សមាគមសម្ព័ន្ធអ្នកសារព័ត៌មានកម្ពុជា

ពលករខ្មែរទៅធ្វើការនៅកូរ៉េមួយចំនួនលើកឡើងថាការយកថ្លៃសំបុត្រយន្ដហោះរបស់ក្រសួងការងារមានតម្លៃខ្ពស់ពេក

ពលករខ្មែរត្រៀមឡើងយន្ដហោះទៅធ្វើការនៅប្រទេសកូរ៉េ ក្នុងព្រលានយន្ដហោះអន្ដរជាតិពោធិ៍ចិនតុង។ រូបភាពនៅថ្ងៃទី២១ ខែសីហា ឆ្នាំ២០២២។ ខេមបូចា/ ឃាង សុខមាន
ពលករខ្មែរត្រៀមឡើងយន្ដហោះទៅធ្វើការនៅប្រទេសកូរ៉េ ក្នុងព្រលានយន្ដហោះអន្ដរជាតិពោធិ៍ចិនតុង។ រូបភាពនៅថ្ងៃទី២១ ខែសីហា ឆ្នាំ២០២២។ ខេមបូចា/ ឃាង សុខមាន

ពលករខ្មែរទៅកូរ៉េមួយចំនួនបានលើកឡើងថា សំបុត្រយន្ដហោះដែលក្រសួងការងារ​យក​ហាក់​ថ្លៃ​មួយគុណនឹងពីរដោយមិនបានបញ្ជាក់ពីហេតុផលច្បាស់លាស់ ខណៈដែល​តម្លៃ​សេវា​ផ្សេងៗ​បាន​យក​រួចហើយ។ ការចំណាយនេះធ្វើឱ្យប៉ះពាល់ដល់ជីវភាព និងបំណុលបន្ថែម​ទៀត។

លោក ចេង ពិសិដ្ឋ អាយុ៣២ឆ្នាំ ជាពលករកំពុងបម្រើការងារក្នុងប្រទេសកូរ៉េ បាន​ឱ្យ​ខេមបូចា ដឹងថា ពលករដែលមានបំណងចង់មកបម្រើការងារនៅប្រទេសកូរ៉េ ដោយសារតែ​បញ្ហា​ជីវភាព និងភាពក្រីក្រ ទើបពួកគាត់ត្រូវចំណាកស្រុកមកធ្វើការស្រុកគេ។ លោកបន្តថា មុន​នឹង​បានមកធ្វើការក្នុងប្រទេសកូរ៉េត្រូវរៀនប្រឡងឱ្យជាប់ ហើយត្រូវរង់ចាំថៅកែកូរ៉េ​រើស​បន្ដ​ទៀត ដូច្នេះពលករភាគច្រើនត្រូវដើរខ្ចីលុយគេ ដើម្បីចំណាយ​លើសេវាផ្សេងៗ។

លោកបន្តថា ពេលមកដល់ក្រសួងការងារត្រូវបង់ថ្លៃសេវាផ្សេងៗដើម្បីបានមកប្រទេសកូរ៉េ ប៉ុន្ដែលោកថាសេវាផ្សេងៗមិនមែនជាបញ្ហាចោទនោះទេ តែបញ្ហាធំនោះគឺថ្លៃសំបុត្រ​យន្ដហោះ​មានតម្លៃរហូត ១ ១០០ដុល្លារក្នុងម្នាក់ ហើយក្រសួងការងារមិនបានបកស្រាយថា​ចំណាយ​លើ​អ្វីឱ្យបា្រកដ។

លោក ពិសិដ្ឋ បន្ដថា៖ «ខ្ញុំចង់ដាក់ជាសំណួរសួរទៅក្រសួងដែរថាការដំឡើង​សំបុត្រយន្ដហោះ​នេះ ឡើងដោយសារកត្ដាអី?​ ឬវាឡើងដោយសារកូវីដ១៩ យើងក៏ចង់ដឹងដែរបង ព្រោះវាជា​ការ​កើនឡើងដ៏ខ្លាំងដែរបង»។ លោកបន្ថែមថា៖ «វាធ្វើឱ្យពលករយើងមានការលំបាក អ្នកខ្លះ​គាត់ជំពាក់គេ ខ្ចីគេ លក់នេះ លក់នោះ ដើម្បីបានលុយមកទិញសំបុត្រយន្ដហោះ ដូច្នេះ​វា​បន្ទុក​សម្រាប់​ពួកគាត់​វិញ ខ្ញុំមកធ្វើការនៅកូរ៉េនេះក៏ខ្ចីគេដែរបង​ដោយសារ​បញ្ហាទាំងអស់ហ្នឹង ហើយត្រូវធ្វើការ​សងគេ៣ទៅ៤ខែទើបរួច»

យ៉ាងណាលោកបន្ថែមថា ក្នុងនាមជាពលករចំណាកស្រុកម្នាក់លោកស្នើ​សុំដល់ក្រសូង​ការងារ មេត្ដាគិតគូរពីបញ្ហាទាំងអស់ហ្នឹងឡើងវិញ ដើម្បីកុំ​ឱ្យ​ជាបន្ទុកដល់ពលករក្រីក្រ​ដែលគ្មានលទ្ធភាពក្នុងការបង់ថ្លៃសំបុត្រយន្ដហោះទាំងអស់ហ្នឹង។ លោកថា ក៏មាន​ករណីខ្លះកើតឡើងច្រើនដែរពេលដែលពួកគាត់​បានមកដល់ប្រទេសកូរ៉េ​ហើយ​ ស្រាប់តែ​មានបញ្ហាសុខភាពដោយមិនអាចធ្វើការបាន ពួកគាត់ត្រូវត្រឡប់ទៅស្រុកខ្មែរ​វិញ ដូច្នេះ​ពួកគាត់ត្រូវចំណាយបន្ថែមទៀតលើអ្វីដែលក្រសួងការងារបានយក វារឹតតែ​ជា​បន្ទុក​ថែមទៀតសម្រាប់ពលករ។

ពលកររូបនេះបន្ថែមថា៖ «មកដល់កូរ៉េហើយ បែរជាត្រូវត្រឡប់ទៅវិញដោយសារសុខភាព​ ពួកគាត់ត្រូវខ្ចីគេបន្ថែមទៀត។ សុំក្រសួងគិតគូររឿងនេះផង កុំឱ្យថ្លៃសំបុត្រយន្ដ​ហោះជាបន្ទុក​សម្រាប់ពលករអី»

កាលពីថ្មីៗកន្លងទៅ ពលករដែលកំពុងបម្រើការងារនៅប្រទេសកូរ៉េបាននាំគ្នាដាក់ជាសំណួរ​ជាច្រើនពាក់ព័ន្ធនឹងក្រសួងការងារអំពីបញ្ហាថ្លៃសំបុត្រយន្ដហោះដែលក្រសួងកំណត់យក ១ ១០០​ដុល្លារទាំងមិនបានបង្ហាញព័ត៌មានឱ្យបានច្បាស់លាស់ ដោយពួកគាត់លើកឡើងថា វា​ជា​តម្លៃថ្លៃ ដោយតម្លៃជាទូទៅត្រឹមតែ​៦០ម៉ឺនវ៉ុន​ជាលុយ​ដុល្លារ​ប្រមាណ៥០០ដុល្លារ​ទាំងទៅ​ទាំងមក ចំណែកក្រសួងការងារយក ១ ១០០ដុល្លារត្រឹមតែ១ជើង។

ក្នុងគណនីហ្វេសប៊ុកមួយរបស់ពលករកូរ៉េម្នាក់ដែលកំពុងបម្រើការងារក្នុងប្រទេសកូរ៉េបានសរសេរអំពីក្រសួងការងារដែលយកថ្លៃសេវាថា៖ «លក់ពាក្យ​ក៏ឡើងថ្លៃ​ សំបុត្រយន្ដហោះ​គ្រាន់តែ​មកកូរ៉េ តែថ្លៃជាងគេ​ទាំងទៅទាំងមក​ទៀត។ បើទិញក្រៅ​ទាំងទៅទាំងមកអស់​ហើយ៥០០​ដុល្លារ​ហ្នឹង»

ស្រដៀងគ្នានេះដែរ លោក សាន គឹមហុង អាយុ២៨ឆ្នាំ  ជាពលករកំពុងបម្រើការងារ​ក្នុង​ប្រទេសកូរ៉េ បានប្រាប់ថា លោកហាក់មិនដឹងថា​តម្លៃដែលក្រសួងការងារ​យក ១ ១០០​ដុល្លារហ្នឹងយកទៅលើថ្លៃអ្វីខ្លះ ព្រោះតម្លៃផ្សេងៗយករួចអស់ហើយ។ លោកបន្តថា​ បើជា​រឿងត្រឹមត្រូវក្រសួងក៏គួរបញ្ជាក់ និងបង្ហាញដល់ពលករឱ្យបានច្បាស់លាស់ បើមិន​ដូច្នេះទេ​ ពលករនៅតែមានការសង្ស័យលើបញ្ហាអស់ហ្នឹង។

លោកបញ្ជាក់ថា៖ «យើងអត់ដឹងថាវាតម្លៃហ្នឹងពិតមែន ព្រោះគេអ្នកថា ជាការរត់ឯកសារ​ តែ​យើងអត់ដឹងដែរ បើថ្លៃសំបុត្រយន្ដហោះអត់ដល់ហ្នឹងទេ។ ពីមុនតម្លៃ៧១០ដុល្លារអីទេ ស្រាប់​តែឥឡូវឡើងដល់ ១ ១០០ដុល្លារវាថ្លៃបង។​ យើងត្រូវមកហើយទោះថ្លៃក៏យើងត្រូវដើរខ្ចីគេដែរ ព្រោះយើងត្រូវមកហើយ មិនថាអត់ឬមានត្រូវតែបង់»

កាលពីថ្ងៃទី២៣ដល់២៥ ខែសីហា ឆ្នាំ២០២២ ក៏មានករណីមួយបានកើតឡើង​គឺពលករ​ខ្មែរ​ធ្វើការនៅកូរ៉េបាន​សម្រុកចេញ​មកកម្ពុជាចំនួនជាង៤០០នាក់។ ពលករខ្មែរ​ទាំងនោះ​ខ្លះសុំ​ច្បាប់​ថៅកែថាឪពុកម្តាយឈឺធ្ងន់ និងខ្លះទៀតសុំច្បាប់ថៅកែ​ឈប់មិនបាន​ក៏ពួកគេសម្រេច​ចិត្ត​បោះបង់ការងារចោល និងត្រឡប់មកកម្ពុជាវិញដោយសារជឿលើការឃោសនាអកុសល​បែប​អបិយជំនឿ និងមិនសមហេតុផលរបស់លោក ខឹម វាសនា។

ប្រជាពលរដ្ឋធ្វើដំណើរលើដងផ្លូវ ខាងមុខក្រសួងការងារ និងបណ្ដុះបណ្ដាលវិជ្ជាជីវៈ ក្នុងរាជធានីភ្នំពេញ។ រូបថតនៅថ្ងៃទី២ ខែកញ្ញា ឆ្នាំ២០២២។ ខេមបូចា/ ព្រីង សំរាំង

ចំណែកឯពលការិនីម្នាក់ទៀតត្រូវនឹងឡើងទៅប្រទេសកូរ៉េ ធ្វើការខាងផ្នែកកសិកម្ម កញ្ញា ថុល ស្រីស្រស់ អាយុ២៦ឆ្នាំ បាននិយាយថា ខ្លួនត្រូវឡើងទៅប្រទេសកូរ៉េ​ក្នុងពេលឆាប់ៗ​ខាងមុខ​នេះ តែបញ្ហាសំខាន់ថ្លៃសំបុត្រយន្ដហោះ​ដែលខាងក្រសួងការងារតម្រូវឱ្យបង់ វា​មានតម្លៃខ្ពស់​ដែល​ធ្វើឱ្យខ្លួនត្រូវដើរខ្ចីលុយគេបង់។ កញ្ញាបន្តថា កញ្ញាក៏មានក្ដីព្រួយបារម្ភ​ពីបញ្ហា​ទាំងអស់​ហ្នឹង​ដែរ ពីព្រោះ​ខ្លួនមិនមានលទ្ធភាពច្រើននោះទេ។

កញ្ញា ស្រីស្រស់ រៀបរាប់ថា៖ «រាងថ្លៃដែរបង ខ្ញុំត្រូវខ្ចីលុយគេបង់ ព្រោះយើងត្រូវបង់ហើយ បើយើងមិនបង់ ឡើងទៅកូរ៉េម៉េចកើតបង ក្រសួងគេតម្រូវចឹង។ វាប៉ះពាល់ហើយបង ព្រោះខ្ញុំ​គ្មានលុយឯណារាប់ពាន់ចឹងណា យើងអ្នកក្រ​។​ តែបើគាត់[ក្រសួងការងារ]​គិតគូរឱ្យ​ពលករ​បន្ដិច​ក៏វាល្អដែរ»

ក្រៅតែអំពីពលករកូរ៉េ ក៏មានពលករខ្មែរ​ដែលទៅធ្វើការ​នៅប្រទេសថៃមួយចំនួន​បាននិយាយ​ពីបញ្ហាថ្លៃសេវារបស់ក្រសួងការងារថាមានតម្លៃថ្លៃ និងចំណាយពេលយូរ ទើបម្នាក់ៗមិន​ចង់​ប្រើប្រាស់ ដោយព្យាយាមចំណាកស្រុកទាំងខុសច្បាប់ បើទោះបីជាដឹងថា​ត្រូវប្រឈមមុខនឹង​បញ្ហាច្រើនក៏ដោយ។

បើតាមអ្នកស្រី​ ស្រីណាក់ (ឈ្មោះអ្នកសារព័ត៌មានដាក់ឱ្យ) ជាអ្នកលក់សំបុត្រយន្ដហោះ​សម្រាប់ពលករកូរ៉េ បានបញ្ជាក់ប្រាប់ថា សំបុត្រយន្ដហោះដែលអ្នកស្រី​លក់ជាទូទៅ​ចន្លោះ​ពី៥០០ដុល្លារទៅ១០០០ដុល្លារតែជាតម្លៃទៅវិញទៅមក។ អ្នកស្រីថា បើសំបុត្រត្រឹមតែមួយ​ជើង​គឺធូរថ្លៃជាងហ្នឹងទៀត។

អ្នកស្រីបន្ដថា៖ «បើរដូវក្ដៅយើងហោះហើរទៅមកតម្លៃត្រឹមតែ៥០០ដុល្លារជាងអីទេ មិនសូវ​ជាថ្លៃអីទេបង»

ចំណែកឯ លោក ឡៅ ហ៊ីម ប្រតិភូរាជរដ្ឋាភិបាលទទួលបន្ទុកជាអគ្គនាយកអប់រំ​បណ្ដុះ​បណ្ដាល​បច្ចេកទេស និងវិជ្ជាជីវៈនៃក្រសួងការងារ បានមានប្រសាសន៍ថា កិច្ចការរឿងបញ្ជូន​ពលករ​ទៅកូរ៉េគឺជាការទទួលខុសត្រូវរបស់លោក  ហេង សួរ រីឯលោកមិនបានទទួល​បន្ទុក​រឿងហ្នឹងឡើយដូច្នេះលោកមិនអាចឆ្លើយនឹងសំណួររបស់ខេមបូចាបានទេ។

លោកគ្រាន់តែបញ្ជាក់ថា៖ «ជាទូទៅឯកឧត្ដម ហេង សួរ គាត់អ្នកទទួលបន្ទុកហ្នឹងហើយ ប្អូនអាច​ទាក់ទង​ទៅ​អ្នកកាន់ការងារហ្នឹងបានដឹងរឿង បងអត់ទទួលបន្ទុករឿងហ្នឹងទេប្អូន»

លោក ខេង គន្ធា ជាអ្នកទទួលបន្ទុកបញ្ជូនពលករទៅកូរ៉េនៃក្រសួងការងារ បានថ្លែងថា លោក​មិន​មានការបកស្រាយអ្វីទេចំពោះថ្លៃសំបុត្រយន្ដហោះ ពីព្រោះលោកថា នៅពេលដែល​ពលករ​ឡើងមកបង់សំបុត្រយន្ដហោះខាងលោកតែងតែប្រាប់ថាចំណាយលើអ្វីខ្លះរួចហើយ តម្លៃ ១ ១០០ដុល្លារមិនមែនសម្រាប់តែថ្លៃសំបុត្រយន្ដហោះនោះទេ។ លោកបន្តថា ខាងលោក​តែងតែឱ្យពលករដែលមានចម្ងល់សាកសួរ ប៉ុន្ដែគ្មាននរណា​ឡើង​សួរនោះទេ។

លោក គន្ធា បន្ថែមថា៖ «ជាទូទៅពេលឡើងមកជួបខាងខ្ញុំ ខាងក្រុមការងារខ្ញុំតែងតែពន្យល់ប្រាប់ទៅគាត់ថាថ្លៃ ១០០ហ្នឹងគឺចំណាយលើអីខ្លះ ពួកគាត់នៅយល់ថា ១០០ ជាថ្លៃសំបុត្រយន្ដហោះ ប៉ុន្ដែជាក់ស្ដែងមិនមែនជាថ្លៃសំបុត្រយន្ដហោះទេ។ អ្នកថាចាំតែថាទេ ជួនកាលនៅពេលដែលមកផ្ទាល់ គេឱ្យសួរមានចម្ងល់អី ហេតុអីក៏មិនសួរ បើពួកគាត់ឆ្ងល់អាចឡើងមកសួរខាងខ្ញុំបាន»

ខេមបូចា មិនអាចសុំការអត្ថាធិប្បាយពី លោក ហេង សួរ អ្នកនាំពាក្យក្រសួងការងារ និង​បណ្ដុះ​​​បណ្ដាលវិជ្ជាជីវៈបានទេ ប៉ុន្តែ លោក  ហេង សួរ កន្លងមកធ្លាប់បញ្ជាក់ថា បច្ចុប្បន្ន​​ពលករខ្មែរដែលធ្វើការនៅ​ប្រទេសកូរ៉េមាន​ជាង​៥ម៉ឺន​នាក់ និងកំពុងបញ្ជូនបន្ដ​ទៀត​ដោយសារ​តែប្រទេសកូរ៉េកង្វះ​ពលករ​ខ្លាំង។

លោក មឿន តុលា នាយកប្រតិបត្ដិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស​(សង់ត្រាល់) បានលើកឡើងថា មិនថាតែពលករទៅកូរ៉េឬទៅប្រទេសថៃទេ ក្រសួងគួរតែ​បង្ហាញ​ពីតម្លាភាពរបស់ខ្លួនឱ្យបានជាក់លាក់ ដើម្បីឱ្យពលករបានដឹង។ លោកថា ការយក​តម្លៃលើសលុបវាគឺជាបន្ទុកមួយសម្រាប់ពលករ ដោយដឹងថា​គ្រប់ពលករទាំងអស់សុទ្ធតែ​ក្រីក្រ មិនមានលទ្ធភាពច្រើនក្នុងការស្វែងរកការងារក្នុងស្រុកបាន ទើបពួកគាត់សម្រេចចិត្ដ​ទៅធ្វើជាកម្មករស្រុកគេ ដូច្នេះក្រសួងក៏គួរគិតគូរពីបញ្ហាទាំងអស់ហ្នឹងសម្រាប់ពលរដ្ឋផង មិនមែនចេះតែឆ្លៀតឱកាសនោះទេ។

នាយកសង់ត្រាល់រូបនេះបន្ដថា៖ «គេមានបារ៉ែនរបស់គេ តែបើក្រសួងយកលើសមែន ជារឿង​ខុសឆ្គងហើយ។ គេហៅថាជាការកេងប្រវ័ញ្ចកម្លាំងរបស់ពលករ យើងដឹង​ហើយថាពលរដ្ឋ​យើង អ្នកដែលសម្រេចចិត្ដទៅក្រៅប្រទេសមិនមែនជាអ្នកសល់លុយទេ សុទ្ធតែអ្នកក្រីក្រ បានពួកគាត់ទៅស្រុកគេ។ ខ្ញុំយល់ថាក្រសួងគួរតែបង្ហាញតម្លៃជាក់លាក់ដល់ពលករ»

នៅថ្ងៃទី១១ ខែកុម្ភៈ ឆ្នាំ២០២២ លោកនាយករដ្ឋមន្រ្តី ហ៊ុន សែន បានស្នើសុំលោក មួន ជេអ៊ីន (Moon Jae-In) ប្រធានាធិបតីសាធារណរដ្ឋកូរ៉េបង្កើនកូតានាំពលករកម្ពុជា និងបន្តយក​ចិត្ត​ទុក​ដាក់ ចំពោះសុខមាលភាពរបស់ពលករកម្ពុជា ទៅធ្វើការ​នៅ​ប្រទេសកូរ៉េ ខណៈជំនួប​ពិភាក្សា​ការងារជាមួយលោក មួន ជេអ៊ីន ប្រធានាធិបតី​សាធារណរដ្ឋកូរ៉េ។

យ៉ាងណាមិញលោក ប៉ិច ពិសី នាយកប្រតិបត្ដិនៃអង្គការតម្លាភាពកម្ពុជា បានថ្លែងថា តម្លៃ​ផ្សេងៗ​ក្រសួងខ្លះបានបញ្ជាក់ពីតម្លៃដែរ ប៉ុន្ដែសម្រាប់តម្លៃសំបុត្រយន្ដហោះ​គឺមិនមានការ​កំណត់ឱ្យបានច្បាស់លាស់នោះទេ វាអាស្រ័យលើក្រុមហ៊ុនឬក៏តម្លៃទីផ្សារ។ យ៉ាងណា​លោកថា បើទោះបីមិនមានកំណត់តម្លៃជាក់លាក់ក៏ពិតមែន ប៉ុន្ដែកាលណា​ក្រសួងយកតម្លៃ​ហួសហេតុពេកអាហ្នឹងក៏ជាអំពើពុករលួយមួយដែរ។

លោកបានបញ្ជាក់ថា៖ «បើសិនជាបងប្អូនពលករគាត់គិតថាតម្លៃដែលកំណត់​ដោយ​ក្រសួង​វាថ្លៃពេក ពួកគាត់គួរតែតវ៉ា ពីព្រោះតម្លៃនៅក្រុមហ៊ុន​អាកាសចរណ៍​គេមានតម្លៃតាមរដូវ។ ខ្ញុំ​គិត​ថាក្រសួងមានពលករច្រើនដែលត្រូវឡើងជាប្រចាំ វាគួរតែថោកជាងគេ បែរជាថ្លៃជាងគេ​ទៅវិញ​ អានេះវាជាភាពមិនប្រក្រតីមួយ ហើយក៏វាជាបន្ទុកមួយសម្រាប់បងប្អូនពលករផង​ដែរ»

934 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម