សមាគមសម្ព័ន្ធអ្នកសារព័ត៌មានកម្ពុជា

អតីតមេដឹកនាំ និងសកម្មជនCNRPជិត៤០នាក់ត្រូវបានផ្តន្ទាទោសឲ្យជាប់ពន្ធនាគាររហូតដល់៧ឆ្នាំពីបទ «រួមគំនិតក្បត់»

អតីតសកម្មជននិងសមាជិកគណបក្សសង្គ្រោះជាតិមកដល់សាលាដំបូងរាជធានីភ្នំពេញ ដើម្បីស្តាប់សាលក្រមក្នុងសំណុំរឿងរបស់ពួកគេ ថ្ងៃទី២២ ខែធ្នូ ឆ្នាំ២០២២។ ខេមបូចា/ព្រីង សំរាំង
អតីតសកម្មជននិងសមាជិកគណបក្សសង្គ្រោះជាតិមកដល់សាលាដំបូងរាជធានីភ្នំពេញ ដើម្បីស្តាប់សាលក្រមក្នុងសំណុំរឿងរបស់ពួកគេ ថ្ងៃទី២២ ខែធ្នូ ឆ្នាំ២០២២។ ខេមបូចា/ព្រីង សំរាំង

សាលា​ដំបូង​រាជធានី​ភ្នំពេញ​កាលពី​ថ្ងៃ​ព្រហស្បតិ៍​​​បាន​ផ្តន្ទា​ទោសអតីត​មន្ត្រី​ជាន់ខ្ពស់​និង​សកម្មជន​គណបក្ស​សង្គ្រោះ​ជាតិ​៣៦​នាក់​ពី​បទ​រួម​គំនិត​ក្បត់​ ​ដោយ​ផ្ដន្ទាទោស​ពួកគេ​ឲ្យ​​​ជាប់​ពន្ធនាគារ​ពី​៥​ឆ្នាំ​ទៅ​៧​ឆ្នាំ​ពាក់ព័ន្ធ​នឹង​ការ​ព្យាយាម​មិន​សម្រេច​​ក្នុង​ការ​ជួយ​លោកស្រី មូរ សុខហួរ ​​អនុប្រធាន​គណបក្ស​សង្គ្រោះ​ជាតិឲ្យ​ត្រឡប់​មក​កម្ពុជា​​វិញ​កាល​ពី​​ខែ​មករា ឆ្នាំ​២០២១។

តុលាការ​បាន​ផ្តន្ទា​ទោស​លើ​មេដឹកនាំជាន់ខ្ពស់រួមទាំងលោកស្រី សុខហួរ និងលោក សម រង្ស៊ី មេដឹកនាំគណបក្សប្រឆាំងផងដែរ ដែលអ្នកទាំងពីរកំពុងនិ​រ​ទេស​​ខ្លួន។ ក្នុង​ចំណោម​មនុស្ស​៣៦​នាក់នេះ ​មាន​ជន​ជាប់​ចោទ​តែ​៤នាក់​ប៉ុណ្ណោះ​ដែលស្ថិត​​នៅ​ក្នុង​ប្រទេស។

លោក គង់ ម៉ាស់ លោក ខាន់ ប៊ុនផេង និងលោក វឿង សំណាង ដែលត្រូវបានឃុំខ្លួនបណ្តោះអាសន្នតាំងពីខែធ្នូ ឆ្នាំ២០២០ ត្រូវបានផ្តន្ទា​ទោសឲ្យជាប់ពន្ធ​នា​គា​រ​​រយៈពេល៥ឆ្នាំ និងបញ្ជូនទៅកាន់ពន្ធនាគារភ្លាមៗ។

ជនជាប់ចោទទី៤ ដែលនៅកម្ពុជាគឺឈ្មោះ ហេង សុខឡេង បានស្ថិតនៅក្រៅឃុំ ដោយសារបញ្ហាសុខភាព ហើយត្រូវបានព្យួរទោស​។ តុលាការ​​បាន​ទម្លាក់បទ​​ចោទ​លើ​ជន​ជាប់​ចោទ​ទី៣៧ ឈ្មោះ ម៉ាត់ វណ្ណី​។ លោក ឈុន សុធី និង ងឹម ញេង​ ក៏​បាន​ព្យួរទោសផង​ដែរ។

ជាមួយគ្នានេះ មេដឹកនាំជាន់ខ្ពស់ចំនួន១១រូប រួមមានលោក​ សម រង្ស៊ី លោកស្រី​មូរ​ សុខហួរ លោក អេង ឆៃអ៊ាងលោក ឡុង រីលោក ហូ វ៉ាន់,លោក អ៊ូ ច័ន្ទឫទ្ធិ, លោក នុត រំដួល,លោក ម៉ែន សុថាវរិន្ទ,លោក ហេង ដាណារ៉ូ លោក វ៉ាន់ ណារិទ្ធិ និងលោកស្រី ជូឡុង សូមូរ៉ា សុទ្ធតែត្រូវបានផ្តន្ទា​ទោសកំបាំងមុខឲ្យ​ជាប់​ពន្ធ​នាគារ​រយៈ​ពេល​៧ឆ្នាំ ហាម​ឃាត់​មិនឲ្យ​ឈរឈ្មោះបោះឆ្នោតនិង​ដក​សិទ្ធិបោះឆ្នោតរបស់ពួកគេរយៈពេលប្រាំឆ្នាំ។

លទ្ធផល​នៃ​ការ​កាត់​ទោស​ទ្រង់ទ្រាយ​ធំនេះ ត្រូវបានជនជាប់ចោទ និងក្រុមគ្រួសារថា​​អយុត្តិធម៌ ​ជា​ពិសេសសម្រាប់​អ្នក​ទាំង​បី​ដែល​នឹង​ត្រូវ​អនុវត្ត​ទោស​ជាប់​​ពន្ធនាគារ។

​បន្ទាប់​ពីចៅ​ក្រម​ប្រកាស​​សាលក្រម លោក គង់ ម៉ាស់ បានស្រែក​នៅ​ក្នុង​បន្ទប់​សវនាការ​ថា៖​ «ប្រសិន​បើ​ការ​កាត់​ទោស​ខ្ញុំ​ធ្វើ​ឲ្យ​អ្នក​សប្បាយ​ចិត្តនិង​ធ្វើ​ឲ្យ​ប្រទេស​រីក​ចម្រើន សូមកាត់ទោស​ទៅចុះ»។

ភរិយារបស់​ទណ្ឌិត​យំ​នៅ​ខាង​ក្រៅ​សាលា​ដំបូង​រាជធានី​ភ្នំពេញ បន្ទាប់​ពី​ការ​ប្រកាស​សាលក្រម ​នៅ​ថ្ងៃ​ទី​២២ ខែ​ធ្នូ ឆ្នាំ​២០២២។ ខេមបូចា/ស៊ន​ សារ៉ាត

ប្រពន្ធ និងកូន​ជន​ជាប់​ចោទ​ទាំង​បី​នាក់​បាន​​​យំ​នៅ​ក្នុង​បន្ទប់​សវនាការដែល​ធ្វើ​​ឲ្យ​សន្តិសុខ​ស្នើ​​ឲ្យពួកគាត់​​ចាក​ចេញ។

អ្នកស្រី កុល សាត ភរិយា​របស់​លោក គង់ ម៉ាស់ បាន​ប្រាប់​អ្នក​សារព័ត៌មាន​នៅ​ក្រៅ​តុលាការ​ថា សាលក្រម​នេះ​អយុត្តិធម៌​ខ្លាំងណាស់សម្រាប់គ្រួសារគាត់​។

អ្នក​ស្រី​បាន​និយាយ​ទាំង​ទឹក​ភ្នែក​​ថា៖ «វា​ជា​ជម្លោះ​នយោបាយ ហើយ​ប្ដី​របស់​ខ្ញុំ​ត្រូវ​បាន​គេ​ដាក់​ពន្ធនាគារ​​ដល់​ទៅ៥ឆ្នាំ​ដោយ​មិន​បាន​ធ្វើ​អ្វី​ខុស។​ ខ្ញុំ​គិត​ថា ​តុលាការ​មិន​ឯករាជ្យទេ។ បើ​ទោះ​ជា​យើង​ប្តឹង​ឧទ្ធរណ៍​ក៏​ដោយ លទ្ធផល​នឹង​នៅតែដដែល​ ព្រោះ​តុលាការ​អនុវត្ត​តាម​ [បញ្ជា​​របស់​រដ្ឋាភិបាល]»។

អ្នកស្រី ម៉ែន គន្ធាវី ភរិយា​របស់​លោក ខាន់ ប៊ុនផេង បាន​និយាយ​​ថា ប្ដី​របស់​គាត់​មាន​បញ្ហា​ផ្លូវ​ចិត្ត ហើយ​គាត់​គួរ​ត្រូវ​បាន​ដោះលែង។

អ្នកស្រី​បាន​និយាយថា៖ «ខ្ញុំ​មក​តុលាការ​​នៅ​ថ្ងៃ​នេះ ​ដោយ​រំពឹង​ថា ​តុលាការ​នឹង​ដោះលែង​ប្តី​ខ្ញុំ ប៉ុន្តែ​ឥឡូវ​នេះ​តុលាការ​បាន​កាត់ទោស​គាត់​ឲ្យ​ជាប់​ពន្ធនាគារ​រយៈពេល ៥ ឆ្នាំ។ ខ្ញុំ​មិន​ដឹង​ធ្វើ​ម៉េច​ទេ​»

លោក គង់ ម៉ាស់ ត្រូវបានឃុំខ្លួនតាំងពីខែធ្នូ ឆ្នាំ២០២០ បន្ទាប់ពីត្រូវ​បាន​ចាប់ខ្លួន​ នៅ​រាជធានីភ្នំពេញ។ នៅពេលនោះ លោក​ទើបតែត្រូវ​បាន​ដោះលែង​ឲ្យ​មាន​សេរីភាពប៉ុន្មានខែប៉ុណ្ណោះ បន្ទាប់ពីគាត់ត្រូវបានដោះលែងពីពន្ធនាគារក្នុងខែសីហា ឆ្នាំ២០២០ បន្ទាប់ពីជាប់ពន្ធនាគាររយៈពេល១៨ខែពីបទញុះញង់ពាក់ព័ន្ធនឹងការបង្ហោះសារលើ​ហ្វេសប៊ុករិះគន់រដ្ឋាភិបាល។

លោក អំ សំអាត នាយកទទួលបន្ទុកកិច្ចការទូទៅ​នៃ​អង្គការ​សិទ្ធិ​មនុស្ស​លីកាដូបាន​មាន​ប្រសាស​ន៍​​ថា នេះ​គឺ​ជា​រឿង​នយោបាយ ហើយ​គួរ​តែ​ដោះស្រាយ​តាម​បែប​នយោបាយ​។

លោក​បាន​បន្ត​ថា៖​ «ដូច​ដែល​យើង​បាន​ដឹង​រួច​ហើយ​ថា ​នេះ​គឺ​ជា​រឿង​​នយោបាយ​ជា​​ជាង​ការ​អនុវត្ត​​ច្បាប់​។ បញ្ហា​នេះ​គឺ​ត្រូវ​លើកយក​មកជជែកគ្នា ដើម្បី​បញ្ចប់​​វិបត្តិ​នយោបាយ​ ដើម្បី​ធ្វើ​ឲ្យ​បរិយាកាស​នៃ​ការ​បោះឆ្នោត​នៅ​ឆ្នាំ​ក្រោយ​ប្រ​សើរ​»។

លោក​មាន​ប្រសាសន៍ថា ការ​កាត់​ទោស​នេះ​នឹង​ដាក់​សម្ពាធ​លើ​ក្រុម​គ្រួសារ​ដែល​កំពុង​ជួប​​ការ​លំបាកស្រាប់​​​ហើយ។ លោក​បាន​បន្ថែមថា៖ ​ «ការ​ធ្វើ​បែប​​នេះ​បាន​ធ្វើ​ឲ្យ​ប៉ះពាល់​ធ្ងន់​ធ្ងរ​​​ដល់​ជីវភាព​រស់នៅ​គ្រួសារ​របស់​ពួកគេ ខណៈ​ប្ដី​ដែល​ជា​អ្នក​រក​ប្រាក់​ទ្រទ្រង់​គ្រួសារ​ជាប់​ពន្ធនាគារ ជា​ពិសេស​​​​កូន​ៗពួកគេដែល​កំពុង​សិក្សា​»

លោក ឡោ ជុន​ធី មេធាវីការពារម្នាក់​ដែល​តំណាងឲ្យ​ជន​ជាប់​ចោទបានប្រាប់ខេមបូចាថា ក្រុមមេធាវីកំពុងរៀបចំប្តឹងឧទ្ធរណ៍។

លោក​បានមាន​ប្រសាសន៍ថា៖​ «​យើង​ស្នើ​ឲ្យ​តុលាការ​ទម្លាក់​បទ​ចោទ ​ព្រោះ​ករណី​របស់​ពួកគេ​មិន​ជាប់​ពាក់ព័ន្ធ​នឹង​អំពើរួម​គំនិត​ក្បត់​​ដូច​ការ​ចោទ​ប្រកាន់​នោះ​ទេ»

ប្រែសម្រួលពីអត្ថបទភាសាអង់គ្លេស៖ Dozens of CNRP Leaders and Activists Sentenced to up to 7 Years in Prison for ‘Plotting’

1,111 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម