មន្ត្រីបានឲ្យដឹងនៅថ្ងៃទី២៦ ខែកញ្ញាថា មានប្រជាពលរដ្ឋជិត៣០០គ្រួសារបានវិលពីលំនៅដ្ឋានរបស់ពួកគេនៅជាប់ព្រំដែនកម្ពុជា-ថៃ មកកាន់ជំរំភៀសសឹកចាស់វិញ។ ការវិលត្រឡប់វិញនេះ កើតឡើងក្រោយមានសេចក្ដីរាយការណ៍ថ្មីៗថា មានឮស្នូរគ្រាប់កាំភ្លើង និងថាមានការបង្កើនចំនួនកងទ័ពតាមព្រំដែន។
កម្ពុជាបានបញ្ជាក់ថាស្នូរផ្ទុះអាវុធនោះគឺជា«ការរាលកៃដោយអចេតនា» នៅជិតព្រំដែនខេត្តព្រះវិហារ កាលពីថ្ងៃអង្គារ ហើយថាបញ្ហានេះត្រូវបានដោះស្រាយភ្លាមៗផងដែរ។ ក្រសួងការពារជាតិកម្ពុជា ក្រោយមកបានចេញសេចក្ដីថ្លែងការណ៍មួយទៀតនៅថ្ងៃព្រហស្បតិ៍ ដោយបានលើកឡើងថាមានការឮសំឡេងកាំភ្លើងបួនដងផ្សេងទៀត ប៉ុន្តែក្រសួងអះអាងថាសំឡេងនោះនៅក្នុងទឹកដីថៃ។
ទាហានថៃនៅសប្ដាហ៍នេះក៏បានចោទប្រកាន់ទាហានកម្ពុជាថាបានបង្ហោះដ្រូន បង្កើនចំនួន អាវុធនៅជិតប្រាសាទព្រះវិហារ និងបានគប់គ្រាប់បែកទៅជិតព្រំដែនខេត្តសុរិន្ទរបស់ថៃ។ កម្ពុជា បានច្រានចោលការចោទប្រកាន់នេះ។ ក្រោមកិច្ចព្រមព្រៀងបទឈប់បាញ់ ប្រទេសទាំងពីរបានយល់ព្រមបញ្ឈប់ការបង្កើនកម្លាំងយោធានៅតាមព្រំដែន ហើយរដ្ឋមន្ត្រីក្រសួងការបរទេសថៃថ្មី បានអំពាវនាវឲ្យមានការកាត់បន្ថយវត្តមានកងទ័ពនៅតាមព្រំដែនប្រទេសទាំងពីរ។
ប្រជាពលរដ្ឋមួយចំនួនបានប្រាប់ខេមបូចាថា ពួកគេបានត្រឡប់មកកាន់ជំរំភៀសសឹកវិញក្នុងសប្ដាហ៍នេះ បន្ទាប់ពីបានវិលត្រឡប់ទៅផ្ទះ និងចូលទៅធ្វើស្រែចម្ការនៅតាមព្រំដែនវិញកាលពីដើមខែនេះ គិតតាំងពីមានការផ្ទុះអាវុធកាលពីខែកក្កដា មក។
អ្នកស្រី កាំ មឿន វ័យ៦៣ឆ្នាំ រស់នៅភូមិឈើទាលគង ប្រហែល១០គីឡូម៉ែត្រពីព្រំដែនថៃ ជាមួយសមាជិកគ្រួសារប្រាំពីរនាក់ បានឲ្យដឹងថាអ្នកស្រី និងអ្នកភូមិបានឃើញការបង្ហោះផ្សាយលើហ្វេសប៊ុកនានាថាអាចនឹងមានការប៉ះទង្គិចគ្នាជាថ្មីនៅថ្ងៃសុក្រនេះ។
អ្នកស្រីឲ្យដឹងថា៖ «មូលហេតុខ្លាច អត់ហ៊ាននៅ យើងស្ដាប់ព័ត៌មានទៅសភាពការណ៍អត់ស្រួល »។ អ្នកស្រីនបន្ថែមថាគ្រួសារអ្នកស្រីនឹងត្រឡប់ទៅផ្ទះវិញនៅដើមខែតុលា បើសិនជាមិនមានការប៉ះទង្គិចគ្នាកើតឡើងនេះទេ។
ព័ត៌មានមិនច្បាស់លាស់ជាច្រើនបានកើតមានដោយថាថៃនឹងវាយប្រហារជាថ្មី ទោះមានបទឈប់បាញ់ ប៉ុន្តែមិនដែលមានហេតុការណ៍បែបនេះកើតឡើងនោះទេ ហើយវាគ្រាន់តែបានធ្វើឲ្យប្រជាពលរដ្ឋនៅតាមព្រំដែនបារម្ភប៉ុណ្ណោះ។
អ្នកស្រី មឿន ក៏ដូចជាអ្នកផ្សេងដែរ បានវិលត្រឡប់ទៅកាន់ជំរំភៀសសឹកវិញ។ អ្នកស្រីថាខ្លួនបារម្ភពីសត្វចិញ្ចឹម និងដំណាំ ដែលត្រូវទុកចោល តាំងពីមានជម្លោះកើតឡើងមក។
អ្នកស្រី អ៊ូច សុខា កសិករនៅឃុំស្រអែម បានឲ្យដឹងថា៖ «ខ្ញុំមិនចង់មកបានយូរអង្វែងទេ ព្រោះអី ស្រូវ អង្ករយើងចង់ចេញ[ទុំ]ដែរហើយ »។ អ្នកស្រីបន្ថែមថាអ្នកស្រីអស់ប្រាក់ដើម្បីទិញប្រេងឥន្ធនៈសម្រាប់ចាក់ធ្វើដំណើរត្រឡប់ទៅមកមើលថែដំណាំហើយគិតតាំងពីផ្ទុះអាវុធឡើងដំបូងមក។
អ្នកស្រីថា៖ «បើអត់មានអ្នកមើលថែមិនកើតទេ ខូចអស់ហើយ ស្រូវវិញបើទុំអត់មានអ្នកច្រូតមិនចោល»
លោក ម៉ុល កុសល រស់នៅក្នុងឃុំជាមួយអ្នកស្រី សុខា ដែរ បានឲ្យដឹងថា ឪពុករបស់លោក ជាទាហានឈរជើងនៅព្រំដែន បានប្រាប់កាលពីថ្ងៃពុធឲ្យលោកចាកចេញពីផ្ទះទៅរកកន្លែងសុវត្ថិភាព ខណៈតំបន់ជួរភ្នំដងរែកស្ថិតក្នុងការប្រុងប្រយ័ត្នខ្ពស់។
លោក គឹម ចាន់បញ្ញា អ្នកនាំពាក្យរដ្ឋបាលខេត្តព្រះវិហារ បានឲ្យដឹងថា ប្រជាពលរដ្ឋប្រហែល៣០០គ្រួសារ មានគ្នាប្រហែល៨០០នាក់ ដែលទើបភៀសសឹកថ្មីៗនេះ ភាគច្រើនកំពុងស្នាក់នៅវត្តកំពង់សង្កែ ក្នុងស្រុកឆែប ដែលមានចម្ងាយប្រមាណ១០០គីឡូម៉ែត្រពីព្រំដែន។
លោក ចាន់បញ្ញា ឲ្យដឹងទៀតថា នៅក្នុខេត្តព្រះវិហារ មាន«មណ្ឌលសុវត្ថិភាព»ចំនួនបួន បន្តបើកទ្វារ និងមានពលរដ្ឋជាង២ពាន់គ្រួសារកំពុងស្នាក់នៅ។ លោកជំរុញឲ្យប្រជាពលរដ្ឋស្ដាប់ព័ត៌មានដែលមានប្រភពពីអាជ្ញាធរទាក់ទងនឹងបញ្ហាព្រំដែន ហើយថានៅមណ្ឌលសុវត្ថិភាពមានសម្ភារៈគ្រប់គ្រាន់សម្រាប់ផ្គត់ផ្គង់ជនភៀសសឹក។
យ៉ាងណាក៏មានសេចក្ដីរាយការណ៍ថានៅជំរំភៀសសឹកមានបញ្ហាខ្វះស្បៀង កន្លែងស្នាក់នៅមិនសមរម្យ និងមានការបៀនបៀនផ្លូវភេទផងដែរ។
ខណៈដែលភាគីកម្ពុជា-ថៃ ចោទគ្នាទៅវិញទៅមកថាបានបំពានបទឈប់បាញ់ ក្រុមអ្នកសង្កេតការណ៍ដឹកនាំដោយម៉ាឡេស៊ី បានចុះទៅពិនិត្យភូមិជោគជ័យ តាមបណ្ដោយព្រំដែនខេត្តបន្ទាយមានជ័យនៅថ្ងៃសុក្រនេះ។
ភូមិ និងតំបន់នៅជុំវិញនោះ មិនមែនជាតំបន់ជម្លោះទេនាពេលកន្លងមក តែវាបានក្លាយជាតំបន់ប្រឈមមុខគ្នាខ្លាំងកាលពីជាងមួយខែមុន ដោយភាគីថៃបានរាយបន្លាលួសកាត់ដីភូមិនិងចម្ការអ្នកស្រុក បង្កឱ្យមានការប៉ះទង្គិចយ៉ាងហិង្សាជាមួយអ្នកស្រុក។
ទន្ទឹមនឹងនោះ អ្នកវិភាគតំបន់បានប៉ាន់ស្មានថា ការប៉ះទង្គិចកាន់តែធំរវាងកម្ពុជា និងថៃ ទំនងជាមិនអាចទៅរួចនោះទេ ជាមួយនឹងកិច្ចប្រជុំកំពូលអាស៊ានលើកទី៤៧ នៅប្រទេសម៉ាឡេស៊ី នឹងត្រូវរៀបចំឡើងត្រឹមតែប៉ុន្មានសប្តាហ៍ទៀតប៉ុណ្ណោះ ៕
ប្រែសម្រួលពីអត្ថបទភាសាអង់គ្លេស៖ Hundreds Flee Preah Vihear Border Amid Fears of Renewed Clashes with Thailand
