មនុស្សមួយចំនួន លែងហ៊ានទៅរកសេវាព្យាបាលជំងឺ បន្ទាប់ពីបណ្ណមូនិធិសមធម៌របស់ខ្លួនហួសកំណត់

អ្នកធ្វើការងារតាមផ្ទះ អ្នកស្រី ឃុន សុវណ្ណនី លើកបង្ហាញបណ្ណមូលនិធិសមធម៌សុខាភិបាលដែលអស់សុពលភាពប្រើប្រាស់ កាលពីថ្ងៃទី០៧ខែកុម្ភៈ ឆ្នាំ២០២១។ វណ្ណ វិចារ
អ្នកធ្វើការងារតាមផ្ទះ អ្នកស្រី ឃុន សុវណ្ណនី លើកបង្ហាញបណ្ណមូលនិធិសមធម៌សុខាភិបាលដែលអស់សុពលភាពប្រើប្រាស់ កាលពីថ្ងៃទី០៧ខែកុម្ភ: ឆ្នាំ២០២១។ វណ្ណ វិចារ

មនុស្សជាង២០០នាក់ បានជួបជុំគ្នាក្នុង​ភោជនីយដ្ឋាន​មួយកន្លែង​នាខណ្ឌច្បារអំពៅ រាជធានីភ្នំពេញ​កាលពីចុងសប្តាហ៍មុន រួមមាន អ្នករត់ម៉ូតូឌុប អ្នកបើករ៉ឺម៉កកង់បី​ អ្នករើសអេតចាយ អ្នកធ្វើការតាមផ្ទះ និងអ្នកសេដ្ឋកិច្ចក្រៅប្រព័ន្ធផ្សេងទៀត។ វាជាការជួបជុំ​ប្រចាំឆ្នាំ​របស់សមាជិក​នៃសមា​គមប្រជាធិប​តេយ្យឯករាជ្យ​នៃសេដ្ឋកិច្ចក្រៅប្រព័ន្ធ។

សមាជិកទាំងអស់​បានជជែកគ្នាយ៉ាងផុសផុល​អំពីបញ្ហា​ប្រឈមផ្សេងៗ​របស់គាត់ ប៉ុន្តែបញ្ហា​ដែលចម្បងរបស់ពួកគាត់​ក្នុងពេលនេះ​គឺការទទួល​សេវាសុខភាព​ដោយពុំគិតថ្លៃ។

មានទឹកមុខក្រៀមក្រំ ពាក់អាវសដៃខ្លី សំពត់បត់ ពាក់ស្បែកជើងផ្ទាត់និងអង្គុយកៅអីមុខគេ ព្រមទាំងកាន់បណ្ណមួយអស់សុពលភាពផងនោះ  គឺអ្នកធ្វើការតាមផ្ទះវ័យ៦១ឆ្នាំ អ្នកស្រី ឃុន សុវណ្ណនី។ អ្នកស្រី ឱ្យដឹងថា អ្នកស្រីមកជួបជុំប្រចាំឆ្នាំលើកនេះ មានបំណងស្វែងរកមតិរួមគ្នា ដើម្បី​ទាមទារឱ្យរដ្ឋាភិបាលបន្តសុពលភាពបណ្ណមូនិធិសមធម៌សុខាភិបាល។

អ្នកស្រី សុវណ្ណនី និយាយថា៖«ខ្ញុំចង់បានបណ្ណសុខភាព(បណ្ណមូនិធិសមធម៌សុខាភិបាល)ថ្មីព្រោះបណ្ណនេះប្រើលែងកើត ខ្ញុំលែងហ៊ានទៅពេទ្យហើយ »។

សមាជិកសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធចំនួនជាង៤ពាន់នាក់ កំពុងកាន់បណ្ណមូនិធិសមធម៌សុខាភិបាលផុតកំណត់ដូចៗគ្នាទាំងអស់ ដែលជាហេតុធ្វើឱ្យពួកគាត់មិនអាចប្រើប្រាស់​​សេវា​សុខា​​ភិបាលឥតបង់ថ្លៃដូចពេលមុន។

អ្នកស្រី ឃុន សុវណ្ណនី សព្វថ្ងៃជាស្ត្រីម៉េម៉ាយ រស់នៅជាមួយចៅស្រីម្នាក់អាយុ១៥ឆ្នាំ។ អ្នកស្រីត្រូវរ៉ាប់រងការចំណាយហូបចុកប្រចាំថ្ងៃនិងការសិក្សារបស់ចៅ ចាប់តាំងពីកូនប្រុសនិងកូនប្រសាររបស់គាត់បានបាត់បង់អាយុជីវិតដោយ សារគ្រោះថ្នាក់ចរាចរណ៍កាលពី៥ឆ្នាំមុន។ អ្នកស្រីឱ្យដឹងថា ប្រាក់ចំណូលរបស់គាត់ បានធ្លាក់ចុះ ចាប់តាំងពីផ្ទុះជំងឺកូវីដ១៩មក។

អ្នកស្រីឃុន វណ្ណនី ឲ្យដឹងថា៖ «មុនកូវីដខ្ញុំធ្វើចុងភៅនៅផ្ទះបារាំងមានប្រាក់ខែ៣៥០ដុល្លារ ដល់មានកូវីដ១៩ថៅកែមុនទៅវិញបាត់ ខ្ញុំត្រូវមកធ្វើការនៅផ្ទះខ្មែរយើងវិញបានប្រាក់ខែតែ២០០ដុល្លារទេ។

អ្នកស្រី ឃុន សុវណ្ណនី បន្ថែមថា អ្នកស្រីបានប្រើប្រាស់បណ្ណសមធម៌​សុខា​ភិ​បាល តាំងពីឆ្នាំ២០១៩មក​ តែបណ្ណរបស់គាត់អស់​សុពលភាពកាលពី​ចុងវិច្ឆកា​ឆ្នាំ២០២០។ អ្នកស្រីបន្តថា គាត់មិនមានប្រាក់បង់ថ្លៃពេទ្យនោះទេ ​នៅពេលឈឺថ្កាត់ម្ដងៗ ។

អ្នកស្រី ឃុន សុវណ្ណនី មានប្រសាសន៍ថា៖ « កាលឆ្នាំមុន មីងឈឺឡើងឈាម និងឈឺក្រពះ ទៅដេកពេទ្យអង្គឌួង៤យប់ យកថ្នាំមកលេប១អាទិត្យអត់អស់លុយទេ អីចឹងធូរច្រើនណាស់។ ដល់ប៉ុន្មានខែក្រោយមកទៀត ខ្ញុំអត់ស្រួលទៀតទៅពេទ្យដដែលពេទ្យប្រាប់ថា បណ្ណមីងប្រើលែងកើត ខ្ញុំក៏ចេញពីពេទ្យមកវិញអត់ព្យាបាលទេ ព្រោះអត់លុយឱ្យពេទ្យ»

អ្នកធ្វើការងារតាមផ្ទះម្នាក់ទៀត អាយុ៤២ឆ្នាំ អ្នកស្រី​ ចាន់ ស៊ីណេន មាន​ប្រសា​ស​ន៍ថា បណ្ណមូលនិធិសមធម៌សុខាភិបាល ដែលអ្នកស្រីកាន់ក្នុងដៃអស់សុពល​ភាពតាំងពីខែកក្កដាឆ្នាំ២០២០។ អ្នកស្រីបារម្ភខ្លាចធ្លាក់ខ្លួនឈឺចំ​ពេលដែលមិនមានប្រាក់និងគ្មានបណ្ណមូលនិធិសមធម៌នៅក្នុងដៃ។

អ្នកស្រី ចាន់ ស៊ីណេន៖« ខ្ញុំ ពេលនេះពួកខ្ញុំព្រួយចិត្តខ្លាចឈឺ ខ្លាចអត់មានលុយចូលពេទ្យស្លាប់អត់អ្នកចិញ្ចឹមកូន»។

សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ឱ្យដឹងថា ថាសមាជិកសមាគមនេះនិងអ្នករកស៊ីក្រៅប្រព័ន្ធដែលមិនមែនជាសមាជិកសមាគមសរុបចំនួនជាង៦ម៉ឺននាក់ បានទទួលបណ្ណមូលនិធិសមធម៌នេះតាំងពីដើមឆ្នាំ២០១៨។

អ្នកលក់បន្លែអង្គុយលក់នៅលើចិញ្ចើមផ្លូវ នៅជាយក្រុងភ្នំពេញ កាលពីថ្ងៃទី១១ ខែកម្ភៈ។ ព្រីង សំរាំង
អ្នកលក់បន្លែអង្គុយលក់នៅលើចិញ្ចើមផ្លូវ នៅជាយក្រុងភ្នំពេញ កាលពីថ្ងៃទី១១ ខែកុម្ភៈ។ ព្រីង សំរាំង

ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅអះអាងថា អ្នករកស៊ីរបរក្រៅប្រព័ន្ធមួយចំនួនធំ មិនទាន់អាចបន្តសុពលភាព

បណ្ណមូលនិធិសមធម៌នេះបាននៅឡើយ​ ដែលធ្វើឲ្យលោកមានការព្រួយបារម្ភដល់ពួកគេក្នុងការទទួលសេវាដោយពុំគិតថ្លៃ។   

លោក វន់ ពៅ ៖« ខ្ញុំបានទទួលបណ្ដឹងនិងសំណូមពរច្រើនណាស់ លើបញ្ហាបណ្ណមូលនិធិសមធម៌សុខាភិបាលនេះ។ ពួកយើង បានជួបតំណាងក្រសួងការងារដែរ តែតំណាងក្រសួងប្រាប់ខ្ញុំវិញថា ឥឡូវនេះរាជរដ្ឋាភិបាលមិនមានលទ្ធភាព គេប្រាប់ខ្ញុំផ្ទាល់មាត់ថាកន្លងទៅគេផ្ដល់បណ្ណសមធម៌ឱ្យច្រឡំប៉ុណ្ណោះ។

អ្នកនាំពាក្យក្រសួងសង្គមកិច្ច លោកតូច ចាន់នី មានប្រសាសន៍ថា ក្រសួងរបស់​លោកមិនមានដែនសមកិច្ចផ្ដល់បណ្ណមូលនិធិសមធម៌ជូនអ្នករកស៊ីក្រៅប្រព័ន្ធ​នោះទេ។

លោក តូច ចាន់នី៖«ខាងក្រសួងការងារជាអ្នកធ្វើរឿងនេះ សូមប្អូនទាក់ទងក្រសួងការងារ»

ចំណែកឯអ្នកនាំពាក្យក្រសួងការងារ លោក ហេង សួរ មិនធ្វើអត្ថាធិប្បាយតប​ចំពោះ​បញ្ហាទាំងនេះឡើយ។

 លោក ហេង​សួរ គ្រាន់តែសរសេរក្នុងបណ្តាញសង្គមតេឡេក្រាមថា៖«​ សេចក្ដីណែរនាំរបស់រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ  ដែលបានណែនាំដល់ប្រធាន សមាគមឬអង្គការវិជ្ជាជីវៈ ស្ដីពីនិតិវិធីនៃការចុះបញ្ជីចុះបញ្ជីកម្មករនិយោជិតក្រៅប្រព័ន្ធក្នុងបេឡាជាតិរបបសន្តិសង្គម ដើម្បីទទួលបានបណ្ណមូលនិធិសមធម៌សុខាភិបាល»។

សេចក្ដីណែនាំនោះបញ្ជាក់ថា ដើម្បីចុះបញ្ជីកម្មករនិយោជិតក្រៅប្រព័ន្ធក្នុងបេឡាជាតិរបបសន្តិសង្គម តម្រូវឱ្យសមាគមត្រូវមានអាជ្ញាបណ្ណ​ទទួលស្គាល់​ដោយ​​ក្រសួងមហាផ្ទៃ ខណៈដែលកម្មករនិយោជិតក្រៅប្រព័ន្ធដែលជាសមាជិក​សមាគមត្រូវមានអត្តសញ្ញាណបណ្ណសញ្ជាតិខ្មែរ ​លិខិតបញ្ជាក់អំពីមុខរបរ និង​ទីលំនៅ ដែលចេញដោយអាជ្ញាធររាជធានីខេត្តតាមនិតិវិធី។

លោក វន់ ពៅ លើកឡើងថា  និតិវិធីស្មុគស្មាញជាឧបសគ្គ ដែលរារាំងមិនឱ្យសមាគមរបស់ លោក សុំបន្តសុពលភាពបណ្ណមូលនិធិសមធម៌សុខាភិបាល ដើម្បីផ្ដល់ជូនសមាជិកបាន។

លោក វន់ ពៅ៖ «ពួកយើងទៅទាក់ទងក្រសួងការងារ គេប្រាប់ឱ្យទៅខាងសង្គមកិច្ច ខាងសង្គមកិច្ចគេថាជាកិច្ចការក្រសួងការងារ។ ពួកយើងទាមទារឱ្យរាជរដ្ឋាភិបាល សម្រួលធ្វើបណ្ណមូលនិធិសមធម៌ជូនកម្មករក្រៅប្រព័ន្ធឡើងវិញ »

ការផ្ដល់បណ្ណ​សម​ធម៌ ជូនកម្មករនិយោជិត​ក្រៅប្រព័ន្ធនិងផ្ដល់ប្រាក់​ឧបត្ថមជូន​ស្ត្រីសម្រាលកូន ជាការអនុវត្តន៍តាម​ប្រសាសន៍​​របស់​មេ​បក្ស​កាន់អំណាច លោក​នាយករដ្ឋមន្ត្រី ហ៊ុន សែន កាលពីខែសីហាឆ្នាំ២០១៧ ​និងសារនយោបាយដែលគណបក្សប្រជាជនកម្ពុជា​យកទៅឃោសនារកសម្លេងឆ្នោតកាលពីឆ្នាំ២០១៨។

ដំណើរការផ្ដល់បណ្ណមូលនិធិសមធម៌ជូនកម្មករនិយោជិតក្រៅប្រព័ន្ធនេះត្រូវបានប្រកាសរួមគ្នា ដោយក្រសួងការងារនិងបណ្ដុះបណ្ដាលវិជ្ជាជីវៈ  ក្រសួងសេដ្ឋកិច្ចនិងហិរញ្ញវត្ថុ ​ក្រសួង​សុខា​ភិបាល  កាលពី១១ខែតុលាឆ្នាំ២០០៧ គឺរយៈពេលជាង១ខែមុនថ្ងៃដែលតុលាការកំពូលរំលាយគណបក្សសង្គ្រោះជាតិ។

នាយកវិទ្យាស្ថានតស៊ូមតិ និងគោលនយោបាយកម្ពុជា(API) លោក ឡាំ សុជាតិ មានប្រសាសន៍ថា ស្ថាប័នរដ្ឋមិនត្រូវប្រើប្រាស់និវិធីស្មុគស្មាញជាងមុន  ចំពោះដំណើរការស្នើសុំបន្តសុពលភាពប័ណ្ណមូលនិធិសមធម៌សុខាភិបាលនោះទេ។

លោក ឡាំ សុជាតិ ៖«ពលរដ្ឋ(អ្នករកស៊ីក្រៅប្រព័ន្ធ) ធ្លាប់បានទទួលបណ្ណហើយអត់បានវិញ អាហ្នឹងមិនបានន័យថារដ្ឋាភិបាលបោកពួកគាត់? មុនបោះឆ្នោតរដ្ឋាភិបាលផ្ដល់បណ្ណនេះដល់ពួកគាត់  លើកទឹកចិត្តគាត់(អ្នករកស៊ីក្រៅប្រព័ន្ធ)។  ពួកគាត់គាំទ្រសប្បាយចិត្តដល់តែជាប់ឆ្នោតហើយបញ្ឈប់លែងឱ្យបណ្ណទៅគាត់ រដ្ឋយកនិតិវិធីលម្អិតមកដាក់កម្រិតពលរដ្ឋវិញ ដូច្នេះប្រជាពលរដ្ឋច្បាស់ជា មិនពេញចិត្តទេ»

ប្រកាសអន្តរក្រសួងកាលពីឆ្នាំ២០១៧ បង្ហាញថា អ្នកកាន់បណ្ណមូលនិធិសមធម៌សុខាភិបាល បានទទួលសេវាសុខភាពពីមន្ទីរពេទ្យរដ្ឋឬគ្រឹះស្ថានសុខាភិបាលសាធារណៈ ដោយមានរាជរដ្ឋាភិបាលជាអ្នកបង់ថ្លៃជំនួស  ។

អ្នកស្រី សុវណ្ណនី បន្តថាក្រសួងពាក់ព័ន្ធគួរពិនិត្យលទ្ធភាពឡើងវិញក្នុងការផ្តល់សុពលភាពបណ្ណសមធម៌នេះ ដើម្បីផ្តល់ក្តីសង្ឃឹមដល់អ្នកក្រីក្រ និងអ្នកសេដ្ឋកិច្ចក្រៅប្រព័ន្ធ។

អ្នកស្រី ឃុន សុវណ្ណនីបន្ថែមថា៖«សព្វថ្ងៃព្រួយណាស់ព្រួយខ្លាចឈឺភ្លាមៗទៅ មិនដឹងមានអីមើលជំងឺទេ ។ ខ្ញុំគិតថារដ្ឋាភិបាលមានតួនាទីជាអ្នកជួយ​ពួកយើង ដូច្នេះគួរតែធ្វើបណ្ណនេះឱ្យខ្ញុំវិញ »៕

766 views
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »