កម្មករយ៉ាងហោចណាស់ ២ ៧០០នាក់ រួមទាំងសហជីពផង នៅរោងចក្រផលិតស្បែកជើងមួយកន្លែងក្នុងខេត្តកំពង់ចាមនឹងបាត់បង់ការងារនៅខែធ្នូខាងមុខ ក្រោយពីរោងចក្រអះអាងថា មិនទទួលការបញ្ជាទិញពីឈ្មួញនៅសហរដ្ឋអាមេរិក។
ស្របពេលដែលមានចម្ងល់ជាច្រើនទាក់ទងនឹងគម្រោងបិទរោងចក្រនេះពាក់ព័ន្ធនឹងពន្ធបដិការរបស់អាមេរិក ឬយ៉ាងណា កម្មករជាច្រើនបារម្ភថាខ្លូននឹងពិបាករកការងារថ្មីធ្វើក្នុងទីផ្សារការងារក្នុងកម្ពុជា។ ក្រុមអង្គការសង្គមស៊ីវិលកំពុងតាមដានករណីនេះដើម្បីធានាថាកម្មករទទួលបានអត្ថប្រយោជន៍ស្របតាមច្បាប់ ខណៈកន្លងមករោងចក្រក៏ធ្លាប់មានភាពតានតឹងជាមួយកម្មកររហូតមានកម្មកររាប់រយនាក់ផ្ទុះការតវ៉ាកាលពីឆ្នាំទៅ ដែលកាលនោះរោងចក្ររងការចោទប្រកាន់ថាបានបញ្ឈប់កម្មករដោយគ្មានការជូនដំណឹងត្រឹមត្រូវ។
រោងចក្រដេរស្បែកជើង Le Crown មានម្ចាស់ជាជនជាតិចិនតៃវ៉ាន់។ រោងចក្រនេះជាអ្នកផ្គត់ផ្គង់ធំមួយទៅកាន់ក្រុមហ៊ុនម៉ាកយីហោធំៗនៅអាមេរិក ដូចជា Vans, The North Face និង Dickies។ ពេលនេះក្រុមហ៊ុនកំពុងស្ថិតក្នុងដំណាក់កាលឈានទៅរកការបិទដំណើរការ ហើយក៏មានគម្រោងបញ្ចប់កិច្ចសន្យាការងារជាមួយកម្មករប្រហែល ២ ៧០០នាក់ នៅត្រឹមថ្ងៃទី១០ ខែធ្នូ។ នេះបើតាមសេចក្ដីជូនដំណឹងមួយចុះថ្ងៃទី៨ ខែតុលា ឆ្នាំ២០២៥ ដែលកម្មករម្នាក់បានផ្ដល់មកសារព័ត៌ខេមបូចា។
ក្នុងសេចក្ដីជូនដំណឹងបានបញ្ជាក់ថា ប្រាក់ឈ្នួលហ្នឹងនៅតែរួមបញ្ចូលទាំងប្រាក់អតីតភាព និងអត្ថប្រយោជន៍ផ្សេងៗទៀត រហូតដល់ថ្ងៃបញ្ចប់កិច្ចសន្យាការងារ។ កម្មករដែលត្រូវបញ្ឈប់ទាំងនេះបានទទួលដំណឹងថាពួកគេនឹងទទួលបានប្រាក់បំណាច់ចំនួនប្រាំពីរថ្ងៃ ប្រាក់ខែចុងក្រោយ និងប្រាក់ឈ្នួលចំនួនប្រាំបីថ្ងៃ ដោយផ្អែកទៅតាមច្បាប់ស្ដីពីការងារ។ នេះបើតាមការឱ្យដឹងពីកម្មករម្នាក់ដែលនិយាយក្នុងលក្ខខណ្ឌមិនបញ្ចេញឈ្មោះដោយបារម្ភពីសុវត្ថិភាព។
កន្លងមកមានកម្មករជាង៨០០នាក់អះអាងថាពួកគេត្រូវរោងចក្រ Le Crown បណ្ដេញចេញដោយអយុត្តិធម៌ ប៉ុន្តែក្រុមហ៊ុនបានច្រានចោលការចោទប្រកាន់នេះ។ ការបញ្ឈប់កម្មករកាលនោះកើតឡើងក្រោយរោងចក្រប្រកាសជាលើកដំបូងពីផែនការបញ្ឈប់បុគ្គលិកប្រហែល១០ភាគរយនៃកម្មករសរុប១ម៉ឺននាក់ ដោយលើកហេតុផលថាការបញ្ជាទិញថយចុះ។
ប៉ុន្តែសម្រាប់កម្មករដែលរងផលប៉ះពាល់ដូចជាចំណាន បានយល់ថា «ហេតុផលគ្មានការបញ្ជាទិញ» គឺគ្រាន់តែជាលេសក្នុងការបញ្ឈប់បុគ្គលិកដែលបានធ្វើការនៅរោងចក្រយូរឆ្នាំ ហើយក្រុមហ៊ុននឹងជួលកម្មករថ្មីជំនួស។
ចំណាន ឱ្យដឹងថា៖ «ខ្ញុំបារម្ភពីការរើសអើសលើកម្មករចាស់ៗ» អ្នកស្រីបន្ថែមថា រោងចក្រពេលនេះមានកម្មករប្រហែល ៥ ០០០នាក់ ហើយថាអ្នកស្រីប្រហែលជាអ្នកបន្ទាប់ដែលត្រូវរោងចក្របញ្ឈប់ពីការងារក្រោយធ្វើការអស់១២ឆ្នាំ។
កម្មករធ្វើការយូរឆ្នាំផ្សេងទៀតក៏ទំនងជាមិនមានសំណាងដែរ។
ក្រោយធ្វើការអស់១០ឆ្នាំនៅរោងចក្រនេះ ហាន គឺជាកម្មករម្នាក់ក្នុងចំណោមកម្មករប្រហែល ២ ៧០០នាក់ដែលត្រូវបាត់បង់ការងារនៅចុងឆ្នាំនេះ។
ហាន លើកឡើងថា៖ «ខ្ញុំបានធ្វើការនៅទីនេះយូរឆ្នាំមកហើយ ខ្ញុំក៏មិនមានការសោកស្ដាយអ្វីដែរ ប៉ុន្តែខ្ញុំក៏មិនដឹងថានឹងត្រូវធ្វើអ្វីដែរ»។ លោកបញ្ជាក់ថា ការសន្យាថានឹងផ្ដល់ប្រាក់បំណាច់ គឺមិនបានជួយអ្វីច្រើនដល់ពួកលោកនោះទេ។
ការព្យាករអំពីស្ថានភាពវិស័យកាត់ដេរសម្លៀកបំពាក់ ដេរស្បែកជើង និងផលិតផលធ្វើដំណើរនៅកម្ពុជា គឺមានភាពមិនច្បាស់លាស់នៅឡើយ តែថានៅមានស្ថិរភាព។ កម្ពុជាដំបូងឡើងប្រឈមនឹងពន្ធបដិការអាមេរិក៤៩% ក្រោយមកធ្លាក់នៅ៣៦% ក្នុងដំណាក់កាលមួយដែលជាសង្គ្រាមពាណិជ្ជកម្មរបស់លោក ដូណាល់ ត្រាំ ហើយចុងក្រោយនេះកម្ពុជាបានទទួលការទម្លាក់ពន្ធបដិការអាមេរិកក្នុងកម្រិតប្រកួតប្រជែងជាមួយប្រទេសក្នុងតំបន់នៅត្រឹម១៩%។ ការនាំចេញសម្លៀកបំពាក់ ស្បែងជើង និងផលិតផលធ្វើដំណើរបានវិលមករកសភាពល្អប្រសើរឡើងវិញ ប៉ុន្តែធនាគារពិភពលោកបានព្រមានថាឆ្នាំក្រោយអាចមានភាពតានតឹងជាងនេះ ហើយការបញ្ជាទិញអាចមានចំនួនតិចជាងមុន។
សម្រាប់កម្មករដូចជាលោក ហាន គឺមានហានិភ័យណាស់ក្នុងពេលដែលស្ថានភាពទីផ្សារការងាររបស់កម្ពុជាមិនសូវមានស្ថិរភាព។ កម្មករចំណាកស្រុករាប់សែននាក់បានវិលត្រឡប់ពីប្រទេសថៃវិញ ក្រោយមានជម្លោះប្រដាប់អាវុធនៅតាមព្រំដែនរវាងកម្ពុជា-ថៃ។ ខណៈកម្មករភាគច្រើនជាង៨៨%ជាកម្មករក្រៅប្រព័ន្ធ និងមិនបានទទួលអត្ថប្រយោជន៍នានា ការស្វែងរកការងារនៅតាមរោងចក្រឯនេះវិញក៏មិនងាយស្រួលដូចគ្នា។
ការព្យាករពីស្ថានភាពទីផ្សារ និងការធ្លាក់ចុះនៃសេដ្ឋកិច្ចបានធ្វើឲ្យកាន់តែមានការព្រួយបារម្ភ បើទោះបីជាក្រសួងការងារបានអះអាងថា រោងចក្រ Le Crown បានគណនាប្រាក់បំណាច់ស្របតាមច្បាប់ស្ដីពីការងារ។
អ្នកនាំពាក្យក្រសួងការងារ លោក ស៊ុន មេសា អះអាងថា៖ «នីតិវិធីដែលរោងចក្រ Le Crown ធ្វើ គឺស្របទៅតាមច្បាប់ និងបានពិភាក្សាជាមួយភាគីពាក់ព័ន្ធ»។
ប៉ុន្តែអង្គការធ្វើការលើសិទ្ធិការងារសង់ត្រាល់ បានលើកឡើងថាគួរតែមានការស៊ើបអង្កេតឱ្យស៊ីជម្រៅជាងនេះ។
លោក ឃុន ថារ៉ូ ប្រធានកម្មវិធីអង្គការសង់ត្រាល់ មានប្រសាសន៍ថា ស្ថាប័នរបស់ខ្លួនកំពុងធ្វើការបញ្ជាក់លើការអះអាងថា ការបញ្ឈប់កម្មកររបស់រោងចក្រ Le Crown ព្រោះតែការថយចុះនៃការបញ្ជាទិញពីក្រុមហ៊ុន VF ដែលជាក្រុមហ៊ុនធំផ្គត់ផ្គង់សម្លៀកបំពាក់ម៉ាកយីហោល្បីៗនៅអាមេរិក។
Ashley McCormack នាយកផ្នែកទំនាក់ទំនងសាជីវកម្មរបស់ក្រុមហ៊ុន VF មិនបានឆ្លើយតបភ្លាមៗលើសំណើសុំអត្ថាធិប្បាយលើរឿងនេះនោះទេ។
អង្គការសង់ត្រាល់ ក៏បានអំពាវនាវឱ្យរោងចក្រលុបចោលលិខិតជូនដំណឹងស្ដីពីការបញ្ឈប់កម្មករចំនួន៤៩នាក់ផ្សេងទៀតដែលគេជឿថាអ្នកទាំងនោះជាថ្នាក់ដឹកនាំហសជីព និងជាសកម្មជនសហជីព។
លោក ថារ៉ូ បានបន្ថែមថា៖ «បច្ចុប្បន្ននេះ យើងកំពុងទាក់ទងទៅកាន់ក្រុមហ៊ុនបញ្ជាទិញ។ ដាច់ដោយឡែកមួយទៀត យើងក៏កំពុងស៊ើបអង្កេតលើគម្រោងរបស់ក្រុមហ៊ុនដែលចង់បិទរោងចក្រ ព្រោះថាយើងមិនទាន់បានទទួលព័ត៌មានផ្លូវការលើហេតុផលដែលថាមានការបញ្ឈប់ការបញ្ជាទិញរបស់រោងចក្រ Le Crown នោះដែរ»។
(រាយការណ៍បន្ថែមដោយ៖ ឡូន សៅដា)
ប្រែសម្រួលពីអត្ថបទភាសាអង់គ្លេស៖ Kampong Cham GFT Factory Blames Falling Orders for Thousands of Layoffs
