រយៈពេលជិតពីរឆ្នាំ ចាប់តាំងពីត្រូវបានចោទប្រកាន់ថា បានឆបោកលុយរាប់លានដុល្លារក្នុងគម្រោងវិនិយោគ ដោយអតីតឧកញ៉ា ឡេង ចាន់ណា ដែលកំពុងស្ថិតក្នុងការឃុំខ្លួនបណ្តោះអាសន្ន។ ពលរដ្ឋរាប់ពាន់នាក់នៅតែស្វែងរកការអន្តរាគមន៍ពីរដ្ឋាភិបាលដើម្បីសម្រាលបន្ទុកបំណុលរបស់ពួកគេ និងពន្លឿនរឿងក្តី។
ពលរដ្ឋប្រហែល ៣០០នាក់បានលើកឡើងថា ពួកគេត្រូវបានគេបោកប្រាស់ ដែលភាគច្រើនបានយកប្រាក់កម្ចីពីធនាគារ និងមីក្រូហិរញ្ញវត្ថុទៅវិនិយោគ។ ពួកគេបានតវ៉ានៅក្រសួងយុត្តិធម៌ក្នុងរាជធានីភ្នំពេញកាលពីថ្ងៃអង្គារដោយជំរុញឱ្យអាជ្ញាធរពន្លឿនសំណងពីគម្រោង «ប្រ៊ីលាន ស៊ីធី» ឆ្នាំ២០២៤។
លោកស្រី ចាន់ណា ដែលគេស្គាល់ថា ជាម្ចាស់អំណោយដ៏ច្រើនសន្ធឹកសន្ធាប់ដល់រដ្ឋាភិបាល ត្រូវបានចោទប្រកាន់ពីបទក្លែងបន្លំ និងការលាងលុយកខ្វក់ក្នុងខែមីនា ឆ្នាំ២០២៤។
លោកស្រីក៏ត្រូវបានដកហូតតំណែងជា «ឧកញ៉ា» ដែលជាការផ្តល់កិត្តិយសដល់បុគ្គលដែលបរិច្ចាគយ៉ាងហោចណាស់ ៥០ ម៉ឺនដុល្លារដល់រដ្ឋាភិបាល។
ករណីនេះ ត្រូវបានគេរាយការណ៍ថា ពាក់ព័ន្ធនឹងថវិកា ២០០លានដុល្លារ បានទាក់ទាញការចាប់អារម្មណ៍យ៉ាងខ្លាំង ដែលជំរុញឱ្យមានការស៊ើបអង្កេតលើការចោទប្រកាន់ថា មានជាប់ពាក់ព័ន្ធជាមួយមន្ត្រីនៅក្រសួងការពារជាតិ និងអប់រំ និងជាអនុប្រធានអង្គភាពប្រឆាំងអំពើពុករលួយ (ACU)។
លោក ហាប់ ហៀប តំណាងក្រុមអ្នកតវ៉ាបានអំពាវនាវឱ្យអាជ្ញាធរជួយពន្លឿនរឿងក្តីដើម្បីឈានដល់ការចេញសាលក្រមយ៉ាងឆាប់រហ័សដោយនិយាយថាមនុស្សជាច្រើនបានតស៊ូអស់ជាច្រើនឆ្នាំដើម្បីរកដំណោះស្រាយនិងសងប្រាក់កម្ចីរបស់ពួកគេ។
អ្នកស្រី ហៀប បាននិយាយថា៖ «តើយើងត្រូវបន្តបង់ប៉ុន្មានខែទៀតនៅពេលដែលមិនមានដំណោះស្រាយ?» អ្នកស្រីបានបន្តថា បច្ចុប្បន្នអ្នកស្រីបង់ប្រាក់ចំនួន ១ ០០០ ដុល្លារក្នុងមួយខែក្នុងការប្រាក់លើកម្ចី ៥៧ ០០០ ដុល្លារ ដែលនាងយកទៅវិនិយោគក្នុងក្រុមហ៊ុនរបស់ ចាន់ណា កាលពី៣ឆ្នាំមុន។
បាតុករម្នាក់ទៀត ឈ្មោះ ចាប ប៊ុនហៀង បាននិយាយថា គាត់បានខ្ចីប្រាក់ចំនួន ១៤ ៦០០ ដុល្លារពីធនាគារមួយ ហើយបង់ការប្រាក់ប្រហែល ១ ០០០ ដុល្លារក្នុងរយៈពេលប្រាំមួយខែ មុនពេលមន្ត្រីឥណទានបានអនុញ្ញាតឱ្យគាត់ពន្យារពេលការទូទាត់។ លោកបន្តថា លោកបានវិនិយោគព្រោះក្រុមហ៊ុនហាក់មានទំនាក់ទំនងជាមួយមន្ត្រីជាន់ខ្ពស់រដ្ឋាភិបាល។
អ្នកនាំពាក្យសាលាដំបូងខេត្តសៀមរាប លោក យិន ស្រាង មានប្រសាសន៍ថា ករណីលោកស្រី ចាន់ណា កំពុងស្ថិតក្រោមការស៊ើបអង្កេតពីតុលាការ ហើយមិនទាន់មានសេចក្តីសម្រេចណាមួយចេញនៅឡើយ។
លោក គី តិច មេធាវីរដ្ឋាភិបាលតំណាងដើមបណ្តឹងជាច្រើននាក់មិនអាចទាក់ទងសុំការបំភ្លឺបានទេ។ នៅក្នុងសន្និសីទសារព័ត៌មានកាលពីខែតុលា ឆ្នាំ២០២៥ ដែលចុះផ្សាយដោយបណ្តាញព័ត៌មាន Fresh News លោកបាននិយាយថា ដើមបណ្តឹងចំនួន ៤ ៩២៩នាក់ បានស្ម័គ្រចិត្តស្នើសុំតំណាងស្របច្បាប់ក្នុងសំណុំរឿងនេះ។
នាយកទទួលបន្ទុកចាត់ការទូទៅនៃអង្គការសិទ្ធិមនុស្ស លីកាដូ (Licadho) លោក អំ សំអាត មានប្រសាសន៍ថា ករណីនេះមានភាពស្មុគស្មាញខ្លាំង ហើយពាក់ព័ន្ធនឹងមន្ត្រីជាន់ខ្ពស់។
លោកបានបន្តថា៖ «តុលាការគួរពន្លឿននីតិវិធីក្នុងរឿងនេះព្រោះជនរងគ្រោះកំពុងរងទុក្ខក្នុងពេលរង់ចាំដំណោះស្រាយ»។លោកបានបន្ថែមថា ហានិភ័យជាច្រើនដែលប្រឈមនឹងបាត់បង់ទ្រព្យសម្បត្តិឬផ្ទះដែលប្រើជាវត្ថុបញ្ចាំ ប្រសិនបើពួកគេមិនអាចសងបំណុលបាន។
អ្នកនាំពាក្យ ACU លោក សយ ច័ន្ទវិចិត្រ មិនអាចទាក់ទងបានភ្លាមៗទេ៕
ប្រែសម្រួលពីអត្ថបទភាសាអង់គ្លេស៖ Hundreds Demonstrate at Justice Ministry Over Stalled ‘Brilliant City’ Trial
