សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋ និងអាជ្ញាធរមូលដ្ឋានចោទក្រុមហ៊ុន ING Holding រំលោភយកដីបឹងសហគមន៍ជាង៧ហិកតា

ទិន្នភាពបឹងជីភោដែលពលរដ្ឋធ្លាប់បានដាំឈូក និងអាស្រ័យផល ប៉ុន្ដែសព្វថ្ងៃត្រូវបានក្រុមហ៊ុនហាមឃាត់មិនឱ្យអាស្រ័យផលបានដូចកាលពីមុនទេ ព្រមទាំងមានបោះបង្គោលថ្មសំគាល់ថា ជាដីក្រុមហ៊ុន ING Holding ទៀតផង។ រូបថតកាលពីថ្ងៃទី២០ ខែធ្នូ ឆ្នាំ២០២១។ ខេមបូចា/ សុទ្ធ គឹមសឿន
ទិន្នភាពបឹងជីភោដែលពលរដ្ឋធ្លាប់បានដាំឈូក និងអាស្រ័យផល ប៉ុន្ដែសព្វថ្ងៃត្រូវបានក្រុមហ៊ុនហាមឃាត់មិនឱ្យអាស្រ័យផលបានដូចកាលពីមុនទេ ព្រមទាំងមានបោះបង្គោលថ្មសំគាល់ថា ជាដីក្រុមហ៊ុន ING Holding ទៀតផង។ រូបថតកាលពីថ្ងៃទី២០ ខែធ្នូ ឆ្នាំ២០២១។ ខេមបូចា/ សុទ្ធ គឹមសឿន

ភ្នំពេញ៖ ប្រជាពលរដ្ឋ និងអាជ្ញាធរមូលដ្ឋាន បានចោទប្រកាន់ក្រុមហ៊ុន ING Holding របស់លោកឧកញ៉ា អ៊ឹង ប៊ុនហ៊ូវ រំលោភយកដីបឹងហសហគមន៍ទំហំជាង ៧ហិកតាស្ថិតនៅ​ភូមិស្ទឹងជ្រៅ​ សង្កាត់​ដើមមៀន ក្រុង​តាខ្មៅ ខេត្ត​កណ្តាល ដោយពួកគេអំពាវនាវឱ្យ​លោក​នាយករដ្ឋមន្រ្តី ហ៊ុន សែន ជួយអន្ត​រាគមន៍​​ដកហូតដីបឹងនោះឱ្យអ្នកភូមិវិញ។

អ្នកភូមិតែងតែហៅបឹងនោះថា«បឹងជីភោ»ដែលស្ថិតនៅខាងក្រោយភូមិស្ទឹងជ្រៅ សង្កាត់ដើមមៀន ក្រុងតាខ្មៅ ខេត្តកណ្ដាល ប៉ុន្ដែកាលពីឆ្នាំ២០២០នេះ រាជរដ្ឋាភិបាល បានកាត់ដីបឹងឱ្យរដ្ឋបាលខណ្ឌមានជ័យ រាជធានីភ្នំពេញជាអ្នកគ្រប់គ្រងវិញ។ បឹងជីភោ ក៏ស្ថិតនៅជាប់នឹង​មហាវិថី​សម្តេចតេជោ​ ហ៊ុន សែន ឬ​ហៅថា​ផ្លូវ​ ៦០ ​ម៉ែត្រផងដែរ។

ប្រជាពលរដ្ឋ​ប្រមាណ​ជាង ២០០ ​នាក់​តំណាងឱ្យអ្នកភូមិ​ ៣៥០ ​គ្រួសារ​រស់នៅទីតាំងខាងលើ កាល​ពីថ្ងៃ​ទី​ ១២ ធ្នូឆ្នាំ២០២១នេះ បាន​ប្រ​មូ​ល​ផ្តុំគ្នា​នៅ​ជិត​ដី​បឹង​មាន​ជម្លោះតាម​បណ្តោយ​​ផ្លូវ​ ៦០ ​ម៉ែត្រ ដោ​យមាន​​លើក​បដា ឧបករណ៍បំពងសម្លេង និងនាំគ្នាស្រែកតវ៉ាឱ្យ​ក្រសួងរៀបចំ​ដែនដី នគរូបណីយកម្ម និង​សំណង់ និង​លោកនាយក​រដ្ឋមន្ត្រី​ ហ៊ុន សែន ជួយអន្តរាគមន៍​ដោះស្រាយ​ជម្លោះដីធ្លី​របស់ពួកគេដែល​បាន​អូសបន្លាយ​ច្រើន​ឆ្នាំ​មកនេះ​។

លោក អឿន សំអូន តំណាង​ពលរដ្ឋ​បាន​ថ្លែងប្រាប់អ្នកយកព័ត៌មានខេមបូចាថា ដី​បឹង​ជីភោ​ដែល​មាន​ទំហំ​ ៧៤ ១៥៣ ​ម៉ែត្រការ៉េ ត្រូវបាន​ពលរដ្ឋ​ធ្លាប់​គ្រប់គ្រង​ និង​អាស្រ័យផលចាប់​តាំងពី​ឆ្នាំ​ ១៩៧០-១៩៨០ មក​ម្ល៉េះ​ដោយ​​បាន​ដាំ​ត្រកួន កញ្ឆែត ស្រូវ និង​ដាំ​ដំណាំបន្លែ​ផ្សេងទៀត ដើម្បី​លក់​ផ្គត់ផ្គង់​ជីវភាព​គ្រួសារ​។

លោក​បន្តថា ​មុនឆ្នាំ២០១៦ ​ក្រុមហ៊ុន ING Holding របស់លោកឧកញ៉ា អ៊ឹង ប៊ុនហ៊ូវ បាន​ដើរ​ទិញ​ដី​ពលរដ្ឋដែលនៅក្បែរ​បឹង​នោះ ប៉ុន្តែ​បែរជាមក​បោះបង្គោល​ថ្មហ៊ុមព័ទ្ធ​រំលោភ​យក​ដី​បឹង​ជីភោ​ទំហំ​ជាង​ ៧ ​ហិកតានោះផងដែរ​។ ក្រុមហ៊ុនបានដាក់មនុស្សយាមដីបឹង មិនអនុញ្ញាតឱ្យ​អ្នកភូមិចូលទៅ​រកត្រី ឬដាំបន្លែផ្សេងៗដូចកាលពីមុនទៀតទេ ដោយពួកគេអះអាងថា ជាដីរបស់ក្រុមហ៊ុន។

លោក សំអូន បញ្ជាក់​ថា​៖ «​ក្រុមហ៊ុន ING គាត់បានលួចធ្វើប្លង់(ប័ណ្ណកម្មសិទ្ធដីធ្លី)​រំលោភ​យក​ដី​បឹងហ្នឹងតែ​ម្តង​ គឺនៅអំឡុងខែមករា ឆ្នាំ​ ២០១៦ ដោយក្រុមហ៊ុន​នេះ​បាន​អះអាងថា គេ​បាន​ទិញដីហ្នឹងហើយ។ រីឯ​ពលរដ្ឋ និងមេភូមិវិញ គ្មាននរណាបានដឹងលឺពីការទិញ-លក់ដី​បឹងនេះ​ទេ។ ​អ៊ីចឹងក្រុមហ៊ុនពិតជាបាន​​ក្លែង​បន្លំ និងលួច​ធ្វើប្លង់ស្ងាត់ៗលើដីបឹង​សហគមន៍​យើង​ហើយ»​

អ្នកស្រី ធា នី អាយុ ៥៧ឆ្នាំកំពុងអង្គុយច្រកទឹកចូលក្នុងដកតូចៗទុកពិសារនៅក្រោមផ្ទះ​របស់គាត់បាន​និយាយទាំងទឹកមុខក្រៀមក្រំថា អ្នកស្រីពិតជាសោកស្ដាយដីបឹងជីភោ​ដែលអ្នក​ភូមិធ្លាប់អាស្រ័យ​ផលរួមគ្នាជិត ៣០ឆ្នាំហើយ ប៉ុន្ដែសព្វថ្ងៃនេះ ក្រុមហ៊ុនបានរំលោភយក​ហើយហាមពលរដ្ឋមិនឱ្យចូលទៅអាស្រ័យផលដូចកាលពីមុនទៀតទេ។

អ្នកស្រីបន្តថា ការហាមឃាត់ពលរដ្ឋនេះ ធ្វើឱ្យប៉ះពាល់ជីវភាពយ៉ាងខ្លាំង ខណៈពលរដ្ឋក្នុង​ភូមិ​ភាគច្រើន​ជាអ្នកដាំបន្លែ និងអ្នកចាប់ត្រី ដើម្បីលក់ដូរផ្គត់ផ្គង់ជីវភាពប្រចាំថ្ងៃ ហើយ​ក្នុង​មួយ​ថ្ងៃៗពួកគាត់អាច​រកបានត្រឹមតែ​ ២ ​ម៉ឺន ឬ​ ៣ ម៉ឺន​រៀលប៉ុណ្ណោះ​។ ក្រុមហ៊ុនបានតម្រូវឱ្យ​ជួល​ដី​បឹង​នោះ ប្រសិនបើអ្នកភូមិ​ចង់បន្តអាស្រ័យផលលើដីបឹងនេះតាមរយៈការចុះកិច្ចសន្យា​ជាកន្លះឆ្នាំ ឬមួយឆ្នាំ​ម្ដង រីឯតម្លៃគិតតាមទំហំដី​ដែលពលរដ្ឋចង់​ជួល។

ស្រ្តីរូបនេះបញ្ជាក់ថា៖ «ពួកយើងជាប្រជាពលរដ្ឋ កើតទុក្ខមិនសុខចិត្តទេ ព្រោះវាជាដីរបស់សហគមន៍ភូមិស្ទឹងជ្រៅ ហេតុអ្វីបានជាក្រុមហ៊ុនយកដីពលរដ្ឋ មកជួលឱ្យពលរដ្ឋ? ដីបឹងនេះមិនមែនជាដីកម្មសិទ្ធ​របស់បុគ្គលណាម្នាក់ដាច់មុខទេ វាគឺជាដីរួមរបស់ពលរដ្ឋសហគមន៍ ៣៥០គ្រួសារនៅ​ក្នុងភូមិហ្នឹង»

អ្នកស្រីថា ដីបឹងជីភោនេះ មិនមានប័ណ្ណកម្មសិទ្ធសម្រាប់សំគាល់ជារបស់បុគ្គលណាម្នាក់ទេ ព្រោះវាជា​ដីបឹងដែលអ្នកភូមិបានរួមគ្នាថែរក្សា ដើម្បីផលប្រយោជន៍រួមរបស់សហគមន៍ ប៉ុន្ដែប្រសិនបើមានក្រុម​ហ៊ុន ឬបុគ្គលណាម្នាក់ចង់បានដាច់មុខ លុះត្រាតែមានការឯកភាពពីប្រជាពលរដ្ឋទាំង ៣៥០គ្រួសារ និង​អាជ្ញាធរជាមុនសិន។

ពលរដ្ឋម្នាក់ក្នុងចំណោមអ្នកភូមិ ៣៥០គ្រួសារ ដែលរស់នៅក្នុងសង្កាត់ដើមមៀន ក្រុងតាខ្មៅ ខេត្តកណ្ដាល បានអង្គុយកាន់ពាក្យបណ្ដឹងខណៈគាត់បានផ្តល់បទសម្ភាសន៍​ដល់​អ្នកសារព័ត៌មាន​ខេមបូចា។ រូបថតកាលពីថ្ងៃទី២០ខែធ្នូ ឆ្នាំ២០២១។ ខេមបូចា/ សុទ្ធ គឹមសឿន

បុរសម្នាក់វ័យ ៥៩ឆ្នាំសុំមិនបញ្ចេញឈ្មោះដែលកំពុងមានជំងឺប្រចាំកាយផងដែរ​បាន​និយាយថា កន្លងមកប្រជាពលរដ្ឋទាំងអស់ បានបង្កើត​គណៈកម្មការមួយមានសមាជិក​ចំនួន ១២នាក់ ​បានឯកភាពគ្នាស្នើសុំគោលការណ៍ពីរាជរដ្ឋាភិបាល ដើម្បីមានសិទ្ធិអាចលក់ដូរ​ដីបឹង​សហគមន៍ភូមិស្ទឹងជ្រៅនេះក្នុងការប្រមូលយកថវិកាមកប្រើប្រាស់សម្រាប់ធ្វើការអភិវឌ្ឍក្នុងសហគមន៍ភូមិស្ទឹងជ្រៅដូចជា កសាងហេដ្ឋារចនាសម្ព័ន្ធ ផ្លូវ ស្ពាន ដាក់លូ សាលារៀន និងមណ្ឌលសុខភាព ដែលជាសេ​ចក្ដី​ត្រូវ​ការ​រប​ស់​ប្រ​ជា​ពលរដ្ឋក្នុងសហគមន៍។

លោកបន្ត​ថា រាជរដ្ឋាភិបាលបានសម្រេចជាគោលការណ៍អនុញ្ញាតឱ្យ​​គណៈកម្មការ និង​ប្រជាពលរដ្ឋ​ចំនួន ៣៥០គ្រួសារ អាចលក់ដីសហគមន៍ភូមិស្ទឹងជ្រៅ ចំណុចបឹងជីភោនេះ តាមរយៈលិខិតលេខ៥៨៥ ស.ជ.ណ.ផ.ក ចុះថ្ងៃទី១០ ខែមិថុនា ឆ្នាំ២០១៦ និងលិខិតលេខ​៩៦៧ ស.ជ.ណ ចុះថ្ងៃទី១៥ ខែកញ្ញា ឆ្នាំ២០១៦ របស់ទីស្តីការគណៈរដ្ឋមន្ត្រី។

លោកបញ្ជាក់ថា៖ «បន្ទាប់ពីយើងទទួលបានការអនុញ្ញាតពីរាជរដ្ឋាភិបាលឱ្យលក់ដីបឹងនេះនៅ​ឆ្នាំ​២០១៦ គឺស្រាប់តែមានក្រុមសន្ដិសុខរបស់ក្រុមហ៊ុន ING មកហាមឃាត់មន្រ្តីសុរិយោដី​ខេត្តកណ្ដាល និង​ពលរដ្ឋ​មិនឱ្យចុះវាស់វែងដីបឹងហ្នឹងទេ គេថាដីរបស់ក្រុមហ៊ុន អ៊ីចឹងពលរដ្ឋ​ម្នាក់ៗ គឺស្រឡាំងកាំង​គ្រប់គ្នា ហើយពួកគាត់ឆ្ងល់ថា តើដីហ្នឹងក្លាយរបស់ក្រុមហ៊ុន​តាំងពី​ពេល​ណាមក?»។​ ដោយលោក​បន្តថា៖ «អ៊ីចឹងហើយ​ បានជា​យើងនាំគ្នា​តវ៉ា​ជាច្រើនលើក ហើយដាក់ពាក្យបណ្ដឹង​ទៅស្ថាប័នជាតិស្ទើរតែគ្រប់កន្លែង​»

លោក ហ៊ឹម ឆុន មេភូមិស្ទឹងជ្រៅបានថ្លែងថា ដីបឹងជីភោនេះ ត្រូវបានពលរដ្ឋក្នុងមូលដ្ឋាន​អាស្រ័យផល និង​ការពារជាច្រើនឆ្នាំហើយ ប៉ុន្ដែក្រុមហ៊ុន ING បែរជាមកលួចធ្វើប័ណ្ណកម្មសិទ្ធិ​ស្ងាត់ៗយកដីបឹងទៅគ្រប់​គ្រងផ្ទាល់ខ្លួន។ ពលរដ្ឋបាននាំគ្នាតវ៉ាជាច្រើនលើក និងដាក់ពាក្យ​បណ្ដឹងទៅអង្គភាពថ្នាក់ជាតិ​ជា​ច្រើនកន្លែងដែរ ប៉ុន្ដែមិនទាន់មានដំណោះស្រាយ​សមរម្យ​ជូន​ពួកគាត់ទេ។

លោកមេភូមិបញ្ជាក់ថា៖ «ពលរដ្ឋគាត់បានស្នើទៅសម្ដេចតេជោ សុំកាត់ឆ្វៀលដីបឹងហ្នឹងមក​ឱ្យសហគមន៍ ហើយសម្ដេចក៏គាត់ឯកភាពដែរ ដល់ពេលពលរដ្ឋ និងមន្រ្តីនាំគ្នាទៅវាស់វែង ភាគីក្រុមហ៊ុនគេហាមមិនឱ្យ​ចូល​ទៅវាស់វែងដីហ្នឹងទេ អ៊ីចឹងក៏ចាប់ផ្ដើមកើតមានជាទំនាស់​នឹងគ្នា»

លោកមេភូមិបន្ថែមថា៖ «បន្ទាប់មក​ក្រុមហ៊ុនគេដឹងថា ពលរដ្ឋកំពុងប្ដឹង​ទាម​ទារ​ទៅស្ថាប័ននេះ ស្ថាប័ននោះ អ៊ីចឹងខាងក្រុមហ៊ុនគេក៏បានលួចទៅធ្វើប្លង់ ហើយសារ៉េដាក់ថ្ងៃខែ ឱ្យវាសមទំនង​តិច​ទៅ គឺដូចរបៀបប្លង់សេះហោះចឹង។ អ៊ីចឹងសព្វថ្ងៃហ្នឹង វានៅជាប់គាំងត្រឹមគេមានឯកសារ ហើយ​ពលរដ្ឋ​គ្មានឯកសារសំគាល់ដីហ្នឹង ឥលូវ​វាជាប់គាំងត្រឹមហ្នឹង​»

លោក ឯក សំណាង ចៅសង្កាត់ដើមមៀននៅថ្ងៃទី ១៦ខែធ្នូនេះបានបដិសេដការផ្ដល់បទ​សំភាសន៍ ដោយលោកអះអាងថា លោកជាប់រវល់ប្រជុំនៅសាលាសង្កាត់ដើមមៀន។

លោកចៅសង្កាត់ប្រាប់ថា៖ «ខ្ញុំអត់អាចនិយាយអ្វីបាន​ទេ ប្អូន ព្រោះខ្ញុំត្រូវទៅប្រជុំនៅសាលា​សង្កាត់ បើមានអ្វីចង់សួរ ចាំសួរខ្ញុំនៅពេលក្រោយ​ទៅ»

លោក ម៉េត មាសភក្ដី អ្នកនាំពាក្យរដ្ឋបាលរាជធានីភ្នំពេញបានថ្លែងថា លោកមិនទាន់ដឹងពី​ប្រវត្តិដីបឹងនេះ​ច្បាស់លាស់នៅឡើយ។

លោកមានប្រសាសន៍ថា៖ «ខ្ញុំមិនទាន់បានដឹងពីសាវតាដីបឹងហ្នឹងច្បាស់លាស់ទេ ដូច្នេះខ្ញុំអត់អាចផ្ដល់​បទសំភាសន៍ជុំវិញករណីនេះបានទេ លោកអាចសួរទៅមន្រ្តីជំនាញ ពួកគាត់នឹងដឹង​រឿងនេះ​»។

លោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី ១៦ ខែ​ធ្នូនេះ​មិន​ទាន់អាចទាក់ទងសុំការបញ្ជាក់បន្ថែមជុំវិញករណីនេះបានទេ ដោយទូរស័ព្ទលោក​គ្មានអ្នកទទួល។​

តាមសេចក្ដីជូនដំណឹងរបស់ទីស្ដីការគណៈរដ្ឋមន្រ្តីចុះថ្ងៃទី ១០ខែមិថុនាឆ្នាំ២០១៦បានឱ្យដឹង​ថា រាជរដ្ឋាភិបាលបានយល់ព្រម និងអនុញ្ញាតឱ្យគណៈកម្មការតំណាងប្រជាពលរដ្ឋចំនួន ៣៥០គ្រួសារលក់ដី​សហគមន៍នៅចំណុចបឹងជីភោ(ដីវាលទំនាប)ដែលមានទំហំ ៧៤១៥៣​ម៉ែត្រ​ការ៉េ នៅជាប់មហាវិថីសម្ដេចតេជោ ឬហៅផ្លូវ ៦០ម៉ែត្រ ស្ថិតនៅក្នុងភូមិស្ទឹងជ្រៅ សង្កាត់ដើមមៀន ក្រុងតាខ្មៅ ខេត្តកណ្ដា​ល ជូនទៅឱ្យក្រុមហ៊ុន ភី ធី អិល នែតជ្រល រីសសស៍ ឌីវេឡុបមេន ដើម្បីធ្វើការអភិវឌ្ឍន៍ និងធ្វើ​ប័ណ្ណកម្មសិទ្ធ។

សេចក្ដីជូនដំណឹងបន្តថា អនុញ្ញាតឱ្យក្រុមហ៊ុន ភី ធី អិល ធ្វើការសម្របសម្រួលដោយផ្ទាល់​ជាមួយគណៈកម្មការ និងប្រជាពលរដ្ឋដែលមានការពាក់ព័ន្ធ និងដីសហគមន៍នៅចំណុច​បឹង​ជីភោដោយ​អនុវត្ត​តាម​នីតិវិធីច្បាប់ជាធរមាន។

រដ្ឋបាលខេត្តកណ្ដាល នៅថ្ងៃទី ២៦ ខែកញ្ញាឆ្នាំ២០១៦ បានចាត់មន្រ្តីជំនាញ ដោយសហការ​ជាមួយ​រដ្ឋ​បាលក្រុងតាខ្មៅ និងអាជ្ញាធរមូលដ្ឋាន ដើម្បីចុះទៅអង្កេតវាស់វែងទីតាំងដី​សហគមន៍​នៅភូមិស្ទឹងជ្រៅ ប៉ុន្ដែក្រុមហ៊ុន ING Holding បានប្រើប្រាស់​កម្លាំងសន្ដិសុខរបស់​ខ្លួន ហាមឃាត់មន្រ្តីជំនាញ និងមន្រ្តី​រដ្ឋបាលក្រុងតាខ្មៅ ដោយមិនអនុញ្ញាតឱ្យវាស់វែង​ដីបឹង​នោះទៅតាមការសម្រេចរបស់រាជរដ្ឋាភិបាល​តាម​រយៈសេចក្ដីជូនដំណឹង​របស់ទីស្ដីការ​គណៈរដ្ឋមន្រ្តីឡើយ។

បន្ទាប់មករដ្ឋបាលខេត្តកណ្ដាលបានបង្កើតក្រុមការងារមួយក្រុមទៀត ដើម្បីចុះពិនិត្យ​ជាក់​ស្ដែងលើទីតាំង​ដីរបស់សហគមន៍ ក្នុងនោះរួមមាន មន្រ្តីរដ្ឋបាលខេត្តកណ្ដាល រដ្ឋបាល​ក្រុងតាខ្មៅ មន្ទីររៀបចំដែន​ដី នគរូបនីយកម្មសំណង់ និងសុរិយោដីខេត្តកណ្ដាល មន្រ្តី​ភូមិបាល​ក្រុងតាខ្មៅ ចៅសង្កាត់ដើមមៀន មេភូមិស្ទឹងជ្រៅ និងសមាជិកគណៈកម្មការ​ចំនួន ១២នាក់ ដែលតំណាងឱ្យពលរដ្ឋ ៣៥០គ្រួសារ​។ ក្រោយមកក្រុមការងារចម្រុះ បានចុះពិនិត្យ​ជាក់ស្ដែងលើទីតាំងដីសហគមន៍ បានរកឃើញថា ក្រុមហ៊ុន ING Holding នេះពិតជាបាន​រំលោភ​យកដីពលរដ្ឋទៅធ្វើប័ណ្ណកម្មសិទ្ធិនៅរាជធានីភ្នំពេញ ដែល​មាន​ប័ណ្ណដីលេខ ភព ២៦១២០ ចុះថ្ងៃទី ០៩ ខែមីនាឆ្នាំ២០១៥ របស់​មន្ទីររៀបចំដែនដីនគរូបនីយកម្មសំ​ណង់​ និង​សុរិយោដី​រាជធានីភ្នំពេ​ញ។

លោក អឿន សំអូន ឈរផ្ដល់បទសំភាសន៍ដល់អ្នកសារព័ត៌មាន ខណៈដែលគាត់​បាន​ចូល​រួមតវ៉ាជាមួយពលរដ្ឋផ្សេងទៀតនៅលើផ្លូវ ៦០ម៉ែត្រ ដើម្បីស្វែងរកដំណោះស្រាយពី​ថ្នាក់​ដឹកនាំរដ្ឋាភិបាល។ រូបថតកាលពីថ្ងៃទី ១៣ ខែធ្នូឆ្នាំ២០២១។ រូបថតផ្ដល់ឱ្យ

គណៈកម្មការដែលតំណាងពលរដ្ឋ ៣៥០គ្រួសារ ស្នើសុំកាត់ឆ្វៀលដីសហគមន៍ភូមិស្ទឹងជ្រៅ​ចំនួន ៧៤​១៥៣ម៉ែត្រការ៉េ នៅចំណុចបឹងជីភោ ជាប់ផ្លូវ ៦០ម៉ែត្ររបស់​មន្ទីររៀបចំដែនដី​នគរូបនីយកម្មសំណង់​ និងសុរិយោដីរាជធានីភ្នំពេញ ដើម្បីប្រគល់ជូន​សហគមន៍វិញ។ ដោយ​ស្នើសុំឱ្យរដ្ឋបាល​ខេត្តកណ្ដាល រដ្ឋបាលក្រុងតាខ្មៅ មន្ទីររៀបចំដែន​ដីនគរូបនីយកម្មសំណង់ និងសុរិយោដីខេត្តកណ្ដាល និងអាជ្ញាធរមូលដ្ឋាន អនុវត្តតាមការសម្រេចរបស់រាជរដ្ឋាភិបាល​តាមរយៈលិខិតចុះថ្ងៃទី ១០ ខែមិថុនា ឆ្នាំ២០១៦ របស់ទីស្ដីការគណៈរដ្ឋមន្រ្តី។

លោកឧកញ៉ា អ៊ឹង ប៊ុនហ៊ូវ និងអ្នកតំណាងក្រុមហ៊ុន ING Holding មិនអាចសុំការឆ្លើយ​បំភ្លឺ​ជុំវិញការចោទប្រកាន់នេះបានទេ។

ប៉ុន្ដែទីស្ដីការគណៈរដ្ឋមន្រ្តី កាលពីថ្ងៃទី ៣០ខែមិនា ឆ្នាំ២០១៧ បានចេញលិខិតជូនដំណឹង​មួយទៀត ដោយបាននិរាករណ៍លិខិតលេខ៥៨៥ សជណ ចុះថ្ងៃទី ១០ខែមិថុនាឆ្នាំ២០១៦​របស់ខ្លួន ដែលស​ម្រេ​ច​បញ្ឈប់ការអនុញ្ញាតឱ្យពលរដ្ឋលក់ដីបឹងជីភោឱ្យទៅក្រុមហ៊ុន ភី ធី អិល។ ដោយអះអាងថា ដីបឹងរបស់​សហគមន៍គ្មានឯកសារសំអាងទេ និងជាន់លើដីកម្មសិទ្ធ​ស្របច្បាប់របស់ក្រុមហ៊ុន ING Holding ដែល​មាន​ប័ណ្ណសម្គាល់សិទ្ធិកាន់កាប់អចលនវត្ថុលេខ ភព ២៦១២០ ចុះថ្ងៃទី ០៩ខែមីនាឆ្នាំ២០១៥ និងជាន់​លើ​ដីផ្សេងទៀតរបស់ក្រុមហ៊ុន ING ស្ថិតនៅក្នុងរាជធានីភ្នំពេញ និងខេត្តកណ្ដាល ក្នុងតំបន់អភិវឌ្ឍទីក្រុងរណបតំបន់បឹងទំពុន និងបឹងជើងឯកដែលរាជរដ្ឋាភិបាលបានសម្រេច​កាលពីឆ្នាំ២០០៦​របស់ទីស្ដីការគណៈ​រដ្ឋមន្រ្តី។

លិខិតបន្តថា អនុញ្ញាតឱ្យក្រុមហ៊ុន ING Holding បន្តគ្រប់គ្រងជាកម្មសិទ្ធិស្របច្បាប់ និងអភិវឌ្ឍដីនេះ​តាមប្លង់មេនៃគម្រោងអភិវឌ្ឍទីក្រុងរណបតំបន់បឹងទំពុន និងបឹងជើងឯក ដែលរាជរដ្ឋាភិបាលបាន​សម្រេច​រួចហើយ។

បន្ថែមពីលើនេះទៀត ក្រសួងមហាផ្ទៃ កាលពីថ្ងៃទី ១៣ ខែវិច្ឆិកា ឆ្នាំ២០២០ ដែលមាន​ហត្ថលេខាលោក ស ខេង រដ្ឋមន្រ្តីក្រសួងមហាផ្ទៃ បានជម្រាបជូនទៅ​រដ្ឋបាលខេត្តកណ្ដាល​បានឱ្យដឹងថា ដីទំហំជាង ៧ហិកតាដែល​ពលរដ្ឋសហគមន៍អះអាងថា ជាដីរបស់ខ្លួននោះ គ្មានឯកសារសំអាងច្បាស់លាស់ និងជា​ន់​លើ​ដី​កម្ម​សិទ្ធិស្របច្បាប់របស់ក្រុមហ៊ុន ING Holding។

ក្រសួងមហាផ្ទៃ បានណែនាំឱ្យរដ្ឋបាលខេត្តកណ្ដាល អនុវត្តតាមសេចក្ដីសម្រេចរបស់​រាជរដ្ឋាភិបាល​ និង​ត្រូ​វ​ចូលរួមចាត់វិធានការទប់ស្កាត់មេខ្យល់ ឬជនខិលខូចដែល​បំផុស​បំផុល​ប្រជាពលរដ្ឋឱ្យធ្វើការ​រំខានដល់ការកាន់កាប់ និងការអភិវឌ្ឍទីក្រុងរណបរបស់ក្រុមហ៊ុន​តាម​គ្រប់​រូបភាព។ លើសពីនេះ ក្រ​សួង​ម​ហា​ផ្ទៃ បាន​ណែនាំឱ្យមន្រ្តីជំនាញខេត្តកណ្ដាល និង​អាជ្ញាធរមូលដ្ឋាន ចុះផ្សព្វផ្សាយ អប់រំណែនាំ​ពលរដ្ឋឱ្យបានយល់ដឹងអំពីគោលការណ៍ច្បាប់ លិខិតបទដ្ឋានគតិយុត្តពាក់ព័ន្ធនឹងដីធ្លី ព្រម​ទាំង​ការសេចក្តីសម្រេចរបស់រាជរដ្ឋាភិបាល​កន្លង​មក ដើម្បីចៀសវាងការចូលទៅរំលោភកាន់កាប់ដីរដ្ឋ និងដីឯកជនដោយខុសច្បាប់។

ទោះបីជាយ៉ាងណា ពលរដ្ឋនៅតែអះអាងថា ពួកគេនឹងបន្តតវ៉ារហូតមានដំណោះស្រាយណា​មួយ​សម​រម្យ​ដែលធ្វើឱ្យភាគីទាំងពីរអាចទទួលយកទាំងអស់គ្នា។ ពួកគាត់មានអារម្មណ៍​សោក​ស្ដាយយ៉ាងខ្លាំងចំពោះការបាត់បង់ដីបឹងដែលអ្នកភូមិធ្លាប់អាស្រ័យផលជិត ៣០ឆ្នាំមកនេះ។

លោក វិន ឈុនហ៊ាត ប្រធានក្រុមប្រឹក្សាភិបាលក្រុមហ៊ុន ដីថ្មី រៀលអ៊ីស្ទេត និងជាជំនាញ​ផ្នែកអចលនទ្រព្យបានឱ្យដឹងថា តាមនីតិវិធីច្បាប់ធ្វើប័ណ្ណកម្មសិទ្ធិដីធ្លី(ប្លង់ដី) មិនអាចធ្វើឆ្លង​ស្រុក ឬរាជធានី/ខេត្ត ឆ្លងទៅធ្វើនៅខេត្ត/ក្រុងណាមួយបានទេ។

លោកបានលើកឧទាហរណ៍មួយថា ប្រសិនបុគ្គលម្នាក់មានដីនៅខេត្តតាកែវ គឺបុគ្គលនោះ​ត្រូវតែធ្វើប្លង់ ឬប័ណ្ណកម្មសិទ្ធិកាន់កាប់ដីធ្លីរបស់ខ្លួននៅក្នុងខេត្តតាកែវ ពោលគឺមិនអាចយក​មក​ធ្វើនៅក្រុងភ្នំពេញបានទេ។

លោកបញ្ជាក់ថា៖ «ខ្ញុំថា ដីហ្នឹងគ្មាននីតិវិធីក្នុងការធ្វើឆ្លងខេត្ត ឆ្លងក្រុងអីបានទេ បើយើងនៅ​ដែនដីណា គឺដែនដីហ្នឹងអ្នកធ្វើឱ្យ។ ជាក់ស្ដែងបើសិនដីនៅក្នុងដែនដីក្រុងតាខ្មៅ គឺត្រូវទៅធ្វើ​នៅខេត្តកណ្ដាលក្នុងករណីគេមិនទាន់កាត់ចូលក្រុងភ្នំពេញ គឺយើងមិនអាចធ្វើប្លង់ឆ្លងខេត្ត ឆ្លងក្រុងតាមតែចិត្តយើងចង់ធ្វើទេ វាខុសពីនីតិវិធីច្បាប់»។  

លោក អំ សំអាត នាយករង​អង្គការ​សិទ្ធិមនុស្ស​​លីកាដូ(LICADHO)បាន​ថ្លែង​​ថា ករណីនេះបាន​កើតឡើង​ជាច្រើនឆ្នាំមកហើយ ប៉ុន្ដែមិនទាន់មានដំណោះស្រាយណាមួយសមរម្យ​ដែលធ្វើឱ្យ​ភាគីក្រុមហ៊ុន និង​ពលរដ្ឋអាចទទួលយកបានទេ។ លោកជំរុញឱ្យមន្រ្តីជំនាញពាក់ព័ន្ធ​ចុះ​ស្រាយជ្រាវ និងប្រមូលព័ត៌មាន​ឱ្យបានច្បាស់លាស់ មុនពេលធ្វើការសម្រេចចិត្តណាមួយ។

លោក សំអាត សម្ដែងក្ដីបារម្ភខ្លាចទំនាស់នេះក្លាយជាជម្លោះធំ ហើយឈានដល់ការ​ប្រើប្រាស់​អំពើ​ហឹង្សា និងរំលោភសិទ្ធិមនុស្ស។ លោកចង់ឃើញមន្រ្តីជំនាញចុះដោះស្រាយបញ្ចប់​វិវាទ​នេះឱ្យបានឆាប់បំផុត ដើម្បីកុំឱ្យអូសបន្លាយ​ពេល​វេលាថែមទៀត។

លោកបញ្ជាក់ថា៖ «បើសិនជាគ្មានដំណោះស្រាយណាមួយសមរម្យទេ ខ្ញុំតែងតែឃើញបញ្ហា​ទំនាស់ដីធ្លីនេះ គឺវាក្លាយទៅជារ៉ាំរ៉ៃយូឆ្នាំ ហើយវា​អាចឈានទៅដល់ការតវ៉ាដោយប្រើ​អំពើ​ហឹង្សា ការចាប់ខ្លួនឃុំជាដើម ហើយបញ្ហាទាំងនេះ​កើតឡើងតែទៅលើពលរដ្ឋរងគ្រោះហ្នឹង»។​ ដោយលោកបន្ថែមថា៖ «ខ្ញុំនៅតែបារម្ភចំពោះបញ្ហានេះវារីកធំឡើងៗដែលធ្វើឱ្យកាន់ពិបាក​ដោះ​ស្រាយ»

315 views

ព័ត៌មានថ្មីៗ

អត្ថបទពេញនិយម