លោក ម៉ម រិទ្ធី ត្រូវបានកាត់ទោសឲ្យជាប់ពន្ធនាគារព្រៃសរយៈពេល១៨ខែ ក្រោយពីបានរិះគន់ម្ចាស់កាស៊ីណូតាមបណ្ដាញសង្គមហ្វេសប៊ុក។ លោក ម៉ម រិទ្ធី ដែលជាថ្នាក់ដឹកនាំសហជីព ត្រូវបានដោះលែងពីពន្ធនាគារកាលពីថ្ងៃទី៧ ខែវិច្ឆិកា ឆ្នាំ២០២៥។ លោកបានហៅការកាត់ទោសមកលើរូបលោកថា «អយុត្តិធម៌» ហើយលោកនៅតែប្ដេជ្ញាបន្តតស៊ូមតិដើម្បីសិទ្ធិកម្មករបើទោះបីជាមានការគំរាមកំហែង និងកំពុងមានបញ្ហាសុខភាពក៏ដោយ។
លោក ម៉ម រិទ្ធី ជាប្រធានសហព័ន្ធសហជីពវិស័យទេសចរណ៍សេវាកម្មកម្ពុជា (CTSWF) និងជាអតីតអនុប្រធានទី២នៃសហភាពការងារកម្ពុជា (CLC)។ លោកបានប្រាប់ សារព័ត៌មានខេមបូចា ថា ការជាប់ពន្ធនាគាររបស់លោកគឺជារឿង «អយុត្តិធម៌ខ្លាំងបំផុតសម្រាប់បុគ្គលិកសង្គមដូចជារូបលោក» ព្រោះតែការពារសិទ្ធិកម្មករ មិនមែនដើម្បីប្រយោជន៍ផ្ទាល់ខ្លួន ប៉ុន្តែគឺដើម្បីប្រយោជន៍រួម។
លោកមានប្រសាសន៍ថា ការរស់នៅក្នុងពន្ធនាគារ គឺលំបាកខ្លាំងដោយសារតែមានអ្នកជាប់ឃុំច្រើន មិនសូវមានអនាម័យ និងកង្វះទឹកស្អាតប្រើប្រាស់។ លោក រិទ្ធី ពេលនេះកំពុងមានបញ្ហាសុខភាព រួមទាំងជំងឺសួត និងបញ្ហាបំពង់ក ដែលបណ្ដាលមកពីស្រូបផ្សេងបារីនៅក្នុងបន្ទប់ពន្ធនាគារ ដែលទាមទារឲ្យលោកត្រូវទទួលការព្យាបាលជាប្រចាំ។ លោកក៏ចាប់ផ្ដើមមានបញ្ហាក្រពះពោះវៀន និងស្បែកផងដែរ។
លោកឱ្យដឹងថា៖ «ក្នុងរយៈពេល១៨ខែ ខ្ញុំលេបថ្នាំមិនតិចជាង៥០០គ្រាប់នោះទេ។ បញ្ហាសុខភាពរបស់ខ្ញុំអាចនិយាយបានថាធ្ងន់ធ្ងរ…រយៈពេល១ឆ្នាំកន្លះ គឺខ្ញុំជាប់ឃុំដោយអយុត្តិធម៌ និងបានរឹតត្បិតរូបខ្ញុំមិនឲ្យជួយសង្គមបាន ជាពិសេសកម្មករក្នុងវិស័យទេសចរណ៍»។
លោក ម៉ម រិទ្ធី ត្រូវបានកាត់ទោសកំបាំងមុខកាលពីខែឧសភា ឆ្នាំ២០២៤ និងក្រោយមកក៏ត្រូវបានចាប់ខ្លួន និងកាត់ទោសឲ្យជាប់ពន្ធនាកាំរព្រៃសពីបទញុះញង់ឱ្យប្រព្រឹត្តបទឧក្រិដ្ឋជាអាទិ និងបទធ្វើឱ្យបាត់បង់ជំនឿលើសេចក្តីសម្រេចរបស់តុលាការ ព្រមទាំងពិន័យជាប្រាក់២លានរៀល តាមបណ្ដឹងរបស់ក្រុមហ៊ុនចិនជីនប៉ី គ្រុប។
កាលនោះ លោកបានផ្សាយផ្ទាល់លើទំព័រហ្វេសប៊ុកដោយបានរិះគន់លើកាស៊ីណូ ជីនប៉ី ២ ដែលខាងកាស៊ីណូបានចោទប្រកាន់បុគ្គលិកជាស្រ្តីម្នាក់ថា បាន «ជួយ» ឲ្យអ្នកលេងល្បែងក្នុងកាស៊ីណូម្នាក់ឈ្នះប្រាក់១៨ ០០០ដុល្លារ និង «មិនអនុញ្ញាត» ឲ្យបុគ្គលនោះចូលលេងកាស៊ីណូទៀតឡើយ។ ស្រ្តីរូបនោះក៏ត្រូវបានចោទប្រកាន់ដែរកាលពីឆ្នាំ២០២២។
ក្នុងការផ្សាយផ្ទាល់កាលនោះ លោកបានលើកឡើងថា លោក «បាត់បង់ជំនឿចិត្តលើតុលាការ» ខណៈស្រ្តីជាបុគ្គលិកកាស៊ីណូរួបនោះត្រូវបានកាត់ទោសទាំងមិនមានភស្ដុតាង។
លោកបានប្ដឹងឧទ្ធរណ៍ចំពោះការសម្រេចរបស់សាលាដំបូងចំនួនពីរដង តែត្រូវសាលាឧទ្ធរណ៍រាជធានីភ្នំពេញច្រានចោលទាំងពីរលើក។
លោក យី សុខសាន្ត អ្នកស៊ើបអង្កេតជាន់ខ្ពស់របស់អង្គការអាដហុក ប្រាប់ សារព័ត៌មានខេមបូចា ថា បុគ្គលិកសង្គមស៊ីវិលដើរតួយ៉ាងសំខាន់ក្នុងការ «បំពេញចន្លោះខ្វះខាតរបស់រដ្ឋាភិបាល» និងថាពួកគាត់គួរតែត្រូវបានលើកទឹកចិត្តឲ្យជួយប្រជជាពលរដ្ឋ ជាពិសេសអ្នកដែលរងផលប៉ះពាល់ពីការរំលោភសិទ្ធិការងារ និងបញ្ហាសហជីព។
លោកឲ្យដឹងដែរថា បើទោះបីជាអាជ្ញាធរក្រោយមកបានរកឃើញថាកាស៊ីណូ ជីនប៉ី បានប្រតិបត្តិការដោយខុសច្បាប់ និងដកបណ្ដឹងក្ដី ក៏តុលានៅតែបន្តនីតិវិធីលើសំណុំរឿងនេះ។
លោក សុខសាន្ត បានជំរុញឲ្យតុលាការទម្លាក់ចោលបទចោទនានា និងទទួលស្គាល់ការរួមចំណែករបស់ក្រុមអង្គការសង្គមស៊ីវិល។
លោកបន្ថែមថា៖ «យើងជំរុញឲ្យតុលាការ និងអាជ្ញាធរការពារកុំឲ្យមានរឿងបែបនេះកើតឡើងទៀត។ ពេលមានការស្នើសុំ ឬផ្ដល់ជាមតិយោបល់ពីក្រុមអង្គការសង្គមស៊ីវិល អាជ្ញាធរគួរតែពិចារណាថា តើការចោទប្រកាន់នោះពិតឬអត់ ជាជាងដាក់ពាក្យប្ដឹងវិញ បំបាត់ព័ត៌មាន ឬបំពានសិទ្ធិមនុស្ស»។
គណៈកម្មាធិការអង្គការអន្តរជាតិខាងការងារស្ដីពីការអនុវត្តស្ដង់ដារបានថ្លែងថា បញ្ហាផ្លូវច្បាប់ និងឧបសគ្គជាក់ស្ដែងចំពោះសេរីភាពនៃការប្រមូលផ្ដុំក្នុងប្រទេសគឺជារឿង «ដែលគួរឲ្យសោកស្ដាយ»។
លោក អាត់ ធន់ អនុប្រធានសហជីពស៊ីខៅឌូ ស្វាគមន៍ចំពោះការដោះលែងលោក រិទ្ធី ប៉ុន្តែលោកថា វាជារឿងអកុសលមួយដែលការដោះលែងនេះធ្វើឡើងនៅពេលការអនុវត្តទោសត្រូវបានបញ្ចប់។
លោកបន្តថា៖ «មានភាពមិនប្រក្រតីជាច្រើននៅក្នុងសំណុំរឿងនេះ។ ក្នុងពេលគាត់ធ្វើជាប្រធានសហជីព គាត់ត្រូវបាទចោទប្រកាន់ [បទល្មើស] ព្រោះការងាររបស់គាត់។ ក្រុមហ៊ុនបានដកពាក្យបណ្ដឹង ប៉ុន្តែនៅទីបំផុត លោក រិទ្ធី នៅតែត្រូវកាត់ទោស។ ដូចនេះខ្ញុំគិតថាវាមិនយុត្តិធម៌ទេសម្រាប់គាត់»។
លោក អាត់ ធន់ ជំរុញឲ្យអាជ្ញាធរឈប់ប្រើប្រព័ន្ធយុត្តិធម៌ដើម្បីគាបសង្កត់មេដឹកនាំសហជីព ដែលធ្វើការការពារសិទ្ធិកម្មករ ដែលនេះជាការធ្វើដើម្បីប្រយោជន៍រួម។
លោកបានបន្ថែមថា៖ «សហជីព គឺជាផ្នែកមួយនៃសង្គម ពួកគាត់ចូលរួមជួយដោះស្រាយបញ្ហាអយុត្តិធម៌។ នៅប៉ុន្មានឆ្នាំចុងក្រោយនេះ ការគាបសង្កត់សេរីភាពកម្មករមានការកើនឡើងខ្ពស់ ហើយពេលសហជីពព្យាយាមជួយដោះស្រាយបញ្ហា ពួកគេបែរជាត្រូវជាប់ពន្ធនាគារទោវិញ»។
អ្នកស្រី គង់ សូដា ភរិយាលោក រិទ្ធី បង្ហាញការសប្បាយចិត្តដែលស្វាមីមានសេរីភាពវិញ ជាពិសេសក្រោយពីការរែកពន់អំរែកគ្រួសារដ៏ធ្ងន់តែម្នាក់ឯង។ យ៉ាងណា អ្នកស្រីនៅតែមានការសោកស្ដាយចំពោះសុខភាពប្ដី ដែលបានចុះទ្រុឌទ្រោមក្រោយចេញពីពន្ធនាគារ ដែលតម្រូវឲ្យទទួលការព្យាបាលទៀងទាត់ ដោយសារតែបានស្រូបផ្សែងបារីច្រើនក្នុងពន្ធនាគារ។
អ្នកស្រីបានលើកឡើងថា៖ «ខ្ញុំសប្បាយចិត្តដែលគាត់បានមកវិញ ហើយខ្ញុំនឹងនៅតែបន្ដគាំទ្រការងាររបស់គាត់ ដើម្បីយុត្តិធម៌របស់កម្មករ»។
ជាមួយគ្នានេះដែរ លោក រិទ្ធី បានឲ្យដឹងដែរថា លោកនៅបន្តទទួលបទពិសោធន៍នៃការគំរាមកំហែង ការរឹតត្បិតសេរីភាពក្នុងការធ្វើការងារសង្គម ប៉ុន្តែលោកនៅតែប្ដេជ្ញាបន្តជួយការពារសិទ្ធិការងារក្នុងវិស័យទេសចរណ៍ និងសេវាកម្ម។
លោកបន្ថែមថា៖ «ខ្ញុំបានតាំងចិត្តធ្វើការងារសង្គមមកជាយូរហើយ។ ខ្ញុំមិនរត់ចោលស្រុកទេ ប៉ុន្តែនឹងបន្តការងារជាមួយសហជីពដើម្បីជួយកម្មករ [ក្នុងប្រទេសកម្ពុជា]»៕
ប្រែសម្រួលពីអត្ថបទភាសាអង់គ្លេស៖ Freed Union Leader Decries ‘Unjust’ Sentence, Vows to Continue Defending Workers’ Rights
