សមាគមសម្ព័ន្ធអ្នកសារព័ត៌មានកម្ពុជា

កសិករកម្ពុជារងគ្រោះដោយក្រុមហ៊ុនស្ករសរបស់ថៃ បានប្តឹងក្រុមហ៊ុនកូកា កូឡា ឲ្យផ្តល់ភស្តុតាង

អាជ្ញាធរខេត្តឧត្តរមានជ័យបានដុតបំផ្លាញផ្ទះប្រជាពលរដ្ឋកាលពីថ្ងៃទី៩ ខែតុលា ឆ្នាំ២០០៩ នៅចំណុចអូរបាត់មាន់ ភូមិបូស ឃុំកូនក្រៀល ស្រុកសំរោង ដើម្បីផ្តល់ឲ្យក្រុមហ៊ុនដំណាំអំពៅមីត្រផល។ រូបភាពផ្ដល់ឲ្យ
អាជ្ញាធរខេត្តឧត្តរមានជ័យបានដុតបំផ្លាញផ្ទះប្រជាពលរដ្ឋកាលពីថ្ងៃទី៩ ខែតុលា ឆ្នាំ២០០៩ នៅចំណុចអូរបាត់មាន់ ភូមិបូស ឃុំកូនក្រៀល ស្រុកសំរោង ដើម្បីផ្តល់ឲ្យក្រុមហ៊ុនដំណាំអំពៅមីត្រផល។ រូបភាពផ្ដល់ឲ្យ

កសិករ​កម្ពុជា​ជា​ច្រើន​ដែល​បាន​រង​នូវ​ការ​បណ្ដេញ​ចេញ​ដោយ​បង្ខំ​កាលពី​ជាង​មួយ​ទសវត្សរ៍​មុន​បាន​ដាក់​ញត្តិ​ទៅ​កាន់​តុលាការ​អាមេរិក​នៅ​សប្ដាហ៍​នេះ ដើម្បី​បង្ខំ​ឲ្យ​ក្រុម​ហ៊ុន​កូកា កូឡា ផ្តល់​ភស្តុតាង​ដែល​ជា​ផ្នែក​មួយ​នៃ​បណ្ដឹង​ប្រឆាំង​នឹង​ក្រុម​ហ៊ុន​ផលិត​ស្ករ​ស​យក្ស​ថៃ មីត្រផល (Mitr Phol Sugar co)។​​​

នៅចន្លោះ​ឆ្នាំ២០០៨ និង​២០០៩ ប្រ​ជា​ពល​រដ្ឋ​ជាង​ ៧០០​គ្រួសារ​ក្នុង​ភូមិ​ចំនួន​ ២៦ ត្រូវ​បាន​បង្ខំ​ឲ្យ​បោះ​បង់​ដី​​របស់​ពួក​គេ​ចំនួន​ ៩ ៤០០​ហិកតា សម្រាប់​ការ​ធ្វើ​សម្បទាន​ នេះ​បើ​យោង​តាម​របាយការណ៍​របស់អង្គការ​ Inclusive Development International។ ដើម្បី​បើក​ផ្លូវ​ឲ្យ​ក្រុម​ហ៊ុន​ដំណាំអំពៅ ប្រជា​​ពល​រដ្ឋ​ជា​ច្រើន​គ្រួសារ​ទាំង​នោះ​ត្រូវ​បណ្ដេញ​ចេញ​​ពី​ដី​របស់​ពួក​គេដោយ​​ហិង្សា ខណៈ​ផ្ទះ និង​ដំណាំ​ ក៏​ត្រូវ​បំផ្លាញ​។​ ក្នុង​ឆ្នាំ២០១៥ គណៈកម្មាធិការ​សិទ្ធិ​មនុស្ស​ថៃ បាន​ឲ្យ​ក្រុម​ហ៊ុន​ មីត្រផល ទទួល​ខុស​ត្រូវ​លើ​រឿង​នេះ និង​បាន​បញ្ជា​ឲ្យ​ដោះស្រាយ​បញ្ហា​នេះ​ផង​ដែរ​។ ដោយសារ​តែ​មិន​បាន​ទទួល​សំណង​ នៅ​ឆ្នាំ​២០១៨ គ្រួសារ​ទាំង​នោះ​បាន​ប្ដឹង​ក្រុម​ហ៊ុន​ថៃ​នោះទៅ​តុលាការ​នៅ​ប្រទេស​ថៃ​។​  

លោក អៀង វុទ្ធី នាយកប្រតិបត្តិអង្គការ​សមធម៌កម្ពុជា ដែល​បាន​ផ្ដល់​ជំនួយ​ផ្នែក​ច្បាប់​ដល់​ជនរង​គ្រោះ​ទាំង​នោះ បាន​ប្រាប់​ខេមបូចាថា តុលាការ​នឹង​ចាប់​ផ្ដើម​បើក​សវនាការ​ប្រឆាំង​នឹង​ក្រុម​ហ៊ុន​មីត្រផល នៅ​ដើម​ឆ្នាំ​២០២២​។​

លោក ឲ្យ​ដឹង​ថា៖ «ក្នុង​ដំណើរ​ការ​នេះ​[មេធាវី] ត្រូវ​ការ​សុំ​ទៅ​តុលាការ​អាមេរិក​ឲ្យ​ជួយ​​យក​ឯកសារ​ពី​ក្រុម​ហ៊ុន​កូកា កូឡា ដើម្បីគាំទ្រ​ដល់​សំណុំ​រឿង​ប្រឆាំង​នឹង​ក្រុម​ហ៊ុន​មីត្រផល»។​

ក្នុង​ឆ្នាំ​២០១៣ បន្ទាប់​ពី​បាន​រក​ឃើញ​ថា​ក្រុម​ហ៊ុន​មីត្រផល គឺ​ជា​ក្រុម​ហ៊ុន​ធំ​បំផុត​មួយ​ផ្គត់​ផ្គង់​ស្ករ​ដល់​ក្រុម​ហ៊ុន​កូកា កូឡា ក្រុម​ហ៊ុន​ភេសជ្ជៈ​លំដាប់​ពិភព​លោក​មួយ​នេះ​បាន​ប្រកាស​ថា​ខ្លួននឹង​ពិនិត្យ​លើ​សង្វាក់​ផ្ទត់​ផ្គង់​របស់​ខ្លួន ដែល​មាន​ក្នុង​គោល​នយោបាយ «មិនលើក​លែង» លើ​ការ​រំលោភ​យក​ដី​។ ញត្តិ​នេះ​បាន​ដាក់​ទៅ​កាន់​តុលាការ​នៅ​ Northern District of Georgia ដោយ​បាន​ស្នើ​​ក្រុម​ហ៊ុន​កូកា កូឡា បង្ហាញ​ជា​សាធារណៈ​នូវ​អ្វី​ដែល​ខ្លួន​បាន​រក​ឃើញ​។​

លោក វុទ្ធី និយាយថា៖ «គ្រួសារ​ខ្លះ​មិន​ទាន់​បាន​ទទួល​ដី​ត្រឡប់​មក​វិញ​នោះ​ទេ ហើយ​អ្នក​ទាំង​នោះ​កំពុង​ជួប​ការ​លំបាក​ក្នុង​ជីវ​ភាព»។​

ផែនទី​បង្ហាញ​ពី​ផែន​ការ​ដាំ​ដើម​ឈើ​នៅ​លើ​ដី​ដក​ហូត​ពី​ប្រ​ជា​ពល​រដ្ឋ​ក្នុងស្រុក​សំរោង ​ខេត្ត​ឧត្តរ​មាន​ជ័យ។ ​រូបភាពផ្តល់ឲ្យ

លោក ប៉ែន កុសល្យ អភិបាល​ខេត្ត​ឧត្តរមានជ័យ ប្រាប់​ខេមបូចាថា លោក​មិន​សូវ​បាន​ដឹង​​ច្រើន​ពី​បញ្ហា​នេះ​ទេ​។

យ៉ាងណា លោក​ថា​តាំង​ពី​ក្រុម​ហ៊ុន​បាន​ចេញ​ពី​កម្ពុជា និង​ប្រគល់​ដី​ឲ្យ​មក​រដ្ឋ​វិញ រដ្ឋាភិបាល​បាន​ដាក់​ដី​នោះ​ទៅ​ក្នុង​គម្រោង​ដីសម្បទាន​សេដ្ឋកិច្ច និង​សង្គម​កិច្ច ខណៈ​មួយ​ផ្នែក​​ទៀត​ត្រូវ​ទុក​សម្រាប់​ដាំដើម​ឈើ​ឡើង​វិញ​។​

ខណៈគ្រួសារ​មួយ​ចំនួន​បាន​ទទួល​ដី​ខ្លះ​មក​វិញ ប្រ​ជា​ពល​រដ្ឋ​ជា​ច្រើន​ទៀត​កំពុង​ជួប​ការ​លំបាក​ក្នុង​ការ​ស្ដារ​ជីវភាព​​របស់​ខ្លួន​ឡើង​វិញ ដែល​បានធ្លាក់​ដុន​ដាប​នាពេល​កន្លង​មក​។​

អ្នកស្រី​ កូ ផាន ជា​កសិករ​រង​គ្រោះ​ម្នាក់ បាន​ប្រាប់​ខេមបូ​ចា ថា តាំងពី​ផ្ទះ និង​ដំណាំ​របស់​អ្នកស្រី​​ត្រូវ​បាន​​បំផ្លាញ ដើម្បី​យក​ដី​ឲ្យ​ក្រុម​ហ៊ុន​ដំណាំអំពៅ មីត្រផល គ្រួសារ​របស់​អ្នកស្រី​​មិន​ទាន់​បាន​ទទួល​សំណង​ជា​ប្រាក់ ឬ​ដី​ពី​រដ្ឋាភិបាល​វិញ​នោះទេ​។​

អ្នកស្រី​​ឲ្យ​ដឹង​ថា៖ «​គ្រួសារ​របស់​ខ្ញុំ​កំពុង​រស់​នៅ​ក្នុង​ភាព​ក្រីក្រ ហើយ​​សមាជិក​ខ្លះ​បាន​បង្ខំ​ចិត្ត​ចំណាក​ស្រុក​ទៅ​ថៃ​ដើម្បី​រក​ប្រាក់»។

ប្រជា​ពល​រដ្ឋ​ដែល​ផ្ទះ​របស់​ពួកគេ​ត្រូវអាជ្ញាធរ​​ឈូស​បំផ្លាញ បាន​សាង​សង់​ខ្ទម​ស្នាក់​នៅ​បណ្ដោះអាសន្ន​ក្នុង​ឆ្នាំ២០០៩។ រូបភាព​ផ្ដល់​ឲ្យ​។

ជន​រង​គ្រោះ​ម្នាក់​ទៀត គឺ​លោក​ ទឹម សារ៉ាត លើក​ឡើង​ថា សំណុំ​រឿង​ជាមួយ​ក្រុម​ហ៊ុន​មីត្រផល នៅ​បន្ត​នៅ​ឡើយ ហើយ​លោក​សង្ឃឹម​ថា​នឹង​បាន​ទទួល​សំណង​លើ​ការ​បំផ្លាញ​ដំណាំ​របស់​លោក​។ លោក​បន្ថែម​ថា៖ «ខ្ញុំ​មិន​ចង់​បាន​អ្វី​ច្រើន​ទេ គ្រាន់តែ​ចង់​បាន​ដី​របស់​ខ្ញុំ​មក​វិញ»។​

បើ​តាម​អ្នកស្រី ផាន និងលោក សារ៉ាត ក្នុង​ឆ្នាំ២០១៨ គ្រួសារ​រង​ផល​ប៉ះពាល់​មួយ​ចំនួន​បាន​ចាប់​ផ្ដើម​ត្រឡប់​ទៅ​ដាំ​ដំណាំ​លើ​អតីត​ដី​របស់​ខ្លួន​ឡើង​វិញ តែ​ត្រូវ​ក្រុម​ហ៊ុន​ឈ្មោះ សាន ហ៊ាង ប្ដឹង។ ក្រុម​ហ៊ុននេះ​ត្រូវ​បាន​រាយ​ការណ៍​ថា​បាន​ទទួល​ដី​សម្បទាន​សេដ្ឋកិច្ច​ពី​រដ្ឋាភិបាល​សម្រាប់​ដាំ​ដំណាំកសិឧស្សាហកម្ម និង​ដំដើមឈើ​ឡើង​វិញ​។​

លោក ស្រី ណារ៉េន អ្នកសម្រប​សម្រួល​របស់​អង្គការអាដហុក​ប្រចាំ​ខេត្ត​ឧត្តរមានជ័យ មាន​ប្រសាសន៍​ថា ប្រជា​ពល​រដ្ឋ​ ១០​គ្រួសារ នៅ​ភូមិ​តាម៉ន ត្រូវ​បាន​រង​ការ​ចោទ​ប្រកាន់ពីបទ​ទន្ទ្រាន​ដី​រដ្ឋ និង​កាប់​បំផ្លាញ​ព្រៃឈើ​។​

លោក​បន្ថែម​ថា៖ «​ពួកគាត់​បាន​វិល​ត្រឡប់​ទៅ​ធ្វើ​ចម្ការ​លើ​ដី​របស់​ពួកគាត់​វិញ ព្រោះ​មិន​ទាន់​បាន​ទទួល​សំណង​តាំងពី​មានការបណ្ដេញ​ចេញ​ពី​ឆ្នាំ២០០៩។ អាជ្ញាធរ​គួរ​តែ​យក​ចិត្ត​ទុក​ដាក់​លើ​បញ្ហា​នេះ ជាជាង​ចោទ​ប្រកាន់ពួកគាត់​ថា​បាន​ទន្ទ្រាន​ដី​រដ្ឋ»៕​

ប្រែសម្រួលពីអត្ថបទភាសាអង់គ្លេស៖ Cambodian farmers hurt by Thai sugar company sue for Coca-Cola to release information

107 views
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »