សាលាដំបូងរាជធានីភ្នំពេញ នៅព្រឹកថ្ងៃទី៦ ខែវិច្ឆិកា បានផ្តន្ទាទោសលោក កើត សារ៉ាយ ប្រធានសមាគមសម្ព័ន្ធនិស្សិតបញ្ញវន្តខ្មែរ (KSILA) ឱ្យជាប់ពន្ធធនាគារ៤ឆ្នាំ និងពិន័យជាប្រាក់ចំនួន២លានរៀល ពីបទញុះញង់ និងបទមិនរាងចាលក្នុងបទល្មើសមជ្ឈឹម។
លោក កើត សារ៉ាយ ត្រូវបានសាលាដំបូងរាជធានីភ្នំពេញផ្តន្ទាទោសដាក់ពន្ធនាគារចំនួន៤ឆ្នាំ និងពិន័យជាប្រាក់ចំនួន២លានរៀល ពីបទញុះញង់ និងបទមិនរាងចាលក្នុងបទល្មើសមជ្ឈឹម នៅព្រឹកថ្ងៃទី៦ ខែវិច្ឆិកា ឆ្នាំ២០២៤ បន្ទាប់ពីតុលាការបានបើកសវនាការជំនុំជម្រះរឿងនេះកាលពីដើមខែមុន។
លោក កើត សារ៉ាយ ត្រូវបានចាប់ខ្លួននៅថ្ងៃទី៥ ខែមេសា ឆ្នាំ២០២៤ បន្ទាប់ពីជួបប្រជាពលរដ្ឋ ដែលមានជម្លោះដីធ្លីដ៏អូសបន្លាយនៅឃុំស្រយ៉ង់ ស្រុកគូលែន ដែលអ្នកស្រុកជាច្រើនបានភៀសខ្លួនទៅជ្រកកោនក្នុងព្រៃដោយបារម្ភខ្លាចកងកម្លាំងប្រដាប់អាវុធចាប់ខ្លួន។
ជម្លោះដីធ្លីបានកើតឡើងតាំងពីឆ្នាំ២០១១ នៅពេលដែលក្រុមហ៊ុនចម្ការកៅស៊ូ Seladamex ទទួលបានសម្បទានដីសេដ្ឋកិច្ចចំនួន ៩ ០០០ហិកតានៅក្នុងឃុំស្រយ៉ង់ និងឃុំភ្នំត្បែងII។ កាលពីខែមីនា ឆ្នាំនេះ មនុស្ស២៥នាក់ក្នុងចំណោម៣៦ នាក់ត្រូវបានចាប់ខ្លួន និងចោទប្រកាន់ពីបទ «កាប់រាននិងកាន់កាប់ដីព្រៃ»។ ពួកគេត្រូវបានដោះលែងឱ្យនៅក្រៅឃុំបណ្តោះអាសន្ន បន្ទាប់ពីការស៊ើបអង្កេតរកឃើញថា ពួកគេចាញ់បោកមេខ្យល់។
លោក កើត សារ៉ាយ ធ្លាប់ប្រឈមមុខនឹងវិធានការផ្លូវច្បាប់កន្លងមក។ កាលពីខែតុលា ឆ្នាំ២០២១ គាត់ត្រូវបានចោទប្រកាន់ពីបទញុះញង់ ហើយត្រូវបានផ្តន្ទាទោសឱ្យជាប់ពន្ធនាគាររយៈពេល២០ខែជាមួយនឹងមនុស្ស១០នាក់ផ្សេងទៀតដោយសារការចូលរួមក្នុងការតវ៉ាដោយសន្តិវិធីមួយ ដើម្បីគាំទ្រលោក រ៉ុង ឈុន ជាមេដឹកនាំសហជីព ដែលកាលនោះ កំពុងជាប់ឃុំនៅពន្ធនាគារ។
កាលពីខែសីហា ការិយាល័យសមាគមយុវជន KSILA ត្រូវបានបិទ បន្ទាប់ពីសមាជិកជាច្រើននាក់ត្រូវបានចាប់ខ្លួន ចំពេលដែលមានគម្រោងប្រមូលផ្តុំមួយ ដើម្បីប្រឆាំងនឹងតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម៕
