យ៉ាងហោចណាស់មានមនុស្សពីរនាក់បានស្លាប់ និងពីរនាក់របួសធ្ងន់ស្រាលក្នុងគ្រោះថ្នាក់ បាក់ដី នៅក្រុមហ៊ុនវារីអគ្គិសនីមួយកន្លែង នៅចំណុចស្ទឹងកែប ឃុំតាតៃលើ ស្រុកថ្មបាំង ខេត្តកោះកុង កាលពីថ្ងៃទី១០ ខែសីហា ឆ្នាំ២០២២។
ករណីបាក់ដីនៅក្នុងក្រុមហ៊ុនវារីអគ្គិសនីនេះ កើតឡើងបន្ទាប់ពីមានការធ្លាក់ភ្លៀងជោគជាំ ស្ទើររាល់ថ្ងៃដែលធ្វើឱ្យរូងសម្រាប់បង្ហៀរទឹកនោះហូរពាំនាំទឹកមកខ្លាំងបាក់ដី និងថ្ម។ នេះ បើតាមលោក ស៊ឹម វ៉ារី អធិការដ្ឋានស្រុកថ្មបាំង។
លោកមានប្រសាសន៍នៅថ្ងៃព្រហស្បតិ៍នេះថា៖ «ប៉ុន្មានថ្ងៃនេះតំបន់ថ្មបាំងនេះមានធ្លាក់ភ្លៀងខ្លាំងហើយ កន្លែងកើតហេតុនេះជារូងសម្រាប់គេបង្ហៀរទឹកនៅផ្លូវទឹកចឹងដល់ពេលភ្លៀងខ្លាំងទៅ វាបាក់ដី និង ថ្មសង្កត់លើ ក៏បណ្ដាលឱ្យស្លាប់តែម្ដងទៅ»។
អ្នកដែលស្លាប់នោះមានឈ្មោះទីមួយ ឈ្មោះ នី វណ្ណៈ ភេទប្រុស អាយុ៣៤ឆ្នាំ មានទីលំនៅភូមិមេចាន់ ឃុំថ្មី ស្រុកកំពត ខេត្តកំពត និងទីពីរ ឈ្មោះ អ៊ុត ចាន់ ភេទប្រុស អាយុ៣១ឆ្នាំ មានទីលំនៅភូមិក្តាត់ ឃុំមេទឹក ស្រុកបាកាន ខេត្តពោធិ៍សាត់។ នេះបើតាមលោក ស៊ឹម វ៉ារី អធិការដ្ឋានស្រុកថ្មបាំង។
លោកបានបញ្ជាក់ប្រាប់ថាទើបមានតែសាកសពម្នាក់ប៉ុណ្ណោះ ត្រូវបានសាច់ញាតិមកទទួល យកទៅធ្វើ បុណ្យតាមប្រពៃណីហើយអាជ្ញាធរ ក៏កំពុងរង់ចាំសាច់ញាតិមកទទួលយកសាកសព១រូប ទៀតនៅ ក្នុងវត្តថ្មបាំង។ដោយឡែកជនរងគ្រោះចំនួន២នាក់ទៀតត្រូវបានបញ្ជូនទៅសង្រ្គោះមន្ទីរពេទ្យបង្អែកខេត្តកោះកុង។
ជុំវិញករណីបាក់ដីនេះ ខាងកងម្លាំងសមត្ថកិច្ចមិនបានចុះទៅអន្តរាគមន៍ផ្ទាល់នោះទេ ដោយបានត្រឹមតែជួយការពារ និងរង់ចាំសាច់ញាតិជនរងគ្រោះមកទទួលនៅក្នុងវត្តតែប៉ុណ្ណោះ។ អធិការដ្ឋានរូបនេះ ប្រាប់ ខេមបូចា ថាក្រុមហ៊ុនវារីអគ្គិសនីនេះជាអ្នកទទួលមើលការខុសត្រូវ និងរ៉ាប់រងលើករណីនេះទាំងអស់។
លោកមានប្រសាសន៍ថា៖ «យើងអត់បានទៅដល់កន្លែងហ្នឹងទេ ហើយរឿងនេះក្រុមហ៊ុនជាអ្នកទទួលខុសត្រូវ។ ក្រុមហ៊ុនជាអ្នកដឹក (ជនរងគ្រោះ) មកផ្ទាល់ព្រោះផ្លូវឆ្ងាយពិបាក ម្យ៉ាងទៀតឡានពួកខ្ញុំក៏ដឹកមិនដល់ដែរ»។ លោកបន្ថែមថា៖ «យើងគ្រាន់ តែជួយសម្របសម្រួលពីបញ្ហាជាមួយក្រុមហ៊ុនប៉ុណ្ណោះ»៕
រាយការណ៍បន្ថែមដោយ ទ្រី ថានី