សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋស្រុកស្អាងលើកឡើងថា អាជ្ញាធរផ្ដល់តម្លៃដី១ដុល្លារក្នុង​១ម៉ែត្រ​ការ៉េ ប៉ុន្តែពួកគាត់មិនព្រម

ប្រជាពលរដ្ឋជិត២០០នាក់តវ៉ាទាមទារឱ្យអាជ្ញាធរចេញបណ្ណកម្មសិទ្ធិស្របច្បាប់ កាលពីថ្ងៃទី១០ ខែវិច្ឆិកា ឆ្នាំ២០២៣ ស្ថិតនៅភូមិទួលខ្មួញ ឃុំទឹកវិល ស្រុកស្អាង ខេត្ដកណ្ដាល។ (រូបថតផ្ដល់ឱ្យ)
ប្រជាពលរដ្ឋជិត២០០នាក់តវ៉ាទាមទារឱ្យអាជ្ញាធរចេញបណ្ណកម្មសិទ្ធិស្របច្បាប់ កាលពីថ្ងៃទី១០ ខែវិច្ឆិកា ឆ្នាំ២០២៣ ស្ថិតនៅភូមិទួលខ្មួញ ឃុំទឹកវិល ស្រុកស្អាង ខេត្ដកណ្ដាល។ (រូបថតផ្ដល់ឱ្យ)

ពលរដ្ឋស្រុកស្អាងលើកឡើងថា អាជ្ញាធរខេត្ដកណ្ដាលផ្ដល់តម្លៃដីមានជម្លោះ១ដុល្លារ​ក្នុង​១ម៉ែត្រ​ការ៉េ​ដល់ពលរដ្ឋ២៥២គ្រួសារស្ថិតនៅភូមិទឹកវិល ឃុំទឹកវិល ស្រុកស្អាង​ លើផ្ទៃដីចំនួន៩០ហិកតា​ដែល​ទាមទារ​ឱ្យ​អាជ្ញាធរចេញប្លង់កម្មសិទ្ធិ ប៉ុន្តែ​ពួកគាត់​​មិន​ព្រម​ទទួល​តម្លៃនេះនៅឡើយទេ។

ពលរដ្ឋចំនួន៣នាក់ត្រូវបានរដ្ឋបាលខេត្ដកណ្ដាល នៅរសៀលថ្ងែទី២៥ ខែធ្នូនេះ អញ្ជើញឱ្យ​ជួបស្វែងរកដំណោះស្រាយ​លើបញ្ហាជម្លោះដីធ្លីរបស់ពួកគេស្ថិតនៅឃុំទឹកវិល​ ស្រុកស្អាង ខេត្ដ​កណ្ដាលមានចំនួន៩០ហិកតា ក្រោមកិច្ចប្រជុំពីលោក នូវប៉េង ច័ន្ទតារា អភិបាលរង​ខេត្ដ​កណ្ដាល។

ពលរដ្ឋបានប្រាប់ ខេមបូចា ថា ក្នុងជំនួបនេះដែរ រដ្ឋបាលខេត្ដតម្រូវឱ្យពលរដ្ឋ​ទាំង​២៥២​គ្រួសារទទួលយកសំណង១ដុល្លារក្នុង១ម៉ែត្រការ៉េ ដោយពលរដ្ឋថា មិនអាចទទួល​យក​បាន និងស្នើឱ្យរដ្ឋបាលខេត្ដចេញប្លង់កម្មសិទ្ធិជូនពួកគេ។ ពលរដ្ឋ៣រូបមានលោក បាន សុផល លោក ម៉ៅ ណុប និង លោក ហុក ហ៊ុល ដែលជាតំណាងពលរដ្ឋ ខណៈ៤រូបផ្សេង​ទៀត​បានចូលជួបពិភាក្សាកាលពីថ្ងែ​ទី​​១៤​ខែធ្នូឆ្នាំ២០២៣កន្លងទៅ។

បើតាមលោក បាន សុផល ពលរដ្ឋម្នាក់កំពុងមានជម្លោះ និងត្រូវចូលបំភ្លឺនៅសាលា​ខេត្ដ​កណ្ដាល​​​នៅរសៀលថ្ងៃទី២៥ ខែធ្នូថា លោកបានទទួលលិខិតពីសាលាខេត្ដ​ដើម្បី​ចរចា​រឿង​ដីរបស់លោក និងពលរដ្ឋផ្សេងចំនួន៣រូប។ លោកបន្ដថា ពលរដ្ឋមិនព្រមទទួល​យក​ឡើយ គឺរូបលោកត្រូវការដីដើម្បីអាស្រ័យផល។ លោកបន្ដថា ក្នុងការចរចាជាមួយអាជ្ញាធរខេត្ដនេះ លោកបានលើកបញ្ហានៃភាពមិនប្រក្រតីចំនួននៃការចុះបញ្ជីដីរបស់រដ្ឋបាលស្រុកស្អាង ខណៈ​លោកបានបង្ហាញលិខិតជាច្រើនក្នុងកិច្ចចរចា។

លោកថា៖ «ខ្ញុំមិនទទួលយកទេតម្លៃហ្នឹង ព្រោះមិនដឹងទៅទិញនៅណាបានវិញ។​ពួកខ្ញុំចង់​បាន​តែប្លង់ទេ។​ខ្ញុំបង្ហាញភស្ដុតាងរឿងចុះបញ្ជីដីពួកខ្ញុំដល់គេ។​វាអយុត្ដិធម៌ណាស់​សម្រាប់ពួកខ្ញុំ»

កាលពីថ្ងៃទី២១ ខែវិច្ឆិកា ឆ្នាំ២០២៣ កន្លងទៅ លោក ហូ សិទ្ធី នាយកខុទ្ទកាល័យរបស់ នាយក​រដ្ឋមន្រ្ដី ហ៊ុន ម៉ាណែត បានចេញដីកាបញ្ជូនទៅរដ្ឋមន្រ្ដីក្រសួងដែននគរូបនីយកម្ម និងសំណង់  ដោយក្នុងដីកាបញ្ជូននោះក៏បានបញ្ជាក់លិខិតលេខ៧៨៣ សជណ.ដប ចុះថ្ងៃ​ទី១៨ ខែសីហា ឆ្នាំ២០២៣ របស់ទីស្ដីការគណៈរដ្ឋមន្រ្ដី​ និងមេត្ដា​អនុញ្ញាត​ឱ្យ​ពួកគាត់​បាន​ចុះ​បញ្ជី​ដីធ្លី ធ្វើបណ្ណកម្មសិទ្ធិលើដីដែលបានកាន់កាប់អាស្រ័យផលតាំងពីឆ្នាំ១៩៧៩។

តំណាង​ពលរដ្ឋ អ្នកស្រី ឆុំ សុធី អាយុ៥០ឆ្នាំ រស់នៅភូមិទួលខ្មួញ ឃុំទឹកវិល ស្រុកស្អាង ខេត្ដ​កណ្ដាល បានផ្ដល់បទសម្ភាសន៍ជាមួយ ខេមបូចា នៅថ្ងៃទី២៥ខែធ្នូ ថា អាជ្ញាធរខេត្ដកណ្ដាល​បានអញ្ជើញពួកអ្នកស្រីដើម្បីចរចាគ្នា ដោយខាងអាជ្ញាធរឱ្យតម្លៃ១ដុល្លារក្នុង១ម៉ែត្រការ៉េ។

អ្នកស្រីបន្ដថា​ ការចរចានេះធ្វើឡើងបន្ទាប់ពីពួកអ្នកស្រីទាមទារឱ្យប្លង់កម្មសិទ្ធិដើម្បីអាច​ប្រើ​ប្រាស់​អាស្រ័យផង​ ត្បិតអ្នកស្រីថា ពលរដ្ឋកំពុងមានជម្លោះជាប់បំណុល​ធនាគារស្ទើតែ​៩៥%​។ អ្នកស្រីថា ពួក​អ្នកស្រីមិនអាចទទួលយកបានទេ នូវតម្លៃដែលអាជ្ញាធរខេត្ដផ្ដល់ឱ្យ ដោយ​អ្នកស្រី​បញ្ជាក់​យ៉ាង​​ខ្លី​ថា៖ «មិនចង់បានលុយទេ ចង់បានតែប្លង់រឹង»។

អ្នកស្រី សុធី ថ្លែងថា៖ «គេ[អាជ្ញាធរ]គំរាមទូទាត់ឱ្យ១រៀល[ដុល្លារ] តែប្រជាពលរដ្ឋអត់​ព្រម។ គាត់​​​អត់​ទទួលយកទេ គាត់សុំតែដី។ ខេត្ដគេអ្នកចេញមុខដោះស្រាយ។ ដំបូងគេឱ្យខ្ញុំចូល តែ​ឥឡូវ​គេលែងឱ្យខ្ញុំចូល គេហៅអ្នកផ្សេង ព្រោះគេថាខ្ញុំពូកែតវ៉ាពេក»

អ្នកស្រីបន្ថែមថា៖ «អយុត្ដិធម៌សម្រាប់ខ្ញុំ សម្រាប់ពលរដ្ឋខ្ញុំ។ អយុត្ដិធម៌ទាំងស្រុង ប្លន់យក​ស្រស់ៗ។ រឿងទឹកលុយអត់ទទួលយកទេ លុយតិចតួចយកមកចាយអស់ ហើយអត់មានអី​អាស្រ័យផលតកូនតចៅក្រោយៗមិនដាច់ពោះងាប់។ខ្ញុំសំណូមពរយកតែដីទេ សល់ដី​បន្ដិចបន្ដួចចឹញ្ចឹមកូនចៅ»

កាលពីថ្ងៃទី១០ ខែវិច្ឆិកា ឆ្នាំ២០២៣កន្លងទៅ ប្រជាពលរដ្ឋជិត២០០នាក់បាននាំគ្នា​​តវ៉ា​នៅ​លើ​ដី​របស់ពួកគេដែលមានទំហំ៩០ហិកតា ស្ថិតនៅភូមិទួលខ្មួញ ឃុំទឹកវិល ស្រុកស្អាង ដើម្បី​ឱ្យ​អាជ្ញាធរ​ចេញប្លង់រឹង។ ក្នុងអំឡុងពេលតវ៉ាក៏ត្រូវបានលោក​  ជី គឹមហៃ អភិបាលស្រុងស្អាង​ចុះ​អន្ដរាគមន៍ដោយឱ្យពលរដ្ឋរំសាយសិន រង់ចាំការដោះស្រាយពីថ្នាក់លើ។

បើតាមលោក ជ្រិន ស្រៀង មេឃុំទឹកវិល បានឱ្យដឹងនៅថ្ងៃទី២៦ ខែធ្នូថា រដ្ឋបាលខេត្ដ​បាន​អញ្ជើញលោកឱ្យចូលរួមប្រជុំដើម្បីស្វែងរកដំណោះស្រាយជូនពលរដ្ឋ ខណៈលោកបន្ដថា តម្លៃ១ដុល្លារគ្រាន់តែតម្លៃសិក្សាប៉ុណ្ណោះ មិនទាន់មានការសម្រេចណាមួយទេ។ តែយ៉ាងណា​លោកក៏បានបញ្ជាក់ថា បច្ចុប្បន្នតម្លៃដីនៅក្នុងឃុំលោក មានតម្លៃមិនក្រោម១០ដុល្លារ​ក្នុង​១ម៉ែត្រ​​ការ៉េ។

មេឃុំរូបនេះបន្ដថា៖ «បាទ ខេត្ដគេហៅខ្ញុំឱ្យចូលរួមជាពលរដ្ឋ។ តម្លៃដែលគេដាក់គ្រាន់តែ​សិក្សាទេ មិនទាន់សម្រេចទេក្មួយ។ ដីនៅម្ដុំពូមិនក្រោម១០ដុល្លារទេ»

លោក ជី​ គឹមហៃ អភិបាលស្រុកស្អាង បានថ្លែងថា លោកបានចូលរួមប្រជុំដែរ ហើយអ្វី​ដែល​លោកអាចផ្ដល់បាន គឺគណៈកម្មាដោះស្រាយវិវាទកំពុងសម្រសសម្រួល តែលទ្ធផល​យ៉ាង​ណា​មិនទាន់ដឹងទេ។

លោកបន្ដថា៖ «គេកំពុងសម្របសម្រួល លើសពីហ្នឹងខ្ញុំមិនអាចផ្ដល់ជូនបានទេ»

តំណាងប្រជាពលរដ្ឋឈរបង្ហាញលិខិតបញ្ជាក់ពីអាជ្ញាធរភូមិឃុំ នៅលើដីមានទំនាស់ ស្ថិតនៅភូមិទួលខ្មួញ ឃុំទឹកវិល ស្រុកស្អាង ខេត្ដកណ្ដាល កាលថ្ងៃទី១៤ ខែវិច្ឆិកា ឆ្នាំ២០២៣។  (ខេមបូចា/ ឃាង សុខមាន)

កាលពីថ្ងៃទី២០ ខែមិថុនា ឆ្នាំ២០២៣ កន្លងប្រជាពលរដ្ឋបាននាំគ្នាដាក់លិខិតសុំ​កិច្ច​អន្ដរាគមន៍​​ទៅកាន់លោក​ សាយ ឈុំ ប្រធានព្រឹទ្ធិសភា ដើម្បីឱ្យជួយអន្ដរាគមន៍ឱ្យចេញ​ប្លង់​កម្មសិទ្ធិ​ស្រប​ច្បាប់ ហើយនៅថ្ងៃទី១៩ខែកញ្ញាឆ្នាំ២០២៣ ពលរដ្ឋបាន​នាំគ្នា​ដាក់​លិខិត​ស្នើ​សុំ​កិច្ចអន្ដរាគមន៍ទៅកាន់ក្រសួងមហាផ្ទៃផងដែរ។

ក្នុងលិខិតទាំងនោះបានបង្ហាញពីការកាន់កាប់ និងអាស្រ័យផលចាប់តាំងពី១៩៧៩ និងបាន​ស្នើ​ឱ្យជួយចេញបណ្ណកម្មសិទ្ធិស្របច្បាប់ជូនពួកគាត់លើទំហំដី៩០ហិកតាស្ថិតនៅភូមិ​ទួលខ្មួញ ឃុំទឹកវិល ស្រុកស្អាង ខេត្ដកណ្ដាល។

ចំណែកឯលោក គង់ សោភណ្ឌ អភិបាលខេត្ដកណ្ដាលបានថ្លែងថា លោកជាប់រវល់​ការងារ​ផ្សេង លោកបានឱ្យក្រុមការងារលោកចាត់ចែងដឹកនាំលើកិច្ចចរចា។ យ៉ាងណាមិញលោកថា សម្រាប់ដំណោះស្រាយ គឺរដ្ឋបាលខេត្ដនឹងដោះស្រាយតាមនីតិវិធីច្បាប់។

លោកបន្ដថា៖ «ក្រុមការងាររបស់ខេត្ដកំពុងស្រាវជ្រាវ និងណែនាំតាមនីតិច្បាប់។ ខ្ញុំអត់បាន​ចូលរួម​ទេ ដោយខ្ញុំជាប់បេសកម្មច្រើននៅកន្លែងផ្សេង»

ខេមបូចា មិនអាចសុំការបំភ្លឺពីលោក គ្រុយ ម៉ាឡែន អ្នកនាំពាក្យរដ្ឋបាលខេត្ដកណ្ដាល​ជុំវិញ​បញ្ហា​ខាងលើទេ ដោយទូរសព្ទចូលគ្មានអ្នកលើក។

ចំណែកឯលោក នី សុខា ប្រធានសមាគមការពារសិទ្ធិមនុស្សអាដហុក បានថ្លែងថា តម្លៃ​ដែល​អាជ្ញាធរ​ឱ្យ​ពលរដ្ឋ​១ការ៉េ១ដុល្លារនេះ វាអយុត្ដិធម៌សម្រាប់ពលរដ្ឋណាស់ ព្រោះពួកគាត់រស់​នៅ និង​អាស្រ័យផល​យូរ​ហើយ។ លោកបន្ដថា បើរដ្ឋបង្វែរដីទាំងនោះទៅឱ្យឯកជនបាន​ហេតុ​អ្វី​មិនអាច​ចេញ​ប្លង់រឹង​ឱ្យ​ពលរដ្ឋបាន ដាច់ខាតរដ្ឋត្រូវតែចេញប្លង់ជូនពលរដ្ឋ។ លោកបន្ដទៀតថា រដ្ឋគួរ​តែ​ពិនិត្យមើលឡើងវិញ ព្រោះតម្លៃនេះ ពលរដ្ឋមិនអាចទិញវិញបានទេ បើយើង​មើល​ទីតាំង​ភូមិសាស្រ្ដ។

លោក សុខា ថ្លែងថា៖ «ដីនៅតំបន់នេះគ្មានដីណាតម្លៃ១ការ៉េ១ដុល្លារទេ។ បើជាលក្ខណៈ​ឯកជន​​យើងត្រូវសិក្សាពីហាងឆេង និងធ្វើការវាយតម្លៃឱ្យបានច្បាស់លាស់ មិនមែនចេះតែ​ឱ្យ​តាមតែចិត្ដចឹងទេ។វាអយុត្ដិធម៌សម្រាប់ពលរដ្ឋដែលគាត់កាន់កាប់យូរហើយ បែរជា​មក​ទទួល​សំណងប៉ុណ្ណឹង វាអយុត្ដិធម៌ណាស់»។​

កាលពីថ្ងៃទី១០ ខែឧសភា ឆ្នាំ២០២៣ លោក កែវ រ៉េមី រដ្ឋមន្រ្ដីប្រតិភូអមនាយករដ្ឋមន្រ្ដី និង​ជា​ប្រធានគណៈកម្មាធិការ​សិទ្ធិមនុស្សនៃក្រសួងមហាផ្ទៃ បានចេញលិខិតផ្លូវការ​មួយឱ្យទៅ​អភិបាលនៃគណៈអភិបាលខេត្ដកណ្ដាលក្រោយ​ពីទទួលលិខិតពីប្រជាពលរដ្ឋ​ថ្ងៃទី៦ ខែមិថុនា ឆ្នាំ២០២៣ ដោយក្នុងលិខិតសរសេរថា៖ «សូម ឯកឧត្ដមអភិបាលនៃគណៈអភិបាល​ខេត្ដ​កណ្ដាល និងជាប្រធានគណៈសុរិយោដីថា្នក់ខេត្ដ ជួយបំភ្លឺករណីទំនាស់ដីធ្លី​ខាងលើ​មក​គណៈកម្មការសិទ្ធិមនុស្ស​ មានមូលដ្ឋានគ្រប់គ្រាន់សម្រាប់ចំណាត់ការបន្ដ»

កាលពីថ្ងៃទី២៥ ខែធ្នូ ម្សិលមិញនេះ អង្គការសមាគមធាងត្នោត បានចេញរបាយការណ៍​ស្រាវ​ជ្រាវ​របស់ខ្លួន​អំពីការបណ្ដេញចេញសំណង និងបំណុលឆ្នាំ២០២៣ និងបញ្ហា​ប្រឈមរបស់​ពលរដ្ឋ ក្នុងខេត្ដកណ្ដាល ខេត្ដតាកែវ និងរាជធានីភ្នំពេញ ដោយរបាយការណ៍បានថ្លែងថា បង្ហាញ​ជារួមពីស្ថានភាពសំខាន់ៗនៃការបណ្ដេញចេញដោយបង្ខំ សំណង និងបញ្ហាបំណុល​ដែលបណ្ដាលមកពីការបណ្ដេញចេញនៅកម្ពុជាដោយលាតត្រដាងពីការមិនគោរពទាំង​ស្រុង​ចំពោះច្បាប់សិទ្ធិមនុស្សអន្ដរជាតិ ច្បាប់ជាតិ និងអនុសាសន៍របស់អង្គការសហប្រជាជាតិ។

លោក សឿង សារ៉ន នាយកប្រតិបត្ដិនៃអង្គការសមាគមធាងត្នោត បានថ្លែងថា ការស្រាវជ្រាវ​នេះគឺលោកផ្ដោតលើបញ្ហរបស់កម្ពុជានៅតែបន្ដការមិនគោរពច្បាប់ និងសិទ្ធិមនុស្ស។ ដោយ​លោកបញ្ជាក់ថា រដ្ឋាភិបាលគួរតែគិតគូរបញ្ហានេះឱ្យបានច្រើនជាងបញ្ហាផ្សេងទៀត បើមិន​ដូច្នេះ​ទេ​កម្ពុជានៅតែមិនអាចក្លាយជាប្រទេសប្រជាធិបតេយ្យពេញលេញនោះទេ។

លោកថ្លែងថា៖ «អ្វីដែលយើងរកឃើញនីតិវិធីផ្លាស់ប្ដូរទីលំនៅ និងផ្ដល់សំណងវាមិន​អនុលោម​​ទៅតាមច្បាប់ជាតិ និងអន្ដរជាតិ។ រដ្ឋាភិបាលគួរតែអនុវត្ដ និងអនុលោម​តាម​ច្បាប់​ដែលមានស្រាប់ គោលនយោបាយដែលមានស្រាប់​សម្រាប់ជនងាយរងគ្រោះ​ឱ្យស្មើភាព​គ្នា»

175 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម