សមាគមសម្ព័ន្ធអ្នកសារព័ត៌មានកម្ពុជា

ម្តាយ និងកូនជាពលករខ្មែរនៅថៃធ្លាក់ខ្លួនពិការដេកទ្រាំជាមួយជំងឺព្រោះមិនមានលុយព្យាបាល

អ្នកស្រី ប៉ែន ឡី កំពុងអង្គុយលើរទេះរុញ និងលោក យ៉ូត ឃុន ជាកូនច្បងរបស់អ្នកស្រី ដែលត្រូវឡានបុកបាក់ភ្លៅឈរកាន់ឈើច្រត់ថតពីក្រោយនៅខាងស្តាំ ព្រមទាំងកូនទាំង២នាក់ទៀត។ រូបភាពផ្តល់ឱ្យ
អ្នកស្រី ប៉ែន ឡី កំពុងអង្គុយលើរទេះរុញ និងលោក យ៉ូត ឃុន ជាកូនច្បងរបស់អ្នកស្រី ដែលត្រូវឡានបុកបាក់ភ្លៅឈរកាន់ឈើច្រត់ថតពីក្រោយនៅខាងស្តាំ ព្រមទាំងកូនទាំង២នាក់ទៀត។ រូបភាពផ្តល់ឱ្យ

ពលករខ្មែរមួយគ្រួសារដែលមានម្តាយ និងកូនធ្លាក់ខ្លួនពិការត្អូញត្អែរថា ជីវិតរបស់​ពួកគាត់​ជួបការលំបាកក្នុងការ​ស្វែងរកចំណូលចិញ្ចឹមជីវិត និងដេកទ្រាំជាមួយជំងឺច្រើនឆ្នាំមកហើយ ព្រោះមិនមានលុយទៅព្យាបាលជំងឺនៅមន្ទីរពេទ្យ។​

អ្នកស្រីប៉ែន ឡី វ័យ​៤២​ឆ្នាំ បច្ចុប្បន្ន​កំពុងរស់​នៅក្នុងខេត្តរ៉ាក់យ៉ង ប្រទេសថៃជាមួយប្តី និងកូន​៣នាក់។ អ្នកស្រីឱ្យដឹងថា រូបគាត់មានជំងឺចុះខ្សោយកម្លាំងបន្តិចម្តងៗ​រហូតដើរលែងរួចហើយ​ត្រូវ​អង្គុយលើរទេះរុញជិត២០ឆ្នាំមកហើយ។

អ្នកស្រី ប៉ែន ឡី រៀបរាប់ថា ពេលខ្លះរូបគាត់ឈឺចុកចាប់ចំណុចត្រគាក និងជើងរហូតដេកយំ ប៉ុន្តែមិន​ដឹងទៅរកការព្យាបាលនៅ​ឯណា ព្រោះគ្មានលុយ។​

អ្នកស្រី ប៉ែន ឡី បានប្រាប់ថា៖ «ដើរអត់កើតទន់ជង្គង់អស់។​ លំបាកណាស់មិនដឹងមាន​អី​មើល​​​ខ្លួនទេ​ដើរ​មិន​រួច​រកអីមិនបានទេសព្វថ្ងៃនេះ​»។​

បងស្រីរបស់អ្នកស្រី ប៉ែន ឡី គឺអ្នកស្រី ប៉ែន ប៉ិច ជាពលករនៅប្រទេសថៃហើយ​រស់នៅក្បែរ​គ្នា​ថ្លែង​ថា ពីមុនគាត់តែងតែជួយដល់គ្រួសារប្អូន ប៉ុន្តែបច្ចុប្បន្នគាត់ក៏រកមិនសូវបានដែរ។ អ្នកស្រី​បន្ត​ថា រូបគាត់អាណិតប្អូន និងក្មួយដែលរងទុក្ខលំបាក ហើយសូមឱ្យសប្បុរសជនជួយដើម្បី​បានទិញជាអាហារ និងថ្នាំពេទ្យខ្លះ។​

អ្នកស្រី​ ប៉ែន ប៉ិច បញ្ជាក់ថា៖ «កូនក៏រកមិនបាន ប្តីគ្នាក៏រកមិនបាន សូមឱ្យមានការជួយថវិកា​ឱ្យគ្នាបន្តិចបន្តួចខ្លះមក ដើម្បីទិញអីហូប និងទិញថ្នាំពេទ្យផឹកខ្លះ»

នៅក្នុងគ្រួសារនេះក្រៅពីអ្នកស្រី ប៉ែន ឡី ពិបាកមិនអាចធ្វើការងាររកចំណូលបាននោះ សមា​ជិកគ្រួសារផ្សេងទៀតក៏មិនរឹងមាំដែរគឺប្តីអ្នកស្រីមានជំងឺប្រចាំកាយសុខភាពមិនល្អ កូនទី១ អាយុ​២៣ឆ្នាំគ្រោះថ្នាក់ចរាចរណ៍បាក់ជើង គឺមានតែកូនទី២អាយុ១៥ឆ្នាំ ​និងកូនទី៣អាយុ​១០ឆ្នាំ នៅរឹងមាំ តែមានវ័យក្មេងពេកអាចស៊ីឈ្នួលគេរកលុយបានតិចតួច។​ កូនទី២ និងទី៣ ក្រៅពីស៊ីឈ្នួលគេខ្លះក៏នេសាទត្រីតាមបឹងត្រពាំង ដើម្បីយកមកទទួលទាន​ក្នុងគ្រួសារ​ផង​ដែរ។​

កូនទី១របស់អ្នកស្រី ប៉ែន ឡី គឺលោក យ៉ូត ឃុន អាយុ២៣ឆ្នាំ បានឱ្យដឹងថា ថ្ងៃមួយ​ក្នុងឆ្នាំ​២០១៩ លោកបានចេញពីធ្វើការជិះម៉ូតូទៅផ្ទះត្រូវ​ឡានទ្រុងធំ​បុកពីក្រោយ​ប​ណ្តាលឱ្យបាក់​ជើង​​ត្រង់​ចំណុចភ្លៅខាងឆ្វេង។​ យុវជន យ៉ូត ឃុន ត្រូវការឈើច្រត់២សម្រាប់អមសងខាង ដើម្បី​ទប់ខ្លួនឈរ និងដើរ ហើយនៅពេលមិនមានឈើច្រត់យុវជនរូបនេះ ត្រូវវារ ឬ រំកិល​គូទ។​

យុវជន យ៉ូត ឃុន បានឱ្យដឹងថា ពេទ្យបានណាត់ឱ្យរូបលោកទៅជួបដើម្បីពិនិត្យ និងយក​ដែក​ដាក់អបក្នុងឆ្អឹងចេញកាលពីឆ្នាំមុន ប៉ុន្តែដោយសារមិនមាន​លុយក៏មិនហ៊ានទៅពេទ្យទេ។ យុវជន​រូបនេះបន្តថា ជាញឹកញាប់កន្លែងរបួសរបស់គាត់តែងឈឺហួលធ្វើឱ្យគាត់ដេកយំ។​

យុវជន យ៉ូត ឃុន អំពាវនាវសុំ​ឱ្យស្ថានទូតខ្មែរប្រចាំប្រទេសថៃ​ក៏ដូចជាអង្គការសប្បុរសជន​ផ្សេងទៀតជួយដល់រូបលោក បានឆាប់ជាសះស្បើយហើយអាចរក​ការងារធ្វើរក​ចំណូល​បាន​ដូចដើមវិញ។​

លោក យ៉ូត ឃុន៖ «សុំឱ្យខាងខ្មែរជួយ ខាងអង្គការ ខាងស្ថានទូតជួយធ្វើម៉េចឱ្យអាចដើរបាន ដើម្បីឆាប់បានធ្វើការងារដូចដើមវិញ»។​

ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពលោក យង់ គិមអេង មាន​ប្រសាសន៍​ថា ករណីគ្រួសារពលករខ្មែរនេះពិតជាគួរឱ្យអាណិតអាសូរ។ លោក ជំរុញឱ្យ​ស្ថាប័ន​ពាក់ព័ន្ធពិសេសស្ថានទូតខ្មែរប្រចាំប្រទេសថៃជួយដោះស្រាយឱ្យបានទាន់ពេល។​

លោក យង់ គិមអេង៖ «ស្ថានកុងស៊ុលដែលជាអ្នកធ្វើកិច្ចការហ្នឹងផ្ទាល់ជាមួយប្រជាពលរដ្ឋ។ អ៊ីចឹងអគ្គកុងស៊ុលហ្នឹងហើយដែលគាត់មានកាតព្វកិច្ចមើលការខុសត្រូវផ្សេងៗ។ ហើយ​ស្ថានទូត​គួរតែយកចិត្តទុកដាក់គិតគូរដល់គាត់។ ហើយខ្ញុំក៏សូមអំពាវនាវ​ទៅដល់ស្ថានទូត​ប្រទេសខ្មែរយើងនៅស្រុកថៃហ្នឹងធ្វើម៉េចជួយគាត់ផង សូមជួយគាត់ឱ្យគ្នាមានក្តីសង្ឃឹម​សម្រាប់​ការរស់រានមានជីវិតទៅថ្ងៃអនាគតទៀតបាន»

ខេមបូចា បានព្យាយាមទាក់ទងតាមលេខទូរសព្ទ និងសារតាមហ្វេសប៊ុក ទៅស្ថានទូតកម្ពុជា​ប្រចាំប្រទេសថៃ ប៉ុន្តែមិនមានការឆ្លើយតបទេ។

​ប្រធានកម្មវិធីប្រឆាំងការជួញដូរមនុស្ស និងទេសន្តរប្រវេសន៍ នៃអង្គការសង់ត្រាល់​លោក ឌីថេ ហូយ៉ា មាន​ប្រសាសន៍​ថា ពលរដ្ឋ​ខ្មែរ​ដែលទៅធ្វើការងារនៅក្នុ​ងប្រទេសថៃ​មាន​បង់​វិភាគទានចូលសេវាធានារ៉ាប់រងសង្គមដូច្នេះពេលមានជំងឺ ឬ គ្រោះថ្នាក់ផ្សេងៗ​ត្រូវ​ទទួល​បានកញ្ចប់ថវិកានោះមកព្យាបាលវិញ។​

លោក ឌីថេ ហូយ៉ា៖ «បើគាត់ធ្វើការងារនៅប្រទេសថៃក៏មានគេហៅថា របបគាំពារសង្គម ប្រកាន់​សង្គម ឬធានារ៉ាប់រងសង្គមរបស់គេ ដែលត្រូវសម្របសម្រួល​ឱ្យគាត់ទទួល​បាន​សេវា​ហ្នឹង។​ ព្រោះធម្មតាគាត់ធ្វើការងារស្រុកគេគាត់បង់ប្រាក់​ចូលធានារ៉ាប់រង​សង្គម​ហើយ​ចឹង​ពេលគាត់គ្រោះថ្នាក់ត្រូវទទួលបានសេវាហ្នឹង»។​

បើតាមអ្នកស្រី ប៉ែន ឡី ឱ្យដឹងថា គ្រួសាររបស់អ្នកស្រីទៅធ្វើការងារនៅប្រទេសថៃ​ប្រមាណ​២០ឆ្នាំហើយ ដែលពីមុនឆ្លងដែនទៅមកកម្ពុជា និងថៃញឹកញាប់ ប៉ុន្តែប្រមាណ១០ឆ្នាំ​ចុង​ក្រោយ​នេះគឺគ្រួសារអ្នកស្រីរស់នៅទីនោះរហូត។​

ចំណែកអ្នកនាំពាក្យក្រសួងការងារលោក ហេង សួរ ក៏មិនបានដឹងករណីពលករខ្មែរ​ទាំងម្តាយ​និងកូនរងទុក្ខលំបាកវេទនានៅប្រទេសថៃនេះដែរ។ លោក បញ្ជាក់ថា លោកនឹងប្រាប់ឱ្យក្រុម​ការងារ​ក្រសួងនៅក្នុងប្រទេសថៃទាក់ទងទៅពលករមួយគ្រួសារនេះ។​

លោក ហេង សួរ ថ្លែងថា៖ «អរគុណសម្រាប់ព័ត៌មាននេះ ខ្ញុំនឹងបញ្ជូនទៅក្រុមការងារ​ទទួល​បន្ទុក​ពលកររួមទាំងស្ថានទូត ដើម្បីស្វែងរកគាត់ និងដើម្បីអន្តរាគមន៍​ឱ្យគាត់មកស្រុកខ្មែរ​វិញ»។​

របាយការណ៍ក្រសួងការងារបង្ហាញថា ពលករខ្មែរកំពុងធ្វើការងារនៅក្រៅប្រទេសមាន​១លាន​៣សែននាក់ក្នុងនោះ១លាន២សែននាក់ធ្វើការងារនៅប្រទេសថៃ។ ចំណែករបាយការណ៍​អង្គការ​សង់ត្រាល់ បង្ហាញថា ពលករខ្មែរធ្វើការងារនៅក្រៅ​ប្រទេសមានជាង២លាន​២សែន​នាក់​ក្នុងនោះ២លាននាក់កំពុងធ្វើការងារនៅប្រទេសថៃ។​

អង្គការសង់ត្រាល់បញ្ជាក់ទៀតថា ក្នុងចំណោម២លាននាក់នៅក្នុងប្រទេសថៃនេះ​ប្រមាណ​ពាក់កណ្តាលស្មើនឹង១លាននាក់មិនមានឯកសារស្របច្បាប់ដែលប្រឈមសមត្ថកិច្ចថៃចាប់​ខ្លួន ត្រូវថៅកែកេងប្រវ័ញ្ច ឬពេលមានគ្រោះថ្នាក់ផ្សេងៗមិនមានអ្នកទទួលខុសត្រូវ៕

192 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម