ថ្នាក់ដឹកនាំខេត្តមួយចំនួនកំពុងស្រាវជ្រាវករណីផ្ទុះការឆ្លងកូវីដ១៩ ក្នុងចំណោមកម្មករ

កម្មកររោងចក្រជិះរថយន្តចង្អៀតបន្ទាប់ពីបញ្ចប់ម៉ោងការងារនៅរោងចក្រមួយក្នុងស្រុកគងពិសី ខេត្តកំពង់ស្ពឺ ថ្ងៃទី៦ ខែឧសភា ឆ្នាំ២០២១។ ខេមបូចា/ បញ្ញា ឆព័ណ្ណ
កម្មកររោងចក្រជិះរថយន្តចង្អៀតបន្ទាប់ពីបញ្ចប់ម៉ោងការងារនៅរោងចក្រមួយក្នុងស្រុកគងពិសី ខេត្តកំពង់ស្ពឺ ថ្ងៃទី៦ ខែឧសភា ឆ្នាំ២០២១។ ខេមបូចា/ បញ្ញា ឆព័ណ្ណ

អាជ្ញាធរ​ស្រុក​​​ក្នុង​ខេត្ត​កំពង់​ចាម​កំពុង​ប្រ​ញាប់​ប្រញាល់​ស៊ើបអង្កេត​​លើ​ករណី​ផ្ទុះ​​រាល​ដាល​ជំងឺកូវីដ១៩​ក្នុង​តំបន់ បន្ទាប់ពី​បាន​រក​ឃើញ​កម្មកររាប់​សិប​នាក់​​បាន​ឆ្លងកូវីដ១៩​នៅ​ក្នុង​រោង​ចក្រ​ស្បែកជើងចំនួន​ពីរ​​ក្នុង​ស្រុក​នេះ​។​

ក្នុង​សេចក្ដី​ថ្លែង​ការណ៍​មួយ​របស់​អាជ្ញាធរ​ខេត្ត​កំពង់ចាម បាន​​សរសេរ​ថា​កម្មករ​ចំនួន​៥១​នាក់​បាន​តេស្ត​វិជ្ជមាន​កូវីដ១៩ នៅ​រោង​ចក្រ​ចំនួ​នពីរ​របស់​រោងចក្រ​​ស្បែក​ជើង​ Carlington និង​ Juhui ។ រោង​ចក្រ​ទាំង​ពីរ​មាន​ទី​តាំង​ស្ថិត​នៅ​ក្នុង​ស្រុក​ជើង​ព្រៃ​ ខេត្ត​កំពង់​ចាម ដែល​ទើប​មាន​ផ្ទុះ​ការ​ឆ្លង​រាល​ដាល​ជំងឺ​កូវីដ១៩​ ថ្មីទៀត​​ក្នុង​ចំណោម​កម្មករ​រោង​ចក្រ ហើយ​អាជ្ញាធរ​នៅពេល​នេះ​កំពុង​​ដាក់ការ​សង្ស័យ​លើ​រថយន្ត​ដឹក​កម្មករ​ដែល​មានការ​ចង្អៀត​ណែន​​ពេក​ ទើប​ក្លាយ​ជា​ប្រភព​នៃ​ការ​ចម្លង​នេះ​។​

ចំនួន​​ឆ្លង​ថ្មី​ ៣៥ករណី​ទៀត​ត្រូវ​បាន​បញ្ជាក់​កាល​ពី​ម្សិល​មិញ​ក្នុង​ចំណោម​កម្មករ​រោង​ចក្រ​ក្នុង​ខេត្ត​កំពង់​ចាម ដែល​ការណ៍​នេះ​ទំនង​ជា​មាន​ទាក់​ទង​នឹង​លំហូរ​នៃ​បុគ្គលិក​រោងចក្រ​ចេញពី​ភ្នំពេញ បន្ទាប់ពី​ការ​ធ្វើ​ដំណើរ​ក្នុងទីក្រុងភ្នំពេញ​​ត្រូវ​បាន​អនុញ្ញាត​ឡើង​វិញ​នៅ​ថ្ងៃទី​៦ ខែឧសភា​។​ មន្ត្រី​សុខា​ភិបាល​នៅ​ខេត្ត​កំពង់​ឆ្នាំង និង​កំពង់​ស្ពឺ ក៏​បាន​រាយ​ការណ៍​ក្នុង​សប្ដាហ៍​នេះ​ពី​ចំនួន​ឆ្លង​រាប់​សិប​នាក់ ក្នុង​ទម្រង់​ដូច​គ្នា​នេះ។ នៅ​ថ្ងៃព្រហស្បតិ៍នេះ អាជ្ញាធរ​ខេត្ត​តាកែវ​ក៏​បាន​រាយកាណ៍​ថា​មាន​ចំនួន​អ្នក​ឆ្លង​កូវីដ​១៩ ៤១​ករណី​ថ្មី ដែល​ភាគ​ច្រើន​ជា​កម្មករ​រោង​ចក្រ​។​​

លោក ហេង វណ្ណនី អភិបាល​រង​ខេត្ត​កំពង់​ចាម បញ្ជាក់ថា​អាជ្ញាធរ​បាន​ផ្អាក​ដំណើរ​ការរោង​ចក្រស្បែក​ជើង​ Carlington ​​ជា​បណ្ដោះ​អាសន្ន​ ដែល​នេះ​ជា​រោង​ចក្រ​មួយ​ក្នុង​ចំណោម​បួន ដែល​មាន​ការ​ឆ្លង​ជំងឺ​កូវីដ១៩​។ ចំណែក​រោង​ចក្រ​បី​ផ្សេង​ទៀត រួម​ទាំង​រោង​ចក្រ​ Juhui ផង​ បាន​បិទ​ប្រតិបត្តិការតាម​ផ្នែក​មួយ​ចំនួន​។

លោកឲ្យ​ដឹងទៀតថា​រោង​ចក្រ​ Carlington មាន​កម្មករ​​ប្រហែល​៧ ០០០​នាក់​។​

លោក គឹម សួរភិរុណ ប្រធាន​មន្ទីរ​សុខាភិបាល​ខេត្ត​កំពង់​ចាម​បដិសេធ​ធ្វើ​អត្ថាធិប្បាយ​លើ​រឿង​នេះ។ យ៉ាងណា អភិបាល​ស្រុក​ជើង​ព្រៃ លោក អូត ឈាងលី មាន​ប្រ​សាសន៍​ថា ពេល​នេះ​អាជ្ញាធរ​កំពុង​តាម​រក​អ្នក​ប៉ះពាល់​ និង​ធ្វើ​តេស្ត​អ្នក​ដែល​ជាប់ពាក់ព័ន្ធ​ជាមួយ​កម្មករ​។​ លោក​ថា ការ​ស្រាវជ្រាវ​កំពុង​ចាប់​ផ្ដើម​ធ្វើ​ក្នុង​ស្រុក​របស់​លោក ហើយ​ស្រុក​បាធាយ និង​ស្រុក​ព្រៃ​ឈរ ដែល​កម្មករ​រស់​នៅ​ក៏​ធ្វើ​ដូច​គ្នា​។

លោក​បន្ថែមថា៖ «​យើង​បាន​យក​សំណាក​អ្នក​ប៉ះពាល់​ផ្ទាល់​ជាមួយ​កម្មករ​វិជ្ជមានកូវីដ១៩ រួម​មាន​ទាំង​សមាជិក​គ្រួសារ​ពួកគេ​ផង​ដែរ»។ លោក​​បន្ថែម​ថា​ នៅ​ថ្ងៃព្រហស្បតិ៍​ ក្រុម​គ្រូពេទ្យ​បាន​ចាប់​ផ្ដើម​ធ្វើ​តេស្ត​មនុស្ស​ប្រហែល​២០០​នាក់​។

លោក​ថា៖ «​យើង​ពិត​ជា​មានការ​បារម្ភ ព្រោះ​ពួក​គេ​រស់​នៅ​ជាមួយ​ឪពុក​ម្ដាយ និង​សមាជិក​គ្រួសារ​ផ្សេង​ទៀត»។​

​លោក​អភិបាល​ស្រុក ក៏​បាន​បញ្ជាក់ដែរ​ថា​ លោក​បាន​បញ្ជា​ទៅ​កាន់​មន្ត្រី​ថ្នាក់ឃុំ និង​ភូមិ​ឲ្យ​ប្រមូល​អ្នក​ពាក់ព័ន្ធ​ជាមួយ​កម្មករ​មាន​វិជ្ជមានកូវីដ១៩ យកទៅធ្វើចត្តាឡីស័ក​ចំនួន​១៤​ថ្ងៃ នៅ​មណ្ឌល​សុខភាព​។ ​

លោក ផេត សុផល អភិបាល​ស្រុក​បាធាយ បាន​បញ្ជាក់​ជាមួយ​ខេមបូចាដែរ​ថា​មន្ត្រី​មូល​ដ្ឋាន​របស់​​លោក​ក៏​កំពុង​ធ្វើ​ដូច​គ្នា​នេះ​ដែរ ក្នុង​ការ​ធ្វើ​តេស្ត និង​ដាក់​ដាច់​ដោយ​ឡែក​​ចំពោះ​អ្នក​ពាក់​ព័ន្ធ​។

លោក​បានឲ្យ​ដឹងថា៖ «​ពេល​ដែល​មាន​កម្មកររោង​ចក្រ​តេស្ត​វិជ្ជមាន​កូវីដ១៩ អាជ្ញាធរ​មូល​ដ្ឋាន​របស់​យើង​ បាន​ចង​ខ្សែ និង​ដាក់​របាំង​បិទ​ផ្ទះ​របស់​ពួកគាត់​ មិន​អនុញ្ញាត​ឲ្យ​ពួកគាត់​ចេញ​ក្រៅ​រហូតដល់​ការ​ធ្វើ​តេស្ត​ចុង​ក្រោយ​បញ្ជាក់​ថា​អវិជ្ជមាន»។​

អាជ្ញាធរ​​ខេត្ត​ផ្សេង​ទៀត​ក្នុង​ប្រទេស​កម្ពុជា​ក៏​កំពុង​មាន​វិធានការ​ដូច​គ្នា​នេះ​ដែរ ដើម្បី​បញ្ឈប់​ការ​ឆ្លង​រាល​ដាល​ជំងឺ​កូវីដ១៩​។

លោក នុត ស៊ីណាត ប្រធាន​មន្ទីរ​សុខាភិបាល​ខេត្ត​តាកែវ បាន​ប្រកាស​នៅ​ថ្ងៃព្រហស្បតិ៍​ថា​មាន​ករណី​ឆ្លង​ថ្មី​ចំនួន​៤១ករណី ដែល​ភាគ​ច្រើ​ន​ជាកម្មករ​រោងចក្រ​ធ្វើ​ការ​នៅ​ក្នុង​ខេត្ត​កណ្ដាល និង​អ្នក​ទៅ​លេង​ផ្ទះ។ ករណី​ផ្សេង​ទៀត​នៅ​ខេត្ត​តាកែវ គឺ​រក​ឃើញ​លើ​ពល​ករ​​ត្រឡប់​ពី​ប្រទេស​ថៃ​។​

លោក​ នុត ស៊ីណាត ឲ្យ​ដឹង​ទៀត​ថាអ្នក​តេស្ត​វិជ្ជមាន​កូវីដ​១៩ មួយ​ចំនួន​ជា​អ្នក​បញ្ចប់​ការ​ធ្វើ​ចត្តាឡីស័ក ដែល​បាន​ចាប់​ផ្ដើម​ភាគច្រើន​នៅ​ថ្ងៃទី​៣ និងទី​៤ ខែឧសភា ពេល​ដែល​អ្នក​ទាំង​នោះ​ត្រឡប់​មក​​ផ្ទះ​នៅ​ខេត្ត​​។​ លោក​ថា បន្ទាប់ពី​តេស្ត​ឃើញ​វិជ្ជមាន​កូវីដ១៩ កម្មករ​ទាំង​នោះ​ត្រូវ​បាន​យក​ត្រឡប់​ទៅ​ធ្វើ​ចត្តាឡីស័ក​វិញ​ភ្លាម​ដែរ។​

សម្រាប់​ខេត្ត​កំពង់​ឆ្នាំង​វិញ ចំនួន​ឆ្លង​កូវីដ១៩​ ថ្មី​មាន​២០​ករណី កាលពី​ថ្ងៃពុធ។ លោក ប្រាក់ វុធ ប្រធានមន្ទីរ​សុខាភិបាល​ខេត្ត​នេះ​ ឲ្យ​ដឹង​ថា ថ្ងៃ​បន្ទាប់​មិន​មាន​ការ​ឆ្លង​ថ្មី​នោះទេ​។ លោកថា ក្រុម​គ្រូពេទ្យ​បាន​ប្រមូល​សំណាក​ជាង​១០០​នាក់​ដើម្បី​ធ្វើ​តេស្ត រួម​មាន​ទាំង​និយោជក ប៉ុន្តែ​ថា​មិន​ទាន់ដឹង​លទ្ធ​ផល​នៅ​ឡើយ​។​​

ប្រ​ធាន​សហជីព​មួយ​ចំនួន​​បាន​លើក​ឡើងា វិធាការបង្ការ​ដែល​ធ្លាប់​តែ​ប្រើ​ដើម្បី​ទប់​ស្កាត់​ការ​ឆ្លង​រាល​ដាល​កូវីដ១៩ មាន​ដូច​ជាការ​បិទ​ផ្នែកខ្លះ​នៃ​កន្លែង​ធ្វើ​ការ​ដែលមាន​ឆ្លង​ជំងឺ គឺមិន​ទាន់​គ្រប់​គ្រាន់​ក្នុងការ​ការពារ​កម្មករ​នោះទេ​។​

លោក អាត់ ​ធន់ ប្រ​ធាន​សភាព​ការងារ​កម្ពុជា មាន​ប្រ​សាសន៍​ថា អាជ្ញាធរ​ខេត្ត​គួរ​បិទ​ខ្ទប់​តំបន់ ឬភូមិ​មួយ​ចំនួន ដែល​មាន​កម្មករ​វិជ្ជមាន​កូវីដ១៩​។​

លោក​បន្ថែមថា៖ «​បើ​សិន​ជា​ស្ថាន​ភា​ព​នេះ​នៅ​តែ​បន្ត យើង​នឹង​ដាក់​លិខិត​ទៅ​កាន់​រដ្ឋ​មន្ត្រី​ក្រ​សួងការងារ ស្នើ​ឲ្យ​មាន​វិធានការ​តឹងរឹង​ដូច​នៅ​ភ្នំពេញ»។ វិធានការ​ដែល​លោក​និយាយ​នេះ​គឺ​​សម្ដៅ​ដល់​ការបិទ​ដំណើរ​ការ​រោង​ចក្រ​ជា​បណ្ដោះ​អាសន្ន​៕

ប្រែសម្រួលពីអត្ថបទភាសាអង់គ្លេស៖ Provincial leaders scramble to contain, investigate COVID-19 outbreaks among garment workers

409 views
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »