សមាគមសម្ព័ន្ធអ្នកសារព័ត៌មានកម្ពុជា

កម្ពុជាចាប់ផ្ដើមយុទ្ធនាការចាក់វ៉ាក់សាំងបង្ការកូវីដ-១៩ របស់ចិនដល់កុមារអាយុប្រាំមួយឆ្នាំ

កុមារអាយុចន្លោះពី៦ទៅ១២ឆ្នាំទទួលវ៉ាក់សាំងបង្ការកូវីដ-១៩ ដូសទី១ប្រភេទស៊ីណូវ៉ាក់ នៅរាជធានីភ្នំពេញ ថ្ងៃទី១៧ ខែកញ្ញា ឆ្នាំ២០២១។ ខេមបូចា/ ព្រីង សំរាំង
កុមារអាយុចន្លោះពី៦ទៅ១២ឆ្នាំទទួលវ៉ាក់សាំងបង្ការកូវីដ-១៩ ដូសទី១ប្រភេទស៊ីណូវ៉ាក់ នៅរាជធានីភ្នំពេញ ថ្ងៃទី១៧ ខែកញ្ញា ឆ្នាំ២០២១។ ខេមបូចា/ ព្រីង សំរាំង

កម្ពុជា​ចាប់​​ផ្ដើម​យុទ្ធនាការ​ចាក់​វ៉ាក់សាំងបង្ការ​កូវីដ១៩ ប្រភេទ​ស៊ីណូវ៉ាក់ (Sinovac)របស់​ចិន​​ដល់​កុមារ​អាយុ​ប្រាំមួយ​ឆ្នាំ ទោះ​បី​ជាក់​ស្តែង​វ៉ាក់សាំង​បង្ការ​កូវីដ១៩នេះ មិន​ទាន់​មាន​ការ​អនុញ្ញាត​ពី​អង្គការ​សុខ​ភាព​ពិភព​លោក​ឲ្យ​ចាក់​លើ​កុមារ​អាយុ​ក្រោម​១២​ឆ្នាំ​ក្ដី​។ ជំហានបន្ទាប់ រដ្ឋាភិបាក៏មានគម្រោងចាក់វ៉ាក់សាំងលើកុមារចាប់ពីអាយុបីឆ្នាំឡើងទៅ។

លោក​នាយក​រដ្ឋ​មន្ត្រី​ ហ៊ុន សែន​ ដែល​បាន​នាំចៅៗ​ទៅ​ចាក់​វ៉ាក់សាំង​នៅ​ថ្ងៃដំបូង​នៅ​វិមាន​សន្ដិភាព​ដែរ​នោះ មាន​ប្រ​សាសន៍​ថា ការ​ចាក់​វ៉ាក់សាំង​ដល់​កុមារ​អាយុ​ចន្លោះ​ពី​ប្រាំមួយ​ឆ្នាំដល់​១២​ឆ្នាំ គឺជា​ការ​ស្ម័គ្រ​ចិត្តសុទ្ធសាធ។​

លោក​​មាន​ប្រសាសន៍​ទៀត​ថា ប្រ​ទេស​ជាច្រើន​បាន​ចាក់​បែប​នេះរួច​ហើយ រួមមាន​ប្រទេស​ចិន គុយបា ប្រទេស​អារ៉ាប់​រួម ប៉េរ៉ូ អាល្លឺម៉ង់ និង​បារ៉ែន​ ខណៈ​សហរដេ្ឋអាមេរិក និង​អ៊ីស្រាអ៊ែល លោក​ថា​កំពុង​រៀប​ចំ​សិក្សា​ពី​ផល​ប៉ះពាល់​របស់​វ៉ាក់សាំង​បង្ការ​កូវីដ១៩ លើ​កុមារ។​

លោក​មានប្រសាសន៍​ថា៖ «ចឹង​យើង​ត្រូវ​បោះជំហាន​ទៅមុន​ការ​ពារ​កុមារ​របស់​យើង​ ដើម្បី​ឲ្យពួក​គេ​ទទួលបាន​ការថែទាំង​សុខភាព​ និង​ឲ្យពួក​គេបាន​ចូលសាលា ​ដោយ​មានសុវត្ថិភាព​ទាំង​គ្រូ ទាំងសិស្ស​នៅ​បឋមសិក្សា​»​។

បើ​តាម​លោក​នាយក​រដ្ឋមន្ត្រី ហ៊ុន សែន កុមារ​អាយុ​ចន្លោះពី​ប្រាំមួយ​ទៅ​១២​ឆ្នាំ មាន​ចំនួន​ប្រហែល​១,៩​លាន​នាក់ ដែល​ត្រូវ​ទទួល​វ៉ាក់សាំង ដែល​នាំ ឲ្យ​ចំនួន​អ្នក​ត្រូវ​ចាក់​វ៉ាក់សាំង​ឡើង​ដល់​ជាង​១៤,៦​លាននាក់ ឬ​៩១​ភាគ​រយ​នៃ​ប្រ​ជា​ជន​សរុប​ចំនួន​១៦លាន​នាក់​។​

ក្រ​សួង​សុខាភិបាល​ឲ្យ​ដឹង​ថា គិត​ត្រឹម​ថ្ងៃទី​១៦ ខែកញ្ញា ប្រជាពល​រដ្ឋ​ជាង​១១,៥​​លាន​នាក់​បាន​ទទួល​វ៉ាក់សាំង​បង្ការ​កូវីដ១៩ ​យ៉ាង​តិច​ចំនួន​មួយ​ដូស និង​មាន​ជាង​១០​លាននាក់ បាន​ចាក់​គ្រប់​ដូស។​ ក្រៅពី​នេះ នៅ​មាន​មនុស្ស​ជាង​៨០ម៉ឺន​នាក់​ បាន​ទទួល​វាក់សាំង​បង្ការ​កូវីដ១៩ ដូស​ទី​បី ឬ​ដូសជំរុញ​ ដែល​លោក​នាយក​រដ្ឋ​មន្ត្រី​ចាត់​ទុក​ថា​ជា​រឿង​គួរ​ឲ្យ​ស្ញប់​ស្ញែង បើ​ធៀប​ទៅ​នឹង​ប្រទេស​ផ្សេង​ទៀត​។​

លោក​​បន្ថែម​ថា៖ «នេះ​មិន​ត្រូវ​ចាត់​ទុក​ថាជាការ​ប្រជែង​លើវ៉ាក់​សាំង​ទេ ​តែ​កម្ពុជា​មានកាតព្វកិច្ច​ការពារ​ជីវិត​ពលរដ្ឋ​របស់​ខ្លួន ​និង​ធ្វើឲ្យ​សង្គម​សេដ្ឋកិច្ច​ត្រូវ​បាន​ស្តារឡើង​វិញ​ក្នុង​រាប់ទាំង​វិស័យអប់រំ​ដែល​ជាវិស័យអទិភាព​»។​

លោក​នាយក​រដ្ឋ​មន្ត្រី​លើក​ឡើង​ទៀត​ថា រដ្ឋាភិបាល​នឹង​រៀប​ចំ​យុទ្ធសាស្រ្ត​ដែល​អាច​អនុញ្ញាត​ឲ្យ​​ជនបរទេស​ដែលបាន​ចាក់​វ៉ាក់សាំង​គ្រប់​ដូស​ហើយ​អាច​មក​លេង​កម្ពុជា​បាន​។​

លោក ចៅ សុធី ដែល​បាន​នាំ​កូន​អាយុ​ប្រាំបី​ឆ្នាំ​មក​ចាក់វ៉ាក់សាំង​បង្ការកូវីដ១៩ នៅសង្កាត់​ដង្កោ នៅ​ថ្ងៃសុក្រនេះ បាន​ឲ្យ​ដឹ​ង​ថា​លោក​ព្រួយបារម្ភ​ពី​ផល​រំខាន​របស់​វ៉ាក់សាំង​មក​លើក​កូន​ខ្លះដែរ​។

លោក​បន្ថែម​ថា៖ «និយាយា​ដោយ​ស្មោះត្រង់​ទៅ ខ្ញុំ​ពិត​ជា​បារម្ភ​រឿង​ចាក់វ៉ាក់សាំង​ឲ្យ​កូន ប៉ុន្តែ​ខ្ញុំ​ត្រូវ​តែនាំកូនមក​ចាក់ ដើម្បី​ឲ្យ​ពួកគេ​អាច​បាន​ចូល​រៀន​វិញ»។​

ចំណែក​លោក វង់ ម៉ាប់ ដែល​មាន​កូន​ចំនួន​ប្រាំមួយ​នាក់ បាន​និយាយ​ថា​កូនៗ​លោក​ចំនួន​ប្រាំ​នាក់​បាន​ចាក់វ៉ាក់សាំង​គ្រប់​ដូស​រួច​រាល់​​ហើយ ដោយ​ថា​នៅ​សល់​តែម្នាក់​ចុង​ក្រោយគេអាយុ​១១​ឆ្នាំ ដែល​ត្រូវ​ចាក់​នៅ​ថ្ងៃសុក្រ​នេះ។​

លោកនិយាយ​ថា៖ «ពេល​គ្រប់​គ្នា​បាន​ចាក់វ៉ាក់សាំង យើង​ក៏​ត្រូវ​ចាក់​ដូច​គេ​ដែរ​ហើយ​​ខ្ញុំ​​​មិន​​បារម្ភ​​ទេ ពីព្រោះក្មេងៗ​មាន​ប្រព័ន្ធភាពស៊ាំរឹង​មាំជា​ងមនុស្ស​ធំ»។​

កុមារអាយុចន្លោះពី​៦​ទៅ​១២​ឆ្នាំ​ទទួល​វ៉ាក់សាំង​បង្ការ​កូវីដ-១៩​ ដូសទី១​ប្រភេទ​ស៊ីណូវ៉ាក់ នៅ​រាជធានី​ភ្នំពេញ​ ថ្ងៃទី១៧ ខែកញ្ញា ឆ្នាំ២០២១​។ ខេមបូចា/ ព្រីង សំរាំង
កុមារអាយុចន្លោះពី​៦​ទៅ​១២​ឆ្នាំ​ទទួល​វ៉ាក់សាំង​បង្ការ​កូវីដ-១៩​ ដូសទី១​ប្រភេទ​ស៊ីណូវ៉ាក់ នៅ​រាជធានី​ភ្នំពេញ​ ថ្ងៃទី១៧ ខែកញ្ញា ឆ្នាំ២០២១​។ ខេមបូចា/ ព្រីង សំរាំង

ទាំង​អង្គការ​សុខភាព​ពិភព​លោក និង​អង្គការ​យូនីសេហ្វ លើកឡើងថា​គិត​មក​ដល់ពេល​នេះ មាន​តែ​វ៉ាក់សាំង​បង្ការ​កូវីដ១៩ ប្រភេទ​Pfizer តែមួយ​ទេ​ដែល​បាន​ត្រួត​ពិនិត្យដោយ​ក្រុម​អ្នក​ជំនាញ​របស់​អង្គការ​សុខភាព​ពិភព​លោក និង​អាច​ប្រើ​​​លើ​ក្មេង​អាយុ​១២​ឆ្នាំ​ឡើង​។

លោកស្រី​វេជ្ជបណ្ឌិត​ Li Ailan តំណាង​អង្គការ​សុខ​ភាព​ពិភព​លោក​ប្រចាំ​ប្រទេស​កម្ពុជា​ ប្រាប់​ខេមបូចាតាម​រយៈអ៊ីម៉ែល​ថា ការ​សិក្សា​លើ​ផល​រំខាន​របស់​វ៉ាក់សាំង​បង្ការ​កូវីដ១៩ រយៈពេល​ខ្លី និង​វែង​លើក​កុមារ ក៏​ដូច​ជា​សុវត្ថិភាព​របស់​វ៉ាក់សាំង​លើ​កុមារ គឺ​កំពុង​នៅ​បន្ត​នៅ​ឡើយ​។​

លោកស្រី​​មានប្រសាសន៍ថា៖ «​យើង​ដឹង​ថា​ប្រទេស​ចិន​បាន​អនុញ្ញាត​​ឲ្យ​ប្រើ​ប្រាស់បន្ទាន់​វ៉ាក់សាំង​បង្ការ​កូវីដ១៩ លើ​ក្មេង​អាយុ​បី​ឆ្នាំ​ទៅ១៧​ឆ្នាំ»។ លោកស្រី​​បន្ត​ថា៖ «ការ​សិក្សា​ជា​ច្រើន​លើ​វ៉ាក់​សាំង​កំពុង​បន្ត​ធ្វើ និង​ភស្តុតាង​​បញ្ជាក់​នឹង​អាច​មាន​កាន់​តែ​ច្រើនទៅ​ថ្ងៃ​ខាង​មុខ»។​

លោកស្រី​​ឲ្យ​ដឹង​ដែរថា អង្គការ​សុខ​ភាព​ពិភព​លោក​បាន​ណែនាំ​ឲ្យ​កុមារ និង​ក្មេង​ជំទង់​​មាន​បញ្ហា​សុខភាពប្រចាំកាយ​​គួរ​ត្រូវ​បញ្ចូល​ឲ្យ​ចាក់​វ៉ាក់សាំងដែរ បើ​ពួកគេ​នៅ​កន្លែង​មាន​ហានិភ័យ​ឆ្លង​ខ្លាំង​។​

លោកស្រី​បញ្ជាក់ថា៖ «ក្នុង​ករណី​នេះ មនុស្ស​ពេញ​វ័យ​​​ក្នុង​ក្រុម​មនុស្ស​អាទិភាព គួរតែ​ត្រូវ​បានទទួល​វ៉ាក់សាំង​មុន​ក្មេងៗ​ដែល​មាន​បញ្ហា​សុខភាព​ប្រចាំកាយ»។​

ចំណែក​លោកស្រី​ Foroogh Foyozat តំណាង​អង្គការ​យូនីសេហ្វ​​ប្រចាំ​កម្ពុជា មាន​ប្រសាសន៍​ថា​ការ​ធ្វើតេស្តសាកល្បង​​លើ​កុមារ​កំពុង​បន្ត​នៅ​ឡើយ ដូច​នេះ​គិត​មក​ដល់ពេល​នេះអ្នក​ជំនាញ​អង្គការ​សុខភាព​ពិភព​លោក​បាន​ពិនិត្យ​រួច​រាល់​តែ​លើ​វ៉ាក់សាំង​ប្រភេទ​​ Pfizer/BionTech  ដែល​អាច​ប្រើ​សម្រាប់​ក្មេង​អាយុ​១២​ឆ្នាំ ​និង​អាយុលើសពីនេះ។​​

លោកស្រី​បន្ថែម​ថា៖ «​ចំពោះ​វ៉ាក់សាំង​ផ្សេង​ទៀត ដូច​ជា​ស៊ីណូវ៉ាក់ និងស៊ីណូហ្វាម ត្រូវ​បាន​អនុញ្ញាត​ឲ្យ​ប្រើ​បន្ទាន់​នៅ​ប្រទេស​មួយ​ចំនួន​លើ​ក្មេង​អាយុ​ចន្លោះពី​១២​ទៅ​១៧​ឆ្នាំ រួម​មាន​ចិន ឥណ្ឌូនេស៊ី និង​ថ្មីៗនេះ​កម្ពុជាផង​ដែរ»។ លោក​ស្រី​បន្ត​ថា៖ «ការ​ធ្វើ​តេស្ត​លើ​ក្មេងៗ​កំពុង​បន្ត​នៅ​ឡើយ វា​អាច​ថា​ត្រូវ​ការពេល​ច្រើនខែ​បន្ត​ទៀត​ដើម្បី​បាន​ព័ត៌មាន​កាន់​តែច្រើន​ទាក់​ទង​នឹង​កុមារ និង​ក្មេង​ជំទង់ និង​ដើម្បី​បាន​ភស្តុតាង​គ្រប់​គ្រាន់​​នាំ​ឲ្យ​អាច​ឈាន​ដល់​ការអនុញ្ញាត​ឲ្យ​ប្រើ​វ៉ាក់សាំង​ផ្សេងៗ​ទៀត»។​

លោកស្រី Foyozat ឲ្យ​ដឹង​ទៀតថា​ កុមារ​អាយុ​ចន្លោះពី​១២​ទៅ​១៥​ឆ្នាំ ដែល​មាន​ហានិភ័យ​ខ្ពស់​នឹង​ការ​ឆ្លង​ជំងឺ គឺ​អាច​នឹង​ត្រូវ​ចាក់វ៉ាកសាំង​ឲ្យ​ដូច​ទៅ​នឹង​ក្រុម​មនុស្ស​អាទិភាព​ដែរ និង​ថា​អង្គការ​សុខភាព​ពិភព​លោក​នឹង​ធ្វើ​បច្ចុប្បន្ន​ភាព​លើ​សេចក្ដី​ណែ​នាំ​របស់​ខ្លួន​ពេល​មាន​ភស្តុតាង ឬ​ក៏​ស្ថាន​ភាព​នៃ​ជំងឺ​រាត​ត្បាត​នេះ​​អាច​ធ្វើ​ឲ្យមាន​ការ​កែ​ប្រែ​គោល​នយោបាយ​។

លោកស្រី សង្កត់​ធ្ងន់​ថា​ភស្តុតាងជា​សកល​បង្ហាញ​ថា​តាំងពី​មាន​ការ​ផ្ទុះ​រាល​ដាល​មក ជំងឺ​កូវីដ១៩ មិន​បង្ក​ហានិភ័យ​ខ្ពស់​លើ​កុមារ​នោះទេ និង​ថា​សាលា​រៀន​មិន​មែន​ជាកន្លែង​​ចម្លង​ជំងឺ​ចូល​ក្នុង​សហគមន៍​នោះ​ដែរ​។​

លោកស្រី​បញ្ជាក់ថា៖ «​ជា​សកល ក្មេងៗ​មានករណី​តិច​តួច​ប៉ុណ្ណោះ​ដែល​មាន​ឆ្លង​ជំងឺ​កូវីដ​១៩…​ក្មេងៗ​នៅ​អាយុ​ត្រឹម​កម្រិត​បឋម​សិក្សា​ និង​ក្មេង​ជាង​នេះ​ ជា​ក្រុម​មនុស្ស​ដែល​មាន​ករណី​ឆ្លង​តិច​បំផុត»។​

គិត​មក​ដល់ពេល​នេះ​ សាលា​រៀន​ចំនួន​២.៦៤១ បាន​បើក​ដំណើរ​ការ​ឡើង​វិញ​នៅ​ទូ​ទាំង​ប្រទេស​នៅក្នុងខែកញ្ញា​នេះ។ ក្រ​សួង​អប់រំ​បាន​ប្រកាស​នៅ​ថ្ងៃសុក្រ​នេះ ឲ្យផ្អាកដំណើរការថ្នាក់រៀនមួយចំនួន នៅក្នុង​សាលា​ចំនួន​ប្រាំ​នៅ​ទីក្រុង​ភ្នំពេញ​​ចំនួន​១៤​ថ្ងៃ បន្ទាប់​បាន​រក​ឃើញ​កូន​សិស្ស​វិជ្ជមាន​កូវីដ១៩​។

លោក​នាយក​រដ្ឋ​មន្ត្រី ហ៊ុន សែន ឲ្យ​ដឹង​ដែរថា​កម្ពុជា​បាន​ទទួល​វ៉ាក់សាំង​ស៊ីណូវ៉ាក់សរុប​ចំនួន​៩​លាន​នៅ​ខែ​កញ្ញា​នេះ រួម​មាន​បី​លាន​ដូស​ជាជំនួយ​របស់​ចិន និង​ប្រាំមួយ​លាន​ដូស​ផ្សេង​ទៀត​ជា​ការ​បញ្ជា​ទិញ​។ លោក​បន្ថែម​ថា ប្រទេស​អូស្រ្តាលី ក៏​បាន​សន្យា​ផ្ដល់​វ៉ាក់សាំង​ប្រភេទ​Pfizer ចំនួន​២,៣​លាន​ដូស​ផង​ដែរ​។

ក្រសួង​សុខាភិបាល​​នៅ​ថ្ងៃសុក្រ​នេះបាន​ឲ្យ​ដឹងថា​អ្នក​ឆ្លង​កូវីដ១៩ មានចំនួន​៦៩៨​ករណី​ថ្មី និង​មាន​អ្នក​ស្លាប់ចំនួន​១​១​នាក់ នាំ​ឲ្យ​ចំនួន​អ្នក​ឆ្លង​សរុប​ឡើង​ដល់​១០២.៨៣៤​ករណី និង​ស្លាប់​២.០៨៩​នាក់ និង​ចំនួន​អ្នក​ជា​សះស្បើយ​មាន​៩៦.២៧៥​ ករណី​៕

ប្រែសម្រួលពីអត្ថបទភាសាអង់គ្លេស៖ Cambodia starts vaccinating six-year-olds with Chinese vaccine

192 views

ព័ត៌មានថ្មីៗ

អត្ថបទពេញនិយម