ប្រជាពលរដ្ឋអះអាងថា អាជ្ញាធររុញដាក់គ្នា ក្នុងការស្វែងរកដំណោះស្រាយលើការបណ្តេញចេញពួកគេពីផ្លូវរថភ្លើង

អ្នកស្រី អ៊ាវ ម៉ាច រើអេតចាយចេញពីរទេះក្បែរផ្ទះរបស់ខ្លួនក្នុងខណ្ឌទួលគោក កន្លែងដែលសហគមន៍ត្រូវបង្ខំបណ្ដេញចេញ ដើម្បីយកដីធ្វើផ្លូវ និងប្រព័ន្ធលូ កាលពីថ្ងៃទី១៥ ខែមករា។ បញ្ញា ឆព័ណ្ណ
អ្នកស្រី អ៊ាវ ម៉ាច រើអេតចាយចេញពីរទេះក្បែរផ្ទះរបស់ខ្លួនក្នុងខណ្ឌទួលគោក កន្លែងដែលសហគមន៍ត្រូវបង្ខំបណ្ដេញចេញ ដើម្បីយកដីធ្វើផ្លូវ និងប្រព័ន្ធលូ កាលពីថ្ងៃទី១៥ ខែមករា។ បញ្ញា ឆព័ណ្ណ
Share on facebook
Share on twitter
Share on linkedin
Share on telegram
Share on whatsapp

ប្រាំមួយខែបន្ទាប់ពី​បាន​ទទួល​សេចក្ដីជូន​ដំណឹង​ឲ្យ​រើ​ចេញ សហគមន៍​អ្នក​រស់​នៅ​តាម​បណ្ដោយ​​ផ្លូវ​រថភ្លើង​ក្នុង​រាជធានីភ្នំពេញ​ ទី​បំផុត​បានជួប​ជាមួយ​មន្ត្រី​សាលាក្រុង ដើម្បីពិភាក្សា​​រឿង​សំណង​ទាក់ទង​នឹង​ការ​រើ​ចេញនេះ ប៉ុន្តែ​ប្រជា​សហគមន៍​ថាហាក់​មាន​សង្ឃឹម​តិច​តួច​នៅ​ឡើយ ដោយ​មន្ត្រី​អះអាង​ថា​ខ្លួន​ត្រូវ​រង់ចាំ​របាយការណ៍​ពី​ថ្នាក់​ក្រោម​​សិន​។​

បន្ទាប់​ពី​រង​ការ​គំរាម​ចាប់​ខ្លួន​ពី​ពេល​មុន​​ក្នុង​ការ​ព្យា​យាម​ជួប​មន្ត្រី​សាលាក្រុង​ តំណាង​ពល​រដ្ឋ​២៥​គ្រួសារ​ដែល​រង​ការ​បណ្ដេញ​ចេញពី​លំនៅ​ដ្ឋាន​ដើម្បី​យក​ដីធ្វើ​ផ្លូវ​ថ្មី និង​ប្រព័ន្ធលូ​ក្នុង​ខណ្ឌទួល​គោក បាន​ជួប​លោក កាំង លាងគ្រី ប្រធានការិយាល័យ​ច្បាប់ និង​ដោះ​ស្រាយ​វិវាទនៅមូលដ្ឋាន​របស់​សាលាក្រុង​។​

តំណាង​សហគមន៍ម្នាក់ លោក កូវ សារុន បាន​ឲ្យ​ដឹងថា​​៖ «​គាត់​បាន​​ប្រាប់យើង​ថា​សាលាក្រុង​មិន​បានទទួល​របាយការណ៍​ណាមួយ​ពីមន្ត្រី​ខណ្ឌ​​នៅឡើយទេ ហើយ​បាន​បន្ទោសទៅអាជ្ញាធរ​ខណ្ឌ​ ដែល​មិន​រាយការណ៍​បញ្ហានេះ​ទៅ​កាន់​ថ្នាក់​លើ»។​

លោក ឲ្យ​ដឹងទៀត​ថា សប្ដាហ៍​ក្រោយ​នឹង​មាន​ជំនួប​រវាង​ប្រជា​សហគមន៍ មន្ត្រី​សាលាក្រុង និង​មន្ត្រី​ខណ្ឌ ដែល​ការ​សន្យា​ជួប​នេះ​ ធ្វើ​ឲ្យ​ប្រជា​សហគមន៍​នៅ​មិន​ទាន់ទុក​ចិត្ត​បាន​នៅឡើយ ដោយ​ថា​​ច្រើន​ខែ​កន្លងមក​នេះមន្ត្រី​ និង​ប្រ​ជា​ពល​រដ្ឋ​នៅមិនទាន់​ត្រូវ​គ្នា​​។​

លោក​បន្ថែមថា៖ «​ពួកគាត់​បង្ហាញ​ពី​ចេតនា​ចង់​ដោះស្រាយ​បញ្ហា ប៉ុន្តែពួក​យើង​មិន​ទាន់​មាន​សង្ឃឹម​ច្រើនទេ ព្រោះ​មិន​ទាន់​បានជួប​លោក​អភិបាល​ក្រុង​ផង។ បើ​សិនជា​ជំនួប​លើក្រោយ​មិន​អាច​រក​ដំណោះស្រាយ​បានទេ ប្រជាជន​នឹង​ទៅ​កាន់​ផ្ទះ​លោក​នាយក​រដ្ឋមន្ត្រី​ ហ៊ុន សែន»។​

លោក លាងគ្រី បដិសេធធ្វើអត្ថាធិប្បាយ​លើ​រឿងនេះ និង​បានបង្វែរ​សំណួរ​ទៅ​កាន់​អ្នក​នាំពាក្យ​សាលារាជធានី​ភ្នំពេញ លោក ម៉េត មាសភក្ដី ហើយ​អ្នក​នាំពាក្យ​រូបនេះ​ក៏​បាន​បដិសេធ​ផ្ដល់​ព័ត៌មាន​លម្អិត​ពី​ដំណើរការដោះស្រាយ​ជម្លោះនេះដែរ។​

លោក​មានប្រសាសន៍ថា៖ «​ពួកគាត់​បាន​យក​បញ្ហា​មក​ទី​នេះ ហើយ​មន្ត្រី​នឹង​ធ្វើ​ការ​ជាមួយ​ពួកគាត់»។ លោក​បដិសេធ​លម្អិត​ពី​បញ្ហា​នេះ។​

តាំង​ពី​បាន​ទទួល​សេចក្ដី​ជូន​ដំណឹង​ឲ្យ​រើ​ចេញ​កាលពី​ខែ​សី​ហា កន្លង​មក​អ្នក​ភូមិ​ទាំង​នោះ​​បាន​តស៊ូ​ទាមទារ​យក​សំណង​សមរម្យ និងបាន​បដិសេធសំណើឲ្យ​ទៅ​រស់នៅ​ក្រៅ​ក្រុង​។​

ប្រជាពលរដ្ឋ​ទាំង​នេះ​ ក៏​ត្រូវ​បាន​ផ្ដល់ឱកាស​ឲ្យ​រស់នៅ​លើទីតាំង​ដដែល​​ផង​ដែរ តែត្រូវកាត់​ទំហំដី ប៉ុន្តែ​អ្នក​ភូមិ​ថា​ផ្ទះ​អ្នក​ខ្លះ​នឹង​នៅ​សល់តែ​ពីរ​បី​ម៉ែត្រ​ប៉ុណ្ណោះ​បន្ទាប់ពីធ្វើ​​ផ្លូវ​ថ្មី និង​បណ្ដាញលូ​ត្រូវ​សាងសង់​អមសង្ខាង​ផ្លូវ​រថភ្លើង​។​

អភិបាល​ខណ្ឌ​ទួលគោក លោក ឯក ឃុនឌឿន ឆ្លើយ​បដិសេធទៅ​នឹង​ការអះអាង​របស់​គ្រួសារ​ត្រូវ​បណ្ដេញ​ចេញ ដោយ​លោក​ថា​សាលាខណ្ឌ​បាន​ធ្វើ​របាយការណ៍​ទៅ​កាន់​សារក្រុង​រួច​ហើយ ទាក់ទង​នឹង​រឿង​នេះ​។​

លោក​ ឲ្យ​ដឹង​ថា៖ «​យើង​មិន​ទាន់​បាន​បង្ខំ​ពួកគាត់ឲ្យ​រុះរើ​ផ្ទះ​នោះទេ។ យើងបាន​ស្នើ​ពួកគាត់​ឲ្យ​នៅ​ស្ងៀម​ស្ងាត់​សិន​ ព្រោះ​យើង​បាន​ផ្ញើ​​របាយការណ៍​ទៅ​កាន់​សាលា​ក្រុង​រួច​ហើយ និង​កំពុង​រង់ចាំ​ដំណោះស្រាយ​»។​

ប្រ​ជាពលរដ្ឋ​បាន​បដិសេធសំណើដែល​ចង់​ឲ្យ​ពួកគាត់​ផ្លាស់ទៅ​នៅ​ស្រុក​អង្គស្នួល ខេត្ត​កណ្ដាល ចម្ងាយ​ប្រហែល​៣០​គីឡូម៉ែត្រ​ពី​ភ្នំពេញ ជំនួស​មកវិញ​អ្នក​ទាំងនោះចង់បាន​ដី​នៅ​ក្នុង​ខណ្ឌទួលគោក ឬ​ខណ្ឌឫស្សីកែវ​។​​

លោក ឃុនឌឿន ថា​សំណើ​នេះ​ស្ថិត​ក្នុង​ដៃ​អភិបាលក្រុង លោក ឃួង ស្រេង រួច​ហើយ​។​

សហគមន៍​​​នេះ​ជា​គ្រួសារ​​ថ្មី​ដែល​ត្រូវ​រង​ការ​បណ្ដេញ​ចេញ​ ព្រោះ​តែការ​អភិវឌ្ឍ​ទីក្រុង ហើយពេល​នេះគឺ​ត្រូវ​ធ្វើ​ផ្លូវ​បេតុ​១២​ម៉ែត្រ និង​បណ្ដាញ​លូ​នៅ​សង្ខាង​ផ្លូវ​រថ​ភ្លើង​។

លិខិត​ជូដំណឹង​របស់អាជ្ញាធរ​ខណ្ឌ​ទួល​គោក​ចុះថ្ងៃទី​១២ ខែ​សីហា ឆ្នាំ​២០២០ បាន​ទុក​ពេល​ឲ្យ​គ្រួសារ​ទាំង​នោះរើចេញ​ក្នុង​រយៈពេល​មួយ​ខែ។​

បន្ទាប់​ពីការ​ចចារជាមួយ​អាជ្ញាធរ​មូលដ្ឋាន​​​ត្រូវ​ជាប់គាំង ប្រ​ជា​ពល​រដ្ឋ​ទាំងនោះ​បាន​ធ្វើ​លិខិត​អំពាវនាវ​មួយ​ទៅ​កាន់ លោក ឃួង ស្រេង ដើម្បីជួយអន្តរាគមន៍។

ពលរដ្ឋបានស្នើសុំ​ជួប​ជាមួយ​មន្ត្រី​នៅ​ថ្ងៃទី​១៤ ខែមករាកន្លងទៅ ប៉ុន្តែពួកគេ​ត្រូវ​អាជ្ញាធរ​មូល​ដ្ឋាន​ប្រាប់ថា​ ពួកគេ​អាច​នឹង​ត្រូវ​ចាត់ទុក​ថាជាអ្នកគាំទ្រក្រុម​ប្រឆាំង ហើយ​នឹង​ត្រូវ​ចាប់​ខ្លួន បើសិនពួកគេធ្វើដំណើរទៅសាលាក្រុង។

លោក សឹង សែនករុណា មន្ត្រីស៊ើប​អង្កតជាន់ខ្ពស់​របស់​សមាគមសិទ្ធិមនុស្ស​អាដហុក មាន​ប្រសាសន៍ថា​ អាជ្ញាធរ​គួរ​តែ​ខិត​ខំដោះស្រាយ​​ជម្លោះនេះ។​

លោក​បន្ថែមថា៖ «​ពួកគាត់​មិនគួររុញ​បញ្ហា​ដាក់​គ្នា​នោះទេ។ វា​បង្ហាញ​ថា​ពួកគាត់​មិន​សហការ​ដោះស្រាយ​បញ្ហា វាបង្ហាញ​ថា​ពួកគាត់​មិន​បាន​យក​ចិត្ត​ទុក​ដាក់ខ្លាំង​ ដែល​នេះ​ហើយជា​មូល​ហេតុ​ពល​រដ្ឋ​ជួបបញ្ហា​គ្មាន​ដំណោះស្រាយ​»

លោក​បន្តថា​អាជ្ញាធរ​ត្រូវ​ពិចារណា​លើ​ផល​ប៉ះពាល់​លើ​សហគមន៍​ក្រីក្រ​ មុន​បង្ខំពួកគាត់​ឲ្យ​ចាកចេញពីទីក្រុង​។​

លោក​បន្ថែមទៀតថា៖ «​​ប្រជាពលរដ្ឋ​មិន​ចង់​ផ្លាស់ទៅ​កន្លែង​ថ្មីនោះទេ ព្រោះវា​ខ្វះខាត​ហេដ្ឋារចនាសម្ព័ន្ធ រដ្ឋាភិបាល​គួរ​តែ​បង្កើត​ឲ្យ​មាន​ផ្លូវ មាន​ទឹក មាន​អគិ្គសនី មណ្ឌលសុខភាព និង​សាលារៀននៅទីនោះ»

ប្រែសម្រួលពីអត្ថបទភាសាអង់គ្លេស៖ Authorities pass buck in railway eviction, residents say

200 views
Share on facebook
Share on twitter
Share on linkedin
Share on telegram
Share on whatsapp
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »