និស្សិតកម្ពុជាចំនួន៥៥រូប បានទទួលអាហារូបករណ៍អូស្ត្រាលីសម្រាប់ឆ្នាំសិក្សា២០២៧ ដោយចាប់ផ្តើមជាមួយកម្មវិធីណែនាំសម្រាប់និស្សិតនៅសាកលវិទ្យាល័យភូមិន្ទភ្នំពេញ (RUPP) ក្នុងសប្តាហ៍នេះ ខណៈសង្គមស៊ីវិលជំរុញឱ្យពង្រីកឱកាសស្រដៀងគ្នានេះដល់យុវជនដែលជួបប្រទះភាពខ្វះខាត។
យោងតាមស្ថានទូតអូស្ត្រាលីប្រចាំកម្ពុជា កម្មវិធីណែនាំដែលរៀបចំនៅសាកលវិទ្យាល័យភូមិន្ទភ្នំពេញ មានគោលបំណងជួយដល់និស្សិតទាំងនោះត្រៀមខ្លួនសម្រាប់ការសិក្សានៅប្រទេសអូស្ត្រាលី។ អ្នកទទួលអាហារូបករណ៍ចំនួន៥រូប បានទទួលអាហារូបករណ៍តាមរយៈកម្មវិធីភាពជាដៃគូអូស្ត្រាលី-មេគង្គ។
ស្ថានទូតបាននិយាយថា និស្សិតអាហារូបករណ៍ទាំងនេះនឹងចូលរួមជាផ្នែកមួយជាមួយ «និស្សិតកម្ពុជាឆ្នើមៗជាង ១ ១០០ នាក់ ដែលបានទទួលអាហារូបករណ៍ទៅសិក្សានៅប្រទេសអូស្ត្រាលីក្រោមកម្មវិធី Australia Awards និងកម្មវិធីដែលមានមុននេះ»។
លោក Derek Yip ឯកអគ្គរាជទូតអូស្ត្រាលីប្រចាំកម្ពុជា បាននិយាយថា អាហារូបករណ៍ Australia Awards បើកទទួលពាក្យពីបេក្ខជនមកពីគ្រប់វិស័យនៅកម្ពុជា រួមទាំងស្ថាប័នរដ្ឋ វិស័យសិក្សាធិការ និងវិទ្យាស្ថានស្រាវជ្រាវ សង្គមស៊ីវិល ប្រព័ន្ធផ្សព្វផ្សាយ ក៏ដូចជាវិស័យឯកជនផងដែរ។
លោកបាននិយាយថា កម្មវិធី Equity Pathways Program (EPP) គឺជាកម្មវិធីគាំទ្រមួយដែលរៀបចំឡើងដើម្បីលើកកម្ពស់ការចូលរួមប្រកបដោយសមភាពនិងធ្វើឱ្យប្រសើរឡើងនូវបរិយាបន្នសង្គមក្នុងការទទួលបានអាហារូបករណ៍ តាមរយៈការជួយដល់ក្រុមមនុស្សនៅក្នុងសង្គមកម្ពុជាដែលបានប្រឈមនឹងឧបសគ្គផ្នែកសង្គម ការអប់រំ និងរចនាសម្ព័ន្ធ ដែលកំណត់លទ្ធភាពរបស់ពួកគេក្នុងការទទួលបានឱកាស រួមទាំងអាហារូបករណ៍។
អ្នកចូលរួមក្នុងកម្មវិធី EPP ទទួលបានការបណ្តុះបណ្តាលភាសាអង់គ្លេស ការត្រៀមខ្លួនសម្រាប់ការសម្ភាស ការអភិវឌ្ឍវិជ្ជាជីវៈ និងការណែនាំពីអ្នកមានបទពិសោធន៍ ដើម្បីប្រកួតប្រជែងយកអាហារូបករណ៍ Australia Awards ដែលអ្នកចូលរួមជាច្រើនបន្តទទួលបានអាហារូបករណ៍ក្រោយចូលរួមកម្មវិធីនេះ។ អ្នកទទួលអាហារូបករណ៍អាចជ្រើសរើសសិក្សាគ្រប់មុខជំនាញ លើកលែងតែជំនាញគ្រប់គ្រងអាជីវកម្មទូទៅ។
លោកបាននិយាយថា៖ «យើងតែងតែរៀបចំសកម្មភាពផ្សព្វផ្សាយដែលផ្តោតលើស្ត្រី ជនមានពិការភាព និងប្រជាជននៅតំបន់ជនបទ ដែលក្នុងនោះរួមមានកម្មវិធី “Dare to Dream” ដែលធ្វើដំណើរទៅតាមបណ្តាខេត្ត ហើយបានទៅដល់ខេត្តភាគច្រើននៅកម្ពុជា»។
ការតាមដាន ការវាយតម្លៃ និងការសិក្សា (MEL) គឺជាផ្នែកសំខាន់មួយនៃកម្មវិធីអាហារូបករណ៍ Australia Awards ដែលផ្តល់ទិន្នន័យអំពីវឌ្ឍនភាពឆ្ពោះទៅរកលទ្ធផលដែលរំពឹងទុក រួមទាំងការលើកកម្ពស់បរិយាបន្ន។
លោក Yip បាននិយាយថា៖ «កម្មវិធី Equity Pathways បានជួយពលរដ្ឋកម្ពុជាដែលមានសមត្ថភាពមកពីមជ្ឈដ្ឋានដែលមានឱកាសតិចឬមកពីប្រភពផ្សេងៗឱ្យត្រៀមខ្លួននិងបំពេញតាមលក្ខខណ្ឌតម្រូវសម្រាប់អាហារូបករណ៍ Australia Awards»។
អ៊ុំ កែវរិទ្ធា ដែលជាអ្នកទទួលបានអាហារូបករណ៍ម្នាក់ នឹងបន្តថ្នាក់អនុបណ្ឌិត ការអនុវត្ត និងភាពជាអ្នកដឹកនាំសម្រាប់ការគាំទ្រជនមានពិការភាពនៅសាកលវិទ្យាល័យ South Australia។ អ្នកស្រីធ្វើការនៅក្រសួងសង្គមកិច្ច អតីតយុទ្ធជន និងយុវនីតិសម្បទា។
កែវរិទ្ធា បានប្រាប់ថា៖ «ពេលខ្ញុំត្រូវបានជ្រើសរើសជាបេក្ខជនសម្រាប់ការសម្ភាសក្នុងវគ្គដំបូង ខ្ញុំមានអារម្មណ៍ថាដូចជាសុបិនអ៊ីចឹង។ ខ្ញុំគិតថា អាហារូបករណ៍នេះមានការប្រកួតប្រជែងខ្លាំងណាស់។ បន្ទាប់មក ខ្ញុំបានឆ្លងកាត់គ្រប់ដំណាក់កាលជាបន្តបន្ទាប់ ចាប់ពីការដាក់ពាក្យ និងការសម្ភាស រហូតដល់ដំណាក់កាលចុងក្រោយ។ ខ្ញុំមិនដែលស្រមៃថា ខ្ញុំនឹងអាចមកដល់ដំណាក់កាលនេះឡើយ»។
កែវរិទ្ធា បាននិយាយថា ឧបសគ្គមួយក្នុងចំណោមឧបសគ្គដំបូងរបស់គាត់គឺការខ្វះទំនុកចិត្តលើខ្លួនឯង ដោយសារមិត្តភក្តិមួយចំនួនរបស់គាត់ប្រាប់ថា អាហារូបករណ៍នេះ «ពិបាកទទួលបានណាស់»។
កែវរិទ្ធា បានប្រាប់សារព័ត៌មានខេមបូចាថា៖ «ពួកគេប្រាប់ខ្ញុំថា អាហារូបករណ៍នេះពិបាកខ្លាំងណាស់ ហើយខ្ញុំប្រ ហែល ជាមិនមានឱកាសទទួលបានទេ។ ពេលឮបែបនោះ ខ្ញុំក៏ចាប់ផ្តើមសង្ស័យសមត្ថភាពខ្លួនឯង ហើយក៏មិនសូវមានទំនុកចិត្តថាខ្លួនអាចជោគជ័យដែរ»។
នាងបានប្រាប់ថា កម្មវិធីភាសាអង់គ្លេសដែលផ្តល់តាមរយៈអាហារូបករណ៍ បានជួយធ្វើឱ្យសមត្ថភាពភាសាអង់គ្លេស និងទំនុកចិត្តរបស់ខ្លួនប្រសើរឡើង ដើម្បីប្រកួតប្រជែងជាមួយបេក្ខជនដទៃទៀត។
នាងបានជ្រើសរើសជំនាញសិក្សាពាក់ព័ន្ធពិការភាពដោយសារបញ្ហាពិការភាពនៅតែជាបញ្ហាសំខាន់មួយនៅកម្ពុជា ហើយវិស័យនេះក៏ជាផ្នែកមួយនៃយុទ្ធសាស្ត្រអភិវឌ្ឍន៍ជាតិរបស់រដ្ឋាភិបាលផងដែរ។
នាង បានលើកឡើងថា៖ «ខ្ញុំជឿថា នៅពេលខ្ញុំត្រឡប់មកវិញខ្ញុំនឹងអាចចូលរួមចំណែកក្នុងការអភិវឌ្ឍវិស័យពិការភាព ជាពិសេសតាមរយៈក្រសួងសង្គមកិច្ច»។
កែវរិទ្ធា បានរំឭកថា សមត្ថភាពភាសាអង់គ្លេស ជាបញ្ហាប្រឈមដ៏ធំបំផុតមួយ ហើយបានលើកទឹកចិត្តបេក្ខជនដែលមានបំណងដាក់ពាក្យឱ្យខិតខំអនុវត្តន៍ជាប្រចាំ។ អ្នកស្រីក៏បានជំរុញឱ្យពួកគេយល់ច្បាស់ពីគោលដៅរបស់ខ្លួន មុនពេលដាក់ពាក្យ។
អ្នកទទួលអាហារូបករណ៍ម្នាក់ទៀត លោក ថាន់ យុធ្យា បាននិយាយថា កម្មវិធីនេះបានចូលរួមចំណែកអភិវឌ្ឍធនធានមនុស្សរបស់កម្ពុជា ចាប់តាំងពីការបង្កើតឡើងក្នុងឆ្នាំ១៩៩៤។ អតីតនិស្សិតអាហារូបករណ៍ Australia Awards ជាច្រើននាក់ បច្ចុប្បន្នកាន់តំណែងជាអ្នកដឹកនាំនៅក្នុងស្ថាប័នរដ្ឋ និងឯកជន ហើយបន្តចែករំលែកបទពិសោធន៍ និងចំណេះដឹងដែលពួកគេទទួលបានពីប្រទេសអូស្ត្រាលីផងដែរ។
លោកបាននិយាយថា៖ «នៅពេលក្រឡេកមើលអតីតនិស្សិតដែលបានបញ្ចប់ការសិក្សានៅអូស្ត្រាលី យើងឃើញថា ពួកគេជាច្រើនបានបន្តដឹកនាំ ឬធ្វើការនៅក្នុងស្ថាប័នរដ្ឋ និងឯកជន។ គោលដៅរបស់ខ្ញុំក៏ចង់ធ្វើដូចពួកគេដែរ ដើម្បីចូលរួមចំណែក និងជួយប្រទេសរបស់យើងឱ្យរីកចម្រើន និងអភិវឌ្ឍបានលឿនជាងមុន»។
លោក យុធ្យា បានដាក់ពាក្យសិក្សាថ្នាក់អនុបណ្ឌិតផ្នែកវិទ្យាសាស្ត្រទិន្នន័យ ដែលក៏មានរៀនមុខវិជ្ជាខ្លះពាក់ព័ន្ធនឹងបញ្ញាសិប្បនិម្មិតផងដែរ។ លោកជ្រើសរើសជំនាញនេះ ដោយសារការងារបច្ចុប្បន្នរបស់លោកពាក់ព័ន្ធនឹងការតាមដាន និងវាយតម្លៃការអនុវត្តយុទ្ធសាស្ត្រអភិវឌ្ឍន៍។
លោកបានបន្តថា៖ «យើងមានទិន្នន័យជាច្រើន ដែលក្នុងនោះរួមមានទិន្នន័យរដ្ឋបាល និងទិន្នន័យពីការស្ទង់មតិដែលប្រមូលដោយវិទ្យាស្ថានជាតិស្ថិតិ។ ប៉ុន្តែចន្លោះប្រហោងមួយដែលខ្ញុំបានសង្កេតឃើញ គឺការប្រើប្រាស់ទិន្នន័យទាំងនេះដើម្បីបង្កើតជាភស្តុតាង ឬធាតុចូលសម្រាប់អ្នកធ្វើការសម្រេចចិត្ត នៅមានកម្រិតនៅឡើយ»។
លោកបានលើកឡើងថា ការតាមដានការអនុវត្តមានសារៈសំខាន់ ពីព្រោះចាំបាច់ត្រូវតាមដាន ដើម្បីដឹងថា គោលនយោបាយត្រូវបានអនុវត្តយ៉ាងដូចម្តេច។ បើគ្មានការតាមដានទេ វាពិបាកដឹងថា គោលនយោបាយនោះមានប្រសិទ្ធភាពកម្រិតណា។
លោក បានបន្ថែមថា៖ «ដូច្នេះ ខ្ញុំចង់ស្វែងរកវិធីបញ្ចូលគ្នានូវទិន្នន័យប្រភេទផ្សេងៗ ទាំងទិន្នន័យអត្ថបទ ដូចជារបាយការណ៍ និងទិន្នន័យស្ទង់មតិ ដើម្បីបម្លែងវាទៅជាភស្តុតាងដែលអាចជួយថ្នាក់ដឹកនាំសម្រេចថា គួរធ្វើអ្វីបន្តទៀត គួរផ្តោតលើចំណុចណា ឬបែងចែកធនធានបន្ថែមទៅកាន់ផ្នែកណា ដើម្បីឱ្យគោលនយោបាយមានប្រសិទ្ធភាពកាន់តែខ្ពស់»។
លោក ណុប វី នាយកប្រតិបត្តិនៃសមាគមសម្ព័ន្ធអ្នកសារព័ត៌មានកម្ពុជា (ខេមបូចា) បានលើកឡើងថា នៅតែមានគម្លាតគ្នាឆ្ងាយក្នុងការទទួលបានឱកាសអប់រំ ជាពិសេសសម្រាប់យុវជនមកពីតំបន់ជនបទដាច់ស្រយាលក៏ដូចជាអ្នកមកពីគ្រួសារមានចំណូលទាប។
លោក បានបន្តថា៖ «ក៏មានយុវជនមកពីគ្រួសារក្រីក្រ ឬគ្រួសារដែលមានបន្ទុកធ្ងន់ធ្ងរ ដែលក្នុងនោះរួមមានទាំងកូនៗរបស់សកម្មជនសិទ្ធិមនុស្ស គ្រួសារជនជាតិដើមភាគតិចនៅតំបន់ដាច់ស្រយាល កសិករ កម្មករ និងសកម្មជនបរិស្ថាន។ ពួកគេច្រើនតែមានឱកាសតិចតួចក្នុងការទទួលបានការអប់រំ និងចូលរួមការងារសង្គម»។
លោកបានបន្តទៀតថា គ្រួសារទាំងនេះជាច្រើនបានចូលរួមចំណែកជាយូរមកហើយដល់សហគមន៍របស់ពួកគេ ប៉ុន្តែកូនៗរបស់ពួកគេជាញឹកញាប់នៅតែខកខានទទួលបានឱកាស ដូចជាអាហារូបករណ៍ទៅសិក្សានៅក្រៅប្រទេស។
លោក បានលើកឡើងថា៖ «ឱកាសសិក្សាតាមរយៈអាហារូបករណ៍នៅអូស្ត្រាលី និងប្រទេសផ្សេងៗទៀត នៅតែឆ្ងាយសម្រាប់មនុស្សមួយចំនួន។ កម្មវិធីអាហារូបករណ៍ ជាពិសេសកម្មវិធីដែលផ្តល់ដោយរដ្ឋាភិបាលនៃប្រទេសប្រជាធិបតេយ្យ គួរតែយកចិត្តទុកដាក់ជាពិសេសចំពោះយុវជនមកពីគ្រួសារអ្នកការពារសិទ្ធិមនុស្ស អ្នកសារព័ត៌មាន និងសកម្មជនការពារព្រៃឈើ ឬបរិស្ថាន»។
លោកបានអំពាវនាវឱ្យមានការយកចិត្តទុកដាក់បន្ថែមទៀតចំពោះយុវជនមកពីគ្រួសារដែលមានប្រវត្តិបម្រើសហគមន៍ រួមទាំងអ្នកដែលធ្វើការលើការការពារបរិស្ថាន សិទ្ធិមនុស្ស សេរីភាព ប្រជាធិបតេយ្យ និងសារព័ត៌មានឯករាជ្យ។
លោកបានបន្ថែមថា៖ «យើងគួរយកចិត្តទុកដាក់ជាពិសេសចំពោះយុវជន ដែលមកពីគ្រួសារមានការប្តេជ្ញាចិត្តខ្ពស់ចំពោះប្រទេស ការពារបរិស្ថាន និងលើកកម្ពស់សិទ្ធិមនុស្ស សេរីភាព ប្រជាធិបតេយ្យ និងសារព័ត៌មានឯករាជ្យ។ យើងគួរលើកទឹកចិត្តពួកគេ ដើម្បីឱ្យពួកគេក្លាយជាជំនាន់បន្ទាប់ដែលបន្តការងាររបស់ឪពុកម្តាយ និងសាច់ញាតិរបស់ពួកគេ»។
លោកស្រី អេង ចាន់ឌី នាយិកាប្រតិបត្តិ អង្គការយេនឌ័រ និងអភិវឌ្ឍន៍ដើម្បីកម្ពុជា (GADC) បានប្រាប់ថា លោកស្រីមិនបានទទួលព័ត៌មានថា កម្មវិធី Australia Awards មានកូតាជាក់លាក់សម្រាប់ជនមានពិការភាព ជនជាតិដើមភាគតិច ឬស្ត្រី ប៉ុន្មាននោះទេ។
លោកស្រី បានលើកឡើងថា៖ «តាមអ្វីដែលខ្ញុំបានសង្កេត អ្នកទទួលអាហារូបករណ៍ Australia Awards នៅកម្រិតអនុបណ្ឌិត និងបណ្ឌិត មានភាពចម្រុះកាន់តែច្រើន។ ចំនួនស្ត្រីក៏បានកើនឡើង ហើយជនមានពិការភាពក៏ហាក់ដូចជាមានឱកាសច្រើនជាងមុនផងដែរ»។
ប៉ុន្តែ លោកស្រី យល់ថា កម្មវិធី Australia Awards អាចពិនិត្យបន្ថែមថា តើយុវជនជាសកម្មជន ឬកូនៗរបស់សកម្មជន មានលទ្ធភាពទទួលបានព័ត៌មានអំពីអាហារូបករណ៍ និងឱកាសដាក់ពាក្យគ្រប់គ្រាន់ដែរឬទេ។
លោកស្រី យល់ឃើញថា ទោះបីអាហារូបករណ៍មានលក្ខខណ្ឌផ្សេងៗគ្នាក៏ដោយ ការផ្តល់ការគាំទ្រតាំងពីដំណាក់កាលដំបូង ដូចជាការបណ្តុះបណ្តាលភាសាអង់គ្លេស ការជួយត្រៀមខ្លួន និងការផ្តល់ព័ត៌មាន អាចជួយលើកទឹកចិត្តសកម្មជន ដូចជាសកម្មជនបរិស្ថាន និងសិទ្ធិមនុស្ស ឱ្យចូលរួមដាក់ពាក្យសុំអាហារូបករណ៍ផងដែរ។
លោកស្រី ចាន់ឌី បានលើកឡើងថា៖ «ខ្ញុំគិតថា បញ្ហាប្រឈមចម្បងសម្រាប់ក្រុមដែលយើងកំពុងនិយាយដល់ គឺការខ្វះព័ត៌មានគ្រប់ជ្រុងជ្រោយពីអាហារូបករណ៍ និងឱកាសដាក់ពាក្យ»។ អ្នកស្រីបន្ថែមថា សមភាពមិនគួរត្រូវបានវាស់ត្រឹមតែថា មនុស្សគ្រប់រូបមានឱកាសដូចគ្នាក្នុងការដាក់ពាក្យឬអត់នោះទេ។
លោកស្រីបានលើកឡើងថា៖ «នៅពេលយើងនិយាយអំពីសមភាព យើងមិនគួរមើលត្រឹមតែឱកាសស្មើគ្នាទេ ដែលមានន័យថា មនុស្សគ្រប់រូបមានសិទ្ធិដូចគ្នា។ យើងក៏ត្រូវមើលលើលទ្ធភាពទទួលបានឱកាសដោយស្មើគ្នា និងលទ្ធផលចុងក្រោយនៃឱកាសទាំងនោះ រួមទាំងអាហារូបករណ៍ផងដែរ»។
លោកស្រីបានបន្ថែមថា៖ «វាជួយកំណត់ថា តើសមភាពយេនឌ័រពិតជាត្រូវបានសម្រេចនៅក្នុងដំណើរការជ្រើសរើស និងលទ្ធផលនៃកម្មវិធី Australia Awards ឬយ៉ាងណា»៕
