អតីតបុគ្គលិកសណ្ឋាគារសូហ្វីតែល ភ្នំពេញ ភូគីត្រា និងភាគីសណ្ឋាគារ បានឈានដល់កិច្ចព្រមព្រៀងលើការផ្ដល់ប្រាក់សំណងផ្សេងៗ មួយថ្ងៃបន្ទាប់ពីអតីតបុគ្គលិកទាំងនេះបានធ្វើបាតុកម្មនៅក្រសួងការងារ។
បើតាមកំណត់ហេតុអង្គប្រជុំ មានចុះហត្ថលេខាមន្ត្រីក្រសួងការងារ លោក និន វណ្ណៈ ផងនោះ បានបង្ហាញថា ភាគីសណ្ឋាគារបានយល់ព្រមជាមួយអតីតបុគ្គលិកដែលត្រូវបញ្ឈប់ពីការងារ ដោយថានឹងទូទាត់ប្រាក់សំណងផ្សេងៗ រួមទាំងប្រាក់លើកទឹកចិត្ត ប្រាក់អតីតភាពការងារ និងប្រាក់កាត់ទុក ផងដែរ។
ក្នុងកំណត់ហេតុសរសេរថា៖ «ភាគីតំណាងកម្មករ និយោជិតបានយល់ព្រមតាមការផ្ដល់ជូនរបស់ភាគីក្រុមហ៊ុន»។
អតីតបុគ្គលិកសណ្ឋាគារសូហ្វីតែល ដែលត្រូវបានបញ្ឈប់ពីការងារកាលពីខែសីហា ដោយសារបញ្ហាធ្លាក់ចុះចំនួនភ្ញៀវទេសចរអំឡុវិបត្តិកូវីដ១៩ បាននាំគ្នាតវ៉ានៅក្រសួងការងារកាលពីថ្ងៃអង្គារ បន្ទាប់ពីមន្ត្រីរបស់ក្រសួងមិនបានបញ្ជូនបណ្ដឹងរបស់ពួកគេទៅកាន់ក្រុមប្រឹក្សាអាជ្ញាកណ្ដាល។
លោក ផាត សារួន ថ្នាក់ដឹកនាំសហជីពឯករាជ្យសាមគ្គី ប្រចាំសណ្ឋាគារបាននិយាយថាតំណាងសណ្ឋាគារនឹងបូកសរុបប្រាក់សំណងផ្សេងនៅក្នុងសប្ដាហ៍នេះ។ លោកបន្តថាខាងសហជីពសង្ឃឹមថា ភាគីសណ្ឋាគារនឹងទូទាត់ត្រឹមត្រូវតាមចំនួនបុគ្គលិក ដែលមានទឹកប្រាក់ជិត១០ ០០០ដុល្លារ។
លោកបន្ថែមថា៖ «ឥឡូវយើងកំពុងរង់ចាំការទូទាត់ពីខាងសណ្ឋាគារក្នុងពេលមួយសប្ដាហ៍»។
អតីតបុគ្គលិកចំនួន៥៣នាក់បានចូលរួមការតវ៉ា ប៉ុន្តែលោក សារួន ថាមានតែបុគ្គលិកចំនួន៤៩នាក់ប៉ុណ្ណោះបានទទួលប្រាក់សំណង ដោយថាបុគ្គលិកបួនរូបផ្សេងទៀតបានឈប់ពីការងារមុនបញ្ចប់កិច្ចសន្យាការងារថ្ងៃទី៣១ ខែសីហា។
លោក និន វណ្ណៈ អគ្គលេខាធិការរងគណៈកម្មការដោះស្រាយវិវាទ និងកូដកម្មនៃក្រសួងការងារដែលជាប្រធានដឹកនាំអង្គប្រជុំផងនោះ មិនអាចទាក់ទងសុំអត្ថាធិប្បាយបានទេ។
លោក ទូច កុសល ប្រធានសហព័ន្ធសហជីពកម្មនិយោជិតវិស័យទេសចរណ៍កម្ពុជា បាននិយាយថាដំបូងខាងសណ្ឋាគារនឹងដោះស្រាយប្រាក់អតីតភាពការងារក្នុងរយៈពេលមួយសប្ដាហ៍ រួចនឹងបន្តផ្ដល់ប្រាក់អត្ថប្រយោជន៍ផ្សេងៗទៀតដូចជា ប្រាក់លើកទឹកចិត្ត និងប្រាក់កាត់ទុកនៅថ្ងៃទី១២ ខែមករា ខាងមុខ។ ប្រាក់កាត់ទុក គឺខាងសណ្ឋាគារកាត់ប្រាក់ខែបុគ្គលិកមួយចំនួនពេលបំពេញការងារដើម្បីទុកទូទាត់ពេលមានការបែកបាក់ ឬខូចខាតទ្រព្យសម្បត្តិណាមួយរបស់សណ្ឋាគារ។
លោក កុសល មានប្រសាសន៍ថា៖ «ខ្ញុំគិតថាក្នុងការចរចាព្រឹកមិញ ទោះបីមិនបានតាមការចង់បាន១០០ភាគរយ តែគ្រប់ភាគីព្រមទទួលយក»។
លោក Charles-Henri Chevet អ្នកចាត់ការទូទៅរបស់សណ្ឋាគារសូហ្វីតែល ភ្នំពេញ ភូគីត្រា មិនបានបញ្ជាក់លម្អិតពីការចរចានេះទេ គ្រាន់តែថាខាងសណ្ឋាគារនឹងធ្វើរតាមច្បាប់ស្តីពីការងារ។
លោក ឲ្យដឹងទៀតថាភាពរងគ្រោះធ្ងន់ធ្ងរក្នុងវិស័យទេសចរណ៍ដោយសារវិបត្តិកូវីដ១៩ ធ្វើឲ្យសណ្ឋាគារគ្មានជម្រើសអ្វីក្រៅពីព្យួរការងារបុគ្គលិក និងកាត់បន្ថយបុគ្គលិកនោះទេ ។ លោកក៏បាននិយាយពីមូលនិធិ បង្កើតដោយក្រុមហ៊ុនមេរបស់សូហ្វីតែល គឺក្រុមហ៊ុន Accor Hotels ចំនួន៨៣លានដុល្លារសម្រាប់ជួយដល់បុគ្គលិកដែលរងផលប៉ះពាល់ផ្នែកសេដ្ឋកិច្ចដោយសារតែវិបត្តិកូវីដ១៩នេះ។ យ៉ាងណា លោកមិនបានបញ្ជាក់ទេថាបុគ្គលិកដែលត្រូវព្យួរការងារនៅភ្នំពេញ នឹងអាចទទួលបានមូលនិធិនេះឬយ៉ាងណា។
លោកប្រាប់ខេមបូចាតាមអ៊ីម៉ែលថា៖ «ពួកយើងគឺពិបាកដូចគ្នា ហើយយើងនៅតែខំប្រឹងជួយបុគ្គលិករបស់យើង ក្នុងការឆ្លងកាត់ពេលវេលាលំបាកមួយនេះ»។
វិស័យទេសចរណ៍ទទួលរងគ្រោះធ្ងន់ជាងគេក្នុងអំឡុងវិបត្តិកូវីដ១៩នេះ ដោយចំនួនភ្ញៀវបរទេសបានធ្លាក់ចុះ៩៨ភាគរយនៅត្រីមាសទី២ និង៤០ភាគរយនៅត្រីមាសទី១ក្នុងឆ្នាំ២០២០។
រដ្ឋលេខាធិការក្រសួងទេសចរណ៍ លោក សុង តុងហាប់ បានសរសេរលើទំព័រហ្វេសប៊ុកក្រសួងទេសចរណ៍ថាចំនួនភ្ញៀវទេសចរបរទេសមានការធ្លាក់ចុះចំនួន៨០ភាគរយ និងអ្នកទេសចរក្នុងស្រុកធ្លាក់ចុះ៥០ភាគរយ និងគិតជាទឹកប្រាក់ខាតក្នុងវិស័យនេះមានប្រហែល៣ពាន់លានដុល្លារ។ ដោយសារតែបញ្ហានេះ បានប៉ះពាល់ដល់ជំនួយពាក់ព័ន្ធផ្នែកទេសចរណ៍១ភាគ៣ និងធ្វើឲ្យបាត់បង់ការងារជិត៥១ ០០០កន្លែង។