អ្នកជំងឺដែលត្រូវប្តូរក្រលៀនចំនួន១៨នាក់ ដែលកំពុងជាប់គាំងនៅក្នុងប្រទេសឥណ្ឌាបន្ទាប់ពីត្រូវបានបោកប្រាស់ដោយមន្ទីរពហុព្យាបាល ម៉េត្រូ អអ៊ិលវី (Metro RLV Polyclinic) ដែលស្ថិតនៅក្នុងទីក្រុងភ្នំពេញ ដែលតាមចោទថា បានគេចខ្លួនជាមួយទឹកប្រាក់ចំនួន១លានដុល្លារ ដែលពួកគាត់បានចំណាយនោះ កំពុងស្នើឲ្យលោកនាយករដ្ឋមន្រ្តី ហ៊ុន ម៉ាណែត ជួយអន្តរាគមន៍ក្នុងសំណុំរឿងរបស់ពួកគាត់។
មន្ទីរពហុព្យាបាលដែលស្ថិតនៅក្នុងសង្កាត់អូរបែកក្អម ខណ្ឌសែនសុខ ត្រូវបានអាជ្ញាធរក្រសួងសុខាភិបាលបិទទ្វារចាប់តាំងពីមានការចោទប្រកាន់ថា មានការជាប់ពាក់ព័ន្ធនឹងការជួញដូរសរីរាង្គខុសច្បាប់។
យោងតាមអ្នកជំងឺម្នាក់ឈ្មោះ ឃឿន ចាន់បុល ដែលបានបង្ហោះសារអំពាវនាវលើទំព័រហ្វេសប៊ុករបស់លោកកាលពីថ្ងៃទី១៣ ខែតុលា ថា លោកបានចាញ់បោកលោក ង៉ែត សំអូន អគ្គនាយកមន្ទីរពហុព្យាបាល ម៉េត្រូ អអ៊ិលវី និងលោក ទូច រិទ្ធីយ៉ា ដែលជាអគ្គនាយករង។ ទាំងលោក សំអូន និងលោក រិទ្ធីយ៉ា សុទ្ធតែបានធានាចំពោះលោក ចាន់បុល ថា លោកនឹងទទួលបានការប្តូរក្រលៀននៅប្រទេសឥណ្ឌា។
លោក ចាន់បុល បានសរសេរថា៖ «ប៉ុន្តែយើងមិនបានទទួលការព្យាបាលទេរហូតមកដល់ពេលនេះ។ រូបខ្ញុំនិងមនុស្សបីនាក់ផ្សេងទៀតអំពាវនាវឲ្យលោកនាយករដ្ឋមន្ត្រីជួយអន្តរាគមន៍ក្នុងបញ្ហានេះ។ ឥឡូវ[យើង] អស់ថវិកា និងអាចអស់ទាំងជីវិត មានតែសម្តេចទេអាចជួយខ្ញុំបាន»។
អ្នកជំងឺម្នាក់ៗបានចំណាយលើមន្ទីរពហុព្យាបាលនេះប្រហែល ៥០.០០០ដុល្លារ។ ពួកគាត់បានស្ថិតនៅប្រទេសឥណ្ឌាអស់រយៈពេល៧ទៅ៨ខែហើយ ដោយមិនបានទទួលការព្យាបាលអ្វីឡើយ។ «ជំងឺកាន់តែធ្ងន់ទៅៗ ហើយយើងកំពុងជួបការលំបាកក្នុងការរ៉ាប់រងការចំណាយបន្ថែមនៅក្នុងប្រទេសឥណ្ឌា» លោបានបន្ថែម។
ស្ត្រីម្នាក់នៅខេត្តបន្ទាយមានជ័យដែលសុំមិនបញ្ចេញឈ្មោះបាននិយាយថា ប្តីរបស់អ្នកស្រីត្រូវបានបញ្ជូនទៅប្រទេសឥណ្ឌា ដើម្បីធ្វើការប្តូរក្រលៀនកាលពីខែមីនាឆ្នាំនេះ ហើយបច្ចុប្បន្នកំពុងប្រឈមនឹងបញ្ហាហិរញ្ញវត្ថុ បន្ទាប់ពីឈ្មោះ សំអូន រត់គេចខ្លួន។
អ្នកស្រីបាននិយាយថា៖ «[យើង] បានបង់ប្រាក់ចំនួន៥០.០០០ដុល្លារ ដើម្បីប្តូរក្រលៀននៅប្រទេសឥណ្ឌា។ មន្ទីរពេទ្យបានសន្យាថា នឹងព្យាបាលជំងឺរបស់គាត់ ប៉ុន្តែយើងបានរង់ចាំហើយរង់ចាំទៀត។ គ្មានការព្យាបាលណាមួយកើតឡើងទេ» ដោយអ្នកស្រីបានបន្ថែមថា ប្តីរបស់អ្នកស្រីកំពុងសម្រាកព្យាបាលនៅមន្ទីរពេទ្យ Metro Hospital ក្នុងប្រទេសឥណ្ឌា ដែលបានសហការជាមួយមន្ទីរពហុព្យាបាលម៉េត្រូ អអ៊ិលវី ក្នុងប្រទេសកម្ពុជា។
អ្នកស្រីបាននិយាយថា៖ «ពួកគេបានបោកប្រាស់យើង ព្រោះវាមានរយៈពេលប្រាំបីខែ [ដោយគ្មានការព្យាបាល]។ ជាធម្មតា គ្រប់គ្នាទៅពីរ បីខែ បន្ទាប់មកពួកគេត្រឡប់ទៅផ្ទះវិញហើយ។ យើងមិនដឹងថា គួរនិយាយថាម៉េចទេ។ វាមិនងាយស្រួលក្នុងការរកប្រាក់នោះទេ ហើយវាក៏មិនមែនជាចំនួនតិចតួចនោះដែរ»។
ក្រសួងសុខាភិបាលបានបិទមន្ទីរពហុព្យាបាល ម៉េត្រូ អអ៊ិលវី កាលពីថ្ងៃទី១៧ ខែតុលា ដោយសារប្រើប្រាស់សេវាប្រឹក្សា ដើម្បីបញ្ជូនអ្នកជំងឺទៅប្តូរក្រលៀននៅប្រទេសឥណ្ឌា ដែលជាការរំលោភលើច្បាប់គ្រប់គ្រងការប្តូរកោសិកា ជាលិកា និងសរីរាង្គរបស់មនុស្ស។
កាលពីថ្ងៃទី១៦ ខែតុលា គណៈគ្រប់គ្រងក្រុមហ៊ុន Metro RLV Overseas Hospital Company Ltd បានចេញសេចក្តីថ្លែងការណ៍ថ្កោលទោសលោក ង៉ែត សំអូន អគ្គនាយក នៃមន្ទីរពហុព្យាបាលនេះ ពីបទ “ប្រើប្រាស់” តួនាទីរបស់ខ្លួននៅក្នុងក្រុមហ៊ុនមិនត្រឹមត្រូវ ដើម្បីបោកប្រាស់ប្រជាពលរដ្ឋកម្ពុជា។
សេចក្តីថ្លែងការណ៍នោះបានសរសេរថា៖ «រាល់សកម្មភាពទាំងអស់របស់បុគ្គល ង៉ែត សំអូន ដែលយកសម្ភាររបស់ក្រុមហ៊ុន មិនត្រូវបានអនុញ្ញាតពីក្រុមហ៊ុននោះទេ ហើយគាត់បានប្រព្រឹត្តដដែលក្នុងសមត្ថភាពផ្ទាល់ខ្លួនរបស់គាត់ ដោយគ្មានបានជូនដំណឹងមកក្រុមហ៊ុននោះទ្បើយ» ។
គណៈគ្រប់គ្រងបានបញ្ចប់កិច្ចសន្យារបស់លោក សំអូន ហើយបានដាក់ពាក្យបណ្តឹងជាមួយអាជ្ញាធរប៉ូលិសប្រឆាំងនឹងគាត់។ ម្ចាស់ក្រមហ៊ុនក៏កំពុងព្យាយាមកំណត់ទីតាំង និងចំនួនអ្នកជំងឺដែលបុគ្គល ង៉ែត សំអូន បានបញ្ជូនទៅកាន់ប្រទេសឥណ្ឌា ដើម្បីព្យាបាលពួកគាត់។
សេចក្តីថ្លែងការណ៍នោះបានសរសេរថា៖ «យើងនឹងព្យាយាមបន្ថែមជំនួយជាច្រើនតាមដែលអាចធ្វើទៅបាន»។
វេជ្ជបណ្ឌិតវ័យ៣១ឆ្នាំម្នាក់ ដែលបានធ្វើការនៅមន្ទីរពហុព្យាបាល ម៉េត្រូ អអ៊ិលវី អស់រយៈពេល១០ខែបានប្រាប់ខេមបូចាថា លោកទទួលបន្ទុកផ្នែកលាងឈាម និងផ្នែកអេកូ ប៉ុន្តែលោកមិនបានដឹងថា អ្នកជំងឺត្រូវបានបញ្ជូនទៅប្រទេសឥណ្ឌា ដើម្បីប្តូរក្រលៀននោះទេ។
វេជ្ជបណ្ឌិតដែលសុំមិនបញ្ចេញឈ្មោះដោយសារបារម្ភខ្លាចគេបញ្ឈប់ពីការងារថ្មីនៅមន្ទីរពេទ្យមួយផ្សេងទៀតបាននិយាយថា៖ «មានក្រុមផ្សេងទៀតធ្វើការលើរឿងនេះ។ ថ្នាក់ដឹកនាំ [ង៉ែត សំអូន] បានស្នើសុំឱ្យខ្ញុំលាលែងពីការងារមួយថ្ងៃមុនពេលមានរឿង»។
លោកនិយាយថា កន្លងមក មន្ទីរពហុព្យាបាលនេះសហការជាមួយមន្ទីរពេទ្យ Metro Hospital ក្នុងប្រទេសឥណ្ឌា ដោយបន្ថែមថា ធ្លាប់មានអ្នកជំងឺម្នាក់ ឬពីរនាក់មកលាងឈាមជាប្រចាំ។
អ្នកយកព័ត៌មានខេមបូចាបានទៅមន្ទីរពហុព្យាបាលនេះកាលពីថ្ងៃព្រហស្បតិ៍ ប៉ុន្តែបានរកឃើញថា ទ្វារត្រូវបានគេចាក់សោរ ហើយមិនមានបុគ្គលិកធ្វើការទេ ខណៈស្លាកយីហោនៅខាងមុខអគារត្រូវបានគេដកចេញ។
ប្រជាពលរដ្ឋម្នាក់ដែលរស់នៅក្រោយមន្ទីរពហុព្យាបាលនេះបាននិយាយថា អ្នកស្រីបានដឹងពីហេតុការណ៍នេះតាមព័ត៌មានដែលគេចែករំលែកតាមហ្វេសប៊ុក។
ស្ត្រីអាយុ៦០ឆ្នាំរូបនេះបាននិយាយថា៖ «យើងបានដឹងពីការបិទ បន្ទាប់ពីអ្នកជំងឺបានដាក់ពាក្យបណ្តឹង។ វាខុសច្បាប់ការលក់ក្រលៀន [មនុស្ស]»។
អ្នកស្រីបាននិយាយថា បដា និងយីហោរបស់មន្ទីរពហុព្យាបាលត្រូវបានដកចេញកាលពីថ្ងៃទី១៨ ខែតុលា។ មជ្ឈមណ្ឌលវេជ្ជសាស្ត្រនេះបានជួលអគារដែលពីមុនជាខុនដូ ប្រហែលមួយឆ្នាំមកហើយ។
អ្នកស្រីបានអះអាងថា បុគ្គលិកមួយចំនួនដែលធ្វើការនៅទីនោះមើលទៅដូចជា «ជនជាតិឥណ្ឌា»។
លោក ធា គ្រុយ រដ្ឋលេខាធិការក្រសួងសុខាភិបាល និងជាប្រធានគណៈកម្មាធិការសម្របសម្រួលក្រុមប្រឹក្សាវិជ្ជាជីវៈសុខាភិបាល បានបដិសេធធ្វើអត្ថាធិប្បាយទេ។
លោក ង៉ែត សំអូន មិនអាចទាក់ទងសុំការអត្ថាធិប្បាយបានទេ។
ក្រុមហ៊ុន Metro Group of Hospitals នៅក្នុងប្រទេសឥណ្ឌា មិនបានឆ្លើយតបនឹងសំណួរតាមរយៈអ៊ីមែលទេ ហើយស្ថានទូតឥណ្ឌាប្រចាំទីក្រុងភ្នំពេញ ក៏មិនបានចេញសេចក្តីអធិប្បាយណាមួយលើបញ្ហានេះដែរ។
លោក អំ សំអាត នាយកចាត់ការទូទៅ នៃអង្គការសិទ្ធិមនុស្សលីកាដូបានជំរុញឱ្យអាជ្ញាធរ ជាពិសេសក្រសួងសុខាភិបាល ស៊ើបអង្កេតឱ្យបានហ្មត់ចត់លើការជួញដូរសរីរាង្គ ដែលអាចនឹងកំពុងកើតមាននៅក្នុងប្រទេសកម្ពុជា។
លោកបានមានប្រសាសន៍ថា៖ «វាសំខាន់ណាស់ដែលថា ប្រសិនបើវាជាករណីជួញដូរ គួរតែត្រូវស៊ើបអង្កេតព្រោះវាជាបទល្មើស»។
លោក អំ សំអាត មានប្រសាសន៍ថា៖ «យើងឃើញថា នេះមិនមែនជាលើកទីមួយទេ។ ខ្ញុំគិតថា ចាំបាច់ត្រូវតែមានការស៊ើបអង្កេត ដើម្បីរកយុត្តិធម៌សម្រាប់ភាគីទាំងសងខាង និងដើម្បីមានការអនុវត្តស្របច្បាប់ និងដើម្បីបញ្ចៀសការរិះគន់បន្ថែមទៀតពីសាធារណជន និងសហគមន៍អន្តរជាតិ»។
លោកស្រី ជូ ប៊ុនអេង អនុប្រធានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស នៃក្រសួងមហាផ្ទៃ មានប្រសាសន៍ថា អាជ្ញាធរកំពុងមានបញ្ហាប្រឈមក្នុងការជួយអ្នកជំងឺ ដោយសារពួកគាត់ស្ទាក់ស្ទើរក្នុងការផ្តល់ព័ត៌មានលម្អិត ដោយសារបារម្ភខ្លាចមិនអាចទទួលបានការវះកាត់ [ប្តូរក្រលៀន]។
លោកស្រីមានប្រសាសន៍ថា៖ «គាត់ឈប់ផ្តល់ព័ត៌មាន ព្រោះគាត់ខ្លាចពួកគាត់មិនអាចធ្វើការប្តូរ(ក្រលៀន)បាន ដូច្នេះយើងកំពុងរកវីធីថាធ្វើម៉េចឱ្យគាត់ផ្តល់ព័ត៌មានឱ្យច្រើន»។
លោកស្រី ជូ ប៊ុនអេង បានមានប្រសាសន៍បន្តថា៖ «យើងមិនត្រូវបានអនុញ្ញាតឱ្យធ្វើការវះកាត់ប្តូរ(ក្រលៀន)នោះទេ ប៉ុន្តែរឿងដែលសំខាន់ គឺមិនមែនអំពីការប្តូរក្រលៀននោះទេ ប៉ុន្តែថា ពួកគេបាននាំមនុស្ស ទៅធ្វើអាជីវកម្មលើអ្នកជំងឺ»។
លោកស្រីមានប្រសាសន៍ថា អគ្គស្នងការនគរបាលជាតិកំពុងស៊ើបអង្កេតករណីនេះ និងកំពុងស្វែងរកចាប់ខ្លួនជនសង្ស័យ (សំអូន) ដែលកំពុងគេចខ្លួននៅពេលនេះ។
កាលពីខែកក្កដាកន្លងទៅ ខេមបូចាបានរាយការណ៍ថា នគរបាលកម្ពុជាកំពុងស៊ើបអង្កេតករណីជួញដូរសរីរាង្គខុសច្បាប់នៅមន្ទីរពេទ្យព្រះកេតុមាលា បន្ទាប់ពីនគរបាលឥណ្ឌូនេស៊ីចាប់ខ្លួនមនុស្ស១២នាក់ ក្នុងនោះបីនាក់ត្រូវបានចាប់ខ្លួននៅកម្ពុជា នេះបើយោងតាមការចុះផ្សាយរបស់ទីភ្នាក់ងារសារព័ត៌មាន Associated Press។
មនុស្សប្រាំបួននាក់ក្នុងចំណោមជនសង្ស័យទាំងនោះ គឺជា “ជនរងគ្រោះនៃការជួញដូរសរីរាង្គ” ដែលតាមចោទថា បានល្បួងមនុស្សផ្សេងទៀតឱ្យលក់ក្រលៀនរបស់ពួកគេតាមរយៈប្រព័ន្ធផ្សព្វផ្សាយសង្គម។
កាលពីឆ្នាំ២០១៦ រដ្ឋសភាបានអនុម័តច្បាប់ ដែលហាមប្រាមការប្តូរសរីរាង្គក្នុងលក្ខណៈពាណិជ្ជកម្មដោយចែងថា ការបរិច្ចាគសរីរាង្គមនុស្សត្រូវតែធ្វើឡើងក្នុងគោលបំណងមនុស្សធម៌ និងមិនមែន ដើម្បីរកប្រាក់ចំណេញទេ។ ការផ្សាំសរីរាង្គក្នុងគោលបំណងពាណិជ្ជកម្ម ក៏ដូចជាការផ្សព្វផ្សាយពាណិជ្ជកម្ម ត្រូវបានហាមឃាត់ក្រោមច្បាប់នេះផងដែរ ហើយជនល្មើសអាចប្រឈមនឹងការជាប់ពន្ធនាគាររហូតដល់២០ឆ្នាំ នេះបើយោងតាមសេចក្តីរាយការណ៍របស់កាសែតភ្នំពេញប៉ុស្តិ៍។
កាលពីខែមីនា ឆ្នាំ២០២២ អតីតនាយករដ្ឋមន្ត្រី ហ៊ុន សែន បានជំរុញឱ្យក្រសួងសុខាភិបាល បង្កើនការផ្សព្វផ្សាយប្តូរសរីរាង្គក្នុងស្រុកតាមរយៈការបរិច្ចាក។
ទាំងលោក ប៉ែន បូណា អ្នកនាំពាក្យរដ្ឋាភិបាល និងលោក ជួន ណារិន្ទ ស្នងការនគរបាលរាជធានីភ្នំពេញបានបង្វែរសំណួររបស់ខេមបូចាឲ្យទៅសួរអ្នកនាំពាក្យក្រសួងសុខាភិបាលវិញ។
នៅពេលសួរអំពីបញ្ហានេះ លោកស្រី ឱ វណ្ណឌីន អ្នកនាំពាក្យក្រសួងសុខាភិបាលមានប្រសាសន៍ថា ក្រសួងកំពុងធ្វើការយ៉ាងយកចិត្តទុកដាក់លើករណីនេះ ហើយបដិសេធធ្វើអត្ថាធិប្បាយបន្ថែម។
លោក ឆាយ គឹមឃឿន អ្នកនាំពាក្យអគ្គស្នងការនគរបាលជាតិបញ្ជាក់យ៉ាងខ្លីថា នគរបាលកំពុងស៊ើបអង្កេត ដោយបដិសេធធ្វើអត្ថាធិប្បាយបន្ថែម៕
ប្រែសម្រួលពីអត្ថបទភាសាអង់គ្លេស៖ Cambodian Kidney Transplant Victims Stranded in India Plead For PM Hun Manet’s Intervention
