លោកនាយករដ្ឋមន្ត្រីហ៊ុន សែន នៅថ្ងៃអង្គារ បានសម្រេចបិទការធ្វើដំណើរឆ្លងខេត្តសម្រាប់រយៈពេលពីរសប្ដាហ៍ និងបានបញ្ជាឲ្យមន្ត្រីសុខាភិបាលរៀបចំឲ្យមានការព្យាបាលអ្នកជំងឺកូវីដ១៩ កម្រិតស្រាលនៅតាមផ្ទះ ខណៈការឆ្លងនៅផ្សារអូរឫស្សីបានឡើងដល់៣៦នាក់ ស្របពេលដែលមន្ត្រីកំពុងរៀបចំយុទ្ធនាការចាក់វ៉ាក់សាំងដល់កម្មកររោងចក្រកាត់ដេរនៅក្នុងប្រទេស។
បើតាមសេចក្ដីសម្រេចរបស់លោកនាយករដ្ឋមន្ត្រី ហ៊ុន សែន ការបិទការធ្វើដំណើរឆ្លងខេត្តនេះចាប់ផ្ដើមពីថ្ងៃទី៧ដល់ថ្ងៃទី២០ ខែមេសា ដើម្បីទប់ស្កាត់ការរាលដាលជំងឺកូវីដ១៩ ក្នុងឱកាសបុណ្យចូលឆ្នាំថ្មី ដោយលើកលែងតែការដឹងជញ្ជូនទំនិញគ្រប់ប្រភេទ រថយន្តសង្គ្រោះបន្ទាន់ រថយន្តពន្ល់អគ្គិភ័យ រថយន្តដឹកកម្មករ និងករណីពិសេសមួយចំនួនទៀត ហើយការធ្វើដំណើររវាងទីក្រុងភ្នំពេញ និងខេត្តកណ្ដាលត្រូវចាត់ទុកក្នុងតំបន់តែមួយមិនស្ថិតក្នុងវិសាលភាពហាមឃាត់នោះទេ។
ការសម្រេចនេះ ក៏បានតម្រូវឲ្យរមណីយដ្ឋានទេសចរណ៍បិទដំណើរការជាបណ្ដោះអាសន្នពីថ្ងៃទី៧ដល់ទៅទី២០ ខែមេសា ហើយគណៈអភិបាលខេត្តនីមួយៗមានសិទ្ធក្នុងការសម្រេចដាក់វិធានការគ្រប់គ្រង ឬហាមឃាត់ការធ្វើដំណើរក្នុងភូមិសាស្រ្តក្រុង ស្រុក និងឃុំរបស់ខ្លួន។
មុនមានការសម្រេចហាមឃាត់ការធ្វើដំណើរនេះ លោកនាយករដ្ឋមន្ត្រីបានលើកឡើងដែរថា យ៉ាងតិចអ្នកជំងឺកូវីដ១៩ ចំនួន៥០ភាគរយអាចសម្រាកព្យាបាលតាមផ្ទះ ដូចដែលនៅអាមេរិក និងអឺរ៉ុបបានធ្វើ ខណៈករណីឆ្លងក្នុងព្រឹត្តិការណ៍ ២០កុម្ភៈ បានឡើងដល់២២៩៣ករណី ធ្វើឲ្យមន្ទីរពេទ្យហួសលទ្ធភាពក្នុងការទទួលអ្នកជំងឺ។
បើតាមសារជាសំឡេងរបស់លោកនាយករដ្ឋមន្ត្រី ផ្សាយដោយសារព័តមានជាតិទីភ្នាក់ងារសារព័ត៌មានកម្ពុជា ហៅកាត់ថា AKPលើកឡើងថា៖ «យើងមិនអាចទទួលអ្នកជំងឺទាំងអស់នោះទេ…ដោយសារតែចំនួនឆ្លងចេះតែកើនឡើង ទោះបីជាមានមន្ទីរពេទ្យច្រើនប៉ុនណា យើងមិនអាចដាក់ពួកគាត់អស់ទេ»។
លោកនាយករដ្ឋមន្ត្រីមានប្រសាសន៍ថា៖ «បើសិនជាផ្ទះរបស់អ្នកជំងឺតូច ពួកគាត់ត្រូវតែមកព្យាបាលនៅមន្ទីរពេទ្យ»។ ដោយលោកបន្ថែមថា ក្រុមការងារនឹងសម្រេចថា អ្នកជំងឺណាត្រូវទៅមន្ទីរពេទ្យ និងអ្នកជំងឺណាត្រូវព្យាបាលនៅតាមផ្ទះ ហើយថាក្រសួងសុខាភិបាល និងអាជ្ញាធរមូលដ្ឋាននឹងតាមដានអ្នកជំងឺទាំងនោះ។
បើតាមលោកនាយករដ្ឋមន្ត្រី មន្ត្រីសុខាភិបាលថ្នាក់មូលដ្ឋានជាអ្នកទទួលខុសត្រូវលើការព្យាបាលនេះ ដោយមានការបណ្តុះបណ្តាល ហើយអ្នកជំងឺដែលសម្រាកព្យាបាលនៅតាមផ្ទះនឹងទទួលបានប្រាក់ឧបត្ថម្ភ២ម៉ឺនរៀលក្នុងមួយថ្ងៃពីរដ្ឋាភិបាល។
លោកនាយករដ្ឋមន្ត្រីបញ្ជាក់ថា៖ «ក្នុងករណីយើងសង្ស័យថាជំងឺគាត់អាចទៅជាធ្ងន់ធ្ងរ យើងត្រូវតែបញ្ជូនគាត់ទៅព្យាបាលនៅមន្ទីរពេទ្យភ្លាម…ហើយបើអ្នកជំងឺមានផ្ទះសមរម្យ [យើង]អាចទុកគាត់ព្យាបាលនៅផ្ទះ ដើម្បីកាន់បន្ថយចំនួនអ្នកជំងឺកកកុញនៅមន្ទីរពេទ្យ»។
ប្រធានមន្ទីរសុខាភិបាលរាជធានីភ្នំពេញ លោក ងី មានហេង មានប្រសាសន៍ថា អ្នកជំងឺក្នុងស្ថានភាពធ្ងន់ធ្ងរត្រូវបញ្ជូនមកព្យាបាលនៅមន្ទីរពេទ្យ ហើយភាគច្រើនមានបញ្ហាផ្លូវដង្ហើម ខណៈអ្នកជំងឺកូវីដ១៩ ផ្សេងទៀតមានសភាពដូចជាជំងឺផ្ដាសាយធំ។
លោក អំ សំអាត នាយករងផ្នែកឃ្លាំមើល និងការពារសិទ្ធិមនុស្សនៃអង្គការលីកាដូបានសាទរចំពោះវិធានការនេះ ប៉ុន្តែលោកបានអំពាវនាវសូមឲ្យមន្ត្រីសុខាភិបាលបំពេញកិច្ចការ និងការព្យាបាលអ្នកជំងឺដោយយកចិត្តទុកដាក់។
លោកបន្ថែមថា៖ «ជាក្រមសិលធម៌របស់គ្រូពេទ្យ ពួកគាត់មិនត្រូវមានការរើសអើងនឹងអ្នកជំងឺ ត្រូវអនុវត្តឲ្យស្មើភាពគ្នា…នេះជាអ្វីដែលយើងព្រួយបារម្ភ»។
ក្រសួងសុខាភិបាលឲ្យដឹងថា ២០ករណីថ្មីទៀតត្រូវបានរកឃើញក្នុងចំណោមអ្នកលក់ដូរនៅផ្សារអូរឫស្សី ដែលផ្សារនេះត្រូវបិទរយៈពេលពីរសប្ដាហ៍ គិតពីថ្ងៃអាទិត្យ ពេលដែលមានអ្នកលក់ដូរ និងសន្ដិសុខផ្សាររកឃើញថាមានវិជ្ជមានកូវីដ១៩។ ក្រសួងសុខាភិបាលអំពាវនាវឲ្យអ្នកលក់ដូរ និងអ្នកបានទៅទិញទំនិញនៅផ្សារនេះ បើមានចេញរោគសញ្ញាត្រូវទៅធ្វើតេស្តកូវីដ១៩។
មុនពីធីបុណ្យចូលឆ្នាំខ្មែរមកដល់ វិធានការផ្សេងៗត្រូវបានដាក់ចេញនៅទូទាំងប្រទេសដើម្បីទប់ស្កាក់ការរាលដាលជំងឺកូវីដ១៩ ដោយចាប់ផ្ដើមពីទីក្រុងភ្នំពេញ ដោយបានកំណត់ការជួបជុំអាចធ្វើទៅបានតែចំពោះអ្នកក្នុងសមាជិកគ្រួសារប៉ុណ្ណោះ។
ដូចគ្នានេះដែរ ក្រុមគ្រូពេទ្យចំនួន៦០ក្រុម ត្រូវបានរៀបចំ ដើម្បីយុទ្ធនាការចាក់វ៉ាក់សាំងបង្ការកូវីដ១៩ ដល់កម្មករកាត់ដេរទូទាំងប្រទេស ដោយនឹងចាប់ផ្ដើមចេញពីរោងច្រម្ដុំផ្លូវវេងស្រេង ផ្លូវជាតិលេខ៣ និងផ្លូវជាតិលេខ៤ ពីថ្ងៃទី៧ ខែមេសា នេះតទៅ។ នេះបើតាមសេចក្ដីជូនដំណឹងរបស់ក្រសួងការងារកាលពីថ្ងៃចន្ទ។ ក្រុមនីមួយៗនឹងត្រូវទទួលបន្ទុកចាក់វ៉ាក់សាំងដល់កម្មករចំនូន៤០០នាក់ក្នុងមួយថ្ងៃ។
អ្នកនាំពាក្យក្រសួងការងារ លោក ហេង សួរ មិនអាចទាក់ទងសុំអត្ថាធិប្បាយបានទេ។
នៅយប់ថ្ងៃចន្ទ មានម៉ូតូតែប្រាំបួនគ្រឿងប៉ុណ្ណោះត្រូវបានដកហូតពីអ្នកបំពានបំរាមគោចរពីរសប្ដាហ៍ពីម៉ោង៨យប់ដល់ម៉ោង៥ភ្លឺ បន្ទាប់ពីមានការដកហូតយានយន្តជាង១៥០គ្រឿងតែក្នុងរយៈពេលបីយប់ដំបូង។
បើតាមក្រសួងសុខាភិបាល គិតត្រឹមថ្ងៃអង្គារ កម្ពុជាមានករណីឆ្លងកូវីដ១៩ ចំនួន២៨២៤ករណី ក្នុងនោះ២២៩៣ករណីជាអ្នកពាក់ព័ន្ធក្នុងព្រឹត្តិការណ៍២០ កុម្ភៈ និងមានអ្នកស្លាប់សរុប២២នាក់។
ប្រែសម្រួលពីអត្ថបទភាសាអង់គ្លេស៖ Travel between provinces banned for two weeks: PM