សមាគមសម្ព័ន្ធអ្នកសារព័ត៌មានកម្ពុជា
KH | EN

សមត្ថកិច្ច​សួរចម្លើយ​កូនប្រុស​មេដឹកនាំកំពូល​សាសនាឥស្លាមពាក់ព័ន្ធករណីចោទប្រកាន់រំលោភ​បំពាន​ផ្លូវភេទសិស្ស​ស្រី១៨នាក់

លោក កាមារ៉ូទីន សូហៃមី នៅឯទីស្នាក់ការនរគបាល ដែលបង្ហោះដោយ Freshnews ។
លោក កាមារ៉ូទីន សូហៃមី នៅឯទីស្នាក់ការនរគបាល ដែលបង្ហោះដោយ Freshnews ។

នាយកដ្ឋាន​ប្រឆាំងការជួញដូរមនុស្ស​និង​ការពារអនីតិជន​បានសួរចម្លើយ​លោក កាមារ៉ូទីន សូហៃមី កូនប្រុស​របស់​លោក សុះ កំរី មេដឹកនាំកំពូល​សាសនា​ឥស្លាម​នៅកម្ពុជា បន្ទាប់ពី​មាន​ការបែកចាយព័ត៌មាននៅ​លើ​បណ្ដាញសង្គម​ចោទប្រកាន់​រូបលោក​ថា​បាន​រំលោភបំពាន​ផ្លូវភេទ​លើ​សិស្ស​ស្រី ១៨នាក់ នៅឯ​អន្តេវាសិកដ្ឋាន​សាលារៀនមួយ​កន្លែង​នៅរាជធានីភ្នំពេញ ។

មន្ត្រីមួយរូបនៃអង្គភាព​ប្រតិកម្ម​រហ័ស​របស់នាយកដ្ឋាន​បានបញ្ជាក់ប្រាប់ ខេមបូចា ព័ត៌មាន ថា លោក សូហៃមី​ ត្រូវបានសួរចម្លើយមែន ប៉ុន្តែ មន្ត្រីរូបនោះ​មិនបាន​ចែករំលែក​ព័ត៌មាន​លម្អិតបន្ថែមទៀត​ថា​តើ​លោក សូហៃមី ត្រូវបានចាប់ខ្លួន ឬអត់​នោះ​ឡើយ ។ 

លោក សុះ កំរី បានបដិសេធ​ការចោទប្រកាន់​មកលើរូបកូនប្រុសរបស់​លោក ​តាមរយៈ​សារបង្ហោះ​នៅលើ​ហ្វេសប៊ុក បន្ទាប់ពីមានការចែករំលែក​រាលដាល​​នូវ​សារ​មួយ​ពីគណនីហ្វេសប៊ុកឈ្មោះ Som Mengly កាលពីថ្ងៃទី១០ ខែតុលា ។ បួនថ្ងៃក្រោយមកទៀត គណនី​ហ្វេសប៊ុកនោះ​ក៏លែងដំណើរការ ។

ទោះបីមានការបដិសេធនេះក៏ដោយ ក៏​ឈ្មោះ សូហៃមី ត្រូវ​បាននាយកដ្ឋាន​ប្រឆាំងការជួញដូរមនុស្ស​និង​ការពារអនីតិជន​សួរចម្លើយ​និងឃាត់ខ្លួន កាលពីថ្ងៃទី១៥ ខែតុលា ។ នេះ​បើ​យោងតាម​ការចុះផ្សាយ​ដោយ​សារព័ត៌មានអនឡាញ Fresh News ។ សារព័ត៌មានដដែលបាន​រាយការណ៍ថា «ព្រះរាជអាជ្ញាអមសាលាដំបូងរាជធានីភ្នំពេញ​បាន​អនុញ្ញាត​ឱ្យ​ចាប់​ខ្លួន​ឈ្មោះ សូហៃមី» និងថា សមត្ថកិច្ច​នគរបាល​កំពុង​កសាងសំណុំរឿង​ដើម្បី​បន្ត​នីតិវីធី ។ ប៉ុន្តែ ទោះជាយ៉ាងនេះក្ដី លោក សូហៃមី ត្រូវគេ​អះអាងថា បន្ត​បដិសេធ​ការចោទប្រកាន់​មក​លើរូបលោក​នៅក្នុងអំឡុងនៃការសួរចម្លើយ ។

សារព័ត៌មាន Fresh News ក៏បានរាយការណ៍​ផងដែរថា នាយកដ្ឋាន​ប្រឆាំងការជួញដូរមនុស្ស​និងការពារ​អនីតិជន​បានកំណត់អត្តសញ្ញាណ​ជនរងគ្រោះបាន ៤នាក់ ដែលពីរនាក់​មាន​អាយុ​១៣ឆ្នាំ និង​ ១៤ឆ្នាំ និងពីរនាក់ទៀត​មានអាយុ ១៥ឆ្នាំ ដែល​ត្រូវបានចោទប្រកាន់ថា ត្រូវ​ឈ្មោះ សូហៃមី រំលោភបំពាន​ផ្លូវភេទ ។

ផ្អែកតាមសារដែលបង្ហោះដោយគណនី​ហ្វេសប៊ុក Som Mengly ករណីរំលោភបំពាន​នេះ​បាន​កើតឡើង​ជាច្រើនឆ្នាំមកហើយ ប៉ុន្តែ បញ្ហានេះទើបតែបែក​ធ្លាយ​នៅ​ពេល​ជនរងគ្រោះ​ម្នាក់​មានផ្ទៃពោះ ។

អ្នកនាំពាក្យ​សាលាដំបូងរាជធានីភ្នំពេញ លោក ប្លង់​ សុផល បាន​អះអាងថា ករណីនេះ​មិនទាន់​បញ្ជូន​មកដល់​ដៃតុលាការនៅឡើយទេ ។ លោក ជីវ ផល្លី អគ្គស្នងការរង​នគរបាលជាតិ ទទួលបន្ទុក​ប្រឆាំងការជួញដូរមនុស្ស​និង​ការពារអនីតិជន និងអ្នកនាំពាក្យ​អគ្គស្នងការនគរបាលជាតិ លោក ឆាយ គឹមឃឿន មិនបាន​ឆ្លើយតប​សំណើ​សុំ​ការអត្ថាធិប្បាយ​នៅឡើយទេ ។

លោកស្រី ស ស៊ីណែត ប្រធាននាយកដ្ឋាន​ការពារ​ផ្លូវច្បាប់​នៃក្រសួង​កិច្ចការនារី ក៏មិន​បាន​ឆ្លើយតប​នឹងសំណួរ​របស់អ្នកសារព័ត៌មានដែរ ។

លោក សុះ កំរី មិនអាចទាក់ទងសុំ​ការអត្ថាធិប្បាយបានទេ បើ​ទោះបី​អ្នកសារព័ត៌មាន​ ខេមបូចា បានព្យាយាមទាក់ទង​ទៅតាមលេខទូរសព្ទដែលបង្ហាញនៅលើគេហទំព័រហ្វេសប៊ុករបស់លោកក្តី។

លោក នី សុខា ប្រធាន​អង្គការសិទ្ធិមនុស្ស អាដហុក បាន​សម្ដែង​ការកោតសរសើរដល់​សមត្ថកិច្ច​នគរបាល ដោយ​បង្ហាញ​ពី​ចំណាត់ការ​​ដ៏រហ័ស​ពី​អាជ្ញាធរ​ក្នុងការស៊ើបអង្កេត​ការក្នុងករណី​រំលោភបំពាន​ផ្លូវ​ភេទ​លើ​ក្មេងស្រីទាំងនេះ ។ លោក​ក៏សង្ឃឹមថា តុលាការ​​នឹង​ចាត់វិធានការ​សមស្រប​តាមផ្លូវច្បាប់ដើម្បី​ការពារ​សេចក្ដីថ្លៃថ្នូររបស់​ជនរងគ្រោះ​ផងដែរ ។

លោក សុខា បាននិយាយ​យ៉ាង​ដូច្នេះថា៖ «យើង​មិនចង់ឃើញត្រឹមតែ​ចំណាត់ការ​បឋម​ប៉ុណ្ណោះនោះទេ […] អ្វីដែល​យើង​ចង់​ឃើញ គឺ​វិធានការ​នីតិវិធី​នាពេលខាងមុខ​ ដើម្បីទប់ស្កាត់​ការបន្ធូរបន្ថយ​ទោស ឬ​ការលើកលែង​ការចោទប្រកាន់» ។ លោក​បាន​បន្ត​ថា នោះគឺដោយសារតែ​ជនសង្ស័យ​ជាសាច់ញាតិរបស់​មេដឹកនាំ​សាសនា​ឥស្លាម​ដ៏មានឥទ្ធិពល​ម្នាក់ ។

លោក សុខា ក៏បានសង្កត់ធ្ងន់ផងដែរ នូវ​ភាពចាំបាច់​សម្រាប់​វិធានការសកម្ម​ពីសំណាក់​អាជ្ញាធរ​នៅក្នុង​ករណីរំលោភបំពាន​ដទៃ​ផ្សេងទៀត ជាជាងការដែល​ចាត់វិធានការ​តែនៅពេលណា​ដែលមាន​ការរិះគន់ខ្លាំង​ពីសំណាក់មហាជន ៕ 

ប្រែសម្រួលពីអត្ថបទភាសាអង់គ្លេស៖ Police Question Son of Cambodia’s Top Islamic Cleric On Allegations of Sexual Assault in School Dormitory

686 views

ព័ត៌មានថ្មី

អត្ថបទពេញនិយម