អង្គការសង្គមស៊ីវិលប្រើសេវាផ្ទេរប្រាក់ ជួយជនរងគ្រោះទឹកជំនន់ប្រកបដោយប្រសិទ្ធភាព

ប្រជាពលរដ្ឋរងគ្រោះធ្ងន់ធ្ងរដោយទឹកជំនន់កាលពីខែកញ្ញា និងតុលា បានទទួលជំនួយមនុស្សធម៌ពីអង្គការមិនមែនរដ្ឋាភិបាលតាមរយៈសេវាផ្ទេរប្រាក់ នៅខេត្តសៀមរាប។ DCA
ប្រជាពលរដ្ឋរងគ្រោះធ្ងន់ធ្ងរដោយទឹកជំនន់កាលពីខែកញ្ញា និងតុលា បានទទួលជំនួយមនុស្សធម៌ពីអង្គការមិនមែនរដ្ឋាភិបាលតាមរយៈសេវាផ្ទេរប្រាក់ នៅខេត្តសៀមរាប។ DCA
Share on facebook
Share on twitter
Share on linkedin
Share on telegram
Share on whatsapp

អង្គការ​​មិន​មែន​​​រដ្ឋាភិបាល​​ចំនួនពីរ​​​ធ្វើ​​ការ​​លើ​រឿង​មនុស្ស​ធម៌ បាន​និយាយ​ថា​ពួកគេ​ទទួលជោគជ័យក្នុងការ​ប្រើ​ប្រាស់បច្ចេកវិទ្យាសេវា​ផ្ទេរ​ប្រាក់​ដើម្បី​ផ្ដល់​ជំនួយ​ដល់​គ្រួសារ​រង​គ្រោះ​ដោយ​ទឹក​ជំនន់​នាពេល​ថ្មីៗនេះ​ប្រមាណ​៥០០​គ្រួសារ ​នៅ​ខេត្ត​សៀមរាប និង​បាត់​ដំបង​។​​

អង្គការ​ទាំង​ពីរ​គឺ​អង្គការ People in Need (PIN) និង​អង្គការ Dan Church Aid (DCA) បាន​​​រាយការណ៍​ថា​បាន​ធ្វើ​ការ​ផ្ទេរ​ប្រាក់ទៅ​កាន់​ប្រជា​ពល​រដ្ឋ​៥០០​គ្រួសារ​ក្នុង​ខេត្ត​ចំនួន​ពីរ តាម​រយៈបច្ចេកវិទ្យាអនឡាញ​​ ដោយ​​ថា​ជួយ​ផ្ដល់​មូលនិធិបាន​លឿន​។ អង្គការ​ទាំងពីរ​បាន​ផ្ទេរ​ប្រាក់ចំនួន​២០ ០០០ដុល្លារ ទៅ​កាន់​ប្រជា​ពល​រដ្ឋ​ប្រហែល​៥០០​គ្រួសារ ដោយ​មួយ​គ្រួសារ​បានទទួល​ថវិកា​ចំនួន​៤៣​ដុល្លារ​។ អង្គការ​ដដែល​បញ្ជាក់ថា​​ វា​នឹង​​ចំណាយ​ពេល​យូរ​បើ​សិនជាការ​​ផ្ដល់ជំនួយធ្វើ​ឡើង​ដោយ​ផ្ទាល់​ដៃ​។​​​

លោក ណុប ប៉ូលីន អ្នក​សម្រប​សម្រួល​កម្មវិធី​អង្គការ Dan Church Aid​ បានមាន​ប្រ​សាសន៍ថា​៖ «​ការ​ចុះ​ផ្ដល់​ជំនួយ​ដោយ​ផ្ទាល់​ស៊ីពេល​ច្រើន​ បើ​ប្រៀប​ធៀប​ទៅ​នឹង​ការផ្ដល់​តាម​រយៈ​សេវា​​​ផ្ទេរ​ប្រាក់​»។​

លោក​​បន្តថាការ​ប្រើ​ប្រ​ព័ន្ធ​បច្ចេកវិទ្យា​បាន​ជួយ​កាត់​បន្ថយ​ហានិភ័យ​បាន​ច្រើន ដូច​ជាលួចបន្លំ ឬ​ត្រូវ​បញ្ជូន​បុគ្គលិក​ទៅ​តាម​ខេត្ត​ដោយ​ផ្ទាល់​។​

បើ​តាម​របាយការណ៍​គណៈកម្មការធិការជាតិ​គ្រប់គ្រង​គ្រោះ​មហន្ត​រាយ​ ឲ្យដឹងថាទឹក​ជំនន់​ដែលបាន​កើត​ឡើង​កាលពីខែ​កញ្ញា និង​ខែ​តុលា បាន​ធ្វើ​ឲ្យ​មនុស្ស​ចំនួន​៣៦នាក់​ស្លាប់ និង​ប្រជា​ពល​រដ្ឋ​ជាង​១១ ០០០​គ្រួសារ​ទៀត​ត្រូវ​ជម្លៀសទៅ​រកទីទួល​សុវត្ថិ​ភាព។ ​

គ្រោះ​ធម្មជាតិ​នេះ​​ បាន​បំផ្លាញ​ផ្ទះ​ចំនួន​១០០ ០០០​ខ្នង និង​សាលារៀនចំនួន​៧០៧ខ្នង ក្នុង​ខេត្ត​ចំនួន​១៩។ ស្រែស្រូវ​​ប្រហែល​២៣០ ០០០​ហិកតា​ និង​​ដំណាំផ្សេងៗ​៨០ ០០០​ហិកតា​ផ្សេង​ទៀត​ត្រូវ​រង​ការខូច​ខាត​ដោយ​ទឹកជំនន់​នៅ​ក្នុង​ខេត្ត​បន្ទាយ​មានជ័យ បាត់​ដំបង ប៉ៃលិន ភ្នំពេញ និង​ពោធិ៍សាត់​។

អ្នក​ស្រី មិន វណ្ណី ដែលជា​អ្នក​បាន​ទទួល​ជំនួយ​មនុស្ស​ធម៌​តាម​រយៈការ​ផ្ទេរ​ប្រាក់​នេះ​ បាន​ឲ្យ​ដឹង​ថា​អ្នកស្រី​បាន​ទទួល​ប្រាក់ចំនួន​៤៣​ដុល្លារ ពី​អង្គការ​ទាំងពីរ ដែល​ចំនួន​នេះ​បាន​ជួយ​ទ្រ​ទ្រង់ជីវភាព​ប្រចាំ​ថ្ងៃ​។​

អ្នក​ស្រី​បន្តថា​៖ «​ខ្ញុំ​សប្បាយចិត្ត​ទោះវាជាចំនួនតិច​តួច​ តែ​វាបាន​ជួយ​ដោះស្រាយ​ជីវភាព​ខ្ញុំ​បាន​មួយ​រយៈ»។​

អ្នក​ស្រី វណ្ណី មាន​វ័យ​៣៤​ឆ្នាំ រស់នៅ​ក្នុង​ឃុំចែងមានជ័យ ស្រុក​បាណន់ ខេត្ត​បាត់​ដំបង។ អ្នក​ស្រី​មាន​​ស្រូវ​ និងពោត​ចំនួន​បួន​ហិកតា​រងការ​ខូច​ខាតដោយ​សារទឹក​ជំនន់​​។ អ្នកស្រីថា​​ នៅ​សង្ឃឹម​​អាច​​ប្រមូល​ផល​ស្រូវ​ដែល​នៅសេស​​សល់​ពីរ​ហិកតា​ទៀត​​នៅ​ពេល​ឆាប់ៗ​ខាង​មុខ ដែល​​​អាច​ផ្ដល់​ជា​ចំណូល​ខ្លះ​ដល់​អ្នកស្រី​។​

​អ្នក​ស្រី​ឲ្យ​ដឹង​ដែរថា អាជ្ញាធរ​មូល​ដ្ឋាន​បាន​ចុះ​ចែក​អំណោយ​ដល់​គ្រួសារ​រងគ្រោះ​ដោយ​ទឹក​ជំនន់ តែ​អ្នក​ស្រី​មិន​បាន​ទទួល​អំណោយ​នោះទេ ដោយថា​ពេល​នោះ​អ្នកស្រី​មិន​នៅ​ផ្ទះ​។​

លោក វឿន ឌិញ មេឃុំ​ចែងមានជ័យ មាន​ប្រ​សាសន៍​ថា​អង្គការ​សង្គម​ស៊ីវិល​បាន​នាំ​យកជំនួយ​មកជួយដល់​​គ្រួសារ​ក្រី​ក្រ។

 លោក​មានប្រសាសន៍ថា​៖ «​បាទ វាមាន​តម្លាភាព​ពេល​ប្រ​ជា​ពលរដ្ឋ​ទទួល​ប្រាក់ ព្រោះ​ពួកគេ​ទៅ​យក​​ដោយ​ខ្លួនឯង​នៅ​វីង»។​​

លោក​បន្ថែម​ថា​ប្រ​ជា​ពល​រដ្ឋ​ក្រី​ក្រជាងគេ​នៅ​តែ​ទទួល​បាន​បណ្ណក្រីក្រ​ ផ្ដល់​ប្រាក់​ដោយ​រដ្ឋាភិបាល ហើយថា​អាជ្ញា​បាន​ធ្វើ​ការ​ជាមួយ​អ្នក​នៅ​មូល​ដ្ឋាន​ដើម្បី​កំណត់អត្តសញ្ញាណ​គ្រួសារ​ងាយ​រងគ្រោះ​។​

លោក ឃុន សុខា អ្នកនាំពាក្យ​គណៈកម្មាធិការជាតិគ្រប់គ្រង​គ្រោះ​មហន្តរាយ បដិសេធធ្វើអត្ថាធិប្បាយ ដោយ​ថា​លោក​មិនបាន​អាន​របាយការណ៍​ និង​តួលេខ​ទឹកជំនន់​ចុងក្រោយ។

ប្រែសម្រួលពីអត្ថបទភាសាអង់គ្លេស៖ CamboJA News

26 views
Share on facebook
Share on twitter
Share on linkedin
Share on telegram
Share on whatsapp
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »