ក្រសួងសុខាភិបាលបានជំរុញឱ្យសាធារណជនមានការប្រុងប្រយ័ត្នខ្ពស់ចំពោះវីរុសនីប៉ាហ៍ និងបានដាក់ចេញវិធានការការពារមួយចំនួនផងដែរ ខណៈនៅប្រទេសឥណ្ឌាមានសេចក្ដីរាយការណ៍ពីការរាតត្បាតវីរុសនេះនៅតំបន់ West Bengal មានចំនួនប្រាំករណីបានឆ្លង និងមានមនុស្សជាង១០០នាក់ផ្សេងទៀតកំពុងដាក់ឲ្យធ្វើចត្តាឡីស័ក ដែលរឿងនេះកំពុងបង្កជាកង្វល់ដល់បញ្ហាសុខភាពក្នុងតំបន់។
ក្នុងសេចក្ដីប្រកាសព័ត៌មានរបស់ក្រសួងសុខាភិបាលចេញផ្សាយកាលពីថ្ងៃអាទិត្យ ឲ្យដឹងថាគិតមកទល់ពេលនេះមិនទាន់មានការឆ្លងវីរុសនេះលើមនុស្សនៅឡើយទេនៅកម្ពុជា។ បើតាមក្រសួងសុខាភិបាលវីរុសនេះអាចឆ្លងពីមនុស្សទៅមនុស្សតាមរយៈការប៉ះពាល់ទឹកសរីរាង្គរបស់បុគ្គល និងថាជំងឺបង្កដោយវីរុសនេះពុំទាន់មានឱសថព្យាបាល ឬវ៉ាក់សាំងជាក់លាក់ណាមួយសម្រាប់ការពារនៅឡើយដែរ។
ប្រចៀវ និងជ្រឹង ជាភ្នាក់ងារចម្លងវីរុសនីប៉ាហ៍ ហើយអ្នកដែលឆ្លងវីរុសនេះអាចប្រឈមនឹងអត្រាស្លាប់ចន្លោះពី៤០ទៅ៧០ភាគរយ។ ជ្រូកក៏ងាយឆ្លងនឹងជំងឺបង្កដោយវីរុសនីប៉ាហ៍ដែរ។
ក្រសួងសុខាភិបាលបញ្ជាក់ថា ខ្លួនបានដាក់ចេញនូវវិធានការមូយចំនួនដើម្បីការពារវីរុសនីប៉ាហ៍ចូលក្នុងប្រទេសកម្ពុជា។
វីរុសនីប៉ាហ៍រកឃើញដំបូងនៅប្រទេសម៉ាឡេស៊ី និងសិង្ហបុរី ក្នុងឆ្នាំ១៩៩៩ ហើយនៅប្រទេសបង់ក្លាដេស និងឥណ្ឌា រកឃើញនៅឆ្នាំ២០០១ និងមានសេចក្ដីរាយការណ៍ថានៅបង់ក្លាដេស និងផ្នែកភាគខាងកើតប្រទេសឥណ្ឌាតែងមានការឆ្លងវីរុសនេះ។ គិតមកទល់ពេលនេះ កម្ពុជាមិនទាន់រកឃើញវត្តមានវីរុសនីប៉ាហ៍លើមនុស្សនៅឡើយ តែធ្លាប់រកឃើញលើសត្វប្រចៀវ។
នៅប្រទេសឥណ្ឌា មន្ត្រីសុខាភិបាលបានប្រញាប់ប្រញាល់គ្រប់គ្រងវីរុសនីប៉ាហ៍ដែលផ្ទុះនៅមន្ទីរពេទ្យឯកជនមួយក្នុងទីក្រុង Kolkata និងមានមនុស្សប្រាំនាក់បានឆ្លងជំងឺនេះ ក្នុងនោះមានបុគ្គលិកពេទ្យពីរនាក់ផងដែលកំពុងស្ថិតក្នុងស្ថានភាពធ្ងន់ធ្ងរ ហើយមនុស្សជាង១០០នាក់ផ្សេងទៀតកំពុងធ្វើចត្តាឡីស័ក។
ក្នុងបទសម្ភាសន៍ជាមួយសារព័ត៌មាន ANI ប្រចាំប្រទេសឥណ្ឌា លោកវេជ្ជបណ្ឌិត Rajeev Jayadevan ដែលជាអតីតប្រធានសមាគមគ្រូពេទ្យក្រុង Cochin ប្រទេសឥណ្ឌាបាននិយាយថាវីរុសនេះអាចបង្កឲ្យមានការរលាកខួរក្បាលធ្ងន់ធ្ងរ និងថាអត្រាមរណភាពមានរហូតដល់៩១ភាគរយ។
លោកវេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លង និងជាអ្នកនាំពាក្យក្រសួងសុខាភិបាលបានឲ្យដឹងថា មិនទាន់មានការរកឃើញករណីអ្នកឆ្លងវីរុសនីប៉ាហ៍នៅកម្ពុជានៅឡើយទេ។ លោកថានាយកដ្ឋានរបស់លោកកំពុងតាមដានយ៉ាងយកចិត្តទុកដាក់ពីស្ថានភាព និងត្រៀមខ្លួនបង្ការមិនឲ្យមានការឆ្លងរាលដាលនៃវីរុសនីប៉ាហ៍។
ដូចគ្នាដែរលោកបញ្ជាក់ថា កម្ពុជាក៏ពង្រឹងការតាមដានលើអ្នកធ្វើដំណើរពីប្រទេសឥណ្ឌា ក្រោយមានសេចក្ដីរាយការណ៍ពីការផ្ទុះជំងឺ ហើយកម្ពុជាបានដាក់ចេញនូវវិធានការភ្លាមៗដើម្បីអនុវត្តវិធានការធ្វើចត្តាឡីស័កផងដែរ។
លោកមានប្រសាសន៍ទៀតថា ជំងឺបង្កដោយវីរុសនីប៉ាហ៍ឆ្លងពីសត្វមកមនុស្ស និងមិនដូចជំងឺកូវីដ-១៩ ដែលឆ្លងតាមរយៈខ្យល់នោះទេ។ រាល់អ្នកធ្វើដំណើរមកពីប្រទេសដែលមានផ្ទុះជំងឺនឹងត្រូវតាមដានដោយដិតដល់ ហើយវិធានការចត្តាឡីស័កក៏នឹងត្រូវអនុវត្តបើសិនជាមានករណីសង្ស័យ។
លោកឲ្យដឹងទៀតថា នាយកដ្ឋានរបស់លោកមានមន្ទីរពិសោធន៍ចំនួន១២ និងថានាយកដ្ឋានបន្តពង្រឹងប្រព័ន្ធតាមដានលើករណីសង្ស័យ និងពង្រឹងសមត្ថភាពអ្នកជំនាញនៅទូទាំងប្រទេសដើម្បីឆ្លើយតបទៅនឹងការគំរាមកំហែងណាមួយពីវីរុសនីប៉ាហ៍។
ក្នុងស្ថានភាពណាមួយដែលប្រជាពលរដ្ឋមកពីប្រទេសនានាឬតំបន់ដែលមានជំងឺរាតត្បាត និងសង្ស័យថាខ្លួនមានជំងឺ ប្រជាពលរដ្ឋទាំងនោះត្រូវរាយការណ៍ទៅអាជ្ញាធរដើម្បីទប់ស្កាត់ និងទទួលការព្យាបាលទាន់ពេលវេលា។
លោកបន្តថា៖ «នេះជាការងាររបស់ក្រសួងដែលត្រូវតាមដានរាល់អ្នកដំណើរចូលប្រទេសកម្ពុជាទាំងតាមផ្លូវអាកាស ផ្លូវគោក និងផ្លូវទឹក។ ប៉ុន្តែសម្រាប់ករណីឆ្លងថ្មីយើងផ្ដោតសំខាន់តែប្រទេសដែលមានផ្ទុះជំងឺ»។
លោក អ៊ូច វុទ្ធី ប្រធានសមាគមគ្រូពេទ្យចិត្តធម៌កម្ពុជា ប្រាប់សារព័ត៌មានខេមបូចា ថា ប្រជាពលរដ្ឋត្រូវតែបង្កើនការប្រុងប្រយ័ត្ន និងអនុវត្តវិធានការការពារឲ្យបានកម្រិតខ្ពស់ទោះបីមិនទាន់មានករណីឆ្លងក្ដី។
លោកមានប្រសាសន៍ទៀតថា ក្រសួង និងស្ថាប័នពាក់ព័ន្ធត្រូវបន្តធ្វើការរួមគ្នាដើម្បីផ្សព្វផ្សាយព័ត៌មាន និងតាមដានបញ្ហានេះ។ លោកបន្តទៀតថា៖ «ជំងឺនេះរកឃើញនៅប្រទេសឥណ្ឌា ហើយយើងមិនទាន់រកឃើញនៅកម្ពុជានៅឡើយ ប៉ុន្តែប្រជាពលរដ្ឋត្រូវតែប្រុងប្រយ័ត្នខ្ពស់ និងការពារខ្លួន ព្រោះថាវីរុសនេះគ្រោះថ្នាក់ណាស់»។
បើតាមអង្គការសុខភាពពិភពលោក វីរុសនីប៉ាហ៍ ត្រូវបានចាត់ទុកថា ជាវីរុសដែលមានលទ្ធភាពក្នុងការបង្កជាជំងឺរាតត្បាតខ្ពស់។ បច្ចុប្បន្នមិនទាន់មានវ៉ាក់សាំង ឬការព្យាបាលជាក់លាក់ណាមួយលើជំងឺនេះនៅឡើយ។ អ្នកឆ្លងជំងឺនេះអាចមិនចេញរោគសញ្ញានៅពេលដំបូងៗ និងក្រោយមកអាចចេញរោគសញ្ញាផ្លូវដង្ហើមស្រូចស្រាល់ និងបង្កការរលាកធ្ងន់ធ្ងរដល់ខួរក្បាលដែលនឹងបង្កគ្រោះថ្នាក់ដល់អាយុជីវិត៕
ប្រែសម្រួលពីអត្ថបទភាសាអង់គ្លេស៖ Cambodia Steps Up Nipah Virus Preparedness as India Confirms Latest Outbreak
