សមាគមសម្ព័ន្ធអ្នកសារព័ត៌មានកម្ពុជា

ពិធីដង្ហែព្រះបរមសពសម្ដេចអគ្គមហាសង្ឃរាជាធិបតី ទេព វង្ស

ពិធីដង្ហែព្រះបរមសពសម្ដេចអគ្គមហាសង្ឃរាជាធិបតី ទេព វង្ស នៅថ្ងៃទី៣ ខែមិថុនា ឆ្នាំ២០២៤ ដើម្បីតម្កល់បូជានៅមុខវត្តបទុមវតី រាជធានីភ្នំពេញ។ (ខេមបូចា/ ព្រីង សំរាំង)
ពិធីដង្ហែព្រះបរមសពសម្ដេចអគ្គមហាសង្ឃរាជាធិបតី ទេព វង្ស នៅថ្ងៃទី៣ ខែមិថុនា ឆ្នាំ២០២៤ ដើម្បីតម្កល់បូជានៅមុខវត្តបទុមវតី រាជធានីភ្នំពេញ។ (ខេមបូចា/ ព្រីង សំរាំង)

ថ្នាក់ដឹកនាំកំពូលៗ កងកម្លាំងទាហាន ប៉ូលិស ព្រះសង្ឃ និង​មន្ត្រីរាជការ​គ្រប់ជាន់ថ្នាក់ ព្រមទាំងប្រជាពលរដ្ឋរាប់ពាន់អង្គ/នាក់ បានចូលរួមពិធីដង្ហែព្រះបរមសពសម្ដេច​អគ្គមហា​សង្ឃ​រាជាធិបតី ទេព វង្ស នៅថ្ងៃទី៣ ខែមិថុនា ឆ្នាំ២០២៤ ដើម្បីតម្កល់បូជានៅមុខវត្តបទុមវតី រាជធានីភ្នំពេញ បន្ទាប់​តម្កល់​​រយ:ពេល​១០០ថ្ងៃ​ដើម្បី​ឱ្យ​ពុទ្ធបរិស័ទ​បាន​ចូល​គោរព​ព្រះវិញ្ញាណក្ខន្ធនៅ​វត្តឧណ្ណាលោម។

សម្ដេចព្រះមហាសង្ឃរាជ ទេព វង្ស ចូលព្រះទិវង្គតក្នុងព្រះជន្ម៩៣ព្រះវស្សា នៅវេលាម៉ោង​១៧៖៤០នាទី ល្ងាចថ្ងៃទី២៦ ខែកុម្ភៈ ឆ្នាំ២០២៤ នៅវត្តឧណ្ណាលោម រាជធានីភ្នំពេញ បន្ទាប់​ពី​សម្ដេច​បានសម្រាកព្យាបាលព្រះរោគនៅមន្ទីរពេទ្យកាល់ម៉ែត្រតាំងពីពាក់​កណ្ដាល​ ឆ្នាំ២០២៣​មក។

សម្ដេចអគ្គសង្ឃរាជ ទេព វង្ស ប្រសូតនៅឆ្នាំ១៩៣២។ ព្រះអង្គបានបួសជាសាមណេរ​ក្នុង​ជន្មាយុ១៦វស្សា នៅវត្តរាជបូព៌ ក្នុងខេត្តសៀមរាប។ តាមព្រះជីវប្រវត្តិ ព្រះអង្គ​ត្រូវ​បាន​តែង​តាំង​​ជា​គ្រូសូត្រស្តាំ​នៅ​វត្ត​រាជ​បូព៌ខេត្តសៀមរាប កាលពីអំឡុងឆ្នាំ១៩៥៧។

ប៉ុន្តែក្នុងឆ្នាំ១៩៧៥ ជាពេលវេលាដែលកម្ពុជា បានធ្លាក់ចូលទៅក្នុងបនប្រល័យពូជសាសន៍​ខ្មែរក្រហម កំឡុងពេលនោះ សម្ដេច ទេព វង្ស ក៏ត្រូវបានរបបនេះបង្ខំឱ្យសឹក និង​ត្រូវបង្ខំ​ឱ្យ​ធ្វើការធ្ងន់ធ្ងរដូចប្រជាជនខ្មែរដទៃទៀតដែរ។

ព្រះអង្គ​ទទួល​ឧបសម្បទាជាភិក្ខុ​ជាថ្មីនៅឆ្នាំ១៩៧៩ និងត្រូវតែងតាំងជាព្រះប្រធាន​សង្ឃ​កម្ពុជា ជា​ព្រះ​ឧបជ្ឈាយ៍ និង​ជា​ព្រះ​វិន័យធរក្នុងប្រទេសក្រោយសម័យខ្មែរក្រហម។ ព្រះអង្គត្រូវបាន​ថ្វាយ​ងារ​ជាព្រះមហា​សុមេធាធិបតី និង​ជា​សង្ឃនាយកនៅឆ្នាំ១៩៩១។

នៅ​ថ្ងៃទី​២៩ ខែមេសា ឆ្នាំ​២០០៦ ព្រះមហាក្សត្រព្រះបាទសម្ដេចព្រះនរោត្ដម សីហមុនី សព្វព្រះរាជហរទ័យតែងតាំងសម្ដេច ទេព វង្ស​ ជាសម្ដេចព្រះ​អគ្គ​មហា​សង្ឃ​រាជាធិបតី សម្ដេច​មហា​សង្ឃរាជ​នៃ​ព្រះរាជាណាចក្រ​កម្ពុជា ​និងព្រះ​រាជានុញ្ញាតឱ្យប្រើ​ប្រាស់​​រាជ​ស័ព្ទ និង​ផ្លិត​យស​ពិសេស៕

1,004 views

ព័ត៌មានថ្មីៗ

អត្ថបទពេញនិយម