កញ្ញា ឈឹម ស៊ីថរ មេដឹកនាំសហជីពណាហ្គាវើលដ៍ត្រូវបានតុលាការសម្រេចឃុំខ្លួន ពាក់ព័ន្ធ នឹងការមិនគោរពតាមលក្ខខណ្ឌដែលដាក់ឱ្យស្ថិតនៅក្រោមសមត្ថកិច្ចតុលាការកាលពីព្រឹកថ្ងៃទី២៦ ខែវិច្ឆិកា ឆ្នាំ២០២២ បន្ទាប់ពីគាត់ត្រូវបានសមត្ថកិច្ចប៉ូលិសអន្តោប្រវេសន៍ឃាត់ខ្លួន ខណៈកញ្ញាត្រឡប់មកពី ប្រទេសអូស្រ្តាលី។ យោងតាមអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ។
លោក អ៊ី រិន្ទ បានមានប្រសាសន៍ថា ចៅក្រមស៊ើបសួរសាលាដំបូងរាជធានីភ្នំពេញបានសម្រេចឃុំខ្លួន កញ្ញា ឈឹម ស៊ីថរ ពាក់ព័ន្ធនឹងកញ្ញាមិនបានគោរពតាមលក្ខខណ្ឌដែលដាក់ឱ្យស្ថិតនៅក្រោមសមត្ថកិច្ចតុលាការ។
លោក អ៊ី រិន្ទ បានបញ្ជាក់ថា៖ «ចៅក្រមស៊ើបសួរបានសម្រេចឃុំខ្លួនគាត់ ដោយសារគាត់មិនគោរពលក្ខខណ្ឌដែលដាក់ឱ្យស្ថិតនៅក្រោមតុលាការ ហើយបានបញ្ជូនទៅឃុំខ្លួនម២ហើយ»។
បើតាមលោក អំ សំអាត នាយកចាត់ការទូទៅនៃអង្គការ លីកាដូ បានឱ្យដឹងថា សមត្ថកិច្ចផ្នែកអន្តោប្រវេសន៍បានធ្វើការឃាត់ខ្លួន កញ្ញា ឈឹម ស៊ីថរ នៅព្រលានយន្តហោះអន្តរជាតិភ្នំពេញ បន្ទាប់ពីរូបនាងត្រឡប់មកពីក្រៅប្រទេសនៅព្រឹកថ្ងៃសៅរ៍ យោងតាមដីការរបស់តុលាការ។
លោកសំអាត បន្តថា ការឃាត់ខ្លួននេះ មិនទាន់ដឹងច្បាស់ពីមូលហេតុអ្វីឡើយ ហើយមេធាវីអង្គការ លីការដូ បានទៅដល់ព្រលានយន្តហោះអន្តរជាតិភ្នំពេញហើយដើម្បីតាមដានករណីនេះ ប៉ុន្តែសមត្ថកិច្ចមិនអនុញ្ញាតឱ្យជួបកញ្ញា ឈឹម ស៊ីថរ ឡើយ។
លោក សំអាត ថ្លែងថា៖ «នៅពេលដែល ស៊ីថរ គាត់ទាក់ទងមិត្តភក្ភិបាន គាត់ប្រាប់ថា ប៉ូលិសឃាត់ខ្លួនដោយមានដីការពីតុលាការ»។
លោក សំអាត ចាត់ទុកថា ការឃាត់ខ្លួនមេដឹកសហជីព គឺ កញ្ញា ឈឹម ស៊ីថរ ជាការគំរាម និងបំភិតបំភ័យស្មារតីទៅដល់សហជីព ព្រមទាំងអតីតបុគ្គលិកនៃក្រុមហ៊ុនណាហ្គាវើលដ៍ ដែលកំពុងបន្តធ្វើកូដកម្មសព្វថ្ងៃនេះ។
លោកបានបន្ថែមថា៖ «ខ្ញុំគិតថាការចាប់ខ្លួននេះជាការគំរាមកំហែងបន្ថែមទៀត ទៅលើមេដឹកនាំសហជីព ហើយទីពីរគឺការបំបាក់ស្មារតីទៅលើក្រុមកូដករ»។
ចំណែកលោក កែវ វណ្ណថន អ្នកនាំពាក្យអគ្គនាយកដ្ឋានអន្តោប្រវេសន៍ បានទទួលទូរសព្ទ ដោយអះអាងថា លោកមិនទាន់ទទួលបានព័ត៌មានលម្អិតអំពីករណីនេះនៅឡើយទេ។
លោកវណ្ណថន ថ្លែងថា៖ «ខ្ញុំអត់ទាន់ទទួលបានសេចក្ដីរាយការណ៍ហ្នឹង ខ្ញុំអត់ទាន់ទទួលបានរបាយការណ៍ ចឹងខ្ញុំសូមឆែកមើលបន្តិច»។
ខេមបូចា មិនអាចសុំការអត្ថាធិប្បាយបានពីលោក សាន សុខសីហា អ្នកនាំពាក្យស្នងការរាជធានីភ្នំពេញ។
គួរជម្រាបថា កញ្ញា ឈឹម ស៊ីថរ ត្រូវបានសមត្ថកិច្ចចាប់ខ្លួននៅកន្លែងតវ៉ាក្បែរស្ថានទូតអូស្រ្តាលីកាលពីថ្ងៃទី៤ ខែមករា ឆ្នាំ២០២២ ហើយត្រូវបានតុលាការចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ» តាមមាត្រា៤៩៤ និង៤៩៥ នៃក្រមព្រហ្មទណ្ឌកម្ពុជា ខណៈពេលថ្មីៗនេះអតីតបុគ្គលិកប្រាំពីរនាក់ផ្សេងទៀត ក៏ទទួលរងបណ្ដឹងពីក្រុមហ៊ុនណាហ្គាវើលដ៍ផងដែរ ពីបទរំលោភលំនៅឋាន ធ្វើឱ្យខូចខាតដោយចេតនាមានស្ថានទម្ងន់ទោស និងចាប់ឃុំឃាំង និងបង្ខាំងដោយខុសច្បាប់៕
