ព្យុះថ្មីអាចនឹងធ្វើ​ឲ្យ​ស្ថានភាពទឹកជំនន់​កាន់តែអាក្រក់ ខណៈពលរដ្ឋរាប់ពាន់គ្រួសារត្រូវបានជម្លៀសទៅទីទួលសុវត្ថិភាព

ប្រជាពលរដ្ឋបណ្តើរម៉ូតូ​តាមផ្លូវដែលរងការជន់លិចនៅខណ្ឌដង្កោក្នុង​ក្រុងភ្នំ​ពេញកាលពីថ្ងៃទី​១៥ ខែតុលា ខណៈពលរដ្ឋផ្សេងទៀតត្រូវបានជម្លៀសតាមទូក​។ បញ្ញា ឆព័ណ្ណ
Share on facebook
Share on twitter
Share on linkedin
Share on telegram
Share on whatsapp

គេរំពឹងថា នឹងមាន​ភ្លៀងធ្លាក់ច្រើនទៀតនៅចុងសប្តាហ៍​នេះ​នៅពេលដែល​ព្យុះត្រូពិចមកដល់ប្រទេសកម្ពុជា​ ហើយវានឹងធ្វើឲ្យ​ស្ថានភាព​ទឹកជំនន់កាន់តែអាក្រក់ជាងនេះ​ បន្ទាប់ពី​ជំនន់ទឹកភ្លៀងបាន​សម្លាប់មនុស្ស្១៨នាក់និង​បង្ខំឲ្យ​ពលរដ្ឋជាងពីរម៉ឺន​ប្រាំពាន់នាក់ផ្សេងទៀតជម្លៀសទៅរកទីទួលសុវត្ថិភាព​ក្នុង​១៩​ខេត្ត​ ចាប់តាំងពី​ដើម​ខែ​តុលា។​ នេះបើតាម​របាយការណ៍​របស់​គណៈកម្មាធិការជាតិគ្រប់គ្រងគ្រោះមហន្តរាយ (NCDM) ។

ព្យុះ​ត្រូពិចឈ្មោះ​ សូឌែល (Saudel) ត្រូវ​គេរំពឹងថា នឹងបង្កឲ្យ​មាន​ភ្លៀង​ធ្លាក់នៅតាម​​តំបន់​ទំ​នាបក្នុងខេត្តមួយចំនួន​ រួម​មាន​ខេត្ត​សៀមរាប​ បាត់ដំបង ពោធិ៍សាត់ កំពង់ធំ កំពង់ឆ្នាំង​ កំពង់ស្ពឺ​ កណ្តាលនិង​ក្រុង​ភ្នំពេញ​ នៅពេលព្យុះនេះមកដល់ប្រទេសវៀតណាមនៅថ្ងៃទី​១៧ ហើយ​នឹង​បន្ត​សំដៅមក​ប្រទេសកម្ពុជា​ នេះបើយើងតាម​សេចក្តីជូនដំណឹង​របស់​ក្រសួង​ធន់ធានទឹកនិង​ឧតុនិយម។

ក្រុមមន្ត្រី​បាន​អះអាងថា ទឹកភ្លៀងនឹងធ្វើ​ឲ្យ​ស្ថានភាពទឹកជំនន់​ដែលមានស្រាប់នេះ ​រឹតតែធ្ងន់ធ្ងរ ដែល​បានធ្វើ​ឲ្យ​ខូចផ្លូវ​ប្រវែងជាង ១.៥០០គីឡូម៉ែត្រ និង​ផ្ទះ ៥០.០០០​ខ្នង​ក្នុង​១៩​ខេត្ត​ ចាប់តាំងពីថ្ងៃទី​៩​ ខែតុលា​ ខណៈ​ខេត្តបន្ទាយ​មាន​ជ័យ  បាត់ដំបង ប៉ៃលិន ក្រុងភ្នំពេញ​ និងខេត្តពោធិ៍សាត់រងគ្រោះ​ធ្ងន់ធ្ងរ​ជាងគេ​ នេះបើតាម​លោក ឃុន សុខា ជាអ្នកនាំពាក្យ​ NCDM។

លោក ឃុន សុខា បានមានប្រសាសន៍ថា អាជ្ញាធរកំពុង​ធ្វើការងារជាមួយ​ក្រុម​មន្ត្រីខេត្ត ចំណែកក្រុមសង្គ្រោះ​និងរុករករបស់​យោធាបន្តជួយសង្គ្រោះពលរដ្ឋដែលជាប់គាំងនៅតាម​ផ្ទះ​ ស្របពេល​មនុស្ស​ ២៥.១៩០​នាក់​ត្រូវ​បាន​ជម្លៀស​មក​កាន់ទីទួល​សុវត្ថិភាព។

លោក សុខា បានមានប្រសាសន៍ថា៖ «​ដោយសារ​យើង​ដឹង​ព័ត៌មានហ្នឹង​ពីការព្យាករណ៍​ទុកមុនឥឡូវ​យើង​បាន​ត្រៀម​កម្លាំងនិង​ត្រៀម ​មធ្យោបាយ​​ ហើយនិង​អ្វី​ដែលជាសម្ភារៈមធ្យោបាយដឹង​ជញ្ជូនប្រជាពលរដ្ឋ​ ក្នុងករណីដែលពួកគាត់ត្រូវជម្លៀសចេញពីតំបន់គ្រោះថ្នាក់​ ដោយ​មានគោលការណ៍មួយ​គឺ​ធ្វើយ៉ាងណា មិនឲ្យប្រជាពលរដ្ឋមានគ្រោះថ្នាក់ទេ​។ យើងបានត្រៀម​ខ្លួនរួចនិងការទទួលស្ថាន​ការណ៍នាពេលខាងមុខនេះ»។

លោកមាន​ប្រសាសន៍ថា៖ «យើងកំពុង​តាម​ដានការព្យាករណ៍ហ្នឹងហើយ ហើយកំពុងពិនិត្យទៅលើខេត្តជាពិសេសខេត្ត​ដែលរងឥទ្ធិពលហ្នឹង ដូចជាខេត្តភាគឦសាន និង​ខាងលិចហ្នឹង។ ហើយបានអប់រំ បានផ្ញើសារទៅដល់ពួកគាត់ឲ្យប្រុងប្រយ័ត្ន ឲ្យតាមដាន​ការព្យាករណ៍​។ ទាំងអាជ្ញាធរថ្នាក់​ជាតិនិងអាជ្ញាធរមូលដ្ឋានកំពុងតែយកចិត្តទុកដាក់និងតាមដាន ពិនិត្យដល់ប្រជាំរដ្ឋតែប្រឈម​មុខខ្លាំងនៅក្នុងតំបន់ទាំងអស់នោះ ហើយ ​។ ប្រសិនបើករណីធ្ងន់ធ្ងរ យើងចាប់ផ្តើមជួយគាត់ ដោយសារយើងមានកម្លាំងរួចជាស្រេចនៅតំបន់ទាំងអស់នោះ»

ស្រ្តីម្នាក់ដើរកាត់តាមផ្លូវជន់លិចក្នុងខណ្ឌដង្កោ ក្រុងក្នុងភ្នំពេញកាលពីថ្ងៃទី១៤ ខែតុលា​ ឆ្នាំ២០២០។ បញ្ញា ឆព័ណ្ណ

លោកបាន​បន្ថែមថា អាហារ ទឹកស្អាតនិង​វត្ថុចាំបាច់ផ្សេងទៀតត្រូវ​បាន​ចែកជូន​ដល់ក្រុមគ្រួសារ​ ដែលជាប់គាំងនៅតាម​ផ្ទះ​និង​អ្នក​ដែល​ត្រូវ​បាន​ជម្លៀសចេញ​រួច​ហើយ។ 

ទឹកជំនន់​នេះ​ក៏ធ្វើឲ្យ​ខូច​ផ្លូវ​ជាតិ​ប្រហែល​២៨៤​គីឡូម៉ែត្រ​និង​ផ្លូវលំ​​នៅតាម​ខេត្តប្រវែង ១.៤៥៩​ គីឡូម៉ែត្រផងដែរ នេះបើតាម​សេចក្តី​ថ្លៃងការណ៍​របស់​ NCDM។ ស្រពេលពេលនេះដែរ ​រថយន្តធុនធំ​ត្រូវ​បាន​ហាមឃាត់មិនឲ្យ​ធ្វើ​ចរាចរណ៍​តាម​ផ្លូវ​ជាតិលេខ​២ លេខ​៣​ លេខ​៤និង​ផ្លូវ​ជាតិ​លេខ​៥ ក្នុង​ខេត្តកណ្តាល​ ដើម្បី​បង្ការកុំឲ្យមានការខូចខាតបន្ថែមទៀត។​

គិតមកត្រឹម​ថ្ងៃសុក្រ​នេះ NCDM បាន​ប៉ាន់ប្រមាណ​ថា មានផ្ទះ ៥១.១៣៣ ខ្នងនិង​សាលារៀន ៤៣៩ ខ្នងរងការខូចខាតដោយសារគ្រោះធម្មជាតិ​ ដែលបានបំផ្លាញ​ស្រូវ ១៣៧.១៦០ ហិកតានិងដំណាំរួមផ្សំ ៦៧.៤៩០​ហិកតា។

ជំនន់ភ្លាមៗនេះ​ក៏បានបង្កឲ្យបាក់ទំនប់នៅខេត្តកំពង់ស្ពឺ ទំនប់នៅឧទ្យានជាតិគីរីរម្យ​និង​ស្ទឹងព្រែកត្នោតនៅក្រុងតាខ្មៅ។

ចំណែកនៅខេត្តបន្ទា​យមានជ័យ ជាខេត្តមួយក្នុងចំណោម​ខេត្តរងគ្រោះធ្ងន់​ធ្ងរជាងគេនោះ អាជ្ញាធរមូលដ្ឋាន​បាន​បង្ខំចិត្ត​ជម្លៀសអ្នក​ទោស​ជាង​១.៦០០​នាក់​ចេញ​ពីពន្ធនាគារខេត្តដោយ​សារការជន់លិច​ នេះបើយោងតាមលោក អ៊ុង ស៊ីផាន ប្រធាន​ពន្ធនាគារខេត្តបន្ទាយ​មានជ័យ។

លោកមាន​ប្រសាសន៍ថា កាលពីថ្ងៃទី​១៣ និង១៤ ខែតុលា​នេះ អាជ្ញាធរបានដឹកអ្នកទោស​តាម​រថយន្ត​ទៅកាន់មណ្ឌលអប់រំកែប្រែ​ផ្សេងទៀតនៅ​​ខេត្តសៀម​រាប ឧត្តរមានជ័យ​ កំពង់ធំ និង​ខេត្ត​ត្បូង​ឃ្មុំ​ ដោយ​លោកបាន​បន្ថែមថា អ្នក​ទោស​នៅខេត្តនេះធ្លាប់ត្រូវ​បាន​ជម្លៀសចេញផងដែរកាលពីឆ្នាំ​២០១៣ ដោយសារតែ​បញ្ហា​ទឹកជំនន់។

លោកមាន​ប្រសាសន៍ថា៖ «​នៅពេលចាប់ផ្តើម​ការជម្លៀសចេញ ទឹកមិនទាន់ចូល​ក្នុងអគារនៅឡើយ​ទេ។ ប៉ុន្តែ​ក្រោយ​ជម្លៀសចេញរួច​រាល់នៅថ្ងៃទី​១៤ ទឹកចាប់ផ្តើម​ហូរចូលពេញ​អគារ។ អ្នកទោស​បាន​ចាកចេញអស់ហើយ»

លោក ម៉េត មាសភក្តី អ្នក​នាំពាក្យ​សាលារាជធានីភ្នំពេញ​បាន​មានប្រ​សាសន៍ថា ទឹកជំនន់នៅក្រុងភ្នំពេញ​នៅ​ឆ្នាំ​នេះធ្ងន់ធ្ងរមែនទែន​ចាប់តាំងពីឆ្នាំ​២០១៦ មក​ ដោយ​លោកពន្យល់ថា ក្រុងភ្នំពេញ​មាន​កម្ពស់​​ទឹកភ្លៀង ១៩០​មីលីម៉ែត្រ​នៅ​សប្តាហ៍​នេះ​ បើធៀបនឹង​ទឹកភ្ញៀវរដូវវស្សាជាមធ្យម​ត្រឹម​១០៥មីលីម៉ែត្រ​។​​

អាជ្ញាធរក្រុងបានព្យាយាម​កាត់បន្ថយ​ផលប៉ះពាល់​ដោយសារទឹកជំនន់​ដោយ​បូមទឹកចេញពី​តំបន់បឹងទំពុន និងបឹងជើងឯក​ ជាកន្លែងស្តុកទឹកភ្លៀងសំខាន់​ពីរក្នុងទីក្រុង​ភ្នំពេញ។

គិតមកត្រឹម​ថ្ងៃព្រហស្បតិ៍​ សង្កាត់ចំនួន​៥​នៅខណ្ឌដង្កោ​ត្រូវ​បាន​ជន់លិច​ ហើយ​ពលរដ្ឋមួយចំនួន​ត្រូវ​បាន​ជម្លៀសទៅកាន់​ទីទួលសុវត្ថិភាពនៅផ្សារព្រែកជ្រៃ។

លោក ម៉េត មាសភក្តី បាន​មាន​ប្រសាសន៍ថា៖ «យើងនៅតែសម្របសម្រួល​ការជម្លៀសចេញ ​ពីព្រោះពលរដ្ឋមួយចំនួន​កំពុងស្ថិតនៅទីតាំង​ [ ជន់លិច​ ]។​យើង​មិន​ទាន់បាន​រាប់ចំនួន​ពួកគាត់នៅឡើយ​ទេ ខណៈ​ពេល​យើងកំពុងព្យា​យាម​នាំយកពួកគាត់ចេញពីតំបន់​ប៉ះពាល់មកកាន់តំបន់សុវត្ថិភាព»

លោកបាន​មាន​ប្រសាសន៍ថា៖ «​ការយកចិត្ត​ទុកដាក់​និង​អាទិភាពចម្បងរបស់​យើង​នៅពេលនេះ គឺនាំយក​ប្រជាពលរដ្ឋមកកាន់កន្លែងជម្លៀស​ ពីព្រោះ​វាពាក់ព័ន្ធការសង្គ្រោះអាយុជីវិត»

កាលពីយប់ថ្ងៃទី​១៥ ខែតុលា​ លោក​នាយក​រដ្ឋមន្ត្រី ហ៊ុន សែន បាន​ចុះសួរសុខទុកប្រជាពលរដ្ឋ​ដែល​ត្រូវ​បាន​ជម្លៀសចេញ​ពី​ផ្ទះ​សម្បែង​នៅខណ្ឌដង្កោ​ និង​បានអំពាវនាវឲ្យអាជ្ញាធរ​ផ្តោតការយកចិត្ត​ទុកដាក់​សង្គ្រោះអាយុជីវិត​និង​ផ្តល់អាហារ​និង​ទឹកស្អាត​ដល់ពលរដ្ឋ​ដែល​ត្រូវ​បាន​ជម្លៀស​ចេញ។

លោក​បានមានប្រសាសន៍​ថា៖ «​គ្រប់ខេត្តទាំងអស់​ត្រូវ​យកចិត្ត​ទុកដាក់ការពារគ្រោះទឹកជំនន់នេះ។ អាទិភាពធំបំផុតក្នុងបេសកកម្មនេះ គឺដើម្បីសង្គ្រោះ​អាយុជីវិ​ត​ប្រជាពលរដ្ឋ​មិន​ឲ្យ​​ស្លាប់ដោយសារការលង់ទឹក លង់ទឹកដោយការយើងមិនបានទៅសង្គ្រោះគាត់»

លោកនាយក​រដ្ឋមន្ត្រី​បាន​គូសបញ្ជាក់ថា ការជន់លិចក្នុងក្រុងភ្នំពេញ​គឺជាគ្រោះមហន្តរាយធម្មជាតិ និងបាន​ប្រាប់ពលរដ្ឋកុំឲ្យ​សន្និដ្ឋាន​ថា ការជន់លិចនេះ​បណ្តាល​មកពី​ការលុបបឹងនិងតំបន់ទំនាបក្បែររាជធានីភ្នំពេញ​សម្រាប់ការអភិ​វឌ្ឍ​ក្រុងនោះ។

លោកបានមានប្រសាសន៍ថា វិភាគទានសម្រាប់ជួយជនរងគ្រោះដោយ​សារ​ទឹកជំនន់បាន​កើន​ដល់​៦​លានដុល្លារ ហើយ​ទឹកប្រាក់​ ៨០០.០០០ដុល្លារត្រូវ​បាន​ប្រើប្រាស់រួច​ហើយ។

ស្ត្រីមេផ្ទះ​ឈ្មោះ​ ម៉ៅ វណ្ណៈ អាយុ​៤១​ឆ្នាំ ​រស់នៅ​សង្កាត់ចោមចៅ​នៅ​ជាយ​ខណ្ឌដង្កោ​បាន​ប្រាប់​ខេមបូចា​ថា ផ្ទះរបស់​អ្នក​ស្រី​បាន​ជន់លិច​ចាប់តាំងពី​ថ្ងៃអង្គារ​ ហើយថា រាល់ឆ្នាំ តំបន់របស់​អ្នក​ស្រីតាមធម្មតាមាន​ការជន់លិច​តិចតួច ប៉ុណ្ណោះ អំឡុង​ពេល​មាន​ភ្លៀងធ្លាក់ខ្លាំង។ 

អ្នក​ស្រី​បាន​និយាយថា៖ «​ខ្ញុំកំពុង​ធ្វើ​ដំណើរ​ត្រឡប់​មកពីខេត្ត ហើយនៅពេល​ខ្ញុំ​មកដល់ផ្ទះ​នៅម៉ោង​ប្រហែល​​ ៨ [ យប់​ ​] ទឹកហូរចូល​ពេញផ្ទះរបស់ខ្ញុំ​បាត់​ទៅហើយ។ ការជន់លិចនេះមានរយៈពេល​បួន​ថ្ងៃ​ហើយ​។ ខ្ញុំមិនធ្លាប់​​ឃើញ​ការជន់​លិច​នៅទីនេះទេ​ ក្នុង​រយៈ​ពេល​១០​ឆ្នាំ​ ដែលខ្ញុំបាន​មករស់នៅទីនេះ»

អ្នក​ស្រីបាន​និយាយថា អ្នក​ស្រីនិង​ក្រុម​គ្រួសារមិនដឹងថា នឹងទៅស្នាក់នៅទីណា​ទេ ស្របពេលផ្ទះរបស់ពួកគាត់បន្តជន់លិច ហើយ​បានអំពាវនាវឲ្យ​អាជ្ញាធរចាត់វិធានការណ៍ទប់ស្កាត់ការជន់លិចនាពេលអនាគត។

អ្នកស្រីបាននិយាយថា៖ «ខ្ញុំសង្ឃឹមថា បន្ទាប់ពី​នេះទៅ អាជ្ញាធរអាចស្តាប្រព័ន្ធលូឲ្យបានប្រសើរជាងនេះ ដើម្បីអាចជួយ [ កាត់បន្ថយ​ការជន់លិច​ ]»៕

Share on facebook
Share on twitter
Share on linkedin
Share on telegram
Share on whatsapp
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »