណែត ដាក់ចេញគោលនយោបាយកសិកម្មដើម្បីលើកកម្ពស់ជីវភាពកសិករ

ទិដ្ឋភាពវាលស្រែក្នុងខេត្តកណ្ដាល។ រូបភាពថតកាលពីថ្ងៃទី២ ខែវិច្ឆិកា ឆ្នាំ២០២៣ (ខេមបូចា/ព្រីង សំរាំង)
ទិដ្ឋភាពវាលស្រែក្នុងខេត្តកណ្ដាល។ រូបភាពថតកាលពីថ្ងៃទី២ ខែវិច្ឆិកា ឆ្នាំ២០២៣ (ខេមបូចា/ព្រីង សំរាំង)

រាជរដ្ឋាភិបាល​ថ្មី​បាន​ប្រកាស​គោលនយោបាយដើម្បី​លើក​ស្ទួយ​ផលិត​ផលកសិកម្ម រក្សា​លំនឹង​តម្លៃ​កសិផលក្នុង​ទី​ផ្សារ​ ផ្ដល់​ការ​គាំទ្រ​ផ្នែក​បច្ចេក​ទេស និង​ធ្វើ​ទំនើប​កម្ម​លើ​កសិកម្ម​បែប​ប្រពៃណី​។​

កាល​ពី​ថ្ងៃ​ចន្ទ លោក​នាយលក​រដ្ឋ​មន្ត្រី ហ៊ុន ម៉ាណែត បាន​បង្ហាញកម្មវិធី​គោលនយោបាយ​អាទិភាពទី​ប្រាំ និង​ទី​ប្រាំ​មួយ ដោយ​មាន​ការ​ផ្ដោត​សំខាន់​លើ​ការ​អភិវឌ្ឍ​វិស័យ​កសិកម្ម​។ គោល​បំណង​របស់​កម្ម​វិធី​នេះ​រួម​មាន​ការ​លើក​កម្ពស់​ផលិត​ផល​កសិកម្ម ស្វែង​រ​កទី​ផ្សារ រក្សា​ស្ថិរភាព​តម្លៃ​ផលិត​ផល​កសិកម្ម​តាម​រយៈ​កម្មវិធី​ហិរញ្ញបទាន ការ​ដាក់​ពង្រាយ​មន្ត្រី​កសិកម្ម​នៅ​តាម​ឃុំ ឬ​សង្កាត់ និង​ការអភិវឌ្ឍ​សហគមន៍កសិកម្មទំនើប​។​

លោក ហ៊ុន ម៉ាណែត មាន​ប្រសាសន៍​ថា​ការ​ចង​ក្រង​សហគមន៍​កសិករឲ្យ​រឹងមាំ និង​ការ​រៀប​ចំសហគមន៍​កសិករ​ទំនើប​គឺ​មាន​សារសំខាន់​ ដោយ​ថា​កា​រធ្វើ​បែបនេះ​​នឹង​ជួយ​បង្កើន​ផលិត​ផល​សហគមន៍ ធានាប្រសិទ្ធភាព​នៃ​កា​រផលិត និង​ចង្វាក់ផ្គត់​ផ្គង់ ហើយ​ក្នុង​នោះ​រដ្ឋាភិបាល​ក៏​បាន​ត្រៀម​ខ្លួន​អន្តរាគមន៍ ក៏​ដូច​ជា​មធ្យោបាយ​ផ្សេង​ៗ​ទៀត​។​

លោក​នាយក​រដ្ឋ​មន្ត្រី​ថ្លែង​ថា៖ «យើង​បានដាក់ទិស​ដៅ​ប្រែក្លាយនឹងដើរចេញ​ពី​កសិកម្ម​បែប​គ្រួសារ​ទៅ​ជា​កសិកម្ម​បែបទំនើប និង​ឧស្សាហកម្មកសិកម្ម​ទ្រង់​ទ្រាយ​ធំ ដែល​ទាមទារ​ឲ្យ​កសិករ​​នីមួយៗដែលចូលទៅក្នុង​សហគមន៍​កសិកម្ម​ទំនើប និង​មានផ្នត់​គំនិត​ដែលចង់ឲ្យ​សហគមន៍​របស់​ខ្លួន​មាន​ការ​ប្រកួត​ប្រជែង​»។​

សម្រាប់​គោល​នយោបាយ​ជារួម សហគមន៍​គួរ​ធ្វើ​ការ​រួម​គ្នា​ដើម្បីធ្វើ​ឲ្យ​កម្ពុជា​មាន​ការ​ប្រកួត​ប្រជែងដើម្បីឱ្យទៅជាតំបន់ដែលមានភាពប្រកួតប្រជែងជួយដល់សេដ្ឋកិច្ច ជួយដល់​​វិស័យ​កសិកម្ម​​មាន​ការ​ប្រកួត​ប្រជែង​ទាំង​ក្នុង​ស្រុក និង​ក្រៅ​ស្រុក។

លោក​នាយក​រដ្ឋ​មន្ត្រី​បន្ថែម​ថា៖ «ការ​ចងក្រងគ្នាជាសហគមន៍​របស់កសិករ​គឺពិត​ជាមានសារៈ​សំខាន់ ហើយ​វា​នឹងធានាបាននូវខ្សែចង្វាក់ផលិតកម្ម ​ និង​ខ្សែចង្វាក់​ផ្គត់​ផ្គង់ដោយ​ប្រសិទ្ធភាព​​»​។​

បើ​តាម​លោក​នាយក​រដ្ឋ​មន្ត្រី មាន​បេក្ខជន​ដាក់​ពាក្យ​ចូលប្រឡង​ប្រជែង​​បម្រើ​ការ​ជា​មន្ត្រី​កសិកម្ម​នៅ​តាម​ឃុំ​សង្កាត់​ប្រមាណ​ជា​១០ ០០០​នាក់ បន្ទាប់ពី​មានការ​ប្រកាស​ជ្រើស​រើសមន្ត្រី​ចំនួន​២៥០​នាក់​​កាលពី​ខែ​តុលា​កន្លង​មក ដើម្បី​ទៅ​បម្រើ​ការ​នៅ​ខេត្ត​អាទិភាព​ចំនួន​១៧ សម្រាប់​ឆ្នាំ​២០២៣​នេះ។​

​ខេត្ត​ទាំង​នោះ​រួម​មាន​តាកែវ កំពង់ស្ពឺ កំពង់ធំ សៀមរាប បន្ទាយ​មានជ័យ កំពង់ចាម កំពង់​ឆ្នាំង បាត់ដំបង កំពត ពោធិ៍សាត់ ព្រៃវែង ព្រះវិហារ ត្បូងឃ្មុំ ស្វាយរៀង ឧត្តរមានជ័យ កណ្ដាល និង​មណ្ឌល​គិរី​។​

សម្រាប់​ឆ្នាំ​២០២៤ ក្រសួង​មុខងារ​សារធារណៈ​នឹង​ប្រកាស​ជ្រើសរើស​មន្ត្រី​កសិកម្ម​ចំនួន​៨០០​នាក់ និង​នៅ​ឆ្នាំ​២០២៥ ចំនួន​៥៥០​នាក់​។​

លោក​នាយក​រដ្ឋ​មន្ត្រី​មាន​ប្រសាសន៍​ទៀត​ថា៖​ ​​«​សម្រាប់​ខ្ញុំ​កសិកម្ម​​មិនសំខាន់​លើ​​អ្វីដែលយើងដាំ ឬ​ចិញ្ចឹម​អ្វី​នោះ​ទេ ប៉ុន្តែ​អ្វី​ដែល​សំខាន់​អ្វីដែលយើងដាំ ឬ​​ចិញ្ចឹម​បានប្រមូលផលច្រើន មាន​ទី​ផ្សារ​សម្រាប់​ [កសិផល]​ទាំង​នេះ ហើយ​បានចំណូលច្រើនដល់កសិករ​​។ នេះជា​គោលដៅធំ [របស់​យើង]»។​

លោក​បន្ថែម​ថា៖ «បើ​សិន​ជា​យើង​ចង់​ជួយ​ពួកគាត់ឲ្យដើរ [កសិករ] [វាមិនគួរ]មិងត្រឹម​តែជួយដាក់ទី​ផ្សារទេ ប៉ុន្តែ [ក៏] ត្រូវ​ជួយ​ផ្នែក​ហិរញ្ញប្បទាន និងជួយទាំង​បច្ចេក​ទេស​»។​

បន្ថែម​លើ​ការ​ផ្ដល់ជំនួយ​បច្ចេក​ទេស ការ​ប្រឹក្សាយោបល់ និង​ឥណទានជាដើម ហើយការរៀបចំហិរញ្ញវត្ថុកសិកម្មតាមរយៈ ធនាគារ​អភិវឌ្ឍន៍ជនបទ និង​កសិកម្ម និង​ធនាគារសហគ្រាសធុនតូច និងមធ្យមក ដែលម្ពុជា​បានដាក់ចេញ ទឹក​ប្រាក់​១០០​ លាន​ដុល្លារ ដើម្បី​ផ្តើមអន្តរាគមន៍ខ្សែចង្វាក់ផលិត​កម្ម ជាពិសេសអ្នកផលិត​។​

លោក ហ៊ុន ម៉ាណែត ក៏​បានជំរុញ​ឲ្យ​មន្ត្រីពាក់ព័ន្ធ​មាន​លក្ខណៈបុរេសកម្ម​ក្នុង​ការ​ជួយ​ផ្ដល់​ការណែ​នាំ​ដល់​កសិករ​ដើម្បី​ឲ្យ​មាន​ការ​ផ្លាស់​ប្ដូរ ជាជាង​ប្រតិកម្ម​ទៅ​នឹង​អ្វី​ដែល​កំពុង​ដាំ​ដុះ​។​

លោក​ពន្យល់​ថាប្រតិកម្ម​មាន​ន័យ​ថា​កន្លែងណាដែលប្រ​ជា​ពល​រដ្ឋ​បាន​ធ្វើអ្វីមួយ​តាំង​ពី​ដូន​តា​មកគឺត្រូវឆ្លើយតបដោយជួយពួកគាត់។

លោកបានមានប្រសាសន៍ថា៖ «​យើង​​ឆ្លើយ​តប​ជួយ​គាត់បាន​ប៉ុណ្ណឹង អីចឹង​បើ​ក្នុង​១ ០០០​គ្រួសារ​មាន​ផលិត​១០០មុខ យើង​ជួយ​១០០​មុខ​ដដែល​»។​

លោក​នាយក​រដ្ឋ​មន្ត្រី​បន្ថែមថា បុរេសកម្ម​មាន​ន័យ​ថា​ត្រូវគិត​គូរថា​តើ​ដើម្បីមានមាត្រដ្ឋាន​កន្លែងដែលអាចជួយគាត់ដើម្បីបង្វែរ ឧទាហរណ៍កន្លែងមានណាមាន​សក្កានុពល​សេដ្ឋកិច្ច​ជួយ​កសិករ​ឲ្យ​ផ្លាស់​ប្ដូរ​ទៅ​ដាំ​ដុះ​ដំណាំ​ផ្សេង​ឬ​យ៉ាងណា​។​

លោក​លើក​ឡើង​ថា៖ «​ឧទាហរណ៍​ថា​កន្លែង​ហ្នឹង​មាន​សក្កានុពល​ដាំស្វាយ​ចន្ទី ដែល​អាច​នាំ​ចេញ​បាន​បី​លាន​តោន។ ប៉ុន្តែ​កន្លែង​ហ្នឹងឥឡូវ​គាត់ធ្វើស្រូវ​។ បើ​សិនជា​យើង​ប្រតិកម្ម យើង​ត្រឹម​តែ​ជួយ​បច្ចេក​ទេសទៅ​ឲ្យ​គាត់​ដាំ​ដុះ​បាន​ល្អ គាត់​រក​ទីផ្សារ​ខ្លួន​ឯង»។

លោក​បន្ត​ថា៖ «​ប៉ុន្តែ​បើ​យើង​មានគោលការណ៍​​បុរេសកម្មបានន័យថា យើង​បានដាក់ទិសដៅប្រែ​ក្លាយ​កន្លែង​ហ្នឹង ទៅ​ជា​ខេត្ត​កំពង់ធំ ព្រះវិហារ​…ជាគោលដៅពង្រីកការដាំដុះស្វាយចន្ទី ឈាន​ដល់​ការ​ដំឡើង​រោងចក្រ និង​ផលិត​សម្រេច​»។​

ដើមស្វាយ​ចន្ទី​នៅក្នុងចម្ការមួយ នៅ​ក្នុង​ខេត្ត​រតនគិរី។ រូបភាព​ថត​កាលពី​ថ្ងៃទី​១៦ ខែឧសភា ឆ្នាំ​២០២០។ (រូបភាព​ផ្ដល់​ឲ្យ​)

នាយក​មជ្ឈមណ្ឌល​សិក្សា​គោល​នយោបាយ លោក ច័ន្ទ សុផល មាន​ប្រសាសន៍ថា​គោល​នយោបាយ​លើក​កម្ពស់​ផលិត​ផល​កសិកម្ម និង​រក​ទី​ផ្សារ​គឺ​ជាការដោះស្រាយចំអាទិភាព ដែល​កសិករ​ចង់​បាន​ ដែល​វាជា​កូនសោ​គន្លឹះនៃ​ការ​អនុវត្ត​គោល​នយោបាយ​ឲ្យ​មាន​ប្រសិទ្ធភាព​។​

លោក​បន្ថែម​ថា៖ «[ទាក់ទង​នឹង]ការ​ដាក់​ពង្រាយ​មន្ត្រី​កសិកម្ម​នៅ​តាម​ឃុំ ខ្ញុំ​យល់ថា​ពួកគាត់ [មន្ត្រី] គួរតែ​ដើរ​តួនាទី​ចម្បង​ក្នុង​ការ​ប្រមូល​ទិន្ន័យ និង​ផ្សព្វ​ផ្សាយ​ការ​បណ្ដុះ​បណ្ដាល​បច្ចេក​ទេស​​ដែល​មាន​ស្រាប់​នៅ​លើ​ប្រព័ន្ធ​យូធូប ឬ​អនឡាញ​»។​

លោក សុផល លើក​ឡើង​ដែរថា សម្រាប់​ការ​អនុវត្តគោលនយោបាយ​នេះ គឺ​ត្រូវ​មានធនធាន​គ្រប់​គ្រាន់ និង​នីតិវិធីមាន​ភាពបត់បែន ហើយ​មន្ត្រី ត្រូវ​មាន​ការ​តាំង​ចិត្ត​ក្នុង​ការ​បម្រើ​ផល​ប្រយោជន៍​ជាតិ។​

លោក ថាន់ ទ្បេង កសិករ​ក្នុង​ខេត្ត​បន្ទាយ​មាន​ជ័យ លើកឡើង​ថាលោក​មិន​បាន​ដឹង​ពីគោល​នយោបាយ​របស់​រដ្ឋាភិបាល​នោះទេ ប៉ុន្តែ​លោក​បាន​ឲ្យ​ដឹងថាទិន្នផល​ស្រូវ​ដែល​ប្រមូល​បានគឺ​ល្អ។ យ៉ាងណា​លោក​ថា​​ជី និង​កម្លាំងពល​កម្ម​មាន​តម្លៃ​ថ្លៃ​។​

លោក​បន្ថែម​ថា៖ «​ឆ្នាំនេះ​ខ្ញុំ​អាច​រក​ចំណូល​បាន​គ្រប់ ពីព្រោះខ្ញុំ​បាន​ធ្វើ​ពូជ​ស្រូវ​ដែល​អាច​ផ្ដល់​ទិន្នផលល្អ​ពីរ​ដង​ក្នុង​មួយ​ឆ្នាំ»។​

លោក​ទ្បេង​ មាន​ដី​ស្រែ​ចំនួន​១៣​ហិកតា​។ ឆ្នាំនេះ លោក​បាន​ប្រមូលផល​ស្រូវ​បាន​ប្រាំបីតោន​ក្នុង​មួយ​ហិកតា​។ ចំណែក​តម្លៃ​ស្រូវ​វិញ​គឺ​១២០០​រៀល​ក្នុង​មួយ​គីឡូក្រាម បើ​ធៀប​នឹង​ឆ្នាំ​មុន​មាន​ត្រឹម​១០៥០​រៀល​ក្នុង​មួយ​គីឡូក្រាម។​

លោក​បាន​បង្ហាញ​ការគាំទ្រ​ដល់​គោលនយោបាយ​របស់​រដ្ឋាភិបាល​ក្នុង​ការ​លើក​កម្ពស់​ផលិត​ផល​កសិកម្ម ជាពិសេស​ការ​ស្វែង​រក​តម្លៃទី​ផ្សារ​សមរម្យ​។​

លោក​ថា៖​ «ពេល​មាន​តម្លៃទីផ្សារ​ល្អ វាស្រួលលក់ ពីព្រោះ​ពេលបច្ចុប្បន្នយើង​ពឹង​តែ​លើ​ឈ្មួញ​កណ្ដាល»។​

កសិករ​ម្នាក់​ទៀត ឈ្មោះ ម៉ុត ម៉ុន នៅស្រុក​តំបែរ ​ខេត្ត​ត្បូង​ឃ្មុំ បាន​ឲ្យ​ដឹង​ដែរថា​កសិករ​ប្រឈម​នឹង​ការ​លំបាក​ច្រើន​យ៉ាង រួម​ទាំង​ជំនាញ និង​បច្ចេក​ទេស​​ដើម្បី​ដោះ​ស្រាយ​បញ្ហា​ប្រែ​ប្រួល​អាកាស​ធាតុ។​

លោក​បន្តថា៖ «​ខ្វះ​ការណែ​នាំ​ទៅ​ដល់​កសិករ ដើម្បី​ឲ្យ​សម្រប​ខ្លួនទៅតាម​អាកាសធាតុ​។ ខ្ញុំ​មិន​ដែល​ឃើញ​មន្ត្រី​មក​បង្រៀន​សហគមន៍​ក្នុង​តំបន់​របស់​ខ្ញុំ​ទេ​»។ លោក ម៉ុន មាន​ដី​ពីរ​ហិកតា សម្រាប់​ដាំ​ស្វាយចន្ទី និង​ដី​ជិត​កន្លះ​ហិកតា​ផ្សេង​ទៀត​សម្រាប់ធ្វើ​ស្រែ​។​

លោក​ថា៖ «ដូច​ជា​គ្រាប់​ស្វាយចន្ទីរបស់​ខ្ញុំអីចឹង ខ្ញុំ​លក់​បាន​ត្រឹម​តែ​៣២០០​រៀល​ក្នុង​មួយ​គីឡូក្រាម។ ខ្ញុំ​មិន​រួច​ថ្លៃ​កម្លាំង​ពលកម្មទេ ពីព្រោះ​ថាថ្លៃជី និង​ថ្លៃ​ថ្នាំ​ថ្លៃពេក។ ហើយ​នៅ​មាន​ការ​ចំណាយ​លើ​ថ្លៃ​ផ្សេង​ៗ​ទៀត»។ បញ្ហា​មួយ​ទៀត គឺ​ថា​តម្លៃ​គ្រាប់​ស្វាយ​ចន្ទី​នឹង​ធ្លាក់​ចុះ​នៅរដូវ​ប្រមូលផល​ចាប់​ផ្ដើម​។​។​

លោក​បន្ថែមថា​វា​ជា​រឿងល្អ​សម្រាប់​កសិករ ​បើ​តម្លៃ​គ្រាប់ស្វាយ​ចន្ទី​នៅ​ចន្លោះ​៧០០០ ទៅ​៨០០០​រៀល ប៉ុន្តែ​បើ​តម្លៃ​នៅ​តែបន្ត​ធ្លាក់​ចុះ កសិករ​នឹង​ធ្លាក់​ក្នុង​បំណុល​កាន់​តែ​ខ្លាំង និង​ប្រហែល​ជា​អាច​ត្រូវ​ចំណាក​ស្រុកទៅ​រក​ប្រាក់​ដើម្បី​សងបំណុល​ផង​ក៏​មាន​។​

លោក​ថា៖ «សម្រាប់​ខ្ញុំ ពីមួយ​ឆ្នាំ​ទៅ​មួយ​ឆ្នាំ ការចំណាយ​ធ្វើ​កសិកម្ម​កាន់​តែ​មាន​តម្លៃ​ថ្លៃទៅៗ»។​

ដោយ​គាំទ្រ​ចំពោះគោល​នយោបាយ​ថ្មីជួយ​ដល់កសិករ លោក​បញ្ជាក់ថា៖ «​ខ្ញុំ​គិត​ថា​វា​ល្អ​សម្រាប់​ពួកយើង​ដែល​ត្រូវ​ដាក់​បញ្ចូល​ទៅ​ក្នុង​សហគមន៍ ដែល​កសិករ​ដឹង​ថា​អ្វីល្អ​សម្រាប់ពួកគាត់»។​

(រាយការណ៍​បន្ថែម​ដោយ៖ រ៉ាន់ ស្រីដែត)

ប្រែសម្រួលពីអត្ថបទភាសាអង់គ្លេស PM Hun Manet Lays Out Agricultural Policy To Improve Farmers’ Livelihoods

191 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម