សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋនៅជាយក្រុងនៅតែបន្តខ្វះទឹកស្អាតប្រើប្រាស់ដើមឆ្នាំ២០២៣

ពលរដ្ឋកំពុងដងទឹកយកទៅប្រើប្រាស់ ខណៈអាជ្ញាធរខណ្ឌព្រែកព្នៅ និងសង្កាត់គោករកា បានដឹកទឹកទៅចែកជូនពលរដ្ឋដែលដាច់ទឹកប្រើប្រាស់ជាច្រើនថ្ងៃ ក្នុងបុរីពិភពថ្មីឈូកវ៉ា១ ស្ថិតក្នុងភូមិភ្លូផ្អែម សង្កាត់គោករកា ខណ្ឌព្រែកព្នៅ រាជធានីភ្នំពេញ។ រូបថតនៅថ្ងៃទី២៥ ខែមីនា ឆ្នាំ២០២៣។ ខេមបូចា/ ឃី សុវុឌ្ឍី
ពលរដ្ឋកំពុងដងទឹកយកទៅប្រើប្រាស់ ខណៈអាជ្ញាធរខណ្ឌព្រែកព្នៅ និងសង្កាត់គោករកា បានដឹកទឹកទៅចែកជូនពលរដ្ឋដែលដាច់ទឹកប្រើប្រាស់ជាច្រើនថ្ងៃ ក្នុងបុរីពិភពថ្មីឈូកវ៉ា១ ស្ថិតក្នុងភូមិភ្លូផ្អែម សង្កាត់គោករកា ខណ្ឌព្រែកព្នៅ រាជធានីភ្នំពេញ។ រូបថតនៅថ្ងៃទី២៥ ខែមីនា ឆ្នាំ២០២៣។ ខេមបូចា/ ឃី សុវុឌ្ឍី

កង្វះទឹកស្អាតប្រើប្រាស់នារដូវប្រាំងនៅតែជាបញ្ហាចោទសម្រាប់ប្រជាពលរដ្ឋដែលរស់នៅ​តាមបុរីមួយចំនួននៅជាយក្រុងភ្នំពេញ ខណៈរដ្ឋាករទឹកធ្លាប់សន្យាថាឆ្នាំ២០២៣​នឹងមានទឹក​ប្រើប្រាស់គ្រប់គ្រាន់។

កាលពីឆ្នាំ២០២២កន្លងទៅរដ្ឋាករទឹកធ្លាប់បានសន្យាថា នៅចុងឆ្នាំ២០២៣ ប្រជាពលរដ្ឋ​រស់​នៅ​ក្នុងរាជធានីភ្នំពេញទាំងអស់នឹងមានទឹកប្រើប្រាស់គ្រប់គ្រាន់ ខណៈដើមឆ្នាំ២០២៤តទៅ បញ្ហាទឹកនឹងលែងជាបញ្ហាចោទទៀតហើយនៅក្នុងរាជធានីភ្នំពេញ។ ប៉ុន្តែបញ្ហាដដែលនេះ​នៅតែកើតមានឡើងចំពោះពលរដ្ឋដែលរស់នៅតាមបុរីជាយក្រុ​ងភ្នំពេញ ក្នុងរដូវប្រាំង​នេះ។

ចំពោះកង្វះទឹកស្អាត់ប្រើប្រាស់នេះ ប្រជាពលរដ្ឋ បានលើកឡើងអំពីផលលំបាកស្រដៀងគ្នា ត្បិតពួកគេមិនមានទឹកសម្រាប់ប្រើប្រាស់ជាច្រើនថ្ងៃ និងត្រូវទិញទឹកស្អាត​មក​ប្រើប្រាស់ជាបន្តបន្ទាប់ បើទោះបីជាអាជ្ញាធរបានដឹកជញ្ជូនទឹក​ចែកឱ្យពួកគេប្រើ​នៅតាមបុរី​ក៏ដោយ។

កំពុងតែអង្គុយដកដើមប្រទាលដែលតាំងលម្អនៅខាងមុខផ្ទះ អ្នកស្រី ឌៀប ម៉ាន់ អាយុ៧៥ឆ្នាំ ជាអ្នករស់នៅក្នុងបុរីពិភពថ្មីឈូកវ៉ា១ ប្រាប់ឱ្យដឹងថា ផ្ទះរបស់អ្នកស្រីមិនមានទឹកប្រើប្រាស់​អស់​ជាច្រើនថ្ងៃមកហើយ សូម្បីតែដំណាំដូចជាផ្កា ប្រទាល ដែលតាំងលម្អនៅខាងមុខផ្ទះ​ក៏មិនមាន​ទឹកស្រោចដែរ។ ដូច្នេះអ្នកស្រីត្រូវដកចោលខ្លះដើម្បីកាត់បន្ថយការប្រើប្រាស់ទឹក​ស្រោចស្រព​ដំណាំទាំងនោះ ត្បិតសូម្បីតែអ្នកស្រី និងសមាជិកគ្រួសារក៏ត្រូវកាត់បន្ថយ​ទឹកប្រើប្រាស់​ប្រចាំ​ថ្ងៃ​ផងដែរ ចំណែកឯការលាងបន្ថែ ដាំស្ល បោកគក់ ក៏ត្រូវកាត់បន្ថយចំណុះទឹក ដើម្បីសន្សំ​សំចៃ​ទឹកប្រើ។

ស្រ្តីវ័យ៧៥ឆ្នាំ លើកឡើងថា៖‍ «វាពិបាកតាំងពីបោកខោអាវ ដើមឈើអីងាប់អស់ហើយ ហើយ​អាតូចមួយហ្នឹង[ចៅប្រុស] មួយថ្ងៃធ្លាប់មុជពីរបីដង ឥឡូវមុជតែម្ដង បើអ៊ំមួយថ្ងៃមុជបាន​តែ​ម្ដង​ទេ​ មិនហ៊ានមុជច្រើនទេបានបីបួនផ្ទិល»។

អ្នកស្រី ម៉ាន់ បន្តថា បើទោះបីជាមានអាជ្ញាធរខណ្ឌ និងខាងបុរី ចុះចែកទឹក​ឱ្យប្រជាពលរដ្ឋ​ក្នុង​បុរីប្រើប្រាស់បណ្ដោះអាសន្នក៏ដោយ ប៉ុន្តែតម្រូវការទឹកនៅតែមិនគ្រប់គ្រាន់​សម្រាប់ការ​ប្រើ​ប្រាស់​ប្រចាំថ្ងៃរបស់ពួគេ ស្របពេលនេះជារដូវប្រាំង អាកាសធាតុមានភាពក្ដៅផងនោះ ធ្វើឱ្យ​ការរស់នៅកាន់តែលំបាក។ អ្នកស្រីរំពឹងថា ខាងរដ្ឋាករទឹកនឹងគោរពសន្យា​ដូចធ្លាប់បានសន្យា​កាល​ពីឆ្នាំមុន​ថា នឹងរៀបចំឱ្យប្រជាពលរដ្ឋមានទឹកប្រើប្រាស់គ្រប់គ្រាន់។

អ្នកស្រី ម៉ាន់ បន្ថែមថា៖ «ទិញទឹកគេរាល់ថ្ងៃ មួយថ្ងៃអស់៥ប៊ីដុងអាប៊ីដុង២០លីត្រហ្នឹង អត់ដឹង​ទ្រាំបានត្រឹមណាទេ ឥឡូវកំពុងតែពេញពិបាកហើយ។ ខ្ញុំសំណូមពរឱ្យរដ្ឋាករទឹកជួយសម្រួល​ទៅ ឱ្យមានទឹកមានអីប្រើទៅណា៎ កូនចៅនៅក្នុងបុរីពិបាកម្នាក់ៗឃើញតែដើរ​ដឹកទឹក»។

សកម្មភាពពលរដ្ឋទៅយកទឹកប្រើប្រាស់ ខណៈអាជ្ញាធរខណ្ឌព្រែកព្នៅ និង​សង្កាត់គោករកា បានដឹកទឹកទៅចែកជូនពលរដ្ឋដែលខ្វះទឹកប្រើប្រាស់ជាច្រើនថ្ងៃ ក្នុង​បុរីពិភពថ្មី ឈូកវ៉ា១ ស្ថិតក្នុងភូមិភ្លូផ្អែម សង្កាត់គោករកា ខណ្ឌព្រែកព្នៅ រាជធានីភ្នំពេញ។ រូបថតនៅថ្ងៃទី២៥ ខែមីនា ឆ្នាំ២០២៣។ ខេមបូចា/ ឃី សុវុឌ្ឍី

បើតាមលោក ពេជ្រ សុភាព អាយុ៣៧ឆ្នាំ ប្រធានសន្តិសុខនៅបុរីពិភពថ្មីឈូកវ៉ា១ ដែលស្ថិត​ក្នុងភូមិភ្លូផ្អែម សង្កាត់គោករកា ខណ្ឌព្រែកព្នៅ ថ្លែងប្រាប់ខេមបូចា ថា តាមរបាយការណ៍​ត្រឹម​ខែកុម្ភៈ មានប្រជាពលរដ្ឋចំនួន១ពាន់ពីររយគ្រួសារកំពុងរស់នៅក្នុងទីតាំងបុរីនេះ ហើយលោក​បន្ត​ថា កង្វះខាតទឹកប្រើប្រាស់នៅក្នុងបុរីឈូកវ៉ាគម្រោងទី១ មិនមែនដោយសារតែបុរីទេ គឺ​ដោយ​សារ​តែរដ្ឋាករទឹកមិនមានទឹកគ្រប់គ្រាន់សម្រាប់ផ្គត់ផ្គង់ជូនអតិថិជន។

តែយ៉ាងណា លោក សុភាព អះអាងថា ខាងបុរីពិភពថ្មី បានខ្នះខ្នែងជួយដឹកជញ្ជូនទឹកដោយ​ឥត​គិតថ្លៃជូនពលរដ្ឋក្នុងបុរីដើម្បីប្រើប្រាស់បណ្ដោះអាសន្នផងដែរ។

លោក សុភាព ថ្លែងថា៖ «ការខ្វះខាតនេះមិនមែនជាលក្ខណៈបុរីទេ គឺមកពីកំសោយ​របស់​រដ្ឋាករទឹកដែលធ្វើឱ្យខ្វះខាតអ៊ីចឹងទេ ពីមុនមកគឺមាន[ទឹកប្រើប្រាស់]ពេញៗរហូត»។

កំពុងតែលាងសម្អាតធុងជ័រពណ៌ខៀវចាស់ចំណុះប្រមាណ៨០លីត្រ លោក ចាន់ ចាវ [ឈ្មោះ​អ្នក​សារព័ត៌មានដាក់ឱ្យ] ពាក់អាវខ្មៅដៃខ្លី ស្លៀកខោខ្លី ថ្លែងប្រាប់ខេមបូចា ថា​ លោកមក​រស់​នៅ​ក្នុងបុរីពិភពថ្មីឈូកវ៉ា១ អស់រយៈពេលជាង៥ឆ្នាំមកហើយ ឆ្នាំនេះ​ជាឆ្នាំដែលរកទឹកប្រើ​ប្រាស់​សឹងពុំបាន បើទោះបីជាលោកប្រើប្រាស់ម៉ូទ័រជំនួយដើម្បីបូមទឹកដាក់ស៊ីទែនក៏ដោយ។ បុរសរូបនេះបន្តថា គ្រួសារលោកត្រូវសន្សំសំចៃទឹកប្រើប្រាស់ដូចជាលាងបន្លៃ ស្រោចផ្កា មុជទឹក និងសកម្មភាពផ្សេងៗទៀត ដោយសារតែបញ្ហាកង្វះទឹកធ្ងន់ធ្ងរ។

លោក ចាវ និយាយថា៖ «អាជ្ញាធរទើបមកដាក់ទឹកបាន៣ថ្ងៃនឹងទេ អត់គ្រប់គ្រាន់ទេ នៅ​តែ​ខ្វះៗ ចឹងបានខ្ញុំមកដងរហូត។ ដល់តែទឹកមិនសូវសម្បូរប្រើថាំៗ បោកខោអាវ ដុសលាងអីក៏​បន្ថយដែរ»។

លោក ចាវ ប្រាប់ទៀតថា បើប្រៀបនឹងឆ្នាំមុនតំបន់លោករស់នៅគ្រាន់មានទឹកចេញខ្លះ ប៉ុន្តែ​ឆ្នាំ​នេះ​គ្មានទឹកប្រើប្រាស់តែម្ដង ហើយលោកបន្ថែមថា៖ «មិនដឹងថ្ងៃណា រាជរដ្ឋាភិបាល​ឱ្យ​មាន​ទឹកគ្រប់គ្រាន់ប្រើ ខែណាឆ្នាំណា មិនដឹង? បើថានៅតែអ៊ីចឹងរហូត តែប៉ុន្មាន​ថ្ងៃ​ទៀត​ដាច់​ខ្យល់ហើយមួយៗនៀក បើមួយអាទិត្យទៀតស្រេចហើយ»។

សកម្មភាពពលរដ្ឋទៅយកទឹកប្រើប្រាស់ បន្ទាប់ពីអាជ្ញាធរខណ្ឌព្រែកព្នៅនិងសង្កាត់គោករកា បានដឹកទឹកទៅចែកជូនពលរដ្ឋដែលខ្វះទឹកប្រើប្រាស់ជាច្រើនថ្ងៃ ក្នុងបុរីពិភពថ្មីឈូកវ៉ា១ ស្ថិតក្នុងភូមិភ្លូផ្អែម សង្កាត់គោករកា ខណ្ឌព្រែកព្នៅ រាជធានីភ្នំពេញ។ រូបថតនៅថ្ងៃទី២៥ ខែមីនា ឆ្នាំ២០២៣។ ខេមបូចា/ ឃី សុវុឌ្ឍី

មនុស្សម្នាជាច្រើននាក់បានសម្រុកយករទេះរឺម៉ក និងឡានទំនើបមកដឹកទឹកពីឡាន​ពន្លត់​អគ្គីភ័យដែលអាជ្ញាធរខណ្ឌព្រែកព្នៅបានយកមកចែកជូនប្រជាពលរដ្ឋនៅបុរីពិភពថ្មីឈូកវ៉ា១។ ម្នាក់ៗនាំគ្នាត្រង់ទឹកដាក់ធុង ខ្លះដងទឹកដាក់ចានដែក ទៅតាមលទ្ធភាព ដើម្បីយកទៅ​ប្រើ​ប្រាស់​នៅផ្ទះ ខណៈផ្ទះពួកគេពុំមានទឹកប្រើប្រាស់ឡើយចាប់តាំងពីថ្ងៃទី២៥ ​ខែមីនា ឆ្នាំ​២០២៣​នេះ។

ធ្លាប់តែមានទឹកប្រើប្រាស់ប្រើប្រាស់តាមតម្រូវការឥតមានទាស់ ឥឡូវនេះអ្នកស្រី ឯម សឿមថត  បានត្រឹមតែមកយកទឹកពីអាជ្ញាធរក្នុងបុរី ដើម្បីប្រើប្រាស់ជំនួសឱ្យទឹកដែល​ធ្លាប់​តែ​បើកក្បាលរ៉ូមីនេចេញបរិបូរណ៍។

ស្រ្តីចំណាស់វ័យ៧៥ឆ្នាំ ពាក់អាវវាលក្លៀកស្លៀកខោខ្លីត្រឹមជង្គង់ កំពុងយួរទឹកដាក់លើម៉ូតូ​ដឹកយកទៅផ្ទះ អ្នកស្រី សឿមថត លើកឡើងថា អ្នកស្រីមិនដឹងជាអាចទ្រាំបានដល់ពេលណា​ឡើយចំពោះបញ្ហាខ្វះទឹកប្រើប្រាស់នេះ។ ប៉ុន្តែអ្នកស្រីថា គ្មានជម្រើសអ្វីឡើយក្រៅតែពីរង់ចាំ និងទ្រាំ រហូតរដ្ឋាករទឹក រៀបចំប្រព័ន្ធទឹករួចរាល់ជូនប្រជាពលរដ្ឋតាមសន្យា បើទោះបីជាចៅ​តូចៗ​របស់អ្នកស្រីកើតរមាស់ យំទារមុជទឹកក៏ដោយ អ្នកស្រីបានត្រឹមតែសង្កត់ចិត្តប៉ុណ្ណោះ។

អ្នកស្រី សឿមថត ឱ្យដឹងថា៖ «ពិបាកណាស់ជួនកាលក្រោកតាំងពីម៉ោង១២ ក្រែងទឹកវាចេញ ពិបាកអីក៏ពិបាកយ៉ាងនេះ។ ក្មេងៗអាតូចៗទើបតែពីរបីឆ្នាំយំរងូវ កើតរមាស់ ព្រោះខ្វះ​ទឹក​ស្អាត ពិសេសខែនេះក្ដៅផងវារោល វាឈឺអស់ហើយយំទាររកទឹក»។

ជុំវិញបញ្ហាកង្វះទឹកប្រើប្រាស់នេះ អ្នកស្រី សឿមថត បានលើកឡើងជាក្ដីបារម្ភចំពោះ​បញ្ហា​សុខភាព អនាម័យរបស់ចៅតូចៗរបស់អ្នកស្រី ត្បិតអ្នកស្រីអាចទ្រាំភាពលំបាកទាំងនេះបាន តែអ្នកស្រីអាណិតចៅតូចៗដែលមិនដឹងអី មកត្រូវលំបាកដូច្នេះ។ ទន្ទឹមនឹងនេះ អ្នកស្រី សឿមថត អះអាងថា មិនជឿទុកចិត្តពាក្យសន្យារបស់រដ្ឋាករទឹកឡើយ ថានឹងអាចដោះស្រាយ​ឱ្យ​មានទឹកប្រើប្រាស់គ្រប់គ្រាន់ឡើងវិញដូចក្នុងសេចក្ដីប្រកាស។

អ្នកស្រី សឿមថត បន្ថែមថា៖ «ថាំចិត្តណាស់ ធ្លាប់តែយើងចាក់ទឹកមួយសេរី ដល់តែ​លាបៗ​អ៊ីចឹង!  ហើយក្នុងចិត្តគិតថា ស្រុកសុខសប្បាយហើយពិបាកអ៊ីចឹង អស់ទឹក​ពិបាកជាង​អស់​បាយ​ទៅទៀត បើបីខែទៀតងាប់តែម្ដង។ ចេះតែទ្រាំទៅ តែមិនទុកចិត្តថាខែប្រាំនេះ​បានទឹក​ប្រើទេ»

សកម្មភាពពលរដ្ឋទៅយកទឹកទៅប្រើប្រាស់ ខណៈអាជ្ញាធរខណ្ឌព្រែកព្នៅនិងសង្កាត់គោករកា បានដឹកទឹកទៅចែកជូនពលរដ្ឋដែលខ្វះទឹកប្រើប្រាស់ជាច្រើនថ្ងៃ ក្នុងបុរីពិភពថ្មីឈូកវ៉ា១ ស្ថិតក្នុងភូមិភ្លូផ្អែម សង្កាត់គោករកា ខណ្ឌព្រែកព្នៅ រាជធានីភ្នំពេញ។ រូបថតនៅថ្ងៃទី២៦ ខែមីនា ឆ្នាំ២០២៣។ ខេមបូចា/ ឃី សុវុឌ្ឍី

ឆ្លើយតបនឹងកង្វះទឹកស្អាតប្រើប្រាស់នេះ លោក ហែម ហ៊ី នាយករដ្ឋបាលខណ្ឌព្រែកព្នៅ  ប្រាប់ឱ្យដឹងថា អាជ្ញាធរខណ្ឌព្រែកព្នៅបានដោះស្រាយបញ្ហាកង្វះទឹកស្អាតជូនប្រជាពលរដ្ឋ ដោយដឹកទឹកតាមរថយន្តមកចែកជូនពលរដ្ឋដែលរស់នៅក្នុងសង្កាត់ទាំង៥នៃខណ្ឌព្រែកព្នៅ។ លោកបញ្ជាក់ថា ការខ្វះខាតទឹកប្រើប្រាស់នារដូវប្រាំងនេះ គឺទើបតែនៅឆ្នាំ២០២៣នេះ ខណៈ​ឆ្នាំកន្លងទៅមិនដែលប្រទះនឹងបញ្ហាដូច្នេះឡើយ។

លោក ហ៊ី ថ្លែងថា៖ «ការចែកនេះតាំងពីព្រឹកដល់ល្ងាច ចែកដល់ផ្ទះប្រជាពលរដ្ឋតែម្ដង​ហើយបញ្ហា​នេះទើបតែមានឆ្នាំនេះទេ»។

យ៉ាងណាមិញ លោក ហ៊ី អះអាងថា អាជ្ញាធរខណ្ឌព្រែកព្នៅនឹងបន្តចែកទឹកជូន​ប្រជាពលរដ្ឋ​រហូតទាល់តែពួកគេមានទឹកប្រើប្រាស់ឡើងវិញ ហើយបញ្ជាក់ថា កង្វះទឹកស្អាតនេះ ដោយ​សារ​តែ​តម្រូវការប្រើប្រាស់ទឹកមានការកើនឡើង ខណៈការផលិតទឹករបស់រដ្ឋាករទឹក​ស្វយ័ត​ក្រុងភ្នំពេញមិនបានគ្រប់តាមតម្រូវការ។

លោក ហ៊ី បន្ថែមទៀតថា៖‍ «ក្នុងមួយថ្ងៃរាជធានីភ្នំពេញប្រើទៅដល់៩៦ម៉ឹនម៉ែត្រគូប តែ​រដ្ឋាករ​ទឹក​ស្វយ័តផ្គត់ផ្គង់បានតែ៦៥ម៉ឺនម៉ែត្រគូប អ៊ីចឹងវាខ្វះ២៥ម៉ឺនម៉ែត្រគូបទៀត។ អាជ្ញាធរនឹងបន្ត​ចែកទឹករហូតមានទឹកពីរដ្ឋាករទឹកស្វយ័តមកវិញ»

តែយ៉ាងណាលោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និង​សន្តិភាព លើកឡើងថា បញ្ហាខ្វះទឹកប្រើប្រាស់នៅតែកើតឡើងក្នុងមួយឆ្នាំៗ​ហើយខាង​រដ្ឋាករ​ទឹក​តែងតែសន្យាថានឹងមិនឱ្យខ្វះទឹកប្រើ ប៉ុន្តែបញ្ហានេះនៅតែកើតឡើងដដែល។

លោក គិមអេង បន្តថា បញ្ហាកង្វះទឹកស្អាតគឺជាបញ្ហាសុខភាពសាធារណៈ ដែលរដ្ឋ​គប្បី​ដោះ​ស្រាយ​ឱ្យទាន់ពេលវេលា បើពុំនោះទេ ពលរដ្ឋនឹងលែងមានជំនឿតទៅទៀតចំពោះការសន្យា ហើយយល់ថាការសន្យាជាវិធីដោះស្រាយមួយពេលៗប៉ុណ្ណោះ។

លោក គិមអេង មានប្រសាសន៍ថា៖ «ខ្ញុំគិតថាបញ្ហាទឹកនេះជារឿងប្រឈមខ្លាំង និងប៉ះពាល់​ដល់​ការរស់នៅប្រចាំថ្ងៃខ្លាំងសម្រាប់ពលរដ្ឋ ព្រមទាំងរបររកស៊ីមួយចំនួនរបស់គាត់ ជាពិសេស​​វាពាក់ព័ន្ធជាមួយរឿងអនាម័យ និងសុខភាពសាធារណៈ»។

ប្រជាពលរដ្ឋដែលរស់នៅក្នុងបុរីពិភពថ្មីឈូកវ៉ា១ ស្ថិតក្នុងសង្កាត់គោករកា ខណ្ឌព្រែកព្នៅ រាជធានីភ្នំពេញ កំពុងតែទៅយកទឹកប្រើប្រាស់ ខណៈ​អាជ្ញាធរ​បានដឹកទៅចែកជូន ដោយសារផ្ទះពួកគេបានដាច់ទឹកជាច្រើនថ្ងៃហើយ។ រូបថតថ្ងៃទី ២៨ ខែមិនា ឆ្នាំ២០២៣។ ខេមបូចា/ សុវណ្ណ ស្រីពេជ្រ

ឆ្លើយតបចំពោះការត្អូញត្អែររបស់ប្រជាពលរដ្ឋនៅតាមបណ្ដាខណ្ឌមួយចំនួនអំពីបញ្ហាខ្វះខាតទឹកស្អាតប្រើប្រាស់នេះ កាលពីថ្ងៃព្រហស្បតិ៍ រដ្ឋាករទឹក​ស្វយ័តក្រុង​ភ្នំពេញ បាន​ចេញ​សេចក្តី​ជូន​ព័ត៌មាន​មួយ ឱ្យប្រជាពលរដ្ឋមានការយោគយល់ចំពោះការខ្វះខាតទឹក ដោយសារតែ​តម្រូវ​ការប្រើប្រាស់ទឹកមានការកើនឡើងដល់៨៩ម៉ឺនម៉ែត្រគូបក្នុងមួយថ្ងៃ និងមានសម្ពាធ​ខ្សោយ​នៅតាមបណ្ដាខណ្ឌនានា ក្នុងរាជធានីភ្នំពេញ។

តាមសេចក្ដីប្រកាសដដែល និយាយថា៖‍«នៅ​ឆ្នាំ​២០២៣ នេះ តម្រូវការ​ទឹក​ប្រើប្រាស់ បាន​កើនឡើងជាង៨៩ម៉ឺន​ម៉ែត្រគូបក្នុង​មួយថ្ងៃ នៅពេលដែល​សមត្ថភាព​ផលិត​ទឹក​ជាក់ស្តែង​របស់ រ​.​ទ​.​ស​.​ភ មាន​ប្រមាណ​តែ៦៤ម៉ឺន​ម៉ែត្រគូប ក្នុង​មួយថ្ងៃ​តែប៉ុណ្ណោះ​។ មានន័យថា រ​.​ទ​.​ស​.​ភ ខ្វះ​ទឹក​ផ្គត់ផ្គង់​ចំនួន ២៥ ម៉ឺន​ម៉ែត្រគូប ក្នុង​មួយថ្ងៃ​»។​

​រដ្ឋាករទឹកស្វយ័ត អះអាងនឹងដោះស្រាយបញ្ហា​ខ្វះ​ទឹកជា​ជំហានៗឱ្យ​ខាងតែបាន ចាប់ពី​ឆមាស​​ទី​១ ឆ្នាំ​២០២៣ នេះ​តទៅ​ ហើយនៅឆ្នាំ២០២៤ រដ្ឋាករទឹកស្វយ័តក្រុងភ្នំពេញ មាន​សមត្ថភាពអាចផលិតទឹកបាន១លានម៉ែត្រគូបក្នុងមួយថ្ងៃដើម្បីបំពេញតម្រូវការប្រើប្រាស់​របស់ប្រជាពលរដ្ឋឱ្យបានគ្រប់គ្រាន់។

យោងតាមរបាយការណ៍របស់អង្គការ Water.org ដែលជាអង្គការក្រៅរដ្ឋាភិបាល​ធ្វើការទៅ​លើបញ្ហាទឹក និងអនាម័យ បាននិយាយថា ក្នុងចំណោមប្រជាជនចំនួន១៦លាននាក់ មាន​ប្រជាជន១២លាននាក់ (៧២% នៃចំនួនប្រជាជន) ខ្វះលទ្ធភាពទទួលបាន​ប្រភពទឹក​ដែលអាច​ទុកចិត្ត​បាន និងគ្រប់គ្រងដោយសុវត្ថិភាព ហើយមនុស្ស ៣.៨ លាននាក់ (២៣%) ខ្វះលទ្ធភាព​ទទួល​បានដំណោះស្រាយបញ្ហាអនាម័យឱ្យប្រសើរឡើង។

អង្គការ Water.org និយាយថា៖‍ «ប្រជាជនកម្ពុជាប្រមាណ៧៥ភាគរយដែលរស់នៅជនបទ កង្វះលទ្ធភាពទទួលបានទឹកស្អាត និងអនាម័យមិនស្មើភាពគ្នា ធ្វើឱ្យប៉ះពាល់ដល់​សហគមន៍​ជនបទ»។

តាមរយៈអង្គការនេះ គេបានព្យាករណ៍ថា នៅឆ្នាំ២០២៥ នៅតាមជនបទនឹងឈានទៅ​ដល់​ការ​ទទួលបានទឹកស្អាត និងអនាម័យ នៅពេលដែលរដ្ឋាភិបាល កំណត់គោលដៅដ៏ជាក់លាក់​មួយ​ដើម្បីសម្រេចជាលទ្ធផលអំពីបញ្ហានេះ៕

រាយការណ៍បន្ថែមដោយ រ៉ាន់ ស្រីដែត

ប្រជាពលរដ្ឋដែលរស់នៅក្នុងបុរីពិភពថ្មីឈូកវ៉ា១ ស្ថិតក្នុងសង្កាត់គោករកា ខណ្ឌព្រែកព្នៅ រាជធានីភ្នំពេញ កំពុងតែទៅយកទឹកប្រើប្រាស់ ខណៈ​អាជ្ញាធរ​បានដឹកទៅចែកជូន ដោយសារផ្ទះពួកគេបានដាច់ទឹកជាច្រើនថ្ងៃហើយ។ រូបថតថ្ងៃទី ២៨ ខែមិនា ឆ្នាំ២០២៣។ ខេមបូចា/ សុវណ្ណ ស្រីពេជ្រ
680 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម