ទឹកទន្លេមេគង្គហក់ឡើងលឿនដោយសារតែភ្លៀងធ្លាក់ជាបន្តបន្ទាប់ ស្របពេលមានព្យុះផងនោះ បង្កឲ្យផ្ទះ ផ្លូវ សាលារៀន មន្ទីរពេទ្យ និងវត្តអារាមនៅតាមបណ្ដាខេត្តមួយចំនួននៅតាមដងទន្លេរងការជន់លិច និងមានប្រជាជនមួយចំនួនត្រូវជម្លៀសទៅកាន់ទីទួលសុវត្ថិភាព។
ក្រសួងធនធានទឹកនៅថ្ងៃទី១៧ ខែកញ្ញា ឲ្យដឹងថា ស្ថានីយជលសាស្រ្តទន្លេមេគង្គ ទន្លេសាប និងទន្លេបាសាក់ទឹកកំពុងហក់ឡើងជាបន្តបន្ទាប់។ ក្រសួងបានជំរុញឲ្យក្រសួង និងស្ថាប័នពាក់ព័ន្ធ ក៏ដូចជាអាជ្ញាធរមូលដ្ឋាន និងប្រជាពលរដ្ឋដែលរស់នៅតាមដងទន្លេងទាំងនោះបង្កើនការប្រុងប្រយ័ត្ន និងជៀសវាងគ្រោះថ្នាក់ដែលអាចកើតឡើងជាយថាហេតុ។
ចន្លោះពីថ្ងៃទី១៧ ដល់ថ្ងៃទី១៩ ខែកញ្ញា កម្ពុជានឹងរងឥទ្ធិពលព្យុះទី១៣ឈ្មោះថាប៊ីប៊ីនកា (Bibinka) និងព្យុះទី១៤ឈ្មោះថាពូឡាសាន (Polasan) ដែលកើតលើគន្លងតែមួយ និងមានឥទ្ធិពលខ្លាំងលើខ្យល់មូសុងនិរតី បក់លើសមុទ្រអាន់ដាម៉ាន់ (Andaman) ឈូងសមុទ្រថៃ ខណៈសម្ពាធទាបបន្តគ្របដណ្ដប់ភាគកណ្ដាលនៃអាងទន្លេមេគង្គ សមុទ្រចិនខាងត្បូង និងលើប្រទេសកម្ពុជា។ នេះបើតាមការជូនដំណឹងរបស់ក្រសួងធនធានទឹក។
ដោយសារតែព្យុះ តំបន់ទំនាប និងតំបន់ខ្ពង់រាបនឹងបន្តមានភ្លៀងផ្គររន្ទះ និងខ្យល់កន្ទ្រាក់គ្របដណ្ដប់លើផ្ទៃដីប្រហែល៦០ភាគរយ។ ចំណែកតំបន់ឆ្នេរវិញនឹងមានភ្លៀងធ្លាក់ខ្លាំងដោយមានផ្គររន្ទះ និងអាចមានខ្យល់កន្ទ្រាក់ គ្របដណ្ដប់លើផ្ទៃដី៤០ភាគរយ។ បន្ថែមពីនេះកម្ពស់រលកសមុទ្រអាចមានចន្លោះពី១,៥ម៉ែត្រ ទៅ២,២៥ម៉ែត្រ។
វីដេអូខ្លីមួយបង្ហោះផ្សាយដោយប្រជាពលរដ្ឋនៅភូមិអញ្ចាញ ឃុំដា ស្រុកចិត្របុរី ខេត្តក្រចះ បានបង្ហាញពីស្ថានភាពទឹកជន់លិចផ្លូវ ស្ពាន សាលារៀន និងវត្តអារាម។ អ្នកភូមិបានវេចរបស់របរសំខាន់ៗ និងមានអ្នកខ្លះដឹកជញ្ជូនតាមម៉ូតូ និងខ្លះដឹកតាមគោយន្តទៅរកទីទួលសុវត្ថិភាព។
អ្នកភូមិលើកឡើងថា នេះជាលើកទីមួយហើយដែលភូមិរបស់ពួកគាត់រងការជន់លិច ដែលកម្ពស់ទឹកទន្លេបច្ចុប្បន្ន១៩,៨៤ម៉ែត្រ និងកម្ពស់សម្រាប់ប្រកាសអាសន្នគឺ២២ម៉ែត្រ។
អភិបាលស្រុកចិត្របុរី លោក យិន វណ្ណៈ ប្រាប់ ខេមបូចា ថាកម្ពស់ទឹកទន្លេមេគង្គមិនទាន់ដល់កម្រិតប្រកាសអាសន្ននៅឡើយ។ ទឹកជំនន់នេះបង្កឡើងដោយភ្លៀង និងព្យុះ ដែលនាំឲ្យតំបន់មួយចំនួនក្នុងស្រុកចិត្របុរីរងការជន់លិច។
លោកបន្តថា លោកបានរៀបចំប្រជុំដើម្បីប្រមូលព័ត៌មាន និងចំនួនគ្រួសារដែលរងផលប៉ះពាល់ដោយទឹកជំនន់។ បើទោះបីជាកម្ពស់ទឹកទន្លេមិនទាន់ដល់កម្រិតប្រកាសអាសន្ន អាជ្ញាធរបានត្រៀមជាស្រេចដើម្បីជួយប្រជាពលរដ្ឋ។
លោកមានប្រសាសន៍ថា៖ «យើងមិនទាន់មានសេចក្ដីរាយការណ៍ពីការខូចខាតនៅឡើយពីព្រោះថាយើងទើបតែប្រជុំពិនិត្យទីតាំងជន់លិចជាក់ស្ដែង។ ការជន់លិចនេះកើតចេញពីទឹកភ្លៀង និងព្យុះ។ ពេលដែលមានភ្លៀងទឹកហូរទៅអាងស្ដុកយឺត ហេតុនេះបង្កជាជំនន់ ដោយសារទឹកទន្លេមេគង្គឡើង»។
លោកបន្ថែមថា ទឹកជំនន់នេះបានបង្កផលប៉ះពាល់ដល់ឃុំចំនួនប្រាំនៅក្នុងស្រុក រួមមានឃុំដា ឃុំបុសលាវ ឃុំកន្ទួត ឃុំថ្មី និងឃុំសំបុក។ លោកបញ្ជាក់ថាអាជ្ញាធរមិនទាន់ជម្លៀសប្រជាជនទេ ដោយថាការជន់លិចផ្លូវ ផ្ទះ វត្តអារាម និងមណ្ឌលសុខភាពគឺស្ថិតក្នុងកម្រិត «ស្រាល» នៅឡើយ។
លោកថា បើសិនជាមានករណីបន្ទាន់ អាជ្ញាធរបានត្រៀមរួចជាស្រេចក្នុងការសង្គ្រោះប្រជាពលរដ្ឋ ប៉ុន្តែ ពេលនេះនៅមិនទាន់ដល់កម្រិតដែលត្រូវអន្តរាគមន៍នៅឡើយ។ លោកឲ្យដឹងថាបើធៀបទៅនឹងកម្ពស់ទឹកកម្រិតអាសន្ន ពេលនេះកម្ពស់ទឹកមានត្រឹម១៩,៨៤ម៉ែត្រ ខណៈកម្ពស់ទឹកកម្រិតអាសន្នគឺ២២ម៉ែត្រ។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក សុទ្ធ គឹមកុលមុនី ប្រាប់ ខេមបូចា ថា គិតត្រឹមថ្ងៃទៅ១៧ ខែកញ្ញា ឃុំដា នៅក្នុងស្រុកចិត្របុរី និងស្រុកស្ទឹងហាវ ក្នុងខេត្តព្រះសីហនុ បានរងគ្រោះទឹកជំនន់ ដែលបង្កឡើងដោយភ្លៀងធ្លាក់ខ្លាំងពេញមួយយប់។
លោកមានប្រសាសន៍ថា៖ «ក្នុងឃុំដា ស្រុកចិត្របុរី ខេត្តក្រចេះ ដែលមានទឹកជន់លិចនៅថ្ងៃទី១៧ ខែកញ្ញា មិនមែនបង្កឡើងដោយទឹកទន្លេមេគង្គនោះទេ។ ដោយឡែកនៅស្រុកស្ទឹងហាវខេត្តព្រះសីហនុ គឺមានភ្លៀងធ្លាក់ខ្លាំង ធ្វើឲ្យតំបន់មួយចំនួនជន់លិច»។
លោកបន្ថែមថា អាជ្ញាធរអាចគ្រប់គ្រងស្ថានការណ៍បាន ក៏ដោយសារតែពួកគាត់បានត្រៀមខ្លួនជាមុន។ លោកបញ្ជាក់ថា មិនមានសេចក្ដីរាយការណ៍ថាមានអ្នករងគ្រោះថ្នាក់នោះទេ ហើយតួលេខអ្នករងផលប៉ះពាល់ក៏មិនទាន់ដឹងច្បាស់ដែរ ព្រោះថាស្ថានភាពមិនទាន់ឈានដល់កម្រិតប្រកាសអាសន្ន។ លោកបន្តថា៖ «ដូចនេះ យើងមិនមានរបាយការណ៍អ្វីទេ»។
គណៈកម្មាធិការទន្លេមេគង្គឲ្យដឹងថា ចន្លោះថ្ងៃទី១៧ដល់២១ ខែកញ្ញា នឹងមានភ្លៀងធ្លាក់ខ្លាំងនៅភាគកណ្ដាលនៃអាងទន្លេមេគង្គ ដូចជាកំពង់ស្ពឺ កំពង់ធំ ក្រចេះ មណ្ឌលគិរី ព្រះវិហារ ស្ទឹងត្រែង និងរតនគិរី។
អ្នកភូមិម្នាក់ឈ្មោះ កន សំដន រស់នៅភូមិស្នែង ស្រុកបុរីអូរស្វាយ ខេត្តស្ទឹងត្រែង ឲ្យដឹងថា អ្នកស្រីមានការព្រួយបារម្ភអំពីទឹកជំនន់ ព្រោះថា វានឹងបង្កការលំបាកដល់ប្រជាពលរដ្ឋក្នុងការធ្វើដំណើរ និងត្រូវជម្លៀសរកទីទួលសុវត្ថិភាព បើទោះបីជាទីទួលសុវត្ថិភាពមានត្រៀមហើយក៏ដោយ។
អ្នកស្រីបន្ថែមថា អាជ្ញាធរបានបិទផ្សាយការជូនដំណឹងអំពីកម្រិតកម្ពស់ទឹកនៅក្ដារព័ត៌មាន និងប្រាប់ប្រជាពលរដ្ឋឲ្យមានការប្រុងប្រយ័ត្ន និងត្រៀមឧបករណ៍សង្គ្រោះបើមានគ្រោះទឹកជំនន់។
ប្រធានមន្ទីរធនធានទឹកខេត្តស្ទឹងត្រែង លោក លំ សិរីគុត មានប្រសាសន៍ថា កម្រិតទឹកទន្លេមេគង្គមិនទាន់ដល់កម្រិតប្រកាសអាសន្ននៅឡើយ។
យ៉ាងណាលោកថា បើសិនជាកម្រិតកម្ពស់ទឹកឡើងដល់១១,៣ម៉ែត្រ គឺ «ជាពេលដែលត្រូវប្រកាសកម្រិតអាសន្ន»។ នៅខេត្តស្ទឹងត្រែងមានស្ថានីយចំនួនបី គឺស្ថានីយស្ទឹងត្រែងកម្ពស់ទឹកកម្រិតអាសន្នគឺ១០,៧០ម៉ែត្រ ស្ថានីយសេសាន ៩,៩ម៉ែត្រ និងសៀមប៉ាង គឺ១១,៥០ម៉ែត្រ។
លោកបន្ថែមថា៖ «ដូចនេះកម្រិតកម្ពស់ទឹកមិនទាន់ដល់កម្រិតអាសន្ននៅឡើយ»៕
ប្រែសម្រួលពីអត្ថបទភាសាអង់គ្លេស៖ Rainstorms, Strong Winds Cause Floods in Cambodia’s Provinces
