ស្របពេលដែលមន្ត្រីសុខាភិបាលបន្តរកករណីឆ្លងក្នុងសហគមន៍ថ្មីរបស់វីរុសបំប្លែងថ្មីប្រភេទអូមីក្រុង ដែលគេជឿថាជាប្រភេទវីរុសឆ្លងលឿននោះ លោកនាយករដ្ឋមន្ត្រី ហ៊ុន សែន បានជំរុញឲ្យអាជ្ញាធរថ្នាក់ខេត្តពន្លឿនការចាក់វ៉ាក់សាំងដូសជំរុញដល់ប្រជាពលរដ្ឋឲ្យបានឆាប់។
សម្រាប់តែថ្ងៃចន្ទមួយ លោកនាយករដ្ឋមន្ត្រីតាមរយៈសារសំឡេង បានបញ្ជាក់ថា អាជ្ញាធរសុខាភិបាលបានរកឃើញករណីថ្មីនៃវីរុសបំប្លែងថ្មី អូមីក្រុង៣៤ករណី ដែលក្នុងនោះករណីឆ្លងក្នុងសហគមន៍មាន១០ករណី ធ្វើឲ្យករណីឆ្លងក្នុងសហគមន៍សរុបឡើងដល់១៤ករណី។ មុនសារសំឡេងរបស់លោកនាយករដ្ឋមន្ត្រី ក្រសួងសុខាភិបាលបានរាយការណ៍ដែរថា ករណីឆ្លងវីរុសបំប្លែងថ្មីអូមីក្រុងនៅកម្ពុជាមានចំនួនជិត ២០០ករណី គិតទាំងនាំចូល និងឆ្លងក្នុងសហគមន៍។ ជាការឆ្លើយតបនឹងបញ្ហានេះ លោកនាយករដ្ឋមន្ត្រី កាលពីល្ងាចថ្ងៃចន្ទ បានឲ្យដឹងថាលោកបានបញ្ជាទិញវ៉ាក់សាំងបង្ការកូវីដ-១៩ ចំណួន ៥លានដូសបន្ថែមទៀត។
លោកមានប្រសាសន៍ថា៖ «អាជ្ញាធរត្រូវតែពន្លឿនការចាក់វ៉ាក់សាំងដូសជំរុញ ដើម្បីតាមឲ្យទាន់អូមីក្រុងឆ្លងចូលក្នុងសហគមន៍ ពីព្រោះយើងគ្មានជម្រើសណាល្អជាងនេះនោះទេ»។
បើតាមលោកនាយករដ្ឋមន្ត្រី ហ៊ុន សែន រដ្ឋាភិបាលត្រូវការវ៉ាក់សាំងជាង ៨លានដូសទៀត ដើម្បីប្រើប្រាស់ក្នុងយុទ្ធនាការចាក់ដូសជំរុញ។ លោកឲ្យដឹងដែរថា បច្ចុប្បន្នកម្ពុជាមានវ៉ាក់សាំងក្នុងដៃជាង ១០លានដូស។
លោកនាយករដ្ឋមន្ត្រី ក៏បានព្រមានកាលពីថ្ងៃពុធ សប្ដាហ៍មុនដែរថា ប្រសិនបើវីរុសកូវីដ-១៩ បំប្លែងថ្មីអូមីក្រុងឆ្លងចូលសហគមន៍ នោះវិធានការបិទខ្ទប់ក៏អាចកើតមានឡើងវិញដែរ។ លោកក៏បានបញ្ជាក់ដែរថា រាល់អ្នកឆ្លងវីរុសបំប្លែងថ្មីអូមីក្រុងទាំងអស់មិនត្រូវអនុញ្ញាតឲ្យព្យាបាលនៅផ្ទះនោះទេ ប៉ុន្តែនឹងតម្រូវឲ្យមកធ្វើចត្តាឡីស័ក និងព្យាបាលនៅមន្ទីរពេទ្យ។
ក្រសួងសុខាភិបាល ក៏បានប្រកាសពីការចាក់ដូសជំរុញ ដូសទី៤ ជូនដល់ក្រុមជួរមុខផងដែរ ដែលក្នុងនោះក៏មានក្រុមអ្នកសារព័ត៌មានដែរ ដោយប្រើវ៉ាក់សាំងប្រភេទ Pfizer ដែលជាជំនួយរបស់ប្រទេសអូស្រ្តាលី មានជាង២លានដូស។ ដូចគ្នាដែរ កម្ពុជាកន្លងមកក៏បានប្រើវ៉ា់ក់សាំងផលិតនៅប្រទេសចិនប្រភេទ Sinovac និង Sinipharm សម្រាប់ចាក់ដូសជំរុញផងដែរ។
ក្រសួងសុខាភិបាលបានរាយការណ៍ករណីឆ្លងអូមីក្រុងចូលក្នុងសហគមន៍ដំបូងកាលបីថ្ងៃទី៨ ខែមករា ឆ្នាំ២០២២ បន្ទាប់ពីបុរសវ័យ ២៣ឆ្នាំ វិជ្ជមានវីរុសនេះ។ បើតាមក្រសួង ករណីដំបូងនេះកើតលើបុរសរស់នៅសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។ យ៉ាងណា បុរសនេះរស់នៅប្រហែល ៧,៥គីឡូម៉ែត្រ ពីខណ្ឌមានជ័យ។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បដិសេធអត្ថាធិប្បាយលើករណីនេះ។
លោក សេង ស៊ីវ៉ាន់ថា ចៅសង្កាត់រងសង្កាត់ស្ទឹងមានជ័យ២ បញ្ជាក់ថាបុរសឆ្លងអូមីក្រុងនោះរស់នៅសង្កាត់របស់លោក។
លោក ស៊ីវ៉ាន់ថា ថា កាលពីថ្ងៃចន្ទ សង្កាត់បានរកឃើញអ្នកវិជ្ជមានកូវីដ-១៩ បំប្លែងថ្មីប្រភេទអូមីក្រុងចំនួនពីរករណី ពេលធ្វើតេស្តលើប្រជាពលរដ្ឋជាច្រើនរូបផ្សេងទៀត។ យ៉ាងណា លោកថា អាជ្ញាធរមូលដ្ឋានមិនបានដាក់វិធានការរឹតបន្តឹងណាមួយលើការធ្វើដំណើរទៅមកក្នុងសហគមន៍នោះទេ។
លោកបន្ថែមថា៖ «អ្នកប៉ះពាល់ផ្ទាល់ផ្សេងទៀតបានធ្វើតេស្តរួចហើយ និងពេលនេះយើងកំពុងរង់ចាំលទ្ធផល»។ លោកបន្តថា៖ «យើងបានរកឃើញសិស្សម្នាក់បានឆ្លងអូមីក្រុង ក្នុងសហគមន៍ផងដែរ»។
បើតាមលោក ស៊ីវ៉ាន់ថា វីរុសបំប្លែងថ្មីអូមីក្រុងនេះ បានរកឃើញពីករណីមួយនៅភូមិ្រព្រែកទ័ល និងមួយករណីទៀតនៅភូមិ៥។
ប្រជាពលរដ្ឋខ្លះបានប្រាប់ខេមបូចាថា ពួកគាត់មិនបានដឹងថាមានការរកឃើញវីរុសបំប្លែងថ្មីអូមីក្រុងក្នុងសហគមន៍ខ្លួននោះទេ។
ជា មុំ វ័យ ៥៨ឆ្នាំ បានលើកឡើងថា៖ «ខ្ញុំមិនបានឃើញពីការជូនដំណឹងរបស់អាជ្ញាធរផងថានៅក្នុងសហគមន៍មានឆ្លងអូមីក្រុង យ៉ាងណា អ្វីដែលយើងត្រូវធ្វើគឺការពារខ្លួនយើងពីវីរុសនេះ ព្រោះយើងក៏បារម្ភពីសុវត្ថិភាពក្មេងតូចៗដែរ»។
អ្នកភូមិម្នាក់ទៀត លោក ទ្រឹង ភក្ដី មានប្រសាសន៍ថា លោកបានឃើញរថយន្តសង្គ្រោះបន្ទាន់មកកាន់ផ្ទះអ្នកជិតខាងកាលពីថ្ងៃអាទិត្យ ប៉ុន្តែលោកមិនបានឮព័ត៌មានអ្វីទាក់ទងនឹងវីរុសបំប្លែងថ្មីអូមីក្រុងនេះទេ។
បុរសជាអ្នកដឹកជញ្ជូនម្ហូបអាហាររូបនេះ បានបន្តថា លោកបារម្ភ ដោយឮថាវីរុសប្រភេទថ្មីអូមីក្រុងនេះមានកម្រិតឆ្លងលឿន។
លោកបន្ថែមថា៖ «បើសិនជាវីរុសនេះផ្ទុះរាលដាលក្នុងសហគមន៍ខ្លាំងនាំឲ្យមានការបិទខ្ទប់ជាថ្មី នោះវានឹងប៉ះពាល់ដល់ចំណូលរបស់ពួកយើង»។ លោកបន្តថា៖ «យើងទើបតែបើកប្រទេសវិញបានពីរខែ»។
កាលពីថ្ងៃចន្ទ ក្រសួងសុខាភិបាលបានឲ្យដឹងថា ចំនួនករណីឆ្លងកូវីដ-១៩ សរុបមាន ១២០ ៦៣៦ករណី គិតតាំងពីមានការឆ្លងរាលដាលនៅដើមឆ្នាំ២០២០។ ភាគច្រើននៃករណីឆ្លងទាំងនេះ កើតមានឡើងកាលពីថ្ងៃទី២០ ខែកុម្ភៈ ពេលដែលការឆ្លងចូលសហគមន៍បានផ្ទុះឡើងនៅកម្ពុជា។ ក្រសួងឲ្យដឹងដែរថា អ្នកជាសះស្បើយសរុបមានចំនួន ១១៣ ០២៣ករណី និងអ្នកស្លាប់ដោយសារកូវីដ-១៩ មានចំនួន ៣ ០១៥នាក់។
ប្រែសម្រួលពីអត្ថបទភាសាអង់គ្លេស៖ Authorities on alert as Omicron variant spreads into community
