បន្ទាប់ពីជួបប្រទះការលំបាកនិងភាពមិនច្បាស់លាស់ជាច្រើន អំឡុងពេលមានការរីករាលដាលនៃជំងឺកូវីដ-១៩ សិស្សថ្នាក់ទី១២ បានចាប់ផ្តើមត្រៀមខ្លួនសម្រាប់ការប្រឡងបញ្ចប់ឆ្នាំសិក្សា ដែលគ្រោងធ្វើនៅថ្ងៃទី២៧ ខែធ្នូ។
ក្រសួងអប់រំ យុវជន និងកីឡា បានឲ្យដឹងថា ខ្លួននឹងរៀបចំការប្រឡងបាក់ឌុបនៅទូទាំង ប្រទេស ខណៈដែលស្ថានភាពជំងឺកូវីដ-១៩ មានលំនឹង ហើយយុទ្ធនាការចាក់វ៉ាក់សាំង ត្រូវបានបញ្ចប់ដោយជោគជ័យ។ គិតត្រឹមថ្ងៃទី២១ ខែវិច្ឆិកា អត្រាចាក់វ៉ាក់សាំងបានកើនដល់៨៨,០៧ភាគរយនៃប្រជាពលរដ្ឋកម្ពុជាចំនួន១៦ លាននាក់។
ង៉ោ ពេជ្រមរកត សិស្សថ្នាក់ទី១២ នៃវិទ្យាល័យបាក់ទូកបាននឹងកំពុងសិក្សាយ៉ាងសកម្ម សម្រាប់ការប្រឡងបញ្ចប់ឆ្នាំសិក្សា។ ការត្រៀមខ្លួននេះ គឺពិតជាមានការលំបាក ប៉ុន្តែនាងព្យាយាមជម្នះភាពភ័យខ្លាចនិងកង្វះទំនុកចិត្តលើខ្លួនឯង។
យុវសិស្ស ពេជ្រមរកត បាននិយាយថា៖ «យើងបានចំណាយពេលច្រើនណាស់ក្នុងការរៀនតាមអនឡាញ មុនពេលប្តូរមករៀនក្នុងថ្នាក់ដោយផ្ទាល់។ ហើយនោះគឺជាបញ្ហា។ យើងមិនទាន់ត្រៀមខ្លួនរួចរាល់ ដើម្បីប្រឡងថ្នាក់ជាតិនោះទេ»។
យុវសិស្ស ពេជ្រមរកត បានប្រាប់ខេមបូចាថា បន្ទាប់ពីមានបញ្ហាប្រឈមដែលនាងបានជួបប្រទះ អំឡុងពេលរៀនតាមអនឡាញ នាងបានចូលរៀនគួរបន្ថែម ដើម្បីរៀនឡើងវិញនូវអ្វីដែលនាងខកខានមិនបានរៀន និងបំពេញបន្ថែមចំណុចខ្សោយរបស់នាងក្នុងមុខវិជ្ជានីមួយៗ។
យុវសិស្ស ពេជ្រមរកត បានឲ្យដឹងថា៖ «មិត្តភ័ក្តិខ្ញុំនិងខ្ញុំរវល់ខ្លាំងណាស់ក្នុងការត្រៀមខ្លួន ដើម្បីធ្វើឲ្យប្រាកដថា យើងមានសមត្ថភាពគ្រប់គ្រាន់សម្រាប់ការប្រឡងនាពេលខាងមុខ។ ពេលនេះ ខ្ញុំកំពុងរៀនគួរបន្ថែមប្រាំមួយមុខវិជ្ជាក្នុងចំណោមមុខវិជ្ជាចំនួនប្រាំមួយផ្សេងគ្នា។ វាជួយខ្ញុំបានច្រើន ជាពិសេសលើអ្វីដែលខ្ញុំខកខានមិនបានរៀន អំឡុងពេលរៀនតាមអនឡាញ»។
ថ្លែងក្នុងពិធីបើកយុទ្ធនាការចាក់វ៉ាក់សាំងដល់កុមារអាយុ៥ឆ្នាំ កាលពីដើមខែនេះ លោកនាយករដ្ឋមន្ត្រី ហ៊ុន សែន បានបញ្ជាឲ្យក្រសួងអប់រំរៀបចំការប្រឡងថ្នាក់ទី១២។ លោកបានមានប្រសាសន៍ថា សិស្សមិនគួរត្រូវបានអនុញ្ញាតឲ្យជាប់ដោយស្វ័យប្រវត្តិនោះទេ ព្រោះវាអាចប៉ះពាល់ដល់ការអភិវឌ្ឍធនធានមនុស្សក្នុងរយៈពេលវែង។
លោកនាយករដ្ឋមន្ត្រី ហ៊ុន សែន បានមានប្រសាសន៍ថា៖ «ខ្ញុំដឹងថា ពួកគេមិនបានរៀនគ្រប់គ្រាន់ដោយសារជំងឺកូវីដ-១៩ ដូច្នេះពួកគេគួរតែព្យាយាមឲ្យអស់ពីសមត្ថភាព ដើម្បីបានជាប់។ បើប្រឡងមិនជាប់ទេ ពួកគេអាចព្យាយាមប្រឡងម្ដងទៀតនៅឆ្នាំក្រោយ»។
រិន សូយ៉ារី សិស្សថ្នាក់ទី១២ នៃវិទ្យាល័យ ហេង សំរិន ក្នុងខេត្តកំពង់ចាម បានប្រាប់ខេមបូចាថា អាចទទួលយកបានការឲ្យសិស្សប្រឡងថ្នាក់ជាតិ ព្រោះពួកគេមានពេលគ្រប់គ្រាន់ត្រឡប់ចូលរៀនវិញ ដើម្បីតាមឲ្យទាន់មេរៀនដែលខកខានមិនបានសិក្សា។
សូយ៉ារី បាននិយាយថា៖ «ខ្ញុំខ្លួនឯងគិតថា វាសមល្មមហើយសម្រាប់យើងក្នុងនាមជាសិស្សថ្នាក់ទី១២ ដែលត្រូវប្រឡងនៅចុងឆ្នាំនេះ។ ដោយសារយើងត្រូវបានអនុញ្ញាតឲ្យត្រឡប់ចូលរៀនវិញមុនសិស្សផ្សេងទៀត ហើយខ្ញុំគិតថា យើងមានពេលគ្រប់គ្រាន់ ដើម្បីពង្រឹងសមត្ថភាពរបស់យើង»។
សូយ៉ារី បានបន្តថា នាងចំណាយពេល៥ម៉ោងក្នុងមួយថ្ងៃសម្រាប់ថ្នាក់ក្រៅម៉ោង ដែលនាងនិយាយថា ជារឿងធម្មតាក្នុងចំណោមមិត្តរួមថ្នាក់របស់នាង។ នាងបាននិយាយថា រៀនគួរក្រៅម៉ោងត្រូវបានចាត់ទុកថា ជាមធ្យោបាយដ៏មានប្រសិទ្ធភាពមួយក្នុងការបង្កើនសមត្ថភាពរបស់សិស្ស ហើយការរៀនគួរកាន់តែមានសារៈសំខាន់ អំឡុងពេលមានរីករាលដាលជំងឺកូវីដ-១៩ ដោយសារសិស្សមិនអាចទៅរៀនបាន។
សូយ៉ារី បាននិយាយថា៖ «ខ្ញុំមិនចង់ជាប់ដោយស្វ័យប្រវត្តិដូចដែលយើងឃើញកាលឆ្នាំមុនទេ ប៉ុន្តែខ្ញុំសង្ឃឹមថា ក្រសួងនឹងធ្វើឲ្យការប្រឡងងាយស្រួលជាងមុនបន្តិច ដើម្បីឲ្យស្របតាមការយល់ដឹងរបស់សិស្ស»។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាបានប្រាប់ខេមបូចាថា ក្រសួងកំណត់កាលបរិច្ឆេទប្រឡងនៅថ្ងៃទី២៧ ខែធ្នូ ដើម្បីផ្តល់ពេលវេលាបន្ថែមដល់សិស្ស។
លោក សុវាចា មានប្រសាសន៍ថា៖ «ការប្រឡងថ្នាក់ជាតិត្រូវតែបន្តអនុវត្តតាមគោលការណ៍ច្បាប់ យុត្តិធម៌ តម្លាភាព និងលទ្ធផលដែលអាចទទួលយកបាន ស្របតាមវិធានការសុវត្ថិភាព សុខភាព»។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យបានប្រាប់ខេមបូចាថា ដោយសារការរីករាលដាលជំងឺកូវីដ-១៩ ការសិក្សារបស់សិស្សថ្នាក់ទី១២មានភាពរអាក់រអួល។ ទោះបីជាពួកគេអាចសិក្សាតាមអនឡាញក៏ដោយក៏សិស្ស ជាពិសេសអ្នកដែលរស់នៅក្នុងតំបន់ជនបទ មិនអាចប្រើប្រាស់ប្រព័ន្ធនេះបានទេ ដោយសារកង្វះខាតសម្ភារ និងបណ្តាញអ៊ីនធឺណិតមិនស្ថិតស្ថេរ។
លោកស្រី ឆាយ៉ាវី មានប្រសាសន៍ថា៖ «ពួកគេ [សិស្ស] បានប្រឈមមុខនឹងការលំបាកផ្សេងៗគ្នាដែលបណ្តាលមកពីការរីករាលដាលជំងឺកូវីដ-១៩ ហើយផ្អែកលើអ្វីដែលខ្ញុំបានសង្កេត ខ្ញុំអាចនិយាយបានថា មិនមានសិស្សច្រើនទេដែលនឹងប្រឡងជាប់នៅឆ្នាំនេះ»៕
ប្រែសម្រួលពីអត្ថបទភាសាអង់គ្លេស៖ With grade 12 exam date set, students furiously studying
