សហរដ្ឋអាមេរិកបន្តដាក់ប្រទេសកម្ពុជាស្ថិតក្នុងចំណាត់ថ្នាក់ទាបបំផុតបីឆ្នាំជាប់គ្នាចំពោះវិធានការឆ្លើយតបរបស់ខ្លួនលើករណីជួញដូរមនុស្ស ដោយរបាយការណ៍ថ្មីមួយបានអះអាងថា មន្ត្រីកម្ពុជាមិនទាន់បានសម្រេចបានគ្រប់គ្រាន់ ក្នុងការដោះស្រាយបញ្ហាជួញដូរមនុស្សនៅឡើយទេ ហើយមន្ត្រីខ្លះដែលគេមិនបញ្ចេញឈ្មោះបានជាប់ពាក់ព័ន្ធក្នុងសកម្មភាពជួញដូរមនុស្ស ដែលគេយកទៅបម្រើការនៅតាមទីតាំងប្រតិបត្តិការឆបោកអនឡាញនៅតំបន់ព្រំដែនកម្ពុជាទៀតផង។
របាយការណ៍ស្តីពី «ការជួញដូរមនុស្ស» ជាសាកល ចេញផ្សាយដោយក្រសួងការបរទេសសហរដ្ឋអាមេរិក នៅថ្ងៃទី២៤ ខែមិថុនា បានលើកឡើងថា មន្ត្រីកម្ពុជាមិនទាន់បានសម្រេចបានគ្រប់គ្រាន់ ក្នុងការស៊ើបអង្កេតលើករណីជួញដូរមនុស្សដ៏រីករាលដាល និងកម្លាំងពលកម្មជាជនបរទេសដែលត្រូវគេបង្ខំឱ្យបម្រើការនៅក្នុងឧស្សាហកម្មឆបោកតាមអនឡាញ ស្របពេលវិធានការឆ្លើយតបរបស់ប្រទេសកម្ពុជាចំពោះទម្រង់នៃការជួញដូរពលរដ្ឋកម្ពុជាផ្សេងទៀតក៏មិនទាន់មានភាពប្រសើរឡើងគ្រប់គ្រាន់ដែរ។
របាយការណ៍នេះបានចាត់ថ្នាក់ប្រទេសមួយចំនួនដោយផ្អែកលើការទទួលស្គាល់របស់ពួកគេ ការឆ្លើយតប និងការទប់ស្កាត់ការជួញដូរមនុស្សគ្រប់ទម្រង់ ហើយកម្ពុជាបានជាប់ចំណាត់ថ្នាក់ទាបបំផុត គឺកម្រិតទី៣ ដោយសារមានការកើនឡើងនៃអំពើជួញដូរ ការឃុំខ្លួននិងការធ្វើទារុណកម្មលើបុគ្គលិកជាជនបរទេសនៅតាមទីតាំងអាជីវកម្មអនឡាញលួចលាក់ ដែលធ្វើសកម្មភាពឆបោកប្រាក់តាមទម្រង់ផ្សេងៗ ដែលមានចាប់តាំងពីឧស្សាហកម្មល្បែងអនឡាញខុសច្បាប់ ការជួញដូររូបិយប័ណ្ណបរទេសហៅថា Forex ការឆបោកតាមរយៈការជួញដូររូបិយប័ណ្ណអេឡិចត្រូនិច crypto និងការឆបោកទិញទំនិញអនឡាញជាដើម។
វិធីសាស្ត្រឆបោកចម្រុះនេះ ត្រូវបានគេហៅជាទូទៅថា «pig butchering» ខណៈបណ្តាញសារព័ត៌មានអន្តរជាតិជាច្រើនធ្វើសេចក្តីរាយការណ៍ពីរឿងរ៉ាវរបស់ជនរងគ្រោះនៅតាមបណ្តាប្រទេសផ្សេងៗ ដែលបាត់បង់ប្រាក់ច្រើនសន្ធឹកសន្ធាប់ បន្ទាប់ពីបានជជែកជាមួយជនឆបោក ដែលត្រូវបានគេរកឃើញថា មានប្រភពនៅតំបន់ទន្លេមេគង្គ រួមទាំងបុគ្គលិកដែលត្រូវគេបង្ខំឱ្យធ្វើការនៅកម្ពុជាផងដែរ។
វិធីសាស្ត្រឆបោកទាំងនេះត្រូវបានគេហៅឈ្មោះបែបនេះ ដោយសារតែបុគ្គលិកឆបោកមួយចំនួនបង្កើតការសន្ទនា ឬទំនាក់ទំនងស្នេហាជាមួយនឹងគោលដៅរបស់ពួកគេ មុនពេលបញ្ចុះបញ្ចូលពួកគេឱ្យដាក់តម្កល់ប្រាក់ ដែលជាញឹកញាប់តាមរយៈការវិនិយោគប្រាក់គ្រីបតូ មានន័យថា «ធ្វើឱ្យធាត់» ហើយបន្ទាប់មក «សម្លាប់» ជ្រូកនោះតែម្តង។
របាយការណ៍ដដែលក៏បានកត់សម្គាល់ផងដែរថា ស្របពេលវិធានការឆ្លើយតបរបស់រដ្ឋាភិបាលនៅមិនបានគ្រប់គ្រាន់ ទម្រង់នៃការជួញដូរផ្សេងទៀត ដែលផ្តោតគោលដៅលើពលរដ្ឋកម្ពុជាបន្តកើតមាន រួមមានការបញ្ចាំខ្លួនដោះបំណុលនៅតាមសិប្បកម្មផលិតឥដ្ឋ ការជួញដូរមនុស្សធ្វើជាកម្មករនេសាទសមុទ្រទឹកជ្រៅ និងការជួញដូរផ្លូវភេទនៅតាមព្រំដែនកម្ពុជា។
ក្រសួងការបរទេសអាមេរិកបានលើកឡើងថា មន្ត្រីអនុវត្តច្បាប់ធ្វើការកំណត់អត្តសញ្ញាណជនរងគ្រោះដោយសារការជួញដូរមិនបានត្រឹមត្រូវ ផ្ទុយទៅវិញបានចាត់ទុកការអំពាវនាវរកជំនួយរបស់បុគ្គលិកទាំងនោះថា ជា «វិវាទការងារ» ទោះបីជាក្រសួងសង្គមកិច្ចមានកំណត់គោលការណ៍ណែនាំអំពីការកំណត់អត្តសញ្ញាណជនរងគ្រោះ និងសេវាការពារមួយចំនួនក៏ដោយ។
របាយការណ៍នេះក៏បានកត់សម្គាល់ផងដែរថា កម្ពុជាចាំបាច់ត្រូវផ្តល់ជំនួយគាំទ្របន្ថែមទៀតដល់ជនរងគ្រោះនៃការជួញដូរកុមារ និងការជួញដូរកម្លាំងពលកម្ម ដោយផ្តល់ថវិកាបន្ថែមទៀតពីរដ្ឋាភិបាល និងដោយមិនពឹងផ្អែកច្រើនលើជំនួយថវិកាពីអង្គការក្រៅរដ្ឋាភិបាល។
លោកស្រី ជូ ប៊ុនអេង ជាអនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បានការពារវិធានការឆ្លើយតបរបស់កម្ពុជាចំពោះការចោទប្រកាន់អំពីការជួញដូរមនុស្សសម្រាប់ឧស្សាហកម្មឆបោកតាមប្រព័ន្ធអនឡាញ ដោយលោកស្រីមានប្រសាសន៍ថា ប្រទេសកម្ពុជាមានការពិបាក ក្នុងការដោះស្រាយបទល្មើសឆ្លងដែន និងប្រើបច្ចេកវិទ្យាទំនើបទាំងនេះ។
លោកស្រីបានមានប្រសាសន៍ថា៖ «ប្រទេសណាក៏ដោយដែលយើងបានទៅជួបគ្នាគឺបានជជែកគ្នាថា គ្មានទាន់ប្រទេសណាធ្វើបានជោគជ័យទេ។ ហើយវាជាឧក្រិដ្ឋកម្មឆ្លងដែនអ្នកប្រព្រឹត្តពិតប្រាដដហ្នឹង គឺជាអ្នកណា យើងនៅមិនទាន់ដឹងទេ។ ហើយយើងអាចបង្ក្រាបបាននៅតែអ្វីដែលនៅចំពោះមុខយើងប៉ុណ្ណោះ» ។
លោកស្រីបានបន្តថា សូម្បីតែប្រទេស «ធំៗ» ដូចជាសហរដ្ឋអាមេរិក ក៏មិនទាន់អាចដោះស្រាយបទល្មើសទាំងនេះបានដែរ ហើយពលរដ្ឋអាមេរិកនៅតែក្លាយជាជនរងគ្រោះនៃអំពើឆបោកតាមអនឡាញ។ លោកស្រី ជូ ប៊ុនអេង បានមានប្រសាសន៍ថា លោកស្រីបាននិងកំពុងពិភាក្សាបញ្ហានេះជាមួយសហរដ្ឋអាមេរិក និងសុំជំនួយ ដើម្បីដោះស្រាយបទល្មើសបែបនេះ។
លោកស្រីបានមានប្រសាសន៍ថា៖ «បច្ចុប្បន្ននេះ យើងឃើញថា ប្រទេសមួយៗមានប្រជាពលរដ្ឋរបស់ខ្លួនឯងទៅចាញ់បោក ឬទៅជាជនរងគ្រោះដោយសារតែប្រព័ន្ធអាយធី ឬការឆបោក ដូច្នេះមានន័យថា ក្នុងបណ្តាប្រទេសណាក៏ពុំទាន់បានទទួលជោគជ័យនៅឡើយទេ»។
ផ្ទុយទៅវិញ ក្រសួងការបរទេសអាមេរិកបានអះអាងថា មន្ត្រីអនុវត្តច្បាប់មិនបានធ្វើការបង្រ្កាបគ្រប់គ្រាន់ ឬឆ្មក់ចូលឆែកទីតាំងអាជីវកម្មប្រកបដោយប្រសិទ្ធិភាពទេ នៅពេលដែលបុគ្គលិកទូរសព្ទទៅក្រសួងមហាផ្ទៃ ឬស្ថានទូតសុំជំនួយ ហើយមន្ត្រីកម្ពុជាត្រូវការព័ត៌មានច្រើនពេកមុនពេលចាប់ផ្តើមឆ្មក់ឆែក។
របាយការណ៍នេះបានចោទប្រកាន់ថា ទីតាំងអាជីវកម្មឆបោកមួយចំនួនត្រូវបានផ្តល់ដំណឹងជាមុន មុនពេលមានការឆ្មក់ចូលឆែក។ របាយការណ៍នេះសរសេរថា៖ «មន្រ្តីរដ្ឋាភិបាលជាន់ខ្ពស់ និងទីប្រឹក្សាមួយចំនួនកាន់កាប់ទីតាំងនិងអគារដោយផ្ទាល់ ឬតាមរយៈអាជីវកម្ម ដែលគេដឹងថា ត្រូវបានប្រើប្រាស់ដោយក្រុមឆបោកតាមអនឡាញ ដើម្បីកេងប្រវ័ញ្ចជនរងគ្រោះតាមរយៈការជួញដូរកម្លាំងពលកម្ម និងទទួលបានអត្ថប្រយោជន៍ហិរញ្ញវត្ថុដោយផ្ទាល់ពីបទល្មើសទាំងនេះ»។
របាយការណ៍ដដែលបានលើកឡើងថា៖ «ការពាក់ព័ន្ធរបស់មន្ត្រី និងពួកអ្នកជំនួញធំៗបានបណ្តាលឱ្យមានការអនុវត្តច្បាប់ដោយចោះៗ និងមានហេតុផលនយោបាយ ដែលរារាំងសកម្មភាពអនុវត្តច្បាប់ប្រកបដោយប្រសិទ្ធភាពប្រឆាំងនឹងបទល្មើសជួញដូរមនុស្ស ដែលនៅតែរីករាលដាលក្នុងរយៈពេលមួយឆ្នាំកន្លងមកនេះ»។
របាយការណ៍នេះក៏បានកត់សម្គាល់ផងដែរថា រដ្ឋាភិបាលបានតែងតាំងបុគ្គលមួយចំនួនឱ្យកាន់តួនាទីដែលទទួលខុសត្រូវ ឬមានឥទ្ធិពលសំខាន់លើការងារប្រឆាំងការជួញដូរមនុស្ស បើទោះបីជាមានការចោទប្រកាន់ជាសាធារណៈនាពេលកន្លងមក និងកំពុងបន្តថា មានការជាប់ពាក់ព័ន្ធជាផ្លូវការរបស់ពួកគេនៅក្នុងករណីពាក់ព័ន្ធនឹងការជួញដូរមនុស្សក៏ដោយ។
លោក ខៀវ សុភ័គ អ្នកនាំពាក្យក្រសួងមហាផ្ទៃ បានស្នើសុំឱ្យសហរដ្ឋអាមេរិកប្រាប់ឈ្មោះមន្ត្រី ដែលតាមចោទថា បានចូលដៃប្រព្រឹត្តិអំពើឆបោកតាមអនឡាញ និងឧស្សាហកម្មល្បែងស៊ីសង។
លោកបានមានប្រសាសន៍ថា៖ «យើងបានប្រឹងប្រែងអស់ពីសមត្ថភាព ហើយយើងនៅតែត្រូវការការគាំទ្រ ជាពិសេសពីសហរដ្ឋអាមេរិក។ យើងបើកចំហរឲ្យសហរដ្ឋអាមេរិក តើអ្នកណាខ្លះពុករលួយ? ឲ្យយើងខ្ញុំបានដឹងមក។ យើងមិនដែលនិយាយថាទេ ចំពោះ [របាយការណ៍ទាំងនេះ]… ចេះតែចោទប្រកាន់យើង ហើយតើមន្ត្រីប្រាប់ឈ្មោះមក… យើងរីករាយនឹងធ្វើការងារនេះ កុំចោទប្រកាន់យើង!»។
លោកបានបន្ថែមថា ក្រសួងមហាផ្ទៃបានទទួលពាក្យបណ្តឹង និងសំណើសុំជំនួយពី «បុគ្គលិករាប់ពាន់នាក់» ហើយសហការជាមួយអង្គការក្រៅរដ្ឋាភិបាល រួមទាំងអង្គការប្រឆាំងការជួញដូរមនុស្ស ដែលមានមូលដ្ឋាននៅសហរដ្ឋអាមេរិក ឈ្មោះអង្គការបេសកកម្មយុត្តិធម៌អន្តរជាតិ (International Justice Mission) ក្នុងចំណោមអង្គការដទៃទៀត។
លោក ប៉ែន បូណា អ្នកនាំពាក្យរដ្ឋាភិបាល បានបដិសេធធ្វើអត្ថាធិប្បាយ ហើយបានបង្វែរសំណួរទៅក្រសួងមហាផ្ទៃវិញ។ លោក ជុំ សុន្ទរី អ្នកនាំពាក្យក្រសួងការបរទេសមិនបានឆ្លើយតបនឹងសំណួររបស់ខេមបូចាទេ។
ទោះបីជារបាយការណ៍នេះមិនបានបញ្ជាក់ឈ្មោះមន្ត្រីជាន់ខ្ពស់ និងទីប្រឹក្សាដែលតាមចោទថា មានការទំនាក់ទំនងនឹងអំពើឆបោកក៏ដោយ ក៏អត្ថបទព័ត៌មានស៊ើបអង្កេតនាពេលថ្មីៗបានផ្តល់ព័ត៌មានបន្ថែមទៀត៖ សារព័ត៌មាន VOD English ដែលពេលនេះលែងដំណើរការ បានរកឃើញទីតាំងប្រតិបត្តិការអំពើឆបោក ដែលមានទំនាក់ទំនងជាមួយលោកអ្នកឧកញ៉ា ទ្រី ភាព ជាទីប្រឹក្សារដ្ឋាភិបាល ដែលរងទណ្ឌកម្មពីសហអាមេរិក និងលោក កុក អាន ជាសមាជិកព្រឹទ្ធសភា។ ទន្ទឹមនឹងនេះ វិទ្យុអាស៊ីសេរី បានរកឃើញការឃុំខ្លួន និងការធ្វើទារុណកម្មនៅទីតាំងជាប់ពាក់ព័ន្ធជាមួយលោក ចេន ហ្ស៊ី ដែលជាប្រធានក្រុមហ៊ុន Prince Group។ លោក ចេន ហ្ស៊ី ដែលទទួលបានសញ្ជាតិខ្មែរ គឺជាទីប្រឹក្សារបស់លោក ហ៊ុន សែន ប្រធានព្រឹទ្ធសភា។
កាលពីខែមុន សហភាពអឺរ៉ុបនិងអង្គការសហប្រជាជាតិបានកំណត់ពេលដាក់ដំណើរការគម្រោងប្រឆាំងការជួញដូរមនុស្សរបស់ខ្លួនឡើងវិញ បន្ទាប់ពីដឹងថា កម្មវិធីរបស់ខ្លួន នឹងត្រូវរៀបចំធ្វើនៅសណ្ឋាគារមួយ ដែលជាកម្មសិទ្ធិរបស់លោក លី យ៉ុងផាត់ សមាជិកព្រឹទ្ធសភា ដែលតាមចោទថា បានជួលទីតាំងនោះសម្រាប់ប្រតិបត្តិការឆបោក នេះបើតាមសេចក្តីរាយការណ៍របស់កាសែត New York Times ។
នៅពេលនិយាយអំពីអំពើឆបោក និងឧស្សាហកម្មល្បែងអនឡាញ របាយការណ៍នេះរៀបរាប់អំពីការធ្វើបាបដ៏ឃោរឃៅបំផុតមកលើបុគ្គលិក ជាពិសេសជនបរទេស ដែលត្រូវបានជួញដូរ ឃុំខ្លួន ហើយនៅពេលខ្លះ ត្រូវបានធ្វើទារុណកម្ម ឬសម្លាប់តាមទីតាំងឆបោក។ ក្រៅពីសេចក្តីរាយការណ៍អំពីការធ្វើបាប និងការចាប់បង្ខាំង បុគ្គលិកមួយចំនួនបាននិយាយថា ពួកគេបានធ្វើការដោយបានដឹងព័ត៌មានខ្លះអំពីការងារដែលពួកគេនឹងត្រូវធ្វើ ហើយតាមព័ត៌មានថា សេរីភាពរបស់អ្នកផ្សេងទៀតមានកម្រិត រួមទាំងបុគ្គលិកកម្ពុជាដែលត្រូវបានជ្រើសរើសឱ្យធ្វើការងារ «អនឡាញ» ទាំងនេះ។
សេចក្តីរាយការណ៍នេះក៏បានផ្តោតទៅលើការជួញដូរមនុស្សទៅកាន់កំពង់ផែក្រុងព្រះសីហនុ ដែលឱ្យឈ្មោះមិនត្រឹមត្រូវថា ជា «តំបន់សេដ្ឋកិច្ចពិសេសក្រោមកិច្ចព្រមព្រៀងគំនិតផ្តួចផ្តើមខ្សែក្រវាត់ និងផ្លូវ រវាងកម្ពុជា និង [ចិន]» ខណៈដែលអំពើឆបោកបាននិងកំពុងកើនឡើងនៅតាមទីក្រុងផ្សេងទៀតដូចជា ប៉ោយប៉ែត បាវិត សំពៅពូន ក៏ដូចជានៅតាមទីតាំងដាច់ស្រយាលជាច្រើនទៀត។
ក្រសួងការបរទេសអាមេរិកបានកត់សម្គាល់ថា មានបុគ្គលិកប្រហែល១០០ ០០០នាក់ ត្រូវបានជួញដូរ និងបង្ខំឱ្យធ្វើការនៅក្នុងឧស្សាហកម្មល្បែងអនឡាញ និងឆបោក ដោយលើកឡើងពីរបាយការណ៍សិទ្ធិមនុស្សរបស់អង្គការសហប្រជាជាតិកាលពីឆ្នាំមុន ដែលរដ្ឋាភិបាលក៏បានបដិសេធផងដែរ។
របាយការណ៍ដដែលនេះបានសង្កត់ធ្ងន់លើការកើនឡើងនៃឧស្សាហកម្មល្បែងអនឡាញ និងឧស្សាហកម្មឆបោកនៅកម្ពុជា ដែលជាហេតុផលនៅក្នុងការផ្តល់ចំណាត់ថ្នាក់ដល់ប្រទេសកម្ពុជា ហើយបញ្ហានេះបានធ្វើឱ្យមានការរិះគន់ពីឧត្តមស្នងការសហប្រជាជាតិទទួលបន្ទុកសិទ្ធិមនុស្ស អ្នករាយការណ៍ពិសេសរបស់អង្គការសហប្រជាជាតិ ក៏ដូចជាបណ្តាប្រទេសសមាជិកអាស៊ាន។
កាលពីឆ្នាំ២០២២ ប្រទេសកម្ពុជាត្រូវបានទម្លាក់ចំណាត់ថ្នាក់ដល់កម្រិតទី៣ ដែលមានន័យថា ប្រទេសនេះមិនបានសម្រេចបានតាម «ស្តង់ដារអប្បបរមា» ក្នុងការបញ្ឈប់ និងទប់ស្កាត់ករណីជួញដូរមនុស្ស ការពារជនរងគ្រោះ និងផ្តន្ទាទោសជនល្មើស។
ការធ្លាក់ចុះនៃចំណាត់ថ្នាក់នេះបានកើតឡើងស្របពេលដែលអំពើឆបោក និងល្បែងតាមអនឡាញកាន់តែរីករាលដាល និងអាចមើលឃើញយ៉ាងច្បាស់ ដោយបុគ្គលិកទាំងអស់អះអាងថា ពួកគេត្រូវបានគេជួញដូរ ឃុំខ្លួន និងធ្វើទារុណកម្មឱ្យធ្វើការងារ ដែលជាសកម្មភាពឆបោកតាមអនឡាញ។
ប្រទេសមីយ៉ាន់ម៉ា គឺជាប្រទេសតំបន់ទន្លេមេគង្គមួយទៀត ដែលបានទទួលចំណាត់ថ្នាក់ទាបដូចប្រទេសកម្ពុជាដែរ ទីដែលបញ្ហាឆបោក និងល្បែងអនឡាញនៅប្រទេសមីយ៉ាន់ម៉ាកាន់តែធ្ងន់ធ្ងរឡើងដោយសារជម្លោះដែលកំពុងបន្ត។ ទន្ទឹមនឹងនោះ ប្រទេសឡាវជាប់ចំណាត់ថ្នាក់ក្នុងតារាងតាមដានកម្រិតទី២ ចំណែកប្រទេសវៀតណាម និងថៃជាប់ចំណាត់ថ្នាក់កម្រិតទី២។
ផ្ទុយទៅវិញ ប្រទេសហ្វីលីពីន ជាប់ចំណាត់ថ្នាក់កម្រិតទី១ ទោះបីជាប៉ុន្មានសប្តាហ៍ថ្មីៗនេះ បុគ្គលិកនៅក្នុងឧស្សាហកម្មល្បែងអនឡាញបានអះអាងថា ពួកគេត្រូវបានគេជួញដូរ និងធ្វើទារុណកម្មក្នុងប្រតិបត្តិការស្រដៀងគ្នានៅតាមក្រុមហ៊ុនល្បែងអនឡាញហ្វីលីពីន (POGOs) មួយចំនួន ក៏ដោយ ៕
ប្រែសម្រួលពីអត្ថបទភាសាអង់គ្លេស៖ U.S. Reprimands Cambodia’s Trafficking, Online Scam Response: Report
