សមាគមសម្ព័ន្ធអ្នកសារព័ត៌មានកម្ពុជា

លោក ស ខេង ទទួលស្គាល់ថាសារធាតុញៀនរឹបអូសបានក្នុងឆ្នាំ២០២២ មានការកើនឡើងខ្លាំង

អាជ្ញាធរដុតបំផ្លាញថ្នាំញៀនប្រាំតោនក្នុងពិធីមួយរៀបចំនៅកោះពេជ្រក្នុងទីក្រុងភ្នំពេញថ្ងៃទី២៨ ខែមិថុនា ឆ្នាំ២០២៣។ ខេបូចា/ព្រីង សំរាំង
អាជ្ញាធរដុតបំផ្លាញថ្នាំញៀនប្រាំតោនក្នុងពិធីមួយរៀបចំនៅកោះពេជ្រក្នុងទីក្រុងភ្នំពេញថ្ងៃទី២៨ ខែមិថុនា ឆ្នាំ២០២៣។ ខេបូចា/ព្រីង សំរាំង

លោក ស ខេង រដ្ឋមន្ត្រីក្រសួងមហាផ្ទៃជាថ្មីម្ដងទៀតបានទទួលស្គាល់ថាមានការហូរចូលនូវថ្នាំញៀន និងសារធាតុគីមីផ្សំយ៉ាងច្រើនចូលមកក្នុងប្រទេសកម្ពុជា។ លោក លើកឡើងបែបនេះនៅក្នុងពិធីដុតបំផ្លាញចោលនូវត្ថុតាង ថ្នាំញៀន និងសារធាតុគីមីផ្សំដែលរឹបអូសបានកាលពីឆ្នាំកន្លងទៅ។

លោក ស ខេង កាលពីថ្ងៃពុធ បានចូលរួមក្នុងទិវាអន្ដរជាតិប្រយុទ្ធប្រឆាំងគ្រឿងញៀន ដែលរៀបចំឡើងនៅកោះពេជ្រក្នុងរាជធានីភ្នំពេញ។ ក្នុងឱកាសនោះលោកថ្លែងដែរថា មន្ត្រីអនុវត្តច្បាប់បានរឹបអូសសារធាតុញៀនសរុប១៤តោនក្នុងឆ្នាំ២០២២ គឺមានចំនួនបីដងច្រើនជាងឆ្នាំ២០២១ ហើយក្នុងនោះមានជាង៥តោនត្រូវយកមកដុតបំផ្លាញ។

បើតាមលោក ស ខេង កាលពីឆ្នាំមុនសារធាតុញៀនជាង៣០០តោនក៏ត្រូវបានរឹបអូសដែរ ដែលសារធាតុញៀនទាំងនេះនឹងត្រូវដុតបំផ្លាញដោយមានជំនួយពីការិយាល័យអង្គការសហប្រជាជាតិផ្នែកគ្រឿងញៀន និងឧក្រិដ្ឋកម្ម។

ប្រទេសកម្ពុជាត្រូវគេមើលឃើញថាមានការកើនឡើងយ៉ាងខ្លាំងលើចំនួនសារធាតុញៀនដែលបង្ក្រាបបាន ខណៈដែលការិយាល័យអង្គការសហប្រជាជាតិផ្នែកគ្រឿងញៀន និងឧក្រិដ្ឋកម្ម ហៅកាត់ថា UNODC លើកឡើងថាក្នុងឆ្នាំ២០២១ ក្រុមអង្គការឧក្រិដ្ឋជនទំនងជាបានប្រើប្រាស់ប្រទេសកម្ពុជាជាកន្លែងផលិតថ្នាំញៀន។ យ៉ាងណា កម្ពុជាបានច្រាចោលការលើកឡើងបែបនេះ ដោយថាថ្នាំញៀនភាគច្រើនដែលរឹបអូសបានក្នុងប្រទេសកម្ពុជាគឺមានទិសដៅនាំចេញទៅបរទេស។

លោក ស ខេង ថាថ្នាំញៀនទាំងនោះត្រូវបានគេលួចនាំចូលកម្ពុជាដើម្បីនាំចេញទៅក្រៅបន្តទៀត។

លោកបញ្ជាក់ថា៖ «បរិមាណថ្នាំញៀននាំចូលពីតំបន់ត្រីកោណមាសមកកម្ពុជាមានការកើនឡើងតាមរយៈខេត្តនៅភាគឦសាន្តរបស់កម្ពុជា»។

បើតាមទិន្ន័យដែលប្រកាសដោយលោក ស ខេង បានបង្ហាញថាបទល្មើសគ្រឿងញៀនមានការកើនឡើង១០០ភាគរយក្នុងឆ្នាំ២០២២ ហើយមន្ត្រីអនុវត្តច្បាប់បានឃាត់ខ្លួនជនសង្ស័យចំនួន១៥ ០០០នាក់។

មន្ត្រីកំពុងរៀបចំដុតបំផ្លាញសារធាតុញៀនដែលរឹបអូសបានកន្លងមក ក្នុងទិវាអន្តរជាតិប្រយុទ្ធប្រឆាំងគ្រឿងញៀនក្នុងរាជធានីភ្នំពេញថ្ងៃទី២៨ ខែមិថុនា ឆ្នាំ២០២៣។ ខេមបូចា/ព្រីង សំរាំង
មន្ត្រីកំពុងរៀបចំដុតបំផ្លាញសារធាតុញៀនដែលរឹបអូសបានកន្លងមក ក្នុងទិវាអន្តរជាតិប្រយុទ្ធប្រឆាំងគ្រឿងញៀនក្នុងរាជធានីភ្នំពេញថ្ងៃទី២៨ ខែមិថុនា ឆ្នាំ២០២៣។ ខេមបូចា/ព្រីង សំរាំង

កម្ពុជាបានប្រឈមនឹងការរិះគន់ជាច្រើនទាក់ទងការបង្ក្រាបលើបទល្មើសគ្រឿងញៀនដែលបានចាប់ផ្ដើមកាលពីឆ្នាំ២០១៧ និងពេលនោះជាលទ្ធផលមានការចាប់ខ្លួនជនសង្ស័យរាប់ម៉ឺននាក់ទាក់ទងនឹងបទល្មើសគ្រឿងញៀន។ យុទ្ធនាការបង្ក្រាបនេះក៏បាននាំឲ្យមានចំនួនអ្នកជាប់ឃុំកើនឡើងយ៉ាងខ្លាំង ស្របពេលដែលពន្ធនាគាររបស់កម្ពុជាមិនទាន់មានសមត្ថភាពគ្រប់គ្រាន់ក្នុងការរៀបចំដាក់អ្នកជាប់ឃុំ។

ក្នុងយុទ្ធនាការបង្រ្កាបដ៏ធំមួយធ្វើឡើងកាលពីឆ្នាំទៅ សារធាតុផ្សំជាសារធាតុញៀនប្រភេទកេតាមីន(ketamine) ប្រហែល២៧០តោនត្រូវបានរកឃើញនៅទីតាំងចំនួនប្រាំពីរ មាននៅភ្នំពេញ ខេត្តកណ្ដាល ខេត្តព្រៃវែង និងខេត្តស្វាយរៀង។ ក្នុងការបង្ក្រាបផ្សេងទៀត ក៏បានរឹបអូសថ្នាំញៀន និងសារធាតុផ្សំចំនួន១២តោន ពីចម្ការស្វាយមួយកន្លែងក្នុងខេត្តកំពង់ស្ពឺ។ អគ្គស្នងការរងនគរបាលជាតិ លោក ម៉ក់ ជីតូ មានប្រសាសន៍ថា នៅពេលនោះនគរបាលបានរកឃើញសារធាតុញៀន«ពាក់កណ្ដាលសម្រេច»នៅទីតាំងខាងលើ ៕

មន្ត្រីកំពុងរៀបចំដុតបំផ្លាញសារធាតុញៀនដែលរឹបអូសបានកន្លងមក ក្នុងទិវាអន្តរជាតិប្រយុទ្ធប្រឆាំងគ្រឿងញៀនក្នុងរាជធានីភ្នំពេញថ្ងៃទី២៨ ខែមិថុនា ឆ្នាំ២០២៣។ ខេមបូចា/ព្រីង សំរាំង
មន្ត្រីកំពុងរៀបចំដុតបំផ្លាញសារធាតុញៀនដែលរឹបអូសបានកន្លងមក ក្នុងទិវាអន្តរជាតិប្រយុទ្ធប្រឆាំងគ្រឿងញៀនក្នុងរាជធានីភ្នំពេញថ្ងៃទី២៨ ខែមិថុនា ឆ្នាំ២០២៣។ ខេមបូចា/ព្រីង សំរាំង

ប្រែសម្រួលពីអត្ថបទភាសាអង់គ្លេស៖ Sar Kheng Acknowledges Steep Rise in 2022 Drug Seizures

85 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម