សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋសម្រុកទៅបោះឆ្នោតជ្រើសរើសក្រុមប្រឹក្សាឃុំសង្កាត់ ខណៈមេដឹកនាំបក្សនយោបាយធំពីរមិនបានបោះឆ្នោត

ប្រជាពលរដ្ឋ ចូលរួមបោះឆ្នោតឃុំ-សង្កាត់ នៅក្រុងតាខ្មៅ ខេត្តកណ្ដាល។ រូបថតថ្ងៃទី៥ ខែមិថុនា ឆ្នាំ២០២២។ ខេមបូចា/ ព្រីង សំរាំង
ប្រជាពលរដ្ឋ ចូលរួមបោះឆ្នោតឃុំ-សង្កាត់ នៅក្រុងតាខ្មៅ ខេត្តកណ្ដាល។ រូបថតថ្ងៃទី៥ ខែមិថុនា ឆ្នាំ២០២២។ ខេមបូចា/ ព្រីង សំរាំង

ប្រជាពលរដ្ឋ​ក្នុងទីក្រុងភ្នំពេញ និងតាម​បណ្តាខេត្តនៅ​ថ្ងៃទី​៥ ខែមិថុនា ឆ្នាំ​២០២២ បាននាំគ្នាសម្រុក​ទៅ​បោះឆ្នោតជ្រើសរើស​ក្រុមប្រឹក្សា​ឃុំសង្កាត់ទូទាំងប្រទេស ខណៈមេដឹកនាំនយោបាយ​ពីររូប​មិនអាច​បោះឆ្នោតបាន។

ចំណែកឯ អង្គការ​សង្គមស៊ីវិល​ដែលឃ្លាំមើល​ដំណើរការ​បោះឆ្នោត និង​ស្ថានភាព​សិទ្ធិមនុស្ស​ក្នុង​អំឡុងពេល​បោះឆ្នោត​នេះ បាន​​​រាយការណ៍​ពី​ភាពមិនប្រក្រតីមួយចំនួន​នៅតាម​ការិយាល័យបោះឆ្នោត។

លោក កឹម សុខា អតីតប្រធានគណបក្ស​សង្គ្រោះជាតិ​ ដែលត្រូវ​បាន​រំលាយ​កាលពីឆ្នាំ២០១៧ មាន​ឈ្មោះក្នុង​បញ្ជីបោះឆ្នោត​នៅសង្កាត់​ចាក់អង្រែលើ ប៉ុន្តែ​លោក​មិនបានទៅបោះឆ្នោតនោះទេ ខណៈព្រះអង្គម្ចាស់​នរោត្តម ចក្រាវុធ ប្រធានគណបក្ស​ហ្វុន​ស៊ិនប៉ិច​មិនមាន​ឈ្មោះក្នុង​បញ្ជី​បោះឆ្នោត។

លោក​នាយករដ្ឋមន្ត្រី ​ហ៊ុន សែន និង​ភរិយា​ បាន​ទៅបោះឆ្នោត​នៅមណ្ឌលបោះឆ្នោត​ក្រុង​តាខ្មៅ​ ខេត្តកណ្តាល នៅវេលាម៉ោង៧​និង​១៥ នាទី​ព្រឹក ដោយមាន​ការចូលរួម​ឃ្លាំមើល​ពីក្រុម​សង្កេតការបរទេសមួយក្រុម និង​អ្នក​សង្កេតការក្នុងស្រុក រួម​ទាំងអ្នក​សង្កេតការ​មក​ពី​​​ក្រុ​មសហភាព​សហព័ន្ធយុវជនកម្ពុជា​របស់​លោក ហ៊ុន ម៉ានី ដែលជាកូនប្រុស​របស់​លោកនាយករដ្ឋមន្ត្រី ហ៊ុន សែន​ ផងដែរ។

លោកនាយករដ្ឋមន្ត្រី ហ៊ុន សែន ចូលរួមបោះឆ្នោតជ្រើសរើសក្រុមប្រឹក្សាឃុំសង្កាត់ នៅមណ្ឌលគរុកោសល្យក្រុងតាខ្មៅ ខេត្តកណ្តាល នាព្រឹកថ្ងៃអាទិត្យទី៥ ខែមិថុនា ឆ្នាំ២០២២។ ខេមបូចា/ ព្រីង សំរាំង

លោក ញឿន រ៉ាដែន អ្នកនាំពាក្យគណបក្សហ៊្វុន ស៊ិន ប៉ិច ប្រាប់ខេមបូចាថា មូលហេតុ ដែលព្រះអង្គម្ចាស់​នរោត្ដមចក្រាវុធ មិនបាន​ទៅបោះឆ្នោត ព្រោះ​ព្រះអង្គគ្មាន​ឈ្មោះក្នុង​បញ្ជីបោះឆ្នោតនោះទេ។

លោកថ្លែងថា៖ «ព្រះអង្គ​រវល់ថែទាំព្រះនរោត្តម រណឬទ្ធិ ដែលគ្រោះថ្នាក់ចរាចរណ៍រហូត​ដល់សុគត ទើបព្រះអង្គមិនបានចុះឈ្មោះបោះឆ្នោត»។ លោកបន្ត​ថា​៖«ការដែលទ្រង់មិនបានចូលរួមបោះឆ្នោត គឺពុំបានជះឥទ្ធិពលអីជាដុំកំភួនទៅលើសមាជិក​សមាជិកានិងអ្នកគាំទ្រគណបក្សហ៊្វុនស៊ិនប៉ិចទេ​»។

លោក មុត ចន្ថា ជំនួយ​ការ​លោក កឹម សុខា បានសរសេរបង្ហោះនៅហ្វេសប៊ុករបស់លោកយ៉ាងខ្លីថា៖  «ឯកឧត្តម កឹម សុខា មិនអញ្ជើញទៅបោះឆ្នោតនេះទេ ព្រោះវាមិនមានជម្រើសសម្រាប់លោកជ្រើសរើស»។

អតីតមេដឹកនាំបក្សប្រឆាំង លោក កឹម សុខា ឃើញក្នុងបញ្ជីឈ្មោះបោះឆ្នោត ខណៈប្រជាពលរដ្ឋតម្រង់ជួរ ដើម្បីបោះឆ្នោតឃុំ-សង្កាត់ នៅរាជធានីភ្នំពេញ។ រូបថតថ្ងៃទី៥ ខែមិថុនា ឆ្នាំ២០២២។ ខេមបូចា/ ព្រីង សំរាំង

លោក ទឹម សុវណ្ណ អាយុ ៤៤ឆ្នាំ ប្រជាពលរដ្ឋម្នាក់​នៅក្រុងតាខ្មៅ​បាន​ចាត់ទុកការបោះឆ្នោត​ថ្នាក់មូលដ្ឋាន​ថា មានសារៈសំខាន់​សម្រាប់ប្រជាជន។ លោកថ្លែងថា៖ «វាបង្ហាញថា​យើងបាន​បំពេញ​ភារកិច្ច​ក្នុងនាម​ជាប្រជាពលរដ្ឋ យើង​ចង់ឃើញការអភិវឌ្ឍផ្លូវថ្នល់ឲ្យកាន់តែប្រសើរ​ និងការធានាបាននូវ​ភូមិ​ ឃុំ​មានសុវត្ថិភាព​»។

កញ្ញា សេង ផល្លា អាយុ២៧ឆ្នាំ រស់នៅឃុំបឹងខ្យាង ខេត្តកណ្តាល បានលើកឡើង​ថា កញ្ញា​ចង់​បានមេឃុំល្អដែលអាចដឹកនាំប្រជាពលរដ្ឋក្នុងឃុំនិងស្មោះត្រង់។ ផល្លាបន្ថែមថា៖ «យើងស្រលាញ់អ្នកណាយើងបោះឱ្យអ្នកនោះទៅ វាជាសិទ្ធិយើង គ្មានអ្នកណាមកបង្ខំយើងបានឡើយ»។

ប្រជាពលរដ្ឋ ចូលរួមបោះឆ្នោតឃុំ-សង្កាត់ នៅក្រុងតាខ្មៅ ខេត្តកណ្ដាល។ រូបថតថ្ងៃទី៥ ខែមិថុនា ឆ្នាំ២០២២។ ខេមបូចា/ ព្រីង សំរាំង

ពលរដ្ឋមួយរូបរស់នៅសង្កាត់ចក្រអង្រែលើ រាជធានីភ្នំពេញ គឺអ្នកស្រី ទេវី បាន​ឱ្យដឹងថា អ្នកស្រីចង់ឃើញ​ការ​បោះឆ្នោត​ ប្រកបដោយសុក្រឹតភាព និង​មិនមានការកេងបន្លំសន្លឹកឆ្នោត។ អ្នកស្រី​រំពឹងថា​ គណបក្សដែលអ្នកស្រីគាំទ្រ គឺអាចដោះស្រាយបញ្ហាដែលនៅតំបន់អ្នកស្រីជួបប្រទះ ជូនដល់ប្រជាពលរដ្ឋ។

អ្នកស្រី​ថ្លែងថា៖ «ខ្ញុំរំពឹងថា នឹងមានសុក្រឹតភាព ហើយយើងអាចជ្រើសរើសគណបក្សដែលយើងពេញចិត្តបាន ។ ខ្ញុំរំពឹងថា គាត់អាចដោះស្រាយបញ្ហា ឬក៏ការព្រួយបារម្ភរបស់ប្រជាពលរដ្ឋក្នុងភូមិសង្កាត់របស់យើងបាន»។

ភាពមិនប្រកក្រតី

មន្ត្រីឃ្លាំមើលការបោះឆ្នោតក្នុងស្រុក​​បាន​ចាត់ទុក​ស្ថានភាព​ទូទៅ​នៃការបោះឆ្នោត​ប្រព្រឹត្តជាធម្មតា ​ប៉ុន្តែ​បាន​មើល​ឃើញវត្តមាន​អាជ្ញាធរ​ច្រើន​នៅខាងក្រៅ និង​ខាងក្នុង​ទីតាំងការិយាល័យបោះឆ្នោត។  

លោក កន សាវាង្ស អ្នកសម្របសម្រួលផ្នែកអង្កេត និងតស៊ូមតិនៃអង្គការខមហ្វ្រែល សង្កេតឃើញថា មានអាជ្ញាធរជួយសម្រួលសណ្ដាប់ធ្នាប់។ លោកបន្ថែមថា៖ ​«វាមានទិដ្ឋភាពទូទៅមួយ គឺមានអាជ្ញាធរច្រើន ទាំងក្នុងការិយា​ល័យ និងខាងក្រៅការិយាល័យ ដើម្បីសម្របសម្រួល ធ្វើសន្ដិសុខ សណ្ដាប់ធ្នាប់តាមការិយាយល័យបោះឆ្នោត» លោកបន្ត​ថា ចំនួន​ប្រជាពលរដ្ឋ​ទៅបោះឆ្នោត​មាន​ច្រើន ឬតិច​នៅតាម​ការិយាល័យបោះឆ្នោត នីមួយៗ។

លោក សំ សុគន្ធាមី នាយក​ប្រតិបត្តិ​នៃ​អង្គការ​និកហ្វិច ថាមិនទាន់មានភាពមិនប្រក្រតីគួរឲ្យកត់សម្គាល់​ធ្ងន់ធ្ងរទេ ក្នុងដំណើរការបោះ​ឆ្នោត​ព្រឹកនេះ​​ ប៉ុន្តែ​ក៏បាន​កត់សម្គាល់​ឃើញ​ថា មានកម្លាំងនគបាល សន្ដិសុខច្រើននៅ​ខាង​មុខ​ការិយាល័យ​បោះ​ឆ្នោតជួយសម្រួលសណ្ដាប់ធ្នាប់។

ប្រជាពលរដ្ឋ លើកបង្ហាញស្នាមទឹកខ្មៅ លើម្រាមដៃពួកគាត់ បន្ទាប់ពីបានចូលរួបបោះឆ្នោតឃុំ-សង្កាត់ នៅរាជធានីភ្នំពេញ។ រូបថតថ្ងៃទី៥ ខែមិថុនា ឆ្នាំ២០២២។ ខេមបូចា/ ព្រីង សំរាំង

​យោងតាម​​របាយការណ៍ស្តីពី ស្ថានភាពសិទ្ធិមនុស្ស អំឡុងពេល​បោះឆ្នោត​ឃុំសង្កាត់ឆ្នាំ ២០២២ ​របស់​អង្គការ​លី​កា​ដូ ​បាន​រកឃើញ​ថា រាជធានី​-​ខេត្ត​ចំនួន​១​៤​ផ្សេងគ្នា​មានភាពមិនប្រក្រតីកើតឡើង ក្នុងនោះរួមមាន ​វត្តមាន​របស់​អាជ្ញាធរ​មូលដ្ឋាន​ ​អង្គុយ​ចាំ​នៅ​ក្នុង​ ​ឬ​ក្រៅ​ទីតាំង​បោះឆ្នោត​ រួម​មាន​មេភូមិ​ ​មេឃុំ​ឬ​ចៅសង្កាត់​ ​ឬ​ចៅហ្វាយស្រុក​ ​ក៏ដូចជា​អាជ្ញាធរ​ផ្សេងទៀត​ ​ក្នុងការ​​​ជួយ​សម្របសម្រួល​ឱ្យ​ពលរដ្ឋ​បាន​ចូល​ទៅកាន់​ការិយាល័យ​បោះឆ្នោត​។ របាយការណ៍បន្តថា ភាគច្រើន​នៃ​ករណី​ទាំងនេះ​ ​អាជ្ញាធរ​ត្រូវ​បាន​មើលឃើញ​ថា​ ​បាន​កត់ត្រា​ឈ្មោះ​ ​ឬ​ចំនួន​ប្រជាពលរដ្ឋ​ដែល​បាន​ទៅ​បោះឆ្នោត​។ ក្រៅពី​នេះ​ ​ក៏​មានការ​រាយការណ៍​អំពី​ករណី​ដែល​អាជ្ញាធរ​មូលដ្ឋាន​ចុះ​តាម​ផ្ទះ​ប្រជាពលរដ្ឋ​នីមួយៗ​ដើម្បី​សួរនាំ​ប្រជាពលរដ្ឋ​អំពី​អ្នក​ដែល​ពួកគេ​បោះឆ្នោត​ឱ្យ ​និង​ការ​បង្ហាញ​វត្តមាន​នៃ​ទាហាន​ប្រដាប់ដោយ​អាវុធ​នៅក្បែរ​ទីតាំង​បោះឆ្នោត​។

លោក អំ សំអាត នាយកចាត់ការទូទៅនៃអង្គការលីកាដូ បាន​ឲ្យ​ដឹង​ថា ​​នៅតាមខេត្តមួយ​ចំនួនមាន​​ដាក់កម្លាំងសមត្ថកិច្ចប្រដាប់ដោយអាវុធមាន​វត្តមាន​នៅ​ក្បែរ​​ការិយាល័យ ដែលធ្វើ​ឲ្យ​ពលរដ្ឋ​ភ័យខ្លាច។ ប៉ុន្តែ​លោកអះអាងថា ករណី​នេះត្រូវ​បាន​ដោះស្រាយ​ភ្លាមៗក្រោយពីពលរដ្ឋ​រាយការណ៍ទៅអាជ្ញាធររៀបចំការបោះឆ្នោត។

លោក​បន្ត​ថា ករណីខ្លះត្រូវបាន​រាយការណ៍ថា មានមនុស្សខ្លះបាន​ដើរសួរតាមផ្ទះ​ថាតើពួកគេបោះឆ្នោត​ឲ្យអ្នកណា។ លោកថ្លែងថា៖ «យើង​ចាត់ទុក​ថាទង្វើទាំងអស់នេះ​វាជាការរំលោភ ឬធ្វើ​ឲ្យប៉ះពាល់​ទៅដល់​សតិអារម្មណ៍ ឬស្មារតី ផ្លូវចិត្ត ក៏ដូចជាការបំភិតបំភ័យដល់ប្រជាពលរដ្ឋ»។

លោក មិន ពៅ ដែលបានឈរឈ្មោះជាបេក្ខភាពមេឃុំព្រែកស្តីរបស់គណបក្សប្រជាធិតេយ្យមូលដ្ឋាន បានប្រាប់ខេមបូចា ថា នៅមណ្ឌលបោះឆ្នោតក្នុងឃុំរបស់លោក ស្ថិតក្នុងស្រុកកោះធំ ខេត្តកណ្តាល មានមេភូមិ និងអាជ្ញាធរឃុំឈរឃ្លាំមើលប្រជាពលរដ្ឋមកបោះឆ្នោត និងកត់ត្រាឈ្មោះរបស់ពួកគេ។ លោកបាននិយាយថា៖ «នៅខាងឃុំព្រែកស្តីរបស់ខ្ញុំក៏មានភាពមិនប្រក្រតីខ្លះដែរ ដោយមេភូមិដាក់តុអង្គុយចាំកត់ត្រាអ្នកមកបោះឆ្នោត» ដោយលោកបន្ថែមថា៖ « ហើយ​​ករណីនេះគឺជាការគំរាមកំហែងដល់ពលរដ្ឋ»។

ប្រជាពលរដ្ឋក្នុងទីក្រុងភ្នំពេញ និងតាមបណ្តាខេត្តនៅថ្ងៃទី៥ មិថុនា ឆ្នាំ២០២២ បាននាំគ្នាសម្រុកទៅបោះឆ្នោតជ្រើសរើសក្រុមប្រឹក្សាឃុំសង្កាត់ទូទាំងប្រទេស ខណៈមេដឹកនាំនយោបាយពីររូបមិនអាចបោះឆ្នោតបាន។
អាជ្ញាធរមូលដ្ឋានដាក់តុអង្គុយកត់ឈ្មោះអ្នកមកបោះឆ្នោតនៅក្នុងឃុំព្រែកស្តី ស្រុកកោះធំខេត្តកណ្តាល នៅព្រឹកថ្ងៃទី៥ ខែមិថុនា ឆ្នាំ២០២២។ រូបភាពផ្តលឲ្យ

លោកហង្ស ពុទ្ធា និងលោកសោម សូរីដា អ្នកនាំពាក្យគណៈកម្មាធិការជាតិ​រៀបចំការ​បោះឆ្នោត​ មិនអាចទាក់ទងសុំការអត្ថាធិប្បាយបាននោះទេ។

ការបោះឆ្នោតចាប់ពីម៉ោង៧ព្រឹករហូតដល់ម៉ោង៣រសៀល។ គ.ជ.ប នឹងផ្សាយលទ្ធផលបោះឆ្នោតបឋមចាប់ពីល្ងាចថ្ងៃទី៥ ខែមិថុនា ឆ្នាំ២០២២ ដល់ម៉ោង១២យប់ និងបន្តផ្សាយចាប់ពីម៉ោង៨ព្រឹកថ្ងៃទី៦ ខែមិថុនា ឆ្នាំ២០២២ ដល់ម៉ោង១២ថ្ងៃត្រង់។

បោះឆ្នោត​ជ្រើសរើស​ក្រុមប្រឹក្សា​ឃុំសង្កាត់អាណត្តិទី៥នេះ មាន​គណបក្ស​នយោបាយ​ចូលរួម​ប្រកួតប្រជែង​ចំនួន​១៧​គណបក្ស៕  (រាយការណ៍ដោយ៖ ស៊ន សារ៉ាត/ឃាង សុខមាន/ ទ្រី ថានី /សុវណ្ណ ស្រីពេជ្រ)

217 views

ព័ត៌មានថ្មី

អត្ថបទពេញនិយម