សហគមន៍តាតុក ដែលមានប្រជាជនរស់នៅតាមបណ្ដោយប្រឡាយ០៣ ប្រមាណ៣៥គ្រួសារ ស្ថិតក្នុងខណ្ឌដង្កោ រាជធានីភ្នំពេញ កំពុងទន្ទឹងរង់ចាំសាលាក្រុងចេញប័ណ្ណកម្មសិទ្ធិស្របច្បាប់ឱ្យពួកគេ ខណៈពួកគេបានដាក់ញត្តិតាំងពីចុងឆ្នាំ២០១៨ ដើម្បីសុំអន្តរាគមន៍រឿងដីធ្លី តែរហូតមកដល់ពេលនេះ នៅតែមិនទាន់មានដំណោះស្រាយនៅឡើយ មានតែការរុញដាក់គ្នាពីស្ថាប័នមួយទៅមួយ។
តំណាងពលរដ្ឋក្នុងសហគមន៍តាតុក ដែលស្ថិតក្នុងភូមិព្រែកថ្លឹង សង្កាត់ជើងឯក ខណ្ឌដង្កោ គឺអ្នកស្រី អឹម សារឿន វ័យ៥២ឆ្នាំ បានប្រាប់ឱ្យដឹងថា អ្នកស្រីបានតាំងទីលំនៅក្នុងសហគមន៍តាតុកតាំងតែពីឆ្នាំ២០០០ ហើយក្រោយមក រាជរដ្ឋាភិបាលមានគម្រោងអភិវឌ្ឍប្រឡាយ០៣ ដែលនឹងមានផលប៉ះពាល់ដល់សហគមន៍ ដែលអ្នកស្រីរស់នៅតាមបណ្តោយប្រឡាយនេះ។ ដោយសារតែផលប៉ះពាល់នេះ សហគមន៍អ្នកស្រីបានដាក់លិខិតស្នើឱ្យមានដំណោះស្រាយទៅដល់អាជ្ញាធរពាក់ព័ន្ធតាំងពីចុងឆ្នាំ២០១៨ តែពុំមានការឆ្លើយតបជាវិជ្ជមានណាមួយនៅឡើយទេ។
អ្នកស្រីលើកឡើងថា៖ «មួយរយៈចុងក្រោយនេះខ្ញុំទៅដាក់ខ្ទង់៦ដង[ដាក់ញត្តិ] ហើយលើកនេះគាត់ចេះតែឆ្លើយថាដោះស្រាយៗ តែមិនទាន់ឃើញចេញលទ្ធផលឱ្យ ស្រេចតែមាត់គាត់ថារុញពួកខ្ញុំទៅនេះទៅនោះ»។
អ្នកស្រីបានបន្តថា អ្នកស្រីក៏ដូចជាប្រជាពលរដ្ឋផ្សេងទៀត គឺទន្ទឹងរង់ចាំសាលាក្រុងចេញប័ណ្ណកម្មសិទ្ធិស្របច្បាប់ឱ្យពួកគេ ស្របពេលពួកគេបានដាក់សំណើរសុំអន្តរាគមន៍តាំងតែពីចុងឆ្នាំ២០១៨មកម៉្លេះ។ ហើយពេលថ្មីៗនេះ អ្នកស្រីប្រាប់ថា ពលរដ្ឋប្រមាណ២០នាក់បានទៅតាមដានញត្តិម្ដងទៀតនៅសាលាក្រុង តែមន្រ្តីសាលាក្រុងគេចវេសក្នុងន័យមិនអើពើនិងរកដំណោះស្រាយ មានតែការរកលេសថារវល់នេះរវល់នោះ និងរុញឱ្យទៅសួរក្រសួងផ្សេងទៅវិញ។
អ្នកស្រីសារឿន បានប្រាប់ឱ្យដឹងទៀតថា៖ «ខកចិត្តនឹងគាត់[អាជ្ញាធរ] ខ្ញុំមិនដឹងសាលាក្រុងមានមូលហេតុអ្វីទេ ព្រោះចេះតែពន្យាពេលរហូត ហើយក្រោយពេលដែលពួកខ្ញុំទៅខាងក្រុងចេះតែថាបែបនេះ បែបនោះដោយឱ្យទៅសួរក្រសួងសាធារណការ និងដឹកជញ្ជូនផង ទៅមន្ទីរដែនដីផង»។ អ្នកស្រីបន្តថា៖ «ខ្ញុំមានអារម្មណ៍ថាគាត់ចង់ពង្វៀងពួកខ្ញុំចង់បោះបាល់ពួកខ្ញុំហ្មង៎ ឱ្យពួកខ្ញុំរត់ចុះរត់ឡើងឱ្យអស់ចិត្តពួកខ្ញុំ តែពួកខ្ញុំអត់អស់ចិត្តទេ នៅតែធ្វើការបន្តទៀតដើម្បីទាមទារប័ណ្ណកម្មសិទ្ធិ ធ្វើមិចឱ្យគាត់អភិវឌ្ឍនៅនឹងកន្លែង»។
អ្នកស្រី សារឿន រំលឹកឱ្យដឹងថា កាលដើមឡើយខាងសង្កាត់ និងខណ្ឌ បានចុះមកសម្រួល ព្រោះពីមុនខាងសាលាក្រុងលើកឡើងថាពលរដ្ឋទាំង៣៥គ្រួសារនេះនៅលើប្រឡាយ តែពេលក្រោយមកខាងសង្កាត់ និងខណ្ឌជួយកែសម្រួលដាក់ថារស់នៅក្បែរចំណីប្រឡាយ ដូច្នេះអ្នកស្រីចង់ឱ្យអាជ្ញាធរចេញប្លង់ស្របច្បាប់ ដោយខ្វៀលដីសហគមន៍ចេញពីប្រឡាយ០៣។
អ្នកស្រី សារឿន រៀបរាប់ថា៖ «គោលបំណងដែលប្រជាពលរដ្ឋសហគមន៍តាតុក យើងចង់បាន គឺទីមួយស្នើឱ្យខ្វៀលដីសហគមន៍នេះចេញពីប្រឡាយ០៣ ទីពីរចង់ឱ្យអាជ្ញាធរចេញប័ណ្ណកម្មសិទ្ធិ ទីបីចង់ឱ្យអាជ្ញាធរអនុញ្ញាតឱ្យពលរដ្ឋសហគមន៍ចូលរួមដឹងឮ ពេលមានការអភិវឌ្ឍណាមួយ»។
អ្នកស្រី សារឿន មានមុខរបរជាអ្នកលក់ត្រី និងមានកូន៩នាក់ក្នុងបន្ទុក ក៏បានលើកឡើងពីកង្វល់ដែលខ្លួនខ្វល់ជាងគេបំផុត គឺពួកគេនឹងរស់នៅលិចលង់ក្នុងជង្ហុកទឹកនារដូវវស្សា ត្បិតថាមានឧកញ៉ាចាក់ដីលុបប្រឡាយដើម ហើយព័ទ្ធរបងចោល ហេតុអ្វីអាជ្ញាធរមិនសួរនាំ ហេតុអ្វីមកធ្វើបាបតែប្រជាជនក្រីក្រ ស្លូតត្រង់ទៅវិញ។ ដូច្នេះហើយ បានជាពួកគេទាមទារឱ្យមានប័ណ្ណកម្មសិទ្ធិ ដើម្បីចាក់ដីធ្វើផ្ទះឱ្យបានរស់នៅសមរម្យ។
អ្នកស្រីអះអាងថា ៖ «សព្វថ្ងៃនេះខ្ញុំរង់ចាំមើលថ្ងៃណាដែលអាជ្ញាធរចេញប័ណ្ណកម្មសិទ្ធិឱ្យ ដោយសារតែទីតាំងនេះវាជិតកន្លែងការងារ កូនចៅធ្វើការរៀនសូត្រអីនៅជិតនេះទាំងអស់។ ម្យ៉ាងដីឧកញ៉ា ក្រុមហ៊ុនគេចាក់ពេញអស់ហើយ ពួកខ្ញុំមិនលិច? បើសិនណាអាជ្ញាធរចេញប្លង់ឱ្យខ្ញុំ ខ្ញុំចាក់ដីឱ្យផុតដូចខាងគាត់ហើយ»។
អ្នកស្រីក៏បានស្នើឱ្យសាលាក្រុងឆាប់ដោះស្រាយបញ្ហានេះជូនប្រជាពលរដ្ឋ ដើម្បីឆាប់បានប័ណ្ណកម្មសិទ្ធិស្របច្បាប់ និងដើម្បីសាងសង់ផ្ទះ ព្រោះឱ្យតែដល់ខែវស្សាគឺទឹកលិចអស់ហើយពិបាកក្នុងការរស់នៅ ប្រកបរបររកស៊ី កូនៗទៅសាលារៀន ចិញ្ចឹមគោមាន់ទាអីក៏ពិបាក។
អ្នកស្រីបន្តថា៖ «លំបាកសព្វបែបយ៉ាង ឱ្យតែខែវស្សាភ្លៀងចាប់ផ្ដើមធ្លាក់ គឺទឹកលិចហើយ ចង់រកស៊ីជួញដូរ ចិញ្ចឹមគោមាន់ទា អីក៏ពិបាកដែរ ខូចខាតទាំងទ្រព្យសម្បត្តិ ហើយចង់ជូនកូនទៅរៀនអីទាល់តែចម្លងទូកទៅ»។
ចំណែកអ្នកស្រី ឡាយ តាំ អាយុ ៦៥ឆ្នាំ ជាពលរដ្ឋរស់នៅសហគមន៍តាតុក បានឱ្យដឹងដែរថា អ្នកស្រីមានការបារម្ភ និងពិបាកចិត្តត្បិតអាជ្ញាធរមិនទាន់ចេញប្លង់កម្មសិទ្ធិ ព្រោះឱ្យតែខែវស្សាមកទឹកជន់លិចលង់ផ្ទះសម្បែងលោកយាយ ចង់ចាក់ដីសង់ផ្ទះក៏មិនហ៊ាន ត្បិតមិនទាន់មានប្លង់ស្របច្បាប់។
អ្នកស្រីរៀបរាប់ថា៖ «ខ្ញុំចាស់ជរាទីទ័លក្រ រស់នៅទីនេះពិបាក ឱ្យតែខែទឹកលិចមក លិចផ្ទះសម្បែងអស់ហើយ ចឹងបានខ្ញុំរង់ចាំគេចេញប្លង់ឱ្យហ្នឹង»។
អ្នកស្រី តាំ លើកឡើងនូវសំណើរមិនខុសពីអ្នកភូមិផ្សេងទៀតឡើយ ដោយចង់ឱ្យអាជ្ញាធរកាត់សហគមន៍នេះ ពីគម្រោងប្រឡាយ០៣ និងចេញប្លង់កម្មសិទ្ធិជូនពួកគាត់ បើពុំនោះទេប្រជាជនទាំង៣៥គ្រួសារនៅទីនេះ នៅតែរងទុក្ខវេទនាដដែលមិនខាន។
អ្នកស្រីឱ្យដឹងថា៖ «វេទនាត្រង់ថា ក្រុមហ៊ុនគេចាក់ដីជុំវិញអស់មក ពួកខ្ញុំទឹកលិចលង់ទៅ ពួកខ្ញុំមិនហ៊ានចាក់ដីទេ ព្រោះគាត់[អាជ្ញាធរ]អត់ទាន់ចេញប្លង់កម្មសិទ្ធិឱ្យវាពិបាកចឹង បើគាត់ចេញប្លង់ឱ្យទោះបីផ្ទះតូច ផ្ទះធំក៏ដោយយើងចាក់ដីឱ្យខ្ពស់ផុតពីទឹកទៅ មិននៅតែចឹងទេលិចនៅហ្នឹង»។
ស្ត្រីវ័យចំណាស់រូបនេះ ប្រាប់ឱ្យដឹងទៀតថា រូបគាត់អន់ចិត្តនឹងអាជ្ញាធរ ខណៈដែលប្រជាពលរដ្ឋទៅពឹងពាក់ឱ្យជួយរកដំណោះស្រាយ តែបែរជារុញដាក់គ្នាទៅវិញ មិនយកចិត្តទុកដាក់ខ្វល់ខ្វាយពីសុខទុក្ខរាស្រ្តយ៉ាងណានោះទេ។
អ្នកស្រីថា៖ «ខ្ញុំអន់ចិត្ត ពេលគាត់រុញដាក់គ្នា បោះទៅបោះមក ថ្ងៃនេះថ្ងៃនោះ អត់មានជួយដោះស្រាយពួកខ្ញុំឱ្យឆាប់ៗ ឃើញទុក្ខវេទនាប្រជាពលរដ្ឋហើយ អត់ទេ គិតតែរុញទៅរុញមក គ្នាខាតពេលវេលារកស៊ី តិចៗគ្នាឡើងទៅ»។
អ្នកស្រីរូបនេះអះអាងថា ទីតាំងដែលអ្នកភូមិរស់នៅ គឺនៅលើក្បែរប្រឡាយ មិនមែននៅក្នុងប្រឡាយ០៣នោះទេ។ អ្នកស្រីបន្តថា កាលដើមឡើយទីតាំងនេះមិនមែនជាប្រឡាយទេ គ្រាន់តែជាចង្អូរគេបង្ហូរទឹកមកធ្វើស្រែប្រាំងប៉ុណ្ណោះ ឯប្រឡាយពិតប្រាកដអ្នកមានអំណាចចាក់ដីលុបបាត់ហើយ។
អ្នកស្រីថ្លែងថា៖ «ទីតាំងនេះមិនមែនប្រឡាយទេ ពីដើមមកគេធ្វើស្រូវប្រាំងពីក្រោម គេកាយដីបង្ហូរទឹកចូលស្រែ ហើយអាប្រឡាយមែនទែនហ្នឹងឧកញ៉ាចាក់លុបហើយ ដល់តែចាក់លុបចឹង ទីតាំងនេះកើតទៅជាប្រឡាយទៅ»។
ចំណែកពលរដ្ឋមួយរូបទៀត គឺលោកយាយ ទូច សុន អាយុ៨០ឆ្នាំ បានឱ្យដឹងថា កំណើតកើតជារបស់លោកយាយគឺរស់នៅទីតាំងនេះ លោកយាយច្បាស់ណាស់ថាទីតាំងនេះ មិនមែនជាប្រឡាយទេ ហើយលោកយាយចង់បានតែប្លង់កម្មសិទ្ធិស្របច្បាប់សម្រាប់រស់នៅតំបន់នេះឱ្យបានសមរម្យដូចគេឯងប៉ុណ្ណោះ។
លោកយាយរៀបរាប់ទាំងទឹកមុខមាំថា៖ «ខ្ញុំស្គាល់ទីនេះ ខ្ញុំកើតនៅហ្នឹងរស់នៅហ្នឹង ត្រង់ស្ពានហ្នឹងជាត្រពាំង មិនមែនប្រឡាយទេ ហើយខ្ញុំមិនចង់បានអីក្រៅពីបានប្លង់ដីកម្មសិទ្ធិរបស់យើងទេ»។
គេសង្កេតឃើញថា ទីតាំងនៅជុំវិញសហគមន៍តាតុក មានការចាក់ដីព័ទ្ធរបងជុំជិតពីសំណាក់អ្នកមានអំណាច ដែលទីតាំងនេះជាតំបន់សក្តានុពលនៅជាយក្រុង ហើយអ្វីគួរឱ្យកត់សម្គាល់នោះការចាក់លុបដីជុំវិញសហគមន៍តាតុក ធ្វើឱ្យមានការលិចលង់ផ្ទះពលរដ្ឋ៣៥គ្រួសារនារដូវវស្សា ព្រោះគេឃើញមានស្នាមទឹកលិចនៅជាប់នឹងជញ្ជាំងផ្ទះនៅឡើយ។
ទាក់ទងនឹងបញ្ហានេះ លោក ស៊ុន ស៊ីវ ចៅសង្កាត់ជើងឯក បានឱ្យដឹងដែរថា ប្រជាពលរដ្ឋនៅសហគមន៍តាតុក បានទៅដាក់ញត្តិស្ងាត់ៗនៅសាលារាជធានីភ្នំពេញដោយមិនប្រាប់អាជ្ញាធរ។ លោកបន្តថា ពួកគេទៅដល់ក្រសួងក៏គ្មានអ្នកណាអនុញ្ញាតដោះស្រាយឱ្យដែរ ដោយសារតែដីដែលពួកគេរស់នៅសព្វថ្ងៃនេះចំប្រឡាយ។
លោកចៅសង្កាត់បន្តទៀតថា តាំងពីពលរដ្ឋនៅសហគមន៍នេះមករស់នៅ គ្មានអាជ្ញាធរណាទៅគំរាមកំហែង ឬដេញចេញនោះទេ ព្រោះមិនដឹងទៅដេញចេញដោយរបៀបណាកើត ត្បិតពួកគេមកតាំងទីលំនៅម្នាក់ៗដប់ម្ភៃឆ្នាំទៅហើយ។
លោក ស៊ីវ បញ្ជាក់ថា៖ «គ្មានអាជ្ញាធរណាដេញពួកគាត់ទេ នៅចឹងសិនទៅ ដោយសារពិនិត្យជាក់ស្ដែងហ្នឹង ពួកគាត់នៅក្នុងប្រឡាយហ្នឹងតែម្ដង ឱ្យយើងទៅធ្វើម៉េច ចេញកម្មសិទ្ធិជូនគាត់ក៏ថ្នាក់លើដែរ មិនមែនថ្នាក់សង្កាត់ទេមិនចឹង? ហើយគាត់ទៅសាលាក្រុង ទៅក្រសួងដែនដី ក៏គ្មានអ្នកណាអនុញ្ញាឱ្យគាត់ដែរ ព្រោះគាត់នៅក្នុងប្រឡាយ»។
ថ្វីបើប្រជាពលរដ្ឋរស់នៅសហគមន៍តាតុកអះអាងថា ពួកគេមិនបានរស់នៅក្នុងប្រឡាយ០៣ទេ តែលោកចៅសង្កាត់បានអះអាងថា ប្រជាជនទាំង៣៥គ្រួសារនេះ រស់នៅក្នុងប្រឡាយពិតប្រាកដមែន។
លោកចៅសង្កាត់បញ្ជាក់ថា៖ «នៅក្នុងប្រឡាយហ្នឹងហើយ មានណាទៀត បើខ្ញុំធ្វើផ្លូវឱ្យ ធ្វើទ្វារឱ្យទៀតផង ដើម្បីឱ្យពួកគាត់បានសុខសប្បាយហ្នឹងណា ជួយទាំងសម្ភារៈហូបចឹងទៀតផង»។
ចំណែកលោកស្រី គឹម ញឹប អភិបាលខណ្ឌដង្កោ បានបដិសេធមិនឆ្លើយតបនឹងសំណួរអ្នកសារព័ត៌មាន ជុំវិញការដាក់ញត្តិ និងស្នើប័ណ្ណកម្មសិទ្ធិរបស់ពលរដ្ឋនៅសហគមន៍តាតុក។
លោកស្រីលើកឡើងថា៖ «អញ្ជើញមកពីណា? អូន អធ្យាស្រ័យខ្ញុំអត់អាចផ្ដល់ព័ត៌មានហ្នឹងបានទេ សុំអធ្យាស្រ័យ អរគុណច្រើន»។
ជុំវិញករណីនេះ លោក សឿង សារ៉ន នាយកប្រតិបត្តិអង្គការសមាគមធាងត្នោត បានលើកឡើងថា អាជ្ញាធរគួរពិគ្រោះយោបល់ឱ្យបានគ្រប់ជ្រុងជ្រោយ និងដោះស្រាយដោយតម្លាភាពជូនប្រជាពលរដ្ឋ មិនគួរមានការរុញដាក់គ្នាទៅវិញទៅមកនោះទេ។ ហើយអាជ្ញាធរគួរមានមាតិកា និងមានអ្នកទទួលខុសត្រូវច្បាស់លាស់ពីថ្នាក់ជាតិរហូតដល់ថ្នាក់ក្រោមជាតិ ដើម្បីដោះស្រាយបញ្ហានេះ។
លោកថ្លែងយ៉ាងដូច្នេះថា៖ «តាមពិតការកំណត់ក្នុងការដោះស្រាយអាជ្ញាធរគួរតែដឹងថាចូលច្រកណា ចេញច្រកណាហើយ ក្នុងនាមជាអាជ្ញាធរមានសមត្ថកិច្ចគួរតែពន្យល់ប្រជាពលរដ្ឋ ពីគ្រោះយោបល់ឱ្យគ្រប់ជ្រុងជ្រោយ ជាជាងការរុញដាក់គ្នា ។ ហើយយើងឃើញមានយន្តការដោះស្រាយបញ្ហាដីធ្លីមានយូរណាស់ហើយ ប៉ុន្តែការយកចិត្តទុកដាក់ក្នុងការដោះស្រាយជូនពលរដ្ឋហាក់នៅមានកម្រិត»។
លោកបន្ថែមថា ដំណោះស្រាយ បើរាជរដ្ឋាភិបាលមិនព្រមដោះស្រាយទេ នឹងមានផលប៉ះពាល់ច្រើនដល់ប្រជាសហគមន៍ ដែលរស់នៅតំបន់នឹង ទីមួយពួកគេអាចប្រឈមនឹងការបណ្ដេញចេញដោយបង្ខំ ទីពីរពួកគេអាចបាត់បង់នូវមុខរបររកស៊ីប្រចាំថ្ងៃ និងប៉ះពាល់ដល់សតិអារម្មណ៍ ពិសេសការអប់រំរបស់កុមារតូចៗ។
លោក សារ៉ន លើកឡើងថា៖ «បើយើងមើលទៅបទពិសោធន៍ក្នុងការបណ្ដេញចេញដោយបង្ខំពីមុនមក គឺប៉ះពាល់ច្រើនណាស់នូវផ្នែកសតិអារម្មណ៍ ក៏ដូចជាការអប់រំរបស់កុមារតូចៗ ហើយដំណោះស្រាយខ្ញុំគិតថារាជរដ្ឋាភិបាល ទោះបីជាមានបញ្ហាប្រឈមយ៉ាងណាក៏ដោយចុះ ការស្វែងយល់អំពីរង្វាស់ដី ការគិតគូរអំពីសំណងសមរម្យជូនប្រជាពលរដ្ឋដែលរងផលប៉ះពាល់»។
លោកមើលឃើញថា រដ្ឋាភិបាលគួរតែយកយន្តការដែលមានស្រាប់មកជជែកជាមួយភាគីពាក់ព័ន្ធ ហើយដំណោះស្រាយគួរតែធ្វើឡើងដោយតម្លាភាព គណនីយភាព បរិយាកាសអំណោយផល ដើម្បីឱ្យប្រជាពលរដ្ឋរស់នៅក្នុងតំបន់មិនរៀបរយទទួលបានការពិគ្រោះយោបល់ដោយអត្ថន័យទទួលយកបាន។
ចំណែកអ្នកនាំពាក្យសាលារាជធានីភ្នំពេញ លោក ម៉េត មាសភក្ដី មិនអាចសុំការបកស្រាយបានឡើយ ជុំវិញបញ្ហានេះ ដោយទូរសព្ទទៅប្រាប់ថាមិនឮច្បាស់ សូម្បីតែផ្ញើសារតាមតេឡេក្រាម បានចូលមើលហើយក៏មិនឆ្លើយតប។
ទាក់ទងនឹងករណីនេះ សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា អាដហុក (ADHOC) ចេញផ្សាយនូវរបាយការណ៍មួយកាលពីថ្ងៃទី៨ កុម្ភៈ បានរកឃើញថា នៅក្នុងឆ្នាំ២០២១នេះមានវិវាទដីធ្លីចំនួន១៦៩ករណី ដីទំហំ ៥២ ៦០១.៨៧ ហិកតា ប៉ះពាល់ជនរងគ្រោះ ១៧ ០៣៣ គ្រួសារ ស្មើ៦១ ៤៦៩នាក់ មានជនជាតិដើមភាគតិច ១ ៣៤៧ គ្រួសារ ដែលក្នុងនោះ លេចធ្លោជាងគេ គឺការរំលោភដោយបុគ្គលមានអំណាច ៦៦ករណី និងបុគ្គលអ្នកមានទ្រព្យ ២៧ករណី។
យ៉ាងណាមិញ អ្នកស្រី សារឿន និងប្រជាពលរដ្ឋក្នុងសហគមន៍តាតុកនៅតែរំពឹង និងជឿជាក់លើអាជ្ញាធរ ជាពិសេសសាលារាជធានីភ្នំពេញ ថានឹងមិនទុកប្រជាពលរដ្ឋចោលឱ្យរងលំបាកឡើយ ដោយសង្ឃឹមថាអាជ្ញាធរនឹងដោះស្រាយជួនប្រជាជនឆាប់ៗនេះតាមការស្នើសុំរបស់ពួកគេ។ ពលរដ្ឋបានសំណូមពរទៅអាជ្ញាធរ ហើយអាជ្ញាធរគួរមើលឱ្យគ្រប់ជ្រុងជ្រោយ គួរតែវាស់វែង និងសិក្សាឱ្យបានច្បាស់លាស់ពីប្រឡាយ០៣នេះ ថាពិតជាទីតាំងដែលអ្នកភូមិរស់នៅក្បែរនេះឬយ៉ាងណា ដើម្បីជួយដល់ប្រជាពលរដ្ឋទន់ខ្សោយ។
អ្នកស្រីអះអាងថា៖«បើពួកគាត់ថាខ្ញុំរស់នៅលើប្រឡាយគួរតែមើលពីលើស្ពានត្រង់មក គឺអត់ប៉ះពាល់កន្លែងពួកខ្ញុំនៅទេ គឺវាត្រូវជៀសផុតហ្មង អាហ្នឹងបើយកពីប្រឡាយត្រង់តាំងពីជំនាន់ណាណីមក ពីស្ពានគឺបុកចំកណ្ដាលដីដែលឧកញ៉ាចាក់នោះ តែបើគាត់ធ្វើលម្អៀងធ្វើបាបប្រជាពលរដ្ឋ អាហ្នឹងជារឿងរបសគាត់ ខ្ញុំអត់ដឹងធ្វើម៉េច»៕