ស្ថាប័នមូលនិធិរូបីយវត្ថុអន្តរជាតិហៅកាត់ថា IMF បានឲ្យដឹងនៅសប្ដាហ៍នេះថា សេដ្ឋកិច្ចកម្ពុជានឹងមានកំណើនយឺតគឺនៅត្រឹម៣ភាគរយ បើធៀបនឹងឆ្នាំ២០២៥ មាន៥,៣ភាគរយ។ មូលហេតុដែលនាំឲ្យកំណើនសេដ្ឋកិច្ចថយចុះ IFM បានលើកហេតុផលថាមកពីតម្លៃថាមពលឡើងថ្លៃ វិស័យទេសចរណ៍ធ្លាក់ចុះ និងចំនួនប្រាក់បញ្ញើត្រឡប់មកប្រទេសកំណើតរបស់ពលករចំណាកស្រុកក៏ធ្លាក់ចុះ ដែលបញ្ហានេះបានដាក់បន្ទុកយ៉ាងខ្លាំងដល់កំណើនសេដ្ឋកិច្ចកម្ពុជា។
ការព្យាករនេះ កើតក្រោយការព្យាកររបស់ធនាគារអភិវិឌ្ឍន៍អាស៊ី ឬADB ប្រហែលមួយសប្ដាហ៍។ ADB បានទម្លាក់តួលេខកំណើនសេដ្ឋកិច្ចកម្ពុជាសម្រាប់ឆ្នាំ២០២៦ ពី៤,១ភាគរយ មកនៅត្រឹម៣,៩ភាគរយវិញ ដោយលើកហេតុផលថាវិស័យទេសចរណ៍ចុះខ្សោយ វិបត្តិកើតឡើងដោយការបិទព្រំដែនគោករវាងកម្ពុជា-ថៃ និងកង្វល់ផ្សេងៗទាក់ទងនឹងមជ្ឈមណ្ឌលឆបោកតាមអនឡាញដែលមាននៅកម្ពុជាកន្លងមក។ ចំណែកអតិផរណាក្នុងឆ្នាំ២០២៦ វិញ ADB បានវាយតម្លៃថាមាន៤,៧ភាគរយ តែ IFM ថាមានចំនួន៥,៦ភាគរយ។
ការសិក្សារបស់ IFM បានលើកឡើងថា៖ «កត្តាហានិភ័យមួយចំនួនជាដើមចមនៃការថយចុះកំណើនសេដ្ឋកិច្ច ខណៈកត្តានាំឲ្យមានអត្រាអតិផរណាកើនឡើងនៅតែមាន…គោលនយោបាយពាណិជ្ជកម្មមិនប្រាកដប្រជា និងការនៅតែមានសកម្មភាពឆបោកតាមអនឡាញ គឺបានធ្វើឲ្យការនាំចេញ និងវិស័យទេចរណ៍កាន់តែចុះខ្សោយ រាំងស្ទះដល់ការវិនិយោគ និងកង្វល់លើស្ថិរភាពហិរញ្ញវត្ថុក៏កើតមានឡើង»។ នេះបើតាមការសិក្សារបស់ IMF។
IFM រំពឹងថា សេដ្ឋកិច្ចកម្ពុជានឹងហក់ឡើងដល់៤ភាគរយវិញនៅឆ្នាំ២០២៧ និងថាអតិផរណានឹងចុះមកនៅ៣,១ភាគរយ ដោយសារតម្លៃថាមពលអាចនឹងវិលមករកភាពប្រក្រតីវិញ។
ចំណែករដ្ឋាភិបាលកម្ពុជាវិញក៏មានការព្យាកររបស់ខ្លួនដែរ ដោយថាកំណើនសេដ្ឋកិច្ចនៅឆ្នាំ២០២៦ នឹងមាន៤,២ភាគរយ និងនៅឆ្នាំ២០២៧ នឹងមាន៥ភាគរយ ដោយថាកំណើននាំចេញផលិតផលមិនមែនសម្លៀកពាក់មានការកើនឡើងខ្លាំងជាងការរំពឹងទុក ការទទួលបានវិនិយោគផ្ទាល់ពីបរទេសបន្ថែម និងរដ្ឋបានបន្ថែមការចំណាយ និងធ្វើឲ្យមានភាពធន់លើតម្រូវការប្រើប្រាស់។ នេះបើតាមរបាយការណ៍របស់ IMF។ ធនាគារជាតិនៃកម្ពុជាបានប៉ាន់ប្រមាណថាអតិផរណាសម្រាប់ឆ្នាំ២០២៦ មាន៤,៧ ភាគរយ។
IMF បានបញ្ជាក់ទៀតថា សេដ្ឋកិច្ចកម្ពុជាកើនឡើងកាលឆ្នាំ២០២៥ គឺផ្អែកលើការនាំចេញផលិតផលកម្មន្តសាល ការវិនិយោគផ្ទាល់ពីបរទេស និងគម្រោងហេដ្ឋារចនាសម្ព័ន្ធនានា។ ប៉ុន្តែចំនួនភ្ញៀវទេសចរបរទេសវិញបានធ្លាក់ចុះជិត៤៨ភាគរយនៅឆមាសទី១ឆ្នាំ២០២៦ បើធៀបទៅនឹងឆ្នាំមុន ហើយបញ្ហាជម្លោះព្រំដែនជាមួយថៃក៏បានធ្វើឲ្យពលករចំណាកស្រុកកម្ពុជាប្រហែល១លាននាក់បានវិលត្រឡប់មកស្រុកកំណើតវិញ ដែលធ្វើឲ្យការផ្ញើប្រាក់ពីបរទេសមកស្រុកកំណើតក៏ធ្លាក់ចុះ។
បើទោះបីជាលោកនាយករដ្ឋមន្ត្រី ហ៊ុន ម៉ាណែត បានលើកឡើងកាលពីសប្ដាហ៍មុនថា កម្ពុជាបានកម្ទេចទីតាំងឆបោកតាមអនឡាញធំៗហើយក្ដី ក៏ IMF បានលើកឡើងថាការខូចខាតមុខមាត់របស់កម្ពុជាអំពីរឿងនេះនៅតែជាបញ្ហាសម្រាប់អ្នកទេសចរ និងទំនុកចិត្តរបស់អ្នកទាំងនោះ និងថាកង្វល់លើអភិបាលកិច្ច និងនីតិរដ្ឋ ក៏ជាឧបសគ្គរាំងស្ទះដល់អ្នកវិនិយោគបរទេសលំដាប់ខ្ពស់ផងដែរ។
នៅក្នុងខែកញ្ញា រដ្ឋាភិបាលបានដាក់ចេញនូវកម្មវិធីមួយដែលមានទឹកប្រាក់១,២ពាន់លានដុល្លារដើម្បីទ្រទ្រង់ជីវភាពប្រជាពលរដ្ឋ និងការងាររយៈពេលខ្លី និងមធ្យម។ កាលពីសប្ដាហ៍មុន រដ្ឋាភិបាលចាប់ផ្ដើមបញ្ចេញសាច់ប្រាក់សម្រាប់គ្រួសារក្រីក្រ និងងាយរងគ្រោះចន្លោះពី៤ម៉ឺនរៀល ទៅ៦ម៉ឺនរៀលក្នុងមួយគ្រួសារ ដើម្បីជួយសម្រាលបន្ទុកកើតចេញពីការឡើងថ្លៃរបស់ប្រេងឥន្ធនៈ ដោយជំនួយសាច់ប្រាក់នេះនឹងធ្វើឡើងរហូតដល់ខែធ្នូ ឆ្នាំ២០២៦។ ត្រង់ចំណុចនេះ IFM ក៏បានផ្ដល់ជាអនុសាសន៍ដែរថារដ្ឋាភិបាលគួរកាត់បន្ថយការឧបត្ថម្ភសាច់ប្រាក់លើថ្លៃប្រេងឥន្ធនៈជាបណ្ដើរៗដោយទុកសម្រាប់តែក្រុមគ្រួសារដែលត្រូវការចាំបាច់បំផុត។
IFM ក៏បានលើកឡើងថា កម្ពុជានៅមាន«ភាពកម្សោតខ្លាំង»លើប្រព័ន្ធហិរញ្ញវត្ថុរបស់ខ្លួនដោយថាធនាគារ ក្រុមហ៊ុនទូទាត់ប្រាក់ និងកាស៊ីណូ ជាដើម មិនត្រូវបានត្រួតពិនិត្យថានរណាជាម្ចាស់ ឬមានអំណះអំណាងបញ្ជាក់ថាលុយដែលពួកគេទទួលបានមកពីប្រភពស្របច្បាប់នៅពេលពួកគេទទួលបានអាជ្ញាបណ្ណ។ IMF បានជំរុញឲ្យធនាគារជាតិនៃកម្ពុជា និងគណៈកម្មការគ្រប់គ្រងល្បែងពាណិជ្ជកម្មយកចិត្តទុកដាក់លើបញ្ហានេះជាចម្បង។ ក្នុងឆ្នាំនេះអាជ្ញាធរកម្ពុជាបានបិទធនាគារតូចៗចំនួនប្រាំ ហើយបីក្នុងចំណោមនោះបានជាប់ទណ្ឌកម្មពីក្រសួងរតនាគារអាមេរិកដោយចោទថាជាប់ពាក់ព័ន្ធបណ្ដាញឆបោកតាមអនឡាញ។
ដូចគ្នាដែរ IFM បានរកឃើញថាកម្ចីខូចបានកើនឡើងជិត៨ភាគរយ ក្នុងចំណោមប្រាក់កម្ចីសរុបនៅឆ្នាំ២០២៥។
អ្នកនាំពាក្យក្រសួងសេដ្ឋកិច្ចលោក មាស សុខសេនសាន មានប្រសាសន៍ថា រដ្ឋាភិបាលបានយកចិត្តទុកដាក់ជាខ្លាំងរាល់សម្មភាពទាំងឡាយណាដែលធ្វើឲ្យប៉ះពាល់ដល់ទំនុកចិត្តមកលើកម្ពុជា។
លោកឱ្យដឹងថា៖ «ជាមួយគ្នានេះ វាជារឿងចាំបាច់ដែលយើងត្រូវទទួលស្គាល់ថារាជរដ្ឋាភិបាលកម្ពុជាបានទទួលស្គាល់ជាសាធារណៈអំពីបញ្ហាសំខាន់ៗ និងបានបង្កើនវិធានការចាំបាច់ដើម្បីដោះស្រាយបញ្ហាទាំងនោះ»។
លោកបញ្ជាក់ថា៖ «កេរ្តិ៍ឈ្មោះ និងទំនុកចិត្តជាទ្រព្យសម្បត្តិរបស់សេដ្ឋកិច្ច»។
លោក គី សេរីវឌ្ឍន៍ អ្នកសេដ្ឋកិច្ច និងជានាយកវិទ្យាស្ថានសិក្សាចិន របស់រាជបណ្ឌិត្យសភាកម្ពុជា មានប្រសាសន៍ថា ធនាគារជាតិបានបង្ហាញកង្វល់ដូចគ្នាទៅនឹងរដ្ឋាភិបាលលើវិស័យហិរញ្ញវត្ថុ ប៉ុន្តែនៅខ្វះឧបករណ៍តាមដានការផ្ទេរប្រាក់ដែលមិនស្រមច្បាប់។
លោកឱ្យដឹងទៀតថា៖ «ខ្ញុំជឿថាមានយន្តការជាក់លាក់មួយចំនួនដែលធនាគារជាតិប្រហែលជាមិនអាចតាមដានដឹងពីការផ្ទេរប្រាក់[ខុសច្បាប់] ទាំងនោះ ជាពិសេសតាមរយៈរូបិយបណ្ណគ្រីបតូ ដែលវាស្ថិតនៅក្រៅការគ្រប់គ្រងរបស់ធានាគារជាតិ»។ លោកថ្លែងនេះគឺសម្ដៅដល់កង្វល់ទាក់ទងដំណើរការរបស់ក្រុមឆបោកប្រើប្រាស់ធានាគារស្របច្បាប់ និងក្រុមហ៊ុនទូទាត់ប្រាក់សម្រាប់លាងលុយ។
លោកបន្តថា៖ «បើសិនជាប្រព័ន្ធធនាគារដួលរលំ វាក៏នឹងធ្វើឲ្យសេដ្ឋកិច្ចជាតិយើងដួលរលំដែរ»។
IMF និយាយថា ភាពទន់ខ្សោយលើប្រព័ន្ធហិរញ្ញវត្ថុបានកើនឡើង ប៉ុន្តែថាប្រព័ន្ធគ្រប់គ្រងហានិភ័យនៅតែដដែល៕
ប្រែសម្រួលពីអត្ថបទភាសាអង់គ្លេស៖ After ADB Cut, IMF Sees Cambodia’s Growth Slowing to 3%
