អាជ្ញាធរបានឱ្យដឹងនាថ្ងៃទី៤ ខែធ្នូថា ប្រមាណជាជិតមួយខែក្រោយពីកងទ័ពថៃបានបាញ់ប្រហារលើជនស៊ីវិលកម្ពុជាតាមបណ្តោយព្រំដែនខេត្តបន្ទាយមានជ័យដែលបង្ខំឱ្យពលរដ្ឋរាប់រយគ្រួសាររត់ភៀសខ្លួន ពេលនេះពួកគេភាគច្រើនបានវិលត្រឡប់មកភូមិរបស់ពួកគេវិញហើយ។
យ៉ាងណាក៏ដោយយ៉ាងហោចណាស់មានពលរដ្ឋ១២គ្រួសារនៅតែបន្តស្នាក់នៅក្នុងតង់ដែលមានចម្ងាយតែប៉ុន្មានគីឡូម៉ែត្រពីផ្ទះរបស់ពួកគេហើយនៅពីក្រោយបន្លាលួសដែលបានរាយដោយទាហានថៃ ដែលជារនាំងធ្វើឱ្យពួកគេមិនអាចឆ្លងកាត់ទៅផ្ទះរបស់ខ្លួនបានអស់រយៈពេលជិត៤ខែមកហើយ។ នេះបើតាមអភិបាលស្រុកមកពីតំបន់ដែលមានជម្លោះព្រំដែន លោក កែវ តារារស្មី។
ពលរដ្ឋជិត ៨៥០គ្រួសារមកពីភូមិជោគជ័យ និងព្រៃចាន់ដែលប្រទេសថៃអះអាងថា ជាទឹកដីរបស់ខ្លួនបានភៀសខ្លួនកាលពីខែវិច្ឆិកា បន្ទាប់ពីជនស៊ីវិលខ្មែរម្នាក់បានស្លាប់ និង៣នាក់រងរបួសដោយសារការបាញ់ប្រហាររបស់ថៃ។ ភាគីកម្ពុជាបាននិយាយថា ការបាញ់ប្រហារនេះបានកើតឡើងដែលបង្កហេតុដោយកងកម្លាំងថៃដែលជាសេចក្តីថ្លែងការណ៍ដែលរដ្ឋាភិបាលក្រុងបាងកកបានបដិសេធដោយនិយាយថា កងទ័ពរបស់ខ្លួនបានបាញ់តបវិញបន្ទាប់ពីទាហានកម្ពុជាបាញ់ចូលទឹកដីថៃ។
ហេតុការណ៍នេះ គឺជាឧប្បត្តិហេតុចុងក្រោយក្នុងចំណោមឧប្បត្តិហេតុជាបន្តបន្ទាប់ នៅតាមបណ្តោយតំបន់មានជម្លោះជាច្រើននៃព្រំដែនរួមគ្នាក្នុងឆ្នាំនេះ រួមទាំងការប្រយុទ្ធទ្រង់ទ្រាយធំ រយៈពេល៤ថ្ងៃ កាលពីខែកក្កដា ដែលបណ្តាលឱ្យមនុស្សរាប់សិបនាក់ស្លាប់ និងធ្វើឱ្យប្រជាជនរាប់សែននាក់ ត្រូវផ្លាស់ទីលំនៅទាំងសងខាង មុនពេលបទឈប់បាញ់ចូលជាធរមាន។
មុននឹងមានករណីបាញ់ប្រហារកាលពីខែវិច្ឆិកា នៅខេត្តបន្ទាយមានជ័យ មានហេតុការណ៍ដាច់ដោយឡែកមួយផ្សេងទៀត គឺករណីផ្ទុះគ្រាប់មីននៅតាមបណ្ដោយព្រំដែនខេត្តព្រះវិហារ-ស៊ីសាកេត ដែលបណ្ដាលឱ្យទាហានថៃរងរបួស ដែលជាហេតុធ្វើឱ្យថៃសម្រេចផ្អាកកិច្ចព្រមព្រៀងបទឈប់បាញ់។
អ្នកនាំពាក្យខេត្តបន្ទាយមានជ័យ លោក ណង វុទ្ធី បានថ្លែងថា៖ «ប្រជាពលរដ្ឋដែលបានផ្លាស់ទីលំនៅ ពេលនេះបានវិលត្រឡប់ទៅលំនៅឋានវិញអស់ហើយ ដោយសារស្ថានភាពបានស្ងប់ស្ងាត់ ហើយអាជ្ញាធរក៏បានបោះបង្គោលព្រំដែនបណ្ដោះអាសន្នរួចរាល់ដែរ»។ លោកបាននិយាយដោយសំដៅទៅលើការងារវាស់វែងខណ្ឌសីមារួមនៅក្នុងតំបន់នោះដែលត្រូវបានគេមើលឃើញថាជាការបន្ធូរបន្ថយភាពតានតឹង ក្រោយពីកិច្ចព្រមព្រៀងបទឈប់បាញ់ត្រូវបានលុបចោល ដែលកិច្ចព្រមព្រៀងនេះ ធ្លាប់ត្រូវបានគេលើកឡើងថា ជាជំហានឆ្ពោះទៅរកសន្តិភាព។
លោក កែវ តារារស្មី អភិបាលស្រុកអូរជ្រៅ ដែលភូមិព្រៃចាន់ និងភូមិជោគជ័យ គឺស្ថិតក្នុងផែនទីកម្ពុជា បានយល់ស្របពីការវាយតម្លៃរបស់លោក វុទ្ធី ដែលថាតំបន់នោះបានស្ងប់ស្ងាត់ ដោយប្រជាជនបានវិលត្រឡប់មកវិញជាបន្តបន្ទាប់ ចាប់តាំងពីថ្ងៃទី២៥ ខែវិច្ឆិកា។ ទោះជាយ៉ាងណាក៏ដោយ លោកបានកត់សម្គាល់ថា អាជ្ញាធរមិនអាចដកបន្លាលួសដែលបានរាយដោយភាគីថៃដែលបន្តរារាំងមិនឱ្យគ្រួសារមួយចំនួនចូលទៅផ្ទះសម្បែង និងដីកសិកម្មដែលពួកគេបានរស់នៅ និងអាស្រ័យអស់រយៈពេលជាច្រើនទសវត្សរ៍មកហើយនោះទេ។
លោកបានបង្វែរសំណួរពីដំណើរការនៃការបោះបង្គោលព្រំដែនបណ្តោះអាសន្ននៅក្នុងតំបន់ជម្លោះទៅរដ្ឋលេខាធិការដ្ឋានកិច្ចការព្រំដែន។
អ្នកស្រី ហ៊ុល ម៉ាលីស ជាអ្នកភូមិព្រៃចាន់ ដែលផ្ទះរបស់គាត់នៅតែហ៊ុំព័ទ្ធដោយបន្លាលួស បាននិយាយថា អ្នកស្រីបានត្រឡប់មកពីជំរំមួយក្នុងខេត្តបន្ទាយមានជ័យ កាលពីមួយសប្តាហ៍មុន។
អ្នកស្រីបាននិយាយដោយជំរុញឱ្យរដ្ឋាភិបាលកម្ពុជាជួយដោះស្រាយបញ្ហានេះថា៖ «រហូតមកដល់ពេលនេះខ្ញុំនៅតែរស់នៅក្នុងតង់ព្រោះថៃមិនទាន់បានដកបន្លាលួសដែលព័ទ្ធជុំវិញផ្ទះរបស់ខ្ញុំចេញនៅឡើយទេ»។
អ្នកភូមិម្នាក់ទៀតមកពីភូមិជោគជ័យ លោក ហូល ផារ័ត្ន បាននិយាយថា លោកនិងក្រុមគ្រួសារបានវិលត្រឡប់ទៅផ្ទះវិញកាលពីសប្តាហ៍មុនបន្ទាប់ពីអាជ្ញាធរស្រុកអនុញ្ញាតឱ្យអ្នកភូមិមកផ្ទះវិញដោយសារតែស្ថានភាពបានស្ងប់ស្ងាត់។
លោក ផារ័ត្ន ដែលមានកូនអាយុទើបតែបាន២សប្តាហ៍ផងនោះ បាននិយាយថា៖ «មិនមានបញ្ហាអ្វីនៅក្នុងជំរំទេ ប៉ុន្តែការលំបាកនោះគឺថាប្រពន្ធខ្ញុំទើបតែសម្រាលកូន ហើយយើងមានកូនតូចៗទៀត»៕
ប្រែសម្រួលពីអត្ថបទភាសាអង់គ្លេស៖ Hundreds of Families Return to Banteay Meanchey Border, Homes Still Blocked
