ប្រធានព្រឹទ្ធសភា លោក ហ៊ុន សែន និង លោកនាយករដ្ឋមន្ត្រី ហ៊ុន ម៉ាណែត ដែលជាកូនប្រុសរបស់លោក បានបង្កើនសម្ពាធលើប្រទេសថៃនៅថ្ងៃសុក្រ ដោយបញ្ឈប់កិច្ចព្រមព្រៀងសេវាអ៊ីនធឺណិត ហាមឃាត់ការចាក់ផ្សាយភាពយន្ត និងគំរាមបិទការនាំចូលទំនិញពីប្រទេសនេះ ក្នុងជម្លោះដែលកំពុងកើនឡើងជុំវិញការរឹតត្បិតការឆ្លងកាត់ព្រំដែន បន្ទាប់ពីមានការប៉ះទង្គិចគ្នារវាងកងទ័ពប្រទេសទាំងពីរកាលពីចុងខែឧសភាកន្លងទៅ។
នាយប់ថ្ងៃព្រហស្បតិ៍ម្សិលមិញ លោក ហ៊ុន ម៉ាណែត បានប្រកាសនៅលើទំព័រហ្វេសប៊ុករបស់លោកថាកម្ពុជានឹងបញ្ឈប់ការទិញអគ្គិសនី និងអ៊ីនធឺណិតពីប្រទេសថៃ ដែលជាវិធានការឆ្លើយតបនឹងការចែកចាយព័ត៌មានតាមបណ្តាញសង្គមរបស់«ក្រុមជ្រុលនិយមថៃមួយចំនួន» ដែលជំរុញរដ្ឋាភិបាលខ្លួនកាត់ផ្តាច់សេវាទាំងនេះពីកម្ពុជា។
ក្រសួងទូរគមនាគមន៍បានឱ្យដឹងថា ការតភ្ជាប់ទូរគមនាគមន៍ពីប្រទេសថៃមកព្រំដែនប៉ោយប៉ែត ត្រូវបានកាត់ផ្តាច់នាព្រឹកថ្ងៃសុក្រ។
ទីប្រជុំជនមួយចំនួននៅជិតព្រំដែនពឹងផ្អែកលើហេដ្ឋារចនាសម្ព័ន្ធទូរគមនាគមន៍ថៃ ដែលអាជ្ញាធរថៃក៏ធ្លាប់បានកាត់ផ្តាច់ម្តងហើយ ដោយសារក្តីបារម្ភថាវាត្រូវបានប្រើប្រាស់មជ្ឈមណ្ឌលបោកប្រាស់។
ស្របពេលជាមួយគ្នានេះ លោក ហ៊ុន សែន ក៏បានបង្ហោះសារលើទំព័រហ្វេសប៊ុករបស់លោកបែបឡកឡើយសំដៅដល់«ក្រុមជ្រុលនិយមថៃ»ដោយមាន«ការគាំទ្រពីពួកយោធាដែលនិយមសង្រ្គាម» ថាកម្ពុជាមានហេដ្ឋារចនាសម្ព័ន្ធ និងអធិបតេយ្យភាពសេដ្ឋកិច្ចគ្រប់គ្រាន់ដើម្បីនឹងទប់ទល់សម្ពាធពីខាងក្រៅហើយ។ លោកក៏បានស្នើឱ្យហាមឃាត់ការចាក់ផ្សាយខ្សែភាពយន្តថៃទាំងអស់ពីទូរទស្សន៍កម្ពុជា ប៉ុន្តែលោកបានអំពាវនាវដល់ប្រជាជនកម្ពុជាឱ្យទប់ស្កាត់អំពើជ្រុលនិយមផ្ទាល់របស់ខ្លួនផងដែរ រួមទាំងការជៀសវាងការតវ៉ានៅស្ថានទូតថៃ និងការស្អប់ខ្ពើមប្រកាន់ពូជសាសន៍ចំពោះជនជាតិថៃ។
ក្រសួងវប្បធម៌កម្ពុជាបានអនុវត្តន៍តាមសេចក្តីស្នើនេះដោយបញ្ជាឱ្យផ្អាកការនាំចូលនិងចាក់បញ្ចាំងភាពយន្តថៃតាមរោងភាពយន្តទូទាំងប្រទេសចាប់ពីថ្ងៃត្រង់ថ្ងៃសុក្រនេះ ។
វិធានការរបស់កម្ពុជានេះ ធ្វើឡើងជាការឆ្លើយតបបន្ទាប់ពីថៃបានធ្វើសកម្មភាពបន្ថយពេលវេលាបើកបិទព្រំដែនយ៉ាងតក់ក្រហល់ដោយមិនបានប្រាប់ភាគីកម្ពុជាកាលពីថ្ងៃទី៦ ខែមិថុនា ដែលបណ្តាលឱ្យមានការព្រួយបារម្ភពីផលប៉ះពាល់ពាណិជ្ជកម្មនិងសេដ្ឋកិច្ចនៅទីប្រជុំជនតាមព្រំដែន។ វិធានការទាំងនេះក៏កើតឡើងមួយថ្ងៃមុនកិច្ចប្រជុំដែលបានគ្រោងទុកនៅរាជធានីភ្នំពេញរបស់គណៈកម្មាធិការព្រំដែនចម្រុះ ដែលជាយន្តការដែលមានស្រាប់សម្រាប់ការដោះស្រាយជម្លោះព្រំដែន។ ជំនួបនោះត្រូវបានធ្វើឡើងក្រោយមានការប៉ះទង្គិចគ្នាកាលពីថ្ងៃទី២៨ ឧសភា រវាងកងទ័ពប្រទេសទាំងពីរនៅតំបន់មុំបី ដែលបានបណ្តាលឲ្យទាហានកម្ពុជាម្នាក់បាត់បងជីវិត។
លោក ហ៊ុន សែន ដែលបានប្រគល់អំណាចឱ្យកូនប្រុសរបស់លោកកាលពីឆ្នាំ២០២៣បន្ទាប់ពីកាន់តំណែងជិតបួនទសវត្សរ៍នោះ ក៏បានបង្ហោះសារកាលពីថ្ងៃសុក្រដោយបានលើកឡើងពីវិធានការឆ្លើយតបចំនួន៦ចំណុចករណីភាគីថៃមិនព្រមបើកច្រកព្រំដែនដែលខ្លួនបិទជាឯកតោភាគីដំណើរការជាធម្មតាវិញ។ ទោះជាយ៉ាងណាក៏ដោយ លោកមិនបានបញ្ជាក់ពីពេលវេលាក្នុងការប្រើវិធានការឆ្លើយតបទាំងនោះទេ។
លោកក៏បានអំពាវនាវឲ្យផ្អាកការនាំចូលទំនិញថៃដោយជំរុញឲ្យពលរដ្ឋខ្មែរទិញផលិតផលក្នុងស្រុកជំនួសវិញ។
មេដឹកនាំគណបក្សកាន់អំណាចក៏បានជំរុញឱ្យអ្នកជំងឺដែលតែងតែស្វែងរកការថែទាំនៅក្នុងប្រទេសថៃបង្វែរទៅកាន់មន្ទីរពេទ្យក្នុងស្រុក ឬបរទេសផ្សេងទៀត រៀបចំទទួលយក និងដោះស្រាយការងារជូនពលករដែលវិលត្រឡប់ពីប្រទេសថៃចំពេលកម្ពុជាមានការខ្វះខាតកម្លាំងពលកម្ម។ លោកក៏បានអំពាវនាវដល់កងកម្លាំងប្រដាប់អាវុធរក្សាការប្រុងប្រយ័ត្នឱ្យខ្ពស់ ហើយខេត្តជាប់ព្រំដែនត្រូវត្រៀមខ្លួនជាស្រេចដើម្បីជម្លៀសពលរដ្ឋក្នុងករណីចាំបាច់។
អ្នកនាំពាក្យរដ្ឋាភិបាលលោក ប៉ែន បូណា មានប្រសាសន៍ថា កម្ពុជាកំពុងរង់ចាំការឆ្លើយតបរបស់ប្រទេសថៃចំពោះចំណាត់ការដែលបានស្នើឡើងនេះ ប៉ុន្តែមិនបានបញ្ជាក់ថាតើការណែនាំរបស់លោក ហ៊ុន សែន នឹងត្រូវបានអនុវត្តនៅពេលណា ឬរបៀបណានោះទេ។
នាយករដ្ឋមន្រ្តីថៃ លោកស្រី ផែថងថាន ស៊ីណាវ៉ាត្រា បានឆ្លើយតបនារសៀលថ្ងៃសុក្រនេះថា ភាគីកម្ពុជាយល់ច្រលំនិងបានគិតថារដ្ឋាភិបាលថៃនឹងកាត់ផ្តាច់ការផ្គត់ផ្គង់អគ្គិសនីនិងសេវាអ៊ីនធឺណិតឆាប់ៗនេះពីកម្ពុជាក្នុងតំបន់ព្រំដែនកម្ពុជាថៃ។ លោកស្រីបានបញ្ជាក់ថាមិនមានរឿងបែបនេះទេ ហើយលោកស្រីក៏បានប្រាប់ទៅរដ្ឋមន្រ្តីការបរទេសរបស់ខ្លួនឱ្យពន្យល់ពីបញ្ហានេះទៅភាគីកម្ពុជាវិញ។
នៅថ្ងៃសុក្រនេះ ភាគីកម្ពុជាក៏បានសម្រេចបិទទាំងស្រុងច្រកទ្វារព្រំដែនអន្តរជាតិដូង ខេត្តបាត់ដំបង ក្រោមហេតុផលរក្សាការពារសន្តិសុខនិងសុវត្ថិភាពរបស់ប្រជាពលរដ្ឋ។ ច្រកទ្វារអន្តរជាតិ ជាច្រកដ៏សំខាន់មួយសម្រាប់ដឹកទំនិញពីប្រទេសថៃឆ្លងកាត់កម្ពុជាទៅប្រទេសវៀតណាម ។
របាយការណ៍អគ្គនាយកដ្ឋានគយនិងរដ្ឋាករកម្ពុជាបង្ហាញថា ក្នុងរយៈពេល៥ខែនេះ ពាណិជ្ជកម្មទ្វេភាគីរវាងកម្ពុជានិងថៃបានកើនដល់ ១,៨៧ ពាន់លានដុល្លារ។ កម្ពុជាបាននាំចេញទំនិញទៅថៃក្នុងតម្លៃ ៣៩៥ លានដុល្លារ ខណៈការនាំចូលពីថៃមានតម្លៃសរុបរហូតដល់១,៤៨ ពាន់លានដុល្លារ។ មេដឹកនាំកម្ពុជាបានលើកឡើងថា ប្រសិនបើមានការរំខានណាមួយ នោះប្រទេសថៃនឹងមានហានិភ័យច្រើនជាងព្រោះប្រទេសនេះទទួលបានអត្ថប្រយោជន៍ច្រើនពីអតុល្យភាពពាណិជ្ជកម្មជាមួយកម្ពុជា។
ប្រជាជនកម្ពុជាក៏ពឹងផ្អែកខ្លាំងលើមន្ទីរពេទ្យថៃ និងវៀតណាមសម្រាប់ការថែទាំវេជ្ជសាស្រ្តឯកទេស ដោយពលរដ្ឋជាច្រើនធ្វើដំណើរឆ្លងកាត់ព្រំដែនទៅរកការព្យាបាលដែលមិនមាននៅក្នុងប្រទេសដោយសារសមត្ថភាពក្នុងស្រុកមានកម្រិត៕
(រាយការណ៍បន្ថែមដោយ ឃួន ណារីម)
ប្រែសម្រួលពីអត្ថបទភាសាអង់គ្លេស៖ Thai Internet Connections Cut, Hun Sen Threatens Embargo Ahead of Border Talks
