អ្នកតវ៉ាក្នុងជម្លោះដីធ្លីចំនួន២១នាក់ត្រូវបានដោះលែង ខណៈមនុស្ស៩នាក់ផ្សេងទៀតត្រូវបានបញ្ជូនទៅពន្ធនាគារ

អ្នកភូមិត្រូវបានដោះលែងពីស្នងការដ្ឋាននគរបាលខេត្តកណ្តាលបន្ទាប់ពីត្រូវបានចាប់ខ្លួនកាលពីថ្ងៃអាទិត្យ អំឡុងការតវ៉ាប្រឆាំងនឹងគម្រោងព្រលានយន្តហោះថ្មី។ រូបភាពថត កាលពីថ្ងៃទី១៤ ខែកញ្ញា ឆ្នាំ២០២១។ ខេមបូចា/ បញ្ញា ឆព័ណ្ណ
អ្នកភូមិត្រូវបានដោះលែងពីស្នងការដ្ឋាននគរបាលខេត្តកណ្តាលបន្ទាប់ពីត្រូវបានចាប់ខ្លួនកាលពីថ្ងៃអាទិត្យ អំឡុងការតវ៉ាប្រឆាំងនឹងគម្រោងព្រលានយន្តហោះថ្មី។ រូបភាពថត កាលពីថ្ងៃទី១៤ ខែកញ្ញា ឆ្នាំ២០២១។ ខេមបូចា/ បញ្ញា ឆព័ណ្ណ

អ្នកភូមិប្រាំបួននាក់ដែលត្រូវបានចាប់ខ្លួនកាលពីថ្ងៃអាទិត្យ ខណៈពេលតវ៉ាក្នុងវិវាទដីធ្លីដែលកំពុងបន្តជុំវិញគម្រោងសាងសង់ព្រលានយន្តថ្មីនៅខេត្តកណ្តាលត្រូវបានបញ្ជូនទៅឃុំខ្លួនបណ្តោះអាសន្នកាលពីយប់ថ្ងៃអង្គារ ចំណែកមនុស្ស២១នាក់ផ្សេងទៀតត្រូវបានដោះលែង។

លោក គង់ សោភ័ណ្ឌ អភិបាលខេត្តកណ្តាលបានប្រាប់ខេមបូចាថា បុរស៥នាក់និងស្ត្រី៤នាក់នឹងត្រូវប្រឈមមុខនឹងវិធានការច្បាប់ដោយសារតែការ​ចោទថា បានប្រើអំពើហិង្សាលើអាជ្ញាធរអំឡុងពេលតវ៉ានោះ។

ប្រជាពលរដ្ឋជាង១០០នាក់នៅឃុំបឹងខ្យាងបានតវ៉ាកាលពីថ្ងៃអាទិត្យបន្ទាប់ពីអាជ្ញាធរមូលដ្ឋានបានបិទផ្លូវឆ្ពោះទៅដីស្រែរបស់ពួកគាត់និងអនុញ្ញាតឲ្យក្រុមហ៊ុនចាប់ផ្តើមឈូសឆាយដីស្រែចំការរបស់ពួកគាត់ ដើម្បីយកកន្លែងសម្រាប់គម្រោងសាងសង់ព្រលានយន្តហោះថ្មី បើទោះបីជាគ្រួសារជាច្រើននៅបន្តស្វែងរកសំណងសមរម្យសម្រាប់ដីស្រែរបស់ពួកគាត់ក៏ដោយ។

មនុស្ស៣០នាក់ត្រូវបានចាប់ខ្លួនកាលពីថ្ងៃអាទិត្យ នៅមុនអ្វីដែលសាក្សីពិពណ៌នាថា ជាការបង្ក្រាបទ្រង់ទ្រាយធំរបស់នគរបាលដោយការវាយដំនិងការចាប់ខ្លួន។ អាជ្ញាធរខេត្តចោទប្រកាន់ពួកគាត់ថា បានប្រើអំពើហិង្សាលើមន្ត្រីនគរបាល។ លោក គង់ សោភ័ណ្ឌ បានមានប្រសាសន៍ថា អាជ្ញាធរសម្រេចដោះលែងមនុស្ស២១នាក់ បន្ទាប់ពីឃុំខ្លួនរយៈពេល៣ថ្ងៃ ដោយលោកអះអាងថា ពួកគាត់ត្រូវបានរកឃើញថាមិនជាប់ ពាក់ព័ន្ធដោយផ្ទាល់ក្នុងអំពើហិង្សានោះទេ។

លោក សោភ័ណ្ឌ មានប្រសាសន៍ថា៖ «ខ្ញុំស្នើឲ្យដោះលែងមនុស្ស២១នាក់ ប៉ុន្តែលើក លែងតែអ្នកភូមិ៩នាក់ផ្សេងទៀតដែលជាជនដៃដល់។ ពួកគេនឹងប្រឈមចំ ណាត់​​  ការតាមផ្លូវច្បាប់ហើយត្រូវបានបញ្ជូនទៅតុលាការ។ ពួកគេ​មិនអាចគេចផុត​បានឡើយ»។ ដោយ លោកបន្ថែមថា៖ «ហេតុអ្វីបានជាគ្រប់គ្នាយក​ចិត្តទុក​ដាក់ តែពីប្រជាពលរដ្ឋ? ហេតុអ្វីមិនយក​ចត្ត​ទុក​ដាក់ ពីនគរប៉ុលិសផង? ។ ប៉ូលិស​ក៏ជាប្រជាពលរដ្ឋដែរតែ ហើយប៉ូលិសនេះហើយ​ជាអ្នក​ការពារច្បាប់»។

សុង សុខរីន ដែលបានទៅជួបប្អូន​ប្រុសរបស់នាងឈ្មោះ សុង ពេជ្ររ៉ា នៅស្នងការដ្ឋាននគរបាលខេត្តកណ្តាលបាននិយាយថា ប្អូន​ប្រុស​គាត់ស្ថិតក្នុងចំណោមមនុស្ស៩នាក់ដែលត្រូវបានអាជ្ញាធរចោទប្រកាន់។

សុខរិន បាននិយាយថា៖ «ប្អូន​ប្រុសខ្ញុំបានចូលរួមតវ៉ាប្រឆាំងក្រុមហ៊ុនដែលឈូសឆាយ ដីស្រែហើយត្រូវបានចាប់ខ្លួន។ ឥឡូវនេះ គេយក​ទៅ​ដាក់​គុក​បាត់​ហើយ។ យើងគ្រាន់តែការពារដីរបស់យើងដែលមាន​ប្លង់​រឹង​ស្របច្បាប់បែរ​ជា​ត្រូវជាប់គុក» ។

ពលរដ្ឋរាប់រយគ្រួសារបានជាប់គាំងនៅក្នុងជម្លោះអស់រយៈពេលជាងបីឆ្នាំមកហើយជុំវិញគម្រោងសាងសង់ព្រលានយន្តហោះដែលមានតម្លៃ១,៥ពាន់លានដុល្លារ ដែលអភិវឌ្ឍដោយក្រុមហ៊ុន OCIC ដែលគ្រប់គ្រងដោយលោកឧកញ៉ា ពុង ឃាវសែ។

លោក អំ សំអាត អនុប្រធានផ្នែកឃ្លាំមើលនៅអង្គការសិទ្ធិមនុស្សលីកាដូបានមានប្រសាសន៍ថា វាជាការគួរឲ្យសោកស្តាយដែលការតវ៉ាកាលពីថ្ងៃអាទិត្យបានឈានដល់អំពើហិង្សានិងការចាប់ខ្លួនមនុស្ស៣០នាក់។

លោកមានប្រសាសន៍ថា៖ «ប្រសិនបើ [ពួកគាត់] ត្រូវបានចោទប្រកាន់និងឃុំខ្លួនករណីនេះ នឹងក្លាយជាបញ្ហាធ្ងន់ធ្ងរសម្រាប់ប្រជាពលរដ្ឋ ព្រោះវាគឺជាទំនាស់ដីធ្លី ដូច្នេះអាជ្ញាធរពាក់ព័ន្ធគួរតែព្យាយាមដោះស្រាយដោយសន្តិវិធី ហើយមិនគួរប្រើកម្លាំងទេ។ ដោយលោកបន្ថែមថា៖ «នេះគឺជាបច្ច័យ​មិនល្អ ហើយត្រូវបានរិះគន់ទាក់ទងនឹងបញ្ហាដីធ្លីនិងសិទ្ធិ»

ប្រែសម្រួលពីអត្ថបទភាសាអង់គ្លេស៖ Twenty-one villagers released as nine people sent to prison for using violence against authorities

197 views
ព័ត៌មានថ្មីៗ »
អត្ថបទពេញនិយម »