សមាគមសម្ព័ន្ធអ្នកសារព័ត៌មានកម្ពុជា

អង្គការ Verra បើកការស៊ើបអង្កេតលើគម្រោង​រេដបូករបស់អង្គការ​សម្ព័ន្ធមិត្តសត្វព្រៃ

ប័ណ្ណផ្សព្វផ្សាយព័ត៌មានអំពីគម្រោងរេដបូកជួរភ្នំក្រវាញខាងត្បូងក្នុងខេត្តកោះកុង។ (ខេមបូចា / Jack Brook)
ប័ណ្ណផ្សព្វផ្សាយព័ត៌មានអំពីគម្រោងរេដបូកជួរភ្នំក្រវាញខាងត្បូងក្នុងខេត្តកោះកុង។ (ខេមបូចា / Jack Brook)

អង្គការអន្តរជាតិមួយ​ដែលគ្រប់គ្រងគម្រោងអភិរក្សព្រៃឈើពិភពលោកបានបើកការស៊ើប​អង្កេត​​លើគម្រោងរេដបូកជួរភ្នំ​ក្រវាញខាងត្បូង (Southern Cardamom REDD+) ដែល​ដំណើរ​ការ​​ដោយអង្គការសម្ព័ន្ធមិត្តសត្វព្រៃ និងក្រសួងបរិស្ថាន។

នៅក្នុងលិខិតចុះថ្ងៃទី១៩ ខែមិថុនា អង្គការ Verra បានប្រាប់អង្គកា​រសម្ព័ន្ធមិត្តសត្វព្រៃ និង​ក្រសួង​បរិស្ថានថា ខ្លួនបានទទួល «មតិយោបល់ពីភាគីពាក់ព័ន្ធ» កាលពីថ្ងៃទី៣០ ខែឧសភា អំពីគម្រោងរេដបូកជួរភ្នំក្រវាញខាងត្បូង ហើយ «ចាត់ទុកមតិទាំងនេះមាន​ហេតុផល​ដែល​ត្រូវ​ស៊ើបអង្កេតបន្ថែម»

អង្គការឃ្លាំមើលសិទ្ធិមនុស្សបានប្រាប់ខេមបូចា ថា ខ្លួនបាននឹងកំពុងស៊ើបអង្កេត«ការចោទ​ប្រកាន់អំពីការរំលោភសិទ្ធិមនុស្សនៅក្នុងបរិបទនៃគម្រោងរេដបូកជួរភ្នំ​ក្រ​​វាញ​ខាងត្បូង» ចាប់​តាំង​ពីខែមេសា ឆ្នាំ២០២២។

អង្គការឃ្លាំមើល​សិទ្ធិ​មនុស្ស​បានប្រាប់ខេមបូចា​កាលពីថ្ងៃពុធថា «យើងបានចែករំលែកការ​រក​ឃើញ​​បឋមរបស់យើងជាមួយអ្នកអនុវត្តគម្រោង ក្រុមហ៊ុនដែលធ្វើសវនកម្មលើគម្រោង និង​ថ្មីៗនេះបាន​ចែក​រំលែក​ជាមួយអង្គការ​ Verra។ យើងសង្ឃឹមថា វិធានការ​របស់អង្គការ Verra នាំទៅរកការដោះស្រាយយ៉ាងទូលំទូលាយនៃផលប៉ះពាល់ ដែលយើងបានចងក្រង​ជា​ឯកសារ»

លោក Farhan Ahmed ប្រធានគ្រប់គ្រងកម្មវិធីរបស់អង្គការ​ Verra បានលើក​ឡើង​​នៅក្នុង​លិខិត​​​ថា «អង្គការ Verra នឹងធ្វើការពិនិត្យឡើងវិញ ហើយខណៈពេលដែលកំពុងដំណើរ​ការ​ការ​ពិនិត្យឡើងវិញនេះ​ ការចេញឥណទាន ឬស្លាកសញ្ញាណាមួយបន្ថែមទៀតត្រូវបានផ្អាក»

អង្គការ​សម្ព័ន្ធមិត្តសត្វព្រៃ​គ្រប់គ្រងតំបន់រេដបូក​លើផ្ទៃដី ៤៥០ ០០០ហិកតា គ្របដណ្តប់​លើ​ឧទ្យាន​ជាតិភ្នំក្រវាញខាងត្បូង និងដែនជម្រកសត្វព្រៃតាតៃ។

យោងតាមអង្គការសហប្រជាជាតិបាន​ឱ្យដឹងថា រេដដបូល​មកពី​ពាក្យ​ថា «កាត់បន្ថយការ​បំភាយ​​ឧស្ម័នពី​ការកាប់បំផ្លាញព្រៃឈើ និងភាព​រិចរិលព្រៃឈើនៅក្នុងប្រ​ទេស​កំពុង​អភិវឌ្ឍន៍» ក្រុមហ៊ុនឯកជនអាចវិនិយោគលើកិច្ចខិតខំប្រឹងប្រែងអភិរក្សព្រៃ​ឈើនៃ​គម្រោងរេដបូក ដើម្បីប៉ះប៉ូវការបំភាយកាបូនរបស់ខ្លួន។

អង្គការ​សម្ព័ន្ធមិត្ត​សត្វព្រៃ​មិន​បាន​ឆ្លើយ​តប​នឹង​ការ​ហៅ​ទូរសព្ទ ឬ​អ៊ីមែល​ពីខេមបូចា​ទេ​កាល​ពី​ថ្ងៃ​ពុធ។

លោក ជួប ប៉ារីស៍ អនុរដ្ឋលេខាធិការក្រសួងបរិស្ថានដែលអង្គការ​ Verra ផ្ញើលិខិតទៅ​ដោយ​ផ្ទាល់​នោះ​បានប្រាប់ខេមបូចា ថា លោកមិនទាន់បានអានឯកសារ​នេះនៅឡើយទេ។

លោក ប៉ារីស៍ ដែលជាអ្នកទំនាក់ទំនងចម្បងរវាងក្រសួងបរិស្ថាន និងអ្នកសម្របសម្រួល​គម្រោង​​រេដបូក​បានមាន​ប្រសាសន៍ថា៖ «ខ្ញុំមិនបានបើកវាទេ ខ្ញុំមិនទាន់មាន​ពេលអានវា​នៅឡើយទេ»

ក្រុមហ៊ុន Everland ជាក្រុមហ៊ុនដែលរកទីផ្សារ និងលក់ឥណទានពីគម្រោងរេដ​បូកជួរ​ភ្នំ​ក្រវាញ​​ខាង​ត្បូង​បាននិយាយថា ខ្លួនគ្រោងនឹងចេញសេចក្តីថ្លែងការណ៍មួយ​។ លោក Josh Tosteson ប្រធាន​ក្រុមហ៊ុន Everland បាន​បដិសេធ​មិន​ធ្វើ​អត្ថាធិប្បាយ​​ទេ ​នៅពេល​ទាក់ទង​តាម​ទូរសព្ទ​កាលពី​ថ្ងៃ​ពុធ។

លិខិតរបស់អង្គការ​ Verra លើកឡើងពីកង្វល់ជុំវិញការអនុវត្តតាម​គោលការណ៍ណែនាំ​របស់​ខ្លួន រួមទាំងគោលការណ៍កម្មវិធីអាកាសធាតុ សហគមន៍ និងជីវចម្រុះ ហៅកាត់ថា (CCB)។ ការខកខានមិន​បាន​អនុវត្តតាមគោលការណ៍ណែនាំទាំងនេះអាចធ្វើ​ឱ្យអង្គការ Verra ផ្អាកគម្រោងរេដបូក។

ស្តង់ដាររបស់​ CCB តម្រូវ​ឱ្យ «អភិវឌ្ឍន៍គម្រោង​ដែលបង្កើត​បាន​នូវ​អត្ថ​ប្រយោជ​ន៍​អាកាសធាតុ សហគមន៍ និងជីវចម្រុះដ៏គួរឱ្យទុកចិត្ត ដែល​ប្រកបដោយនិរន្តរភាពនិង​ចម្រុះ​»

វ៉ែន វន មានដើមកំណើតនៅខេត្តកោះកុង ជា​តំណាងសហគមន៍ជនជាតិដើមភាគតិចជង ដែលរស់នៅក្នុងគម្រោងរេដបូកបាន​និយាយថា៖ «គម្រោងរេដបូក​នេះមិនអនុញ្ញាត​ឱ្យ​ប្រជាពលរដ្ឋ​ប្រើប្រាស់អនុផលព្រៃឈើទេ»

វ៉ែន វន បាននិយាយថា គម្រោងរេដបូក​បានគាំទ្រសហគមន៍មូលដ្ឋានតាម​រយៈ​ហេដ្ឋារចនាសម្ព័ន្ធ​​ដូចជាផ្លូវ និងអណ្តូងទឹក ហើយប្រជាពលរដ្ឋ​បានសាទរ​ចំពោះ​ការ​វិនិយោគនេះ។

ប៉ុន្តែ វ៉ែន វន បានសម្តែងការព្រួយបារម្ភថា គម្រោងរេដបូកបានកាត់បន្ថយលទ្ធភាព​ចូលទៅ​ប្រើប្រាស់អនុផលព្រៃឈើ​ដូចជា​ផ្លែឈើ បន្លែ និងផលិតផលផ្សេងទៀត ដែលពួកគាត់​បាន​អាស្រ័យ​​ផល​ជាប្រពៃណី​សម្រាប់ការចិញ្ចឹមជីវិត និងជីវភាពប្រចាំថ្ងៃ​។ នេះ​យោង​តាម​គេហទំព័រ​​របស់​អង្គការ Verra បានឱ្យដឹងថា ប្រជាពលរដ្ឋ​ប្រហែល ៤ ០០០​នាក់​រស់នៅ​ក្នុង​ភូមិ​ជាង២០ នៅ​ក្នុងតំបន់រេដបូក។

វ៉ែន វន បាន​បញ្ជាក់ថា៖ «ប្រសិន​បើ​គម្រោងរេដបូកបង្កើត​ព្រៃ​សហគមន៍ ដើម្បី​ឲ្យ​សហគមន៍​ប្រើប្រាស់​អនុផល​ព្រៃឈើ នោះ​វាគឺ​ជា​រឿង​ល្អ។ ប៉ុន្តែ​គម្រោងរេដបូក​នេះ​ មិន​អនុញ្ញាត​ឱ្យ​ប្រជាពលរដ្ឋ​ប្រើប្រាស់​អនុផល​ព្រៃឈើ​ទេ»

លោក​បាន​បន្ត​ថា សហគមន៍​ជនជាតិភាគតិចជង​ត្រូវ​បាន​ហាម​ឃាត់​មិន​ឱ្យធ្វើ​ស្រែ​ចម្ការ​នៅ​តំបន់​ជាក់​លាក់​មួយ​ចំនួន ខណៈ​មន្ត្រី​រដ្ឋាភិបាល​កំពុងជាប់រវល់​ក្នុង​ដំណើរ​ការ​កំណត់​ទីតាំងដី ​ដែល​ត្រូវ​បាន​ពន្យា​ពេល​ដ៏យូរ។

វ៉ែន វន បាន​បន្ថែមថា៖ «ចំពោះបញ្ហាទាំងអស់ទាក់ទងនឹងការកំណត់តំបន់ ការអភិរក្ស និងការ​ប្រើ​ប្រាស់​អនុផលព្រៃឈើក្នុងគម្រោងរេដបូក។ អង្គការ​សម្ព័ន្ធមិត្តសត្វព្រៃ ក៏ដូចជាមន្ត្រី​បរិស្ថាន មិន​មាន​កិច្ចប្រជុំលម្អិត ដើម្បីផ្តល់ព័ត៌មានដល់ប្រជាពលរដ្ឋ និងមិនបាន​កំណត់​តំបន់ច្បាស់​លាស់​​សម្រាប់​ប្រជាជនទេ។ វា​បង្ក​បញ្ហា​ដល់​​ប្រជាពលរដ្ឋ»

អ្នកស្រី រាម សៅស៊ា ជា​សកម្មជនបរិស្ថានម្នាក់ទៀតនៃសហគមន៍ជនជាតិដើមភាគតិច​ជង ដែលរស់​នៅក្នុងគម្រោងរេដបូកបាន​និយាយថា អ្នកស្រី​ជឿថា គម្រោងរេដបូក​បានជួយ​កាត់​បន្ថយការ​កាប់ឈើខុសច្បាប់។

អ្នកស្រី​​បាន​លើកឡើង​ថា៖​ «ខ្ញុំ​នឹង​សោកស្ដាយ​ ប្រសិន​បើ​គម្រោង​នេះ​ត្រូវ​បាន​ដក​ចេញ​។ ​នៅ​ពេល​យើងបើកសេរី​ពេក វា​នឹង​បាត់បង់​ធនធាន​ធម្មជាតិ»

ក្រុមហ៊ុន Everland អះអាង​ថា គម្រោងរេដបូកបាន​ប៉ះប៉ូវ​ចំពោះ​ការ​បំភាយ​ឧស្ម័ន​​កាបូនិក​ជាង២៧លាន​តោន។

ឧទ្យានជាតិក្រវាញខាងត្បូង និងដែនជម្រកសត្វព្រៃតាតៃ ក៏ជាជម្រកនៃប្រភេទសត្វ​ជិតផុត​ពូជ​ផងដែរ ដូចជា សត្វត្រយ៉ងយក្ស ខ្លាឃ្មុំព្រះអាទិត្យ និងសត្វទោច​។

ទោះបីជាយ៉ាងណា អ្នកស្រី សៅស៊ា បាននិយាយថា អាជ្ញាធរខ្វះការយល់ដឹងទៅវិញទៅមក​អំពីសិទ្ធិរបស់ជនជាតិដើមភាគតិចនៅក្នុងតំបន់នេះ។

អង្គការ​សម្ព័ន្ធសត្វព្រៃ​ប្រើវិធីសាស្រ្តបែប «ការ​ថែរក្សា​បន្ទាយ» ដែលពាក់ព័ន្ធនឹងការដុតផ្ទះ សម្ភារៈកសិកម្ម និងប្រតិបត្តិការបែបយោធាដ៏ចម្រូងចម្រាស​ជាមួយឧទ្យាន​នុរក្សរបស់​រដ្ឋាភិបាល និងកងរាជអាវុធហត្ថ ដើម្បីទប់ស្កាត់ការទន្ទ្រានយកដី និងការកាប់​បំផ្លាញ​ព្រៃឈើ។

តាមសេចក្តីរាយការណ៍ថា ក្រសួងបរិស្ថានបានចាប់ខ្លួនជនជាតិដើមភាគតិច​នៅក្នុង​សហគមន៍​ផ្សេងទៀត​ ដោយសារ​តែ​រស់នៅ និងធ្វើកសិកម្មនៅក្នុងតំបន់ការ​ពារ ទោះបី​ជា​កសិករនិយាយថា ពួកគាត់​បានរស់នៅតាមប្រពៃណីនៅលើដីនោះ​ក៏ដោយ។

អ្នកស្រី សៅស៊ា បាននិយាយថា៖ «ពេលខ្លះពួកគាត់​ [អាជ្ញាធរ] ធ្វើរឿងត្រឹមត្រូវ ប៉ុន្តែមិនចំគោលដៅ​។ ពួកគាត់ [ចាប់] សហគមន៍ដែលប្រើប្រាស់​អនុផលព្រៃឈើ មិនចាប់​អ្នកកាប់ឈើទេ។ ពួកគាត់​មិនដែលចាប់ពួកគេទេ»

អង្គការ​ Verra បានប្រាប់អង្គការសម្ព័ន្ធមិត្តសត្វព្រៃ និងក្រសួងបរិស្ថានថា ការឆ្លើយតប​ជា​លាយ​លក្ខណ៍​អក្សរ​ត្រូវតែផ្តល់ជូន បន្ទាប់ពីការរកឃើញនៅ​ក្នុង​របាយការណ៍រ​បស់ខ្លួន​​៕

ប្រែសម្រួលពីអត្ថបទភាសាអង់គ្លេស៖ Verra Opens Investigation into Wildlife Alliance’s REDD+ Project

346 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម